ရန်ကုန် ၂၀ ဖေဖော်ဝါရီ

မြန်မာ ယူ-၁၈ အသင်းသည် ဗီယက်နမ်ဘောလုံးအဖွဲ့ချုပ်က ကြီးမှူးကျင်းပမည့် ဗီယက်နမ် ယူ-၁၉ ဖိတ်ခေါ်ပြိုင်ပွဲတွင် ဝင်ရောက်ယှဉ်ပြိုင်မည် ဖြစ်သည်။

ဗီယက်နမ်ဘောလုံးအဖွဲ့ချုပ်သည် သက်တမ်းအလိုက် လူငယ်လက်ရွေးစင် အသင်းများအတွက် ဖိတ်ခေါ်ပြိုင်ပွဲ ကျင်းပပေးလျက်ရှိပြီး ယခုကျင်းပမည့် ယူ-၁၉ ပြိုင်ပွဲကို မတ် ၂၃ ရက်မှ ၃၀ ရက်အထိ ကျင်းပရန် စီစဉ်ထားသည်။ 

ယင်းပြိုင်ပွဲတွင် အိမ်ရှင်ဗီယက်နမ်၊ မြန်မာ၊ ထိုင်းအသင်းတို့ ဝင်ရောက်ယှဉ်ပြိုင်မည်ဖြစ်ပြီး တရုတ်တိုင်ပေ အသင်းမှာလည်း ဝင်ရောက်ယှဉ်ပြိုင်ရန် နီးစပ်လျက်ရှိသည်။

မြန်မာနိုင်ငံ ဘောလုံးအဖွဲ့ချုပ်သည် ဗီယက်နမ်ဘောလုံးအဖွဲ့ချုပ်၏ ကမ်းလှမ်းမှုကို လက်ခံခဲ့ပြီး အာဆီယံ ယူ-၁၈ ပြိုင်ပွဲနှင့် အာရှ ယူ-၁၉ ခြေစစ်ပွဲအတွက် လေ့ကျင့်ပြင်ဆင်နေသည့် မြန်မာ ယူ-၁၈ အသင်းဖြင့် ယှဉ်ပြိုင်မည်ဖြစ်သည်။

မြန်မာ ယူ-၁၈ အသင်းသည် လက်ရှိတွင် MNL ယူ-၂၁ ပြိုင်ပွဲ၌ MFF Youth အသင်းအမည်ဖြင့် ဝင်ရောက်ယှဉ်ပြိုင်လျက်ရှိပြီး နည်းပြချုပ်အဖြစ်  ဦးစိုးမြတ်မင်းက ကိုင်တွယ်လျက်ရှိသည်။

ဦးစိုးမြတ်မင်းသည် မြန်မာ ယူ-၂၂ အသင်းတွင်လည်း လက်ထောက်နည်းပြအဖြစ် ပူးတွဲတာဝန် ပေးအပ်ခံထားရသောကြောင့် လက်ရှိတွင် မြန်မာ ယူ-၂၂ အသင်းနှင့် ပူးပေါင်းနိုင်ပြီး မြန်မာနိုင်ငံ ဘောလုံးအဖွဲ့ချုပ်သည် လက်ထောက်နည်းပြတစ်ဦး ခန့်အပ်မည်ဖြစ်ပြီး ယင်းနည်းပြဖြင့် ဗီယက်နမ်ဖိတ်ခေါ်ပြိုင်ပွဲတွင် ဝင်ရောက်ယှဉ်ပြိုင်မည်ဖြစ်သည်။

မြန်မာ ယူ-၁၈ အသင်းသည် ပဏာမကစားသမား ၂၇ ဦးဖြင့် လေ့ကျင့်ပြင်ဆင်လျက်ရှိပြီး ကစားသမားများ၏ ခြေစွမ်းအပေါ် မူတည်၍ အပြောင်းအလဲပြုလုပ်မည် ဖြစ်သည်။

သတင်း-ညီမြတ်သော်တာ
ဓာတ်ပုံ-စိုးညွန့်