ရန်ကုန် ၁၇  ဇန်နဝါရီ

မြန်မာနိုင်ငံ ကျမ်းစာအသင်းတိုက် ဆက်ကပ် ကျေးဇူးတော် ချီးမွမ်းခြင်း အခမ်းအနားကို ယနေ့နံနက် ၈ နာရီခွဲက ရန်ကုန်မြို့ ကျောက်တံတားမြို့နယ် ဆူးလေဘုရားလမ်းရှိ အဆိုပါ မြန်မာနိုင်ငံ ကျမ်းစာအသင်းတိုက်တွင် ကျင်းပသည်။

အခမ်းအနားသို့ ဒုတိယသမ္မတ ဦးဟင်နရီဗန်ထီးယူနှင့် ဇနီး ဒေါက်တာရွှေလွှမ်း၊ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ ပြည်ထောင်စုအစိုးရအဖွဲ့ရုံးဝန်ကြီးဌာန ဒုတိယဝန်ကြီး ဦးတင်မြင့်၊ သာသနာရေးနှင့်ယဉ်ကျေးမှုဝန်ကြီးဌာန ဒုတိယဝန်ကြီး ဦးကြည်မင်း၊ ရန်ကုန်တိုင်းဒေသကြီးအစိုးရအဖွဲ့ လူမှုရေးဝန်ကြီး ဦးနိုင်ငံလင်း၊ ရခိုင် တိုင်းရင်းသားလူမျိုးရေးရာဝန်ကြီး ဦးဇော်အေးမောင်၊ မြန်မာနိုင်ငံ ကျမ်းစာအသင်း ဥက္ကဋ္ဌ သိက္ခာတော်ရ ဒေါက်တာဇော်ဝင်းနှင့် ဘုတ်အဖွဲ့လူကြီးများ၊ အသင်းဝင် အသင်းတော် ၁၅ ပါးနှင့် အဖွဲ့အစည်း လေးပါးတို့မှ တာဝန်ရှိသူများ၊ ဖိတ်ကြားထားသော ဧည့်သည်တော်များ တက်ရောက်ကြသည်။

ရှေးဦးစွာ အနားယူကျမ်းစာအသင်း ဒုတိယဥက္ကဋ္ဌ သိက္ခာတော်ရ ဆရာမ ဒေါ်နီနီဆွေက အဖွင့်ဆုတောင်းပြီး ဘုရားသခင်အား ဘုန်းကြီးစေသောကျူး ဓမ္မသီချင်း သီဆိုသည်။

ထို့နောက် အကြီးစား ပြန်လည်ပြင်ဆင် မွမ်းမံထားသည့် မြန်မာနိုင်ငံကျမ်းစာ အသင်းတိုက် အဆောက်အဦအား ဒုတိယသမ္မတ ဦးဟင်နရီဗန်ထီးယူ၊ တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ ဒုတိယဝန်ကြီး ဦးတင်မြင့်နှင့် ဦးကြည်မင်း၊ ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီဝင် ဒေါက်တာစောထွန်းအောင်မြင့်နှင့် မြန်မာနိုင်ငံ ကျမ်းစာအသင်းမှ ဒေါက်တာစောခရီးနာတို့က ဖဲကြိုးဖြတ်ဖွင့်လှစ်ပေးသည်။

ယင်းနောက် မြန်မာနိုင်ငံ ကျမ်းစာအသင်းတိုက် ကမ္ဗည်းကျောက်စာတိုင်ကို ဒုတိယသမ္မတ ဦးဟင်နရီဗန်ထီးယူ နှင့် ကျမ်းစာအသင်းမှ တာဝန်ရှိသူများက ဖွင့်လှစ်ပေးပြီး သန့်ရှင်းသောရေဖြင့် ပက်ဖျန်းပေးသည်။

`

ဆက်လက်၍ အသင်းတိုက်ဆိုင်ရာ တင်ပြခြင်းနှင့် ဆုတောင်းခြင်း အခမ်းအနားကိုကျင်းပရာ ကျမ်းစာအသင်းဥက္ကဋ္ဌ သိက္ခာတော်ရ ဒေါက်တာဇော်ဝင်းက ကြိုဆိုနှုတ်ခွန်းဆက် ကျေးဇူးတင်စကား ပြောကြားပြီး ကျမ်းစာအသင်း အထွေထွေ အတွင်းရေးမှူး သိက္ခာတော်ရ ဆရာဦးခွေလမ်းထန် က မြန်မာနိုင်ငံ ကျမ်းစာအသင်းအကြောင်း တင်ပြသည်။

ထို့နောက်  ဒုတိယသမ္မတ ဦးဟင်နရီဗန်ထီးယူက ဂုဏ်ပြုအမှာစကား ပြောကြားရာတွင် မြန်မာနိုင်ငံ ကျမ်းစာအသင်းသည် ခရစ်ယာန်သာသနာ ထွန်းကားပြန့်ပွားရေးအတွက် သမ္မာကျမ်းစာကို လူမျိုးတိုင်းက မိခင်ဘာသာစကားဖြင့် လုံလောက်စွာ ရရှိနိုင်ရန် ကြိုးပမ်းဆောင်ရွက်ပေးနေသည့် သာသနာအဖွဲ့အစည်း ဖြစ်ပါကြောင်း၊ မြန်မာနိုင်ငံ ကျမ်းစာအသင်း၏ အသင်းဝင် အသင်းတော် ၁၅ ပါးနှင့် အဖွဲ့အစည်း လေးပါး ပါဝင်ကြောင်းကို သိရှိရပါကြောင်း။

မြန်မာနိုင်ငံ ကျမ်းစာအသင်းအနေဖြင့် ယနေ့အထိ မြန်မာနိုင်ငံရှိ ဘာသာစကား ပေါင်း ၄၅ မျိုးဖြင့် သမ္မာကျမ်းစာကိုလည်းကောင်း၊ ဘာသာစကား ၂၁ မျိုးဖြင့် ဓမ္မသစ် ကျမ်းကိုလည်းကောင်း ဘာသာပြန်ပြီးစီးပြီးဖြစ်ကာ နှစ်စဉ်ကျမ်းစာအုပ် ၈၀ဝ၀ဝ ခန့် ပုံနှိပ်ဖြန့်ချိနေပါကြောင်း၊ ထို့ကြောင့် ကျမ်းစာအသင်းတိုက်သည် ခရစ်ယာန်တို့၏ ဂုဏ်ယူစရာ အမွေအနှစ်ဖြစ်သကဲ့သို့ ခရစ်ယာန်သာသနာ ရှင်သန်ရပ်တည်မှု၏ အထင် ကရ ပြယုဂ်အဖြစ် မားမားမတ်မတ် ရပ်တည်နေသည်ကို တွေ့ရပါကြောင်း။

မြန်မာနိုင်ငံတွင် သမ္မာကျမ်းစာအမှုတော်လုပ်ငန်းကို ၁၈၈၉ ခုနှစ်မှအစပြုပြီး ဗြိတိသျှနှင့် နိုင်ငံရပ်ခြား ကျမ်းစာအသင်း (British and Foreign Bible Society) က ဆောင်ရွက်ခဲ့ခြင်းဖြစ်၍ ယခုဆိုလျှင်နှစ်ပေါင်း ၁၃၀ ရှိခဲ့ပြီဖြစ်ကြောင်း၊ ၁၉၆၄ ခုနှစ်တွင် မြန်မာနိုင်ငံကျမ်းစာအသင်း (Bible Society of Myanmar)ဟု ပြန်လည်ပြင်ဆင် ဖွဲ့စည်းခဲ့ပြီး ၁၉၆၉ ခုနှစ်တွင် ကမ္ဘာ့ကျမ်းစာအသင်းများအဖွဲ့ (United Bible Societies) ၏ တင်းပြည့်အသင်းဝင် ဖြစ်လာခဲ့ကြောင်း။

မြန်မာနိုင်ငံ ကျမ်းစာအသင်းပိုင် အဆောက်အအုံ နှစ်ခုစလုံးသည် သက်တမ်းရင့်ပြီး  ရာသီဥတုဒဏ်ကြောင့်လည်းကောင်း၊ ၁၉၉၈ခုနှစ်တွင် ပတ်ဝန်းကျင် အဆောက်အဦများ တည်ဆောက်ခဲ့ကြစဉ် ကြံ့ခိုင်မှုထိခိုက်ခဲ့ရ၍လည်းကောင်း မူလပုံစံမပျက် ကြိုးစားပြုပြင်ရန် လိုအပ်လာခဲ့ကြောင်း။

သာသနာပြုဆရာကြီးများ ပြန်သွားပြီး ၁၉၆၂ ခုနှစ် နောက်ပိုင်းတွင် မူလပိုင်ဆိုင်မှု အမည်ပေါက် British and Foreign Bible Society ထံမှ ၂၀၁၅ ခုနှစ် ဒီဇင်ဘာလ ၈ ရက်တွင် မြန်မာနိုင်ငံ ကျမ်းစာအသင်း ပိုင်ဆိုင်မှု အမည်ပေါက်အဖြစ် တရားဝင်လွှဲပြောင်း နိုင်ခဲ့သည်ဟု သိရှိရကြောင်း။

ယင်းကဲ့သို့ လွှဲပြောင်းခဲ့ပြီးနောက် ၂၀၁၈ ခုနှစ် ဒီဇင်ဘာလမှ ၂၀၁၉ ခုနှစ် နိုဝင်ဘာလအတွင်း MYO & PECGroup Construction Co.,Ltd က ကုန်ကျငွေကျပ် ၃၆၀၄ သိန်းကျော်ဖြင့် အကြီးစားပြင်ဆင်ခြင်းလုပ်ငန်းကို ဆောင်ရွက်ခဲ့သည်ကို သိရပါကြောင်း။

ပြည်ထောင်စုသမ္မတ မြန်မာနိုင်ငံတော်သည် ရှေးဘိုးဘေးဘီဘင်တို့လက်ထက်၊ ရှေးပဝေသဏီ ခေတ်ကတည်းက တိုင်းရင်းသားလူမျိုးပေါင်းစုံ၊ ဘာသာပေါင်းစုံ ငြိမ်းချမ်းစွာ အတူလက်တွဲ နေထိုင်ကြသည့် တိုင်းပြည်ဖြစ်ကြောင်း၊ အများစုက ဗုဒ္ဓဘာသာဝင်ဖြစ်ကြသော်လည်း ဟိန္ဒူဘာသာ၊ ခရစ်ယာန်ဘာသာနှင့် အစ္စလာမ်ဘာသာ တို့ကိုလည်း ကိုးကွယ်ရာ ဘာသာများအဖြစ် တရားဝင် အသိအမှတ်ပြုထားပါကြောင်း။

ဘာသာတရားအသီးသီး၏ အဆုံးအမအောက်တွင် မေတ္တာတရားကိုအခြေပြုပြီး အသက်ရှင်ကြပါကြောင်း၊ ငြိမ်းချမ်းစွာ အတူယှဉ်တွဲ နေထိုင်ရေးကို လူတိုင်းနှစ်သက်ကြကြောင်း၊ ထို့ကြောင့်လည်း ယနေ့ နိုင်ငံတော်အစိုးရအနေဖြင့် ပြည်တွင်းငြိမ်းချမ်းရေး လုပ်ငန်းများကို အထူးတလည် အာရုံစိုက်ဆောင်ရွက်နေသည်ကို တွေ့ကြရမည်ဖြစ်ပါကြောင်း၊ ယင်း ငြိမ်းချမ်းရေးလုပ်ငန်းများ အောင်မြင်ရန် ခရစ်ယာန်အသင်းတော်များကလည်း ဆုတောင်းပေးကြရန်နှင့် ဒီမိုကရေစီဖက်ဒရယ်ပြည်ထောင်စုတည်ဆောက်ရေးတွင်လည်း အင်တိုက်အားတိုက် ပါဝင်ဆောင်ရွက်ကြရန် တိုက်တွန်းလိုကြောင်း။

ယခုကဲ့သို့ ပြောင်းလဲလာခဲ့သည့် မြန်မာ့နိုင်ငံရေး အခြေအနေနှင့် ရာသီဥတုဒဏ်၊ ပထမကမ္ဘာစစ်၊ ဒုတိယကမ္ဘာစစ်ဒဏ်များကြားက ရာစုနှစ်တိုင်အောင် ကြံ့ကြံ့ခံကာ ရပ်တည်နိုင်ခဲ့သည့် မြန်မာနိုင်ငံကျမ်းစာ အသင်းတိုက်ကြီးကို အကြီးစားပြင်ဆင်ရေး လုပ်ငန်းတွင် ငွေအား၊ လူအား၊ စိတ်ဓာတ်ရေးရာ ခွန်အားများဖြင့် အဘက်ဘက်က ဝိုင်းဝန်းကြိုးပမ်း ပံ့ပိုးကူညီပေးခဲ့ကြသူများ အားလုံးကို ကျေးဇူးတင် အသိအမှတ်ပြု ပြောကြားလိုပါကြောင်း။

ယခုပြုပြင်ပြီးသော ကျမ်းစာအသင်းတိုက်သည် ခရစ်ယာန်သာသနာ ရှင်သန်တည်ရှိမှု သက်သေအနေဖြင့်လည်းကောင်း၊ အသင်းတော်များ စည်းလုံးညီညွတ်မှု၏ အထင်ကရ ပြယုဂ်အဖြစ်လည်းကောင်း ရန်ကုန်မြို့လယ်တွင် အဓွန့်ရှည်စွာ ရပ်တည်နိုင်ပါစေကြောင်း ဆုမွန်ကောင်းတောင်းရင်း နိဂုံးချုပ်အပ်ပါကြောင်း ပြောကြားသည်။

ယင်းနောက် ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက ဂုဏ်ပြုအမှာစကား ပြောကြားပြီး မြန်မာနိုင်ငံ ခရစ်ယာန်အသင်းတော်(အင်္ဂလီကန်)မှ ဓမ္မသံစုံ ချီးမွမ်းခြင်းပြုလုပ်ကာ ကက်သလစ်ဆရာတော်ကြီးများအဖွဲ့ချုပ်မှ ဖာသာမာရီရာနိုစိုးနိုင်က အထူးဆက်ကပ် ဆုတောင်းခြင်း ပြုလုပ်သည်။

ထို့နောက် တက်ရောက်လာသည့် ပရိသတ်များက “ကိုးစား၍နားထောင်” ဓမ္မသီချင်း သီဆိုပြီး သိက္ခာတော်ရ ဆရာအာရွန်စွတ်ညက် (UBS Ministry Resource Facilitator-Team Leader) က ကောင်းချီးပေးကာ အခမ်းအနားကို ရုပ်သိမ်းခဲ့သည်။

သတင်းစဉ်