မင်းလှ ၁၉ အောက်တိုဘာ
မကွေးတိုင်းဒေသကြီး သရက်ခရိုင် မင်းလှမြို့နယ် ရေခါးကျေးရွာအုပ်စု၊ ရေခါးကျေးရွာတွင် ကျေးလက်ကုန်ထုတ်လမ်းတစ်လမ်းနှင့် ရေကျော်သုံးခု တည်ဆောက်သွားမည်ဖြစ်ကြောင်း မင်းလှမြို့နယ် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ သိရသည်။
ရေခါးကျေးရွာတွင် ကုန်ထုတ်လမ်းတစ်လမ်းနှင့် ရေကျော်သုံးခု တည်ဆောက်ပေးနိုင်ရေး အတွက် ယနေ့နံနက် ၁၁ နာရီအချိန်က မင်းလှမြို့နယ် ကျေးလက်ဒေသဖွံ့ဖြိုး တိုးတက်ရေးဦးစီးဌာန မြို့နယ်ဦးစီးမှူး ဒေါ်ခင်နန္ဒာအိနှင့် ဝန်ထမ်းများက ကျေးရွာ ကုန်ထုတ်လမ်းဖြစ်မြောက်ရေး ကော်မတီဝင်များနှင့်အတူ လက်ရှိမြေပြင်အခြေအနေ၊ သတ်မှတ်လမ်းအကျယ်ရရှိမှု အခြေအနေများကို ကြည့်ရှုစစ်ဆေးခဲ့သည်။
အဆိုပါ ရေခါးကျေးရွာ ကုန်ထုတ်လမ်းကို လမ်းအရှည် ၂ မိုင် အကျယ် ၁၂ ပေ ထု ၉ လက်မ မြေနီကျောက်စရစ်လမ်းခင်းခြင်း၊ ယင်းကုန်ထုတ်လမ်းပေါ်တွင် အရှည် ၃၀ ပေ အကျယ် ၁၈ ပေ ထု ၉ လက်မ ရေကျော်နှစ်ခု၊ အရှည်ပေ ၂၀ ၊ အကျယ် ၁၈ ပေ ထု ၉ လက်မ ရှိသော ရေကျော်တစ်ခုတို့အား ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ၂၀၁၉ - ၂၀၂၀ခု ဘဏ္ဍာနှစ် ခွင့်ပြုရန်ပုံငွေဖြင့် ဆောင်ရွက်သွားမည်ဖြစ်ကြောင်း မင်းလှ မြို့နယ် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်ခင်နန္ဒာအိ ကပြောပြသည်။
ကျေးလက်ဒေသ ဖွံ့ဖြိုးတိုးတက်ရေးဦးစီးဌာနသည် ကျေးလက်ဒေသရှိ လယ်ယာစိုက်ပျိုးရေး ထုတ်ကုန်များ ဈေးကွက်သို့ ဈေးနှုန်းသက်သာစွာဖြင့် လွယ်ကူလျင်မြန်စွာ ပို့ဆောင်နိုင်ရန် ရည်ရွယ်၍ ကျေးလက်ကုန်ထုတ်လမ်းများကို တစ်နိုင်ငံလုံး အတိုင်းအတာအနေဖြင့် ဖောက်လုပ်ပေးလျက်ရှိကြောင်း၊ ယခု ရေခါးကျေးရွာ ကုန်ထုတ်လမ်း ဖောက်လုပ်ပြီးစီး သွားပါက ကျေးရွာမှ လယ်ယာထုတ်ကုန် ဧက(၁၀ဝဝ) အကျိုးပြုမည်ဖြစ်ကြောင်း မြို့နယ်ဦးစီးမှူး ဒေါ်ခင်နန္ဒာအိ ကဆက်လက် ပြောပြသည်။
Source - ငြိမ်းသူ
