နောင်ချိုမြို့တွင် ကိုဗစ်-၁၉ ရောဂါဖြင့် သေဆုံးသူ (၅)ဦးထိရှိလာ
နောင်ချို ဇူလိုင် ၅
ရှမ်းပြည်နယ် (မြောက်ပိုင်း) နောင်ချိုမြို့နယ်တွင် ကိုဗစ်-၁၉ ရောဂါဖြင့် သေဆုံးသူ ဇူလိုင် ၄ ရက်အထိ (၅)ဦး ရှိလာကြောင်း မြို့နယ်ကိုဗစ်-၁၉ ရောဂါကာကွယ်ထိန်းချုပ် ကုသရေးကော်မတီထံမှ သိရသည်။
နောင်ချိုမြို့နယ်တွင် ဇွန် ၁ ရက်မှ ဇူလိုင် ၄ ရက်အထိ ကိုဗစ်-၁၉ ရောဂါပိုးကူးစက်ခံရသူ (၃၀၂)ဦးထိ ရှိလာခဲ့ရာ ပိုးတွေ့လူနာများအား နောင်ချိုမြို့နယ် သုံးဆယ်တိုက်နယ်ဆေးရုံတွင် (၁၄)ဦး၊ နောင်ချိုမြို့ ပြည်သူ့ဆေးရုံနှင့် မြနန်းတော်ဝင်ခန်းမ၌ (၁၄၆)ဦး စုစုပေါင်း (၁၆၀)ကို ကြပ်မတ်ကုသနိုင်ရန် သီးခြားဆောင်ရွက်ထားရှိပြီး ပိုးတွေ့လူနာများနှင့် ထိတွေ့ဆက်စပ်ခဲ့သူများအား ကျန်းမာရေး စိစစ်နိုင်ရေး ဆက်လက်ဆောင်ရွက်လျက်ရှိကြောင်းနှင့် ဇွန်လ (၁) ရက်နေ့မှ ဇူလိုင်(၄) ရက်ထိ ကိုဗစ်-၁၉ ရောဂါ သက်သာပျောက်ကင်း၍ ဆေးရုံဆင်းခွင့်ရရှိသူ စုစုပေါင်း (၁၃၇)ဦး၊ ကိုဗစ်-၁၉ ရောဂါဖြင့် သေဆုံးသူ စုစုပေါင်း (၅)ဦး၊ ကိုဗစ်-၁၉ ရောဂါပိုးရှိသူ ဆေးရုံတက်ကုသနေသူ (၁၆၀)ဦးရှိကြောင်း မြို့နယ် ကိုဗစ်-၁၉ ရောဂါ ကာကွယ်ထိန်းချုပ်ကုသရေး ကော်မတီထံမှ သိရသည်။
ထွေးငယ်(ပြန်/ဆက်)
