မန္တလေး ၁၃ ဖေဖော်ဝါရီ
မန္တလေးမြို့ အထွေထွေရောဂါကုဆေးရုံကြီးရှိ နှလုံးရောဂါအထူးကုဌာနတွင် ဖေဖော်ဝါရီ ၁၂ ရက်နှင့် ၁၃ ရက်နေ့၌ မြန်မာနိုင်ငံတွင် ပထမဆုံးအကြိမ် နည်းပညာကုထုံးအသစ်ဖြင့် ပေါင်ခြံမှ နှလုံးအဆို့ရှင်လဲလှယ် ကုသခြင်း လုပ်ငန်းကို လူနာ ငါးဦးအား အောင်မြင်စွာ ကုသပေးနိုင်ခဲ့ကြောင်း သိရသည်။
အဆိုပါကုသခြင်းလုပ်ငန်းကို စင်ကာပူနိုင်ငံ National University Hospital မှ နှလုံးအထူးကုဆရာ ဝန်ကြီးနှစ်ဦး၏ နည်းပညာအကူအညီဖြင့် မန္တလေးအထွေထွေရောဂါကု ဆေးရုံကြီးမှ နှလုံးအထူးကု ဆရာဝန်ကြီးများ ခွဲစိတ်ဆရာဝန်ကြီးများ၊ မေ့ဆေးအထူးကု ဆရာဝန်ကြီးများနှင့် ဝန်ထမ်းများ ပူးပေါင်းဆောင်ရွက်ခဲ့ကြပြီး နှလုံးအဆို့ရှင် ၁၂ လုံးကို အမေရိကန်နိုင်ငံ Edward Life Sciences ကုမ္ပဏီမှ လှူဒါန်းမှုတို့ဖြင့် အောင်မြင်စွာ ဆောင်ရွက်နိုင်ခြင်းဖြစ်သည်။
မန္တလေးအထွေထွေရောဂါကု ဆေးရုံကြီးတွင် ၂၀၁၃ ခုနှစ် ဖေဖော်ဝါရီ ၂၈ ရက်နေ့က မြန်မာနိုင်ငံတွင် ပထမဆုံးအကြိမ်အဖြစ် အရေးပေါ်နှလုံးသွေးကြောပိတ်ရောဂါကို ဆေးသွင်းခြင်းမပြုဘဲ တိုက်ရိုက်သွေးကြော ချဲ့ပြီး ဒေါက်ထည့် ကုသသည့် ကုထုံးအသစ်ဖြင့် အောင်မြင်မှုမှတ်တိုင် စိုက်ထူနိုင်ခဲ့ပြီး ယခု နှလုံးအဆို့ရှင် လဲလှယ်သည့်ကုထုံး (Transcutaneous Aortic Valve Implantation)(TAVI) သည် မြန်မာနိုင်ငံ၏ နှလုံးရောဂါဆေးကုသမှုသမိုင်းတွင် ဒုတိယအကြိမ်အဖြစ် မှတ်တိုင်သစ် စိုက်ထူနိုင်ခဲ့ခြင်းဖြစ်ကြောင်း အဆိုပါကုထုံးသစ်တွင် ပါဝင်ဆောင်ရွက်ခဲ့ကြသည့် ဆရာဝန်ကြီးများနှင့် တွေ့ဆုံမေးမြန်းရာတွင် ပြောကြားခဲ့ခြင်းဖြစ်သည်။
ဒေါက်တာ သန်းသန်းကြိုင်(မန္တလေးအထွေထွေရောဂါကုဆေးရုံကြီး နှလုံးဆေးကုဌာန ပါမောက္ခဌာနမှူး)
ဖေဖော်ဝါရီ ၁၂ ရက်နဲ့ ၁၃ ရက်နေ့မှာ မြန်မာနိုင်ငံမှာ ပထမဆုံး မခွဲရ၊ မစိတ်ရဘဲ နှလုံးအဆို့ရှင်ကို ပေါင်ခြံ ကနေ ပိုက်ထည့်ပြီး လဲလှယ်ခြင်းကို စတင်ဆောင်ရွက်ပါတယ်။ စင်ကာပူနိုင်ငံ အမျိုးသားအထူးကုဆေးရုံကြီးက Dr.Edger Tay, Dr. Jimmy Hun တို့နဲ့ ပူးပေါင်းဆောင်ရွက်ခြင်းဖြစ်ပါတယ်။ အရင်တုန်းက အဆို့ရှင်လဲတယ် ဆိုတဲ့ နေရာမှာ ရင်ဘတ်ကို ခွဲစိတ်ပြီးတော့ လဲလှယ်ရပါတယ်။ အခုခေတ်ပေါ်နည်းဖြစ်တဲ့ မခွဲရဘဲ ပေါင်ခြံကနေ ပိုက်ထည့်ပြီးတော့ နုလုံးအဆို့ရှင်ကို လဲလှယ်ခြင်းဖြစ်ပါတယ်။ လူနာလည်း အရမ်းသက်သာပါတယ်။
မေ့ဆေးကလည်း အရမ်းကြီး ပေးစရာမလိုပါဘူး။ တစ်ချို့လူနာတွေဆိုရင် ကျွန်မတို့က ထုံဆေးလေးနဲ့တင် စကားပြောရင်း လဲလှယ်ပေးပါတယ်။ ပြီးရင် လူနာက မိသားစုနဲ့ စကားတွေဘာတွေလည်း ပြောနိုင်တယ်။ နောက်တစ်နေ့မှာဆိုရင် ထပြီး လမ်းလျှောက်နိုင်တဲ့ အခြေအနေအထိကို ရရှိပါတယ်။ လူနာ ငါးဦးကို ကုသပေးဖို့အတွက် စီစဉ်ထားပါတယ်။ မနေ့ကတော့ သုံးယောက်ပြီးသွားပါပြီ။ အားလုံးအောင်အောင်မြင်မြင်နဲ့ ပြီးသွားပါတယ်။ လူနာရွေးချယ်မှုစနစ်က အရမ်းအရေး ကြီးပါတယ်။ ကုထုံးမှာ ခွဲစိတ်ကုသဖို့ရာအတွက် မသင့်တော်တဲ့သူတွေပေါ့။ ဘာလို့လဲဆိုရင် အခု ကုထုံးက ဈေးလည်းကြီးပါတယ်။ ခေတ်ပေါ်နည်းလည်း ဖြစ်တဲ့အတွက်ကြောင့် သူတို့နိုင်ငံတွေမှာလည်း နှလုံးခွဲစိတ်ဖို့အတွက် မသင့်တော်တဲ့သူတွေကို ရွေးချယ်ရပါတယ်။
ကျွန်မတို့ကလည်း နှလုံးခွဲစိတ်ဖို့အတွက် မေ့ဆေးအကြာပြီးပေးဖို့ မသင့်တော်တဲ့သူတွေ၊ ခွဲစိတ်မှုဒဏ်ကို မခံနိုင်တဲ့သူတွေကို ကျွန်မတို့က ဦးစားပေးပြီး တော့ ရွေးချယ်ပါတယ်။ အခုချိန်မှာ အစိုးရကလည်း ပံ့ပိုးတဲ့အတွက် အဆို့ရှင်လဲလှယ်တဲ့အချိန်မှာ ဘာမှသိပ်ပြီး ကုန်ကျခြင်း မရှိပါဘူး။ ဒါကြောင့် ကျွန်မတို့အနေနဲ့ ခွဲစိတ်ဖို့ သင့်တော်တဲ့သူတွေဆိုရင် ခွဲစိတ်ဆရာဝန်ကြီးတွေဆီကိုပဲ ပို့ပြီး ခွဲစိတ်စေပါတယ်။ အကုန်လုံးပူးပေါင်းပြီး ရွေးချယ်ဆောင်ရွက်ခြင်း ဖြစ်ပါတယ်။ ပုံမှန်အဆို့ရှင်လဲလှယ်တဲ့နေရာမှာ အဆို့ရှင်လဲလှယ်မယ်ဆိုရင် ခွဲစိတ်တဲ့အခါမှာ အစိုးရက ပံ့ပိုးတဲ့အတွက်ကြောင့် ဘာမှသိပ်ပြီး ကုန်ကျစရိတ်မရှိပါဘူး၊ ပေါင်ရင်းကနေ မခွဲရမစိတ်ရဘဲ အဆို့ရှင်လဲမယ်ဆိုရင် ဈေးအင်မတန်မှကြီးပါတယ်။ သူတို့က လှူဒါန်းတဲ့အတွက်ကြောင့် ကျွန်မတို့က လုပ်နိုင်ခြင်းဖြစ်ပါတယ်။ တစ်စုံကို ဒေါ်လာ လေးသောင်းကျော်ကျတယ်။ အခုအဆို့ရှင်တွေကို သူတို့က လှူတာပါ။
ကျွန်မတို့လူနာက ကုန်ကျစရိတ်ကျခံခြင်း မရှိပါဘူး။ ကျွန်မတို့အနေနဲ့ ဒီလောက်ဈေးကြီးတဲ့ လူနာကိုတော့ ကျွန်မတို့က ကုန်ကျစရိတ်ကိုတော့ ကျွန်မတို့ ကျခံနိုင်ခြင်းမရှိပါဘူး။ ဒါပေမယ့်လို့ နည်းပညာစနစ်သစ်တွေက နေ့စဉ်နဲ့အမျှ တိုးတက်မှုတွေက ရှိနေတဲ့အတွက်ကြောင့် နောင်များမှာ ဒီထက်သက်သာတဲ့ အဆို့ရှင်လေးတွေ ပေါ်လာတယ်ဆိုရင်၊ နိုင်ငံတော်က ပံ့ပိုးမှုလည်း ရှိမယ်ဆိုရင် ဒီနည်းပညာစနစ်သစ်နဲ့ ကျွန်မတို့ လူနာအများကြီးကို ကယ်တင်နိုင်မယ်လို့ ယူဆပါတယ်။ ကျွန်မအနေနဲ့ ပထမဆုံး ကျေးဇူးတင်ချင်တာကတော့ ကျွန်မတို့ ကျန်းမာရေးဝန်ကြီးဌာနပေါ့။ စီးပွားကူးသန်းရောင်းဝယ်ရေး ဝန်ကြီးဌာန၊ အခွန်ဘဏ္ဍာဝန်ကြီးဌာန၊ မန္တလေးလေဆိပ်က လူဝင်မှုကြီးကြပ်ရေးဌာန၊ အကောက်ခွန်ဌာနက ဝန်ထမ်းအားလုံးကို ကျေးဇူးတင်ပါတယ်။ ဘာဖြစ်လို့လဲဆိုရင် အလှူပစ္စည်းဆိုပေမယ့် မြန်မာပြည်ကို တင်သွင်းတဲ့အခါမှာ အခက်အခဲအများကြီး ရှိပါတယ်။
အဲ့အခါ သူတို့ကနေ ဒီအလှူပစ္စည်းတွေကို ဆေးရုံကိုရောက်အောင် သူတို့တွေက ဝိုင်းဝန်းပြီးတော့ ကူညီပံ့ပိုးတဲ့အတွက်ကြောင့် ဒီပစ္စည်းတွေ ရောက်လာတာပါ။ အဲ့ပစ္စည်းတွေ ရောက်လာတဲ့အတွက်ကြောင့်လည်း ကျွန်မတို့လူနာအတွက် လုပ်ပေးနိုင်တာပါ။ ပစ္စည်းတွေ လှူဒါန်းပေးတဲ့ကုမ္ပဏီကိုလည်း ကျေးဇူးတင်ပါတယ်။ နည်းပညာစနစ်သစ်ကို မျှဝေပေးဖို့အတွက် အဝေးကနေ လာရောက်ပေးတဲ့ စင်ကာပူနိုင်ငံက ဆရာဝန်ကြီးနှစ်ယောက်ကိုလည်း အထူးကျေးဇူးတင်ပါတယ်။ နည်းပညာအသစ်တွေပေါ်တိုင်း ကြိုးစားကြဖို့ လာရောက်တိုက်တွန်းနေတဲ့ တိုင်းဒေသကြီး အစိုးရအဖွဲ့ ဝန်ကြီးချုပ်နဲ့ ဝန်ကြီးများအားလုံး၊ ဆေးရုံအုပ်ကြီး၊ ဝိုင်းသန်းကူညီပေးကြတဲ့ ဆေးရုံကြီးက ဆရာဝန်ကြီး၊ ဆရာဝန်၊ သူနာပြုများအားလုံး၊ လျှပ်စစ်ဌာနက ဝန်ထမ်း တွေကိုလည်း ကျေးဇူးတင်ပါတယ်။
ဒေါက်တာ ကျော်စိုးဝင်း(ပါမောက္ခနုလုံးအထူးကုဆရာဝန်ကြီး၊ မန္တလေးအထွေထွေရောဂါကု ဆေးရုံကြီး နုလုံးရောဂါအထူးကုဌာန)
အရင်ကုထုံးက မေ့ဆေးပေးတယ်၊ နံရိုးချိုးတယ်၊ နှလုံးကို ရပ်လိုက်တယ်။ နှလုံးကိုခွဲပြီးတော့ မကောင်းတဲ့ အဆို့ရှင်ကို ထုတ်တယ်။ ပြီးတော့ကောင်းတဲ့ အဆို့ရှင်ပြန်ထည့်တယ်။ လူနာက မေ့ဆေးရဲ့ဆိုးကျိုး ခွဲစိတ်မှု ဆိုးကျိုးခံရနိုင်တယ်။ နှလုံးကိုရပ်ထားပြီး နှလုံးအတုစက်နဲ့ လည်ပတ်နေစဉ် ကာလအတွင်းမှာ ခွဲစိတ်မှုကာလအတွင်းမှာ ဆိုးကျိုးတွေ ရလာနိုင်ပြီး တစ်ခုလုံးရဲ့ လုပ်ထုံးလုပ်နည်းတွေနဲ့လုပ်တော့ ၆ နာရီကျော်ကြာတယ်။ ဒီရောဂါအဖြစ်များတာကလည်း အသက်ကြီးတဲ့သူတွေ အဖြစ်များတယ်။ အဲဒီဟာကို ကုသဖို့က တချို့လူနာတွေက အသက်အရမ်းကြီးသူ၊ အရမ်းဝတဲ့သူ၊ ဆေးလိပ်အများကြီးသောက်လို့ အဆုတ်ပွနေသူတွေက မေ့ဆေးပေးလို့မရဘူး။ အဲလိုလူတွေက ပုံမှန်နည်းနဲ့ ကုလို့မရတော့ဘူး။ ဒီဝေဒနာနဲ့ အသက်ဆုံးရှုံးရတယ်။
အဓိက ဒီကုထုံးပေါ်လာတာက မေ့ဆေးပေးတဲ့ဒဏ် မခံနိုင်တဲ့ နှလုံးရောဂါအပြင် အခြားရောဂါတွေပါ တွဲရှိနေတဲ့သူတွေအတွက် မခွဲမစိတ်ဘဲနဲ့ ကုသဖို့ ကုထုံးအသစ်တွေ ပေါ်လာတဲ့နည်းပညာပါ။ လူတိုင်းက သာမန်အသေးစားတောင် မခွဲစိတ်ချင်တော့ နှလုံးခွဲစိတ်တဲ့ အကြီးစားခွဲစိတ်မှု မလုပ်ချင်ကြဘူး။ နိုင်ငံခြားမှာတော့ ဒီကုထုံးကို ပြင်သစ်နိုင်ငံက နှလုံးခွဲစိတ်ကုဆရာ ဝန်ကြီးက ၂၀ဝ၂ ခုနှစ်မှ စခဲ့တယ်။ ဒါကို တွင်တွင်ကျယ်ကျယ်မ လုပ်ခဲ့ကြဘူး။ ကြောက်ကြတယ်။ တွင်တွင်ကျယ်ကျယ်လုပ်တာက ၂၀ဝ၉ ခုနှစ်မှာ လုပ်ခဲ့ကြရာက ၂၀၁၇ ခုနှစ်မှာ လူ တစ်သိန်းလောက်က မခွဲမစိတ်ဘဲ ဒီနည်းနဲ့ ပေါင်ခြံကနေ နှလုံးအဆို့ရှင်လဲတဲ့ ကုထုံးနဲ့လုပ်ခဲ့ပြီးကြပြီ။ အာရှတိုက်မှာ ဒီကုထုံးနဲ့ တစ်သောင်းလောက် လုပ်ခဲ့ကြပြီး အများဆုံးလုပ်တာကတော့ ဂျပန်နိုင်ငံကပါ။ ဒုတိယအများဆုံးလုပ်တာက စင်ကာပူပေါ့။ ဒီကုထုံးကို မြန်မာနိုင်ငံမှာလုပ်တဲ့ ရည်ရွယ်ချက်က အသက်ကြီးတဲ့သူတွေ၊ မေ့ဆေးဒဏ် ခွဲစိတ်မှုဒဏ် မခံနိုင်တဲ့သူတွေအတွက် လုပ်ပေးချင်တာပါ။
ပြဿနာကတော့ ဒီပစ္စည်းက အမေရိကန်ဒေါ်လာ လေးသောင်းတန်တော့ ဈေးသိပ်ကြီးပါတယ်။ မြန်မာငွေ သိန်းငါးရာလောက်ပါ။ ဒီပစ္စည်းတစ်ခုတင်ပါ။ ကျန်တာက နိုင်ငံက ဝယ်ပေးထားတဲ့ပစ္စည်းတွေ ရှိသေးတယ်။ နိုင်ငံတော်ပံ့ပိုးမှုကိုက တန်ဖိုးက သိန်း ၈၀ ဝန်းကျင်ရှိပါတယ်။ နောက်ပြီးတော့ ပစ္စည်း ကိရိယာလိုတယ်။ နည်းပညာလိုတယ်။ ပုံမှန်လုပ်နေကျ နှလုံးသွေးကြောချဲ့ဆရာဝန်တွေနဲ့ နှလုံးခွဲစိပ်ဆရာဝန်တွေ ပူးပေါင်းပြီးလုပ်ကြတယ်။ နှလုံးမေ့ဆေးဆရာဝန်က လူနာကို မနာမကျင်အောင် လုပ်နေတဲ့အချိန်မှာ သွေးပေါင်တက်တာ ကျတာ၊ ပရိုစီဂျာလုပ်ချိန်မှာ အနှောင့်အယှက်မဖြစ်အောင် ကူညီပေးတယ်။ အဲဒီ Team သုံးခုက တက်ညီလက်ညီလုပ်ရတယ်။ ကျနော်တို့ Team သုံးခုကလည်း အတွေ့အကြုံမရှိခဲ့သေးဘူး။
ပထမ စင်ကာပူနိုင်ငံ နှလုံးဆရာဝန်နဲ့ နှလုံးခွဲစိတ်ဆရာဝန် ၂ ဦးက ပထမဆုံး နည်းပညာတွေ ဆင့်ပွား သင်ပေး တယ်။ နှလုံးအဆို့ရှင်ပစ္စည်းကလည်း လိုသေးတယ်။ အမေရိကန်အခြေစိုက် Edward Life Sciences ကုမ္ပဏီက အဆို့ရှင် ၁၂ ခုလှူပါတယ်။ စလုပ်တဲ့ နေ့ကလည်း ရုံးပိတ်ရက်ဖြစ်နေပြီး တိုက်တိုက်ဆိုင်ဆိုင် ပြည်ထောင်စုနေ့ (ဖေဖေါ်ဝါရီ ၁၂) ဖြစ်နေသလို ကုသမှုကလည်း တစ်ဦးကောင်း တစ်ယောက်ကောင်း မဟုတ်ဘဲနဲ့ Unity လို့ ပြောရမယ့် ဌာနအားလုံး ညီညီညွတ်ညွတ်လုပ်မှ အောင်မြင်တဲ့ ကုထုံးကို အောင်မြင်စွာ လုပ်ဆောင်နိုင်ခဲ့တာက စည်းလုံးညီညွတ်မှုကို ပြလိုက်တာလို့ စိတ်ထဲမှာ ခံစားရတယ်။ ဒီကုထုံးရဲ့ ကောင်းကျိုးက ခွဲစိတ်မှုဒဏ်မရှိဘူး။ မေ့ဆေးဒဏ်မရှိဘူး။ ခွဲစိပ်ပြီးနောက် ထထိုင်နိုင်ပြီ။ စားနိုင် ထိုင်နိုင်ပြီ။ အရင်ကုထုံးက ခွဲစိတ်ရင် ၇ နာရီလောက်ကြာမယ်။
၂ရက်လောက် အိပ်ရာထဲမှာ ရှိမယ်။ အရည်လောက်ပဲ သောက်ရအုံးမယ်။ လမ်းလျှောက်ဖို့က ရက်စောင့်ရအုံးမယ်။ ၂ လလောက်က နံရိုးချိုးထားတဲ့ ဒဏ်ကြောင့် အလေးအပင်မမရ ဆိုတာမျိုးတွေ ရှိမယ်။ ခုလုပ်တဲ့ ကုထုံးက ခွဲစိပ်ပြီး ၂ ရက်လောက်ဆိုရင် လမ်းလျှောက် လို့ရပြီ။ ဆေးရုံက ဆင်းလို့ရနိုင်တဲ့ အခြေအနေပါ။ သွေးမခဲဆေး သောက်စရာမလိုတော့ဘူး။ ဆိုးကျိုးကတော့ တစ်ရှူးအဆို့ရှင်သက်တမ်းက ၁၀-နှစ်က ၁၅ နှစ် သက်တမ်းလောက်ပဲရှိတယ်။ ဒီသက်တမ်းကျော်လာရင် လူနာက အရင် ရောဂါဝေဒနာတွေ ပြန်ခံစားရနိုင်တယ်။ ဒီကုထုံကို မြန်မာနိုင်ငံမှာ အိမ်နီးချင်းနိုင်ငံတွေလို လုပ်နိုင်ပြီဆိုတာ ပြသခွင့် ရလိုက်တဲ့အတွက် ဂုဏ်ယူလို့ မဆုံးဘူး။
ဒေါက်တာ Edgar Tay (နှလုံးအထူးက ဆရာဝန်ကြီး၊ စင်ကာပူနိုင်ငံ အမျိုးသားတက္ကသိုလ်ဆေးရုံ)
ဒီကိုလာရတဲ့ အကြောင်းရင်းကတော့ မန္တလေးအထွေထွေရောဂါကု ဆေးရုံကြီး နှလုံးအထူးကုဌာနက ဆရာဝန်တွေနဲ့ နှလုံးအဆို့ရှင် ကျဉ်းတဲ့ဝေဒနာရှင်တွေကို မခွဲမစိတ်ဘဲနဲ့ ပေါင်ခြံသွေးကြောကနေတစ်ဆင့် အဆို့ရှင်တပ်ဆင်ပေးတဲ့ ကုထုံးအသစ်ကို လာပြီးလုပ်ဆောင်ဖို့ပါ။ ဒီဆေးရုံကြီး နှလုံးရောဂါကုဌာနမှာရှိတဲ့ ဆရာဝန်တွေဟာ အင်မတန်မှလည်း အတွေ့အကြုံရှိကြပြီး လူနာတွေအတွက်လည်း အရမ်းကို စေတနာထား ကြပါတယ်။ မနေ့က လူနာ သုံးယောက်ကို အဆို့ရှင်တပ်ဆင်တဲ့ လုပ်ငန်းကို လုပ်ဆောင်ခဲ့ပါတယ်။ ဒီကုသမှုရဲ့ အောင်မြင်မှုဆိုတာ လူနာရွေးချယ်မှုအပေါ်မှာ အများကြီး မူတည်ပါတယ်။ ဒီကုသမှုနဲ့ ကုသလို့ အောင်မြင်နိုင်မယ့် လူနာကို စနစ်တကျနဲ့ ရွေးချယ်နိုင်ခဲ့မယ်ဆိုရင် ၉၀ ရာခိုင်နှုန်းလောက် အောင်မြင်မှာ ဖြစ်ပါတယ်။ မနေ့က ကုသခဲ့တဲ့ သုံးယောက်ကို ဒီနေ့ ကျွန်တော်ဝင်ကြည့်တဲ့အခါမှာ ကျန်းမာရွှင်လန်းစွာနဲ့ တွေ့ရပါတယ်။
ဦးဘိုမောင်၊(နှလုံးအဆို့ရှင်လဲလှယ်သည့်လူနာ၊ မန္တလေးမြို့)
နုလုံးရောဂါ ခံစားနေရတဲ့အတွက် အဆို့ရှင်လာလဲရတာပါ။ ဒီဝေဒနာခံစားရတာ တစ်နှစ်ကျော်ကျော် လောက်တော့ရှိပြီ။ ဒီကိုလာပြတဲ့အခါမှာ ဒီရောဂါကုဖို့အတွက် ရင်ဘတ်ခွဲရမယ်ပြောတယ်။ ခွဲရမယ်ပြောတော့ ရင်ဘတ်မခွဲချင်ဘူး။ အသက် ၆၉ နှစ်ရှိပြီ။ ပေါင်ခြံကနေ ကုရတဲ့ ကုထုံးတော့ရှိတယ်။ မလုပ်နိုင်သေးဘူး၊ လုပ်နိုင်ရင် လုပ်မလားလို့ဒီက ဆရာဝန်ကြီးတွေက ပြောထားတယ်။ အခုလုပ်နိုင်တဲ့အတွက် အခုကျွန်တော် မခွဲမစိတ်ရဘဲ အဆို့ရှင်လဲလိုက်နိုင်တယ်။ ဒါကြောင့် အခု ကောင်းကောင်မွန်မွန် နေနိုင်ပါတယ်။ မနေ့က ပြီးသွားတဲ့အတွက် အခုဆို သက်သက်သာသာ ရှိပါတယ်။ အသက်ရှူရတာလဲ ပေါ့သွားတယ်။ ကျေးဇူးတင်တာကတော့ ပြောကိုမပြနိုင်ဘူး။ ကျွန်တော်စဖြစ်တုန်းကဆိုရင် စုပြီး ဆုတ်ဆွဲခံရသလို ဖြစ်နေတယ်။ ဒီရောဂါကို ကုသပေးတဲ့ မြန်မာနိုင်ငံက ဆရာဝန်ကြီးတွေ၊ အဆို့ရှင်လှူဒါန်းပေးတဲ့ ကုမ္ပဏီနဲ့ စင်ကာပူကနေ လာပြီးကုသပေးတဲ့ ဆရာဝန်ကြီးတွေရော၊ အကုန်လုံးကို အများကြီး ကျေးဇူးတင်ပါတယ်။ ကျွန်တော်လည်း အများကြီး ကျန်းမာရေးကောင်းသွားပါပြီ။
မင်းထက်အောင်(မန်းကိုယ်ပွား)
