မန္တလေး  ၆  ဖေဖော်ဝါရီ 

မန္တလေးမြို့တော်ဝန် ဒေါက်တာရဲလွင်သည် အမရပူရမြို့နယ် မြို့ပတ်ကမ်းနားလမ်းတွင် Mandalay Business Capital Development ကုမ္ပဏီက အကောင်အထည်ဖော် ဆောင်ရွက်လျက်ရှိသည့် အမရပူရ မြို့ပြဖွံ့ဖြိုးရေးစီမံကိန်းများတွင် ပါဝင်သည့် ဧရာဝတီမြစ်ကမ်းပါး ထိန်းသိမ်းရေး ကျောက်ရိုးစီ မြေထိန်းနံရံ တည်ဆောက်ခြင်း လုပ်ငန်းဆောင်ရွက်နေမှုများကို ဖေဖော်ဝါရီ ၅ ရက်က ကွင်းဆင်းကြည့်ရှုစစ်ဆေးခဲ့သည်။

အဆိုပါကွင်းဆင်းကြည့်ရှုစစ်ဆေးရာသို့ မန္တလေးမြို့တော်ဝန်နှင့်အတူ ဒုတိယမြို့တော်ဝန် ဦးရဲမွန်၊ တွဲဖက်အတွင်းရေးမှူး ဦးသက်နိုင်ထွန်းနှင့် ကော်မတီဝင်များ လိုက်ပါလာခဲ့ပြီး လုပ်ငန်းဆောင်ရွက်နေမှု အခြေအနေများအား Mandalay Business Capital Development ကုမ္ပဏီဥက္ကဌ ဦးဝိတ်က ကျောက်ရိုးစီ မြေထိန်းနံရံလုပ်ငန်းပြီးစီးမှု အဆင့်ဆင့်နှင့် ဆက်လက်ဆောင်ရွက်မည့် အစီအစဉ်များကို မြေပုံကားချပ်များဖြင့် ရှင်းလင်းတင်ပြရာ မြို့တော်ဝန်က သတ်မှတ်စံချိန်စံညွှန်းများအတိုင်း အရည်အသွေးပြည့်မီစွာ ဆောင်ရွက်သွားရန် ဖြည့်ဆည်းမှာကြားခဲ့သည်။

ဧရာဝတီမြစ်ကမ်းတွင် ခေတ်မီစနစ်ကျသည့် မန္တလေးမြို့၏ ထင်ရှားသော မြို့ပြစီမံကိန်းတစ်ခုအဖြစ် ဖော်ဆောင်ရန် အမရပူရမြို့ပြဖွံ့ဖြိုးရေးစီမံကိန်းကို ၂၀၁၇ ခုနှစ် အောက်တိုဘာလမှစ၍ မြေပြုပြင်ခြင်း လုပ်ငန်းများဆောင်ရွက်ခဲ့ပြီး ဧရာဝတီမြစ်ကမ်းပါးထိန်းသိမ်းရေး ကျောက်ရိုးစီမြေထိန်းနံရံ တည်ဆောက်ခြင်းအတွက် ပြည်တွင်းပညာရှင်များ၊ နယ်သာလန်နိုင်ငံမှ ပညာရှင်များပူးပေါင်း၍ ဧရာဝတီမြစ်ကြောင်းဆိုင်ရာ River Model တစ်ခုကို စနစ်တကျ အကောင်အထည်ဖော် ဆောင်ရွက်လျက်ရှိကြောင်း သိရသည်။

မင်းထက်အောင်(မန်းကိုယ်ပွား)