မော်လမြိုင် ဖေ​ဖော်ဝါရီ ၈

မွန်ပြည်နယ် ကိုဗစ်-၁၉ ​ရောဂါ ကာကွယ်ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ ဥက္ကဋ္ဌ၊ ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ ကျန်းမာရေးဦးစီးဌာနမှ တာဝန်ရှိသူများသည် ယနေ့နံနက် ၉ နာရီက မော်လမြိုင်မြို့၊ ပြည်နယ်ခန်းမ၌ ဆရာတော်၊ သံဃာတော်များ၊ သာသနာ့အနွယ်ဝင် သီလရှင်ဆရာ​လေးများအား ကိုဗစ်-၁၉ ကာကွယ်​ဆေး ထိုးနှံ​ပေး​နေမှုကို ကြည့်ရှုအား​ပေးသည်။ 

ဆက်လက်၍ ပြည်နယ်ဝန်ကြီးချုပ်က မြို့နယ်များအလိုက် ကိုဗစ်-၁၉ ရောဂါ ကာကွယ်ဆေးများကို ထိုးနှံနိုင်ရေး အထူအလေးထား ဆောင်ရွက်သွားရန်၊ အိုမီခရွန်ရောဂါပိုး ပျံ့နှံ့မှုများရှိသည့်အတွက် ကျန်းမာရေးဝန်ကြီးဌာနမှ သတ်မှတ်ထားသော စည်းမျဉ်းစည်းကမ်းများနှင့်အညီ လိုက်နာဆောင်ရွက်သွားရန်၊ ရောဂါကူးစက်ပြန့်ပွားမှု မရှိစေရန် အသိပညာ​ပေးလုပ်ငန်းများကိုလည်း ထိထိရောက်​​ရောက်​  ဆောင်ရွက်​ပေးကြရန် တာဝန်ရှိသူများကို  လမ်းညွှန်မှာကြားသည်။ 

မွန်ပြည်နယ်အ​နေဖြင့် ကိုဗစ်-၁၉ ရောဂါကွယ်​ဆေး Booster Dose အား (တတိယအကြိမ်) ထပ်ဆောင်းထိုးနှံမှုကို မော်လမြိုင်မြို့နယ် အပါအဝင် သက်ဆိုင်ရာ မြို့နယ်များအလိုက် သတ်မှတ်နေရာအသီးသီးတွင် ဖေ​ဖော်ဝါရီလဆန်းမှ ဆက်လက်ထိုးနှံ​ပေး​နေပြီး ကျန်းမာရေးဝန်ထမ်းများ၊ ဌာနဆိုင်ရာဝန်ထမ်းများ၊ ပရဟိတ​ ​စေတနာ့ဝန်ထမ်းများက ဝိုင်းဝန်းကူညီ ကာကွယ်ဆေးထိုးနှံနိုင်​ရန် စီစဉ်ဆောင်ရွက်ပေးထားသည်။  

ထို့နောက် ပြည်နယ်ဝန်ကြီးချုပ်နှင့် အဖွဲ့သည် အမှတ်(၅) အခြေခံပညာအထက်တန်းကျောင်း ရာပြည့်ခန်းမတွင် (၇၅)နှစ်မြောက် စိန်ရတု ပြည်ထောင်စုနေ့အထိမ်းအမှတ် အထက်တန်းအဆင့် ပန်းချီ၊ ကဗျာ၊ စာစီစာကုံးနှင့် ​ဆောင်းပါးပြိုင်ပွဲများ ကျင်းပနေမှုကို ကြည့်ရှုအားပေးသည်။ 

ပြိုင်ပွဲကို မွန်ပြည်နယ် (၁၀)မြို့နယ်အတွင်း အခြေခံပညာကျောင်းများမှ ဝင်ရောက်ယှဉ်ပြိုင်ခဲ့ကြရာ ပန်းချီပြိုင်ပွဲတွင် “စိန်ရတုပြည်ထောင်စုနှင့် အနာဂတ် ရောင်စုံပန်းခင်းများ” ခေါင်းစဉ်ဖြင့် ကျောင်းသား၊ ကျောင်းသူ (၁၇)ဦး၊ ကဗျာပြိုင်ပွဲတွင် “ပြည်ထောင်စုအမွေ၊ ကမ္ဘာတည်စေ” ခေါင်းစဉ်ဖြင့်  ကျောင်းသား၊ ကျောင်းသူ (၁၉)ဦး၊ စာစီစာကုံးပြိုင်ပွဲတွင် (၁၈)ဦးနှင့်​ ဆောင်းပါးပြိုင်ပွဲတွင် (၅)ဦးတို့က ပါဝင်ယှဉ်ပြိုင်ခဲ့ကြပြီး ကျပန်းစကားပြောပြိုင်ပွဲကိုလည်း ​ဆက်လက်ကျင်းပပေးမည်ဖြစ်ကြောင်း သိရသည်။

ဇာဖြူဝင်း(ပြန်/ဆက်)