နေပြည်တော် မေ ၅

နေပြည်တော်ကောင်စီဥက္ကဋ္ဌ ဦးသန်းထွန်းဦးသည် ယမန်နေ့က ဥတ္တရသီရိမြို့နယ် မြတ်လေးလမ်းနှင့် နေကြာလမ်းသို့ သွားရောက်၍ ငလျင်ဘေးကြောင့် ပျက်စီးခဲ့သည့် ရေပေးဝေရေး ပိုက်လိုင်းများကို ဝန်ထမ်းများ၊ ယန္တရားများဖြင့် တူးဖော်ပြင်ဆင် ဆောင်ရွက်နေမှု အခြေအနေများကို ကြည့်ရှုစစ်ဆေးပြီး လိုအပ်သည်များ ပေါင်းစပ်ညှိနှိုင်း ဆောင်ရွက်ပေးသည်။

ယနေ့နံနက်ပိုင်းတွင် နေပြည်တော်ကောင်စီ ဥက္ကဋ္ဌသည် ဥတ္တရသီရိမြို့နယ် ရာဇသင်္ဂဟလမ်းအနီး ငလျင်ဘေးဒဏ်ကြောင့် ပျက်စီးခဲ့သည့် ပင်မရေပိုက်လိုင်းများ၊ ရေဖြန့်ဝေသည့်ပိုက်လိုင်းများ ပြန်လည်ပြုပြင်နေမှုနှင့် ရာဇသင်္ဂဟအိမ်ရာ (၁) ဝင်း အတွင်း ရေပိုက်လိုင်းများ ပြုပြင်နေမှုကို လှည့်လည် ကြည့်ရှုစစ်ဆေးသည်။

ထို့နောက် ငလျင်ဘေးကြောင့် ထိခိုက်ပျက်စီးခဲ့သော ရာဇသင်္ဂဟလမ်းကို စက်ယန္တရားများဖြင့် ပြန်လည်ပြုပြင်နေမှုနှင့် ဥတ္တရသီရိမြို့နယ်ရှိ နေပြည်တော် စည်ပင်သာယာရေးကော်မတီ၊ ရေသန့်စင် စက်ရုံအမှတ် (၃) ရေသိုလှောင်ထားရှိမှုနှင့် ရေဖြန့်ဝေနေမှုအခြေအနေ၊ ဥတ္တရသီရိမြို့နယ် သုခမိန်လမ်း၌ ကလိုရင်းခတ်သန့်စင်ထားသည့် သောက်သုံးရေများ ရေသယ်ယာဉ်များဖြင့် ရေဖြည့်တင်းပြီး သယ်ယူပို့ဆောင်ဖြန့်ဝေနေမှု အခြေအနေများကို ကြည့်ရှုစစ်ဆေးသည်။

ယင်းနောက် နေပြည်တော်ကောင်စီဥက္ကဋ္ဌသည် ချောင်းမကြီးရေလှောင်တမံသို့ သွားရောက်ပြီး တမံပြုပြင်နေမှုများနှင့် တမံမြေသားကြံ့ခိုင်မှု စစ်ဆေးနေမှုအခြေအနေများ၊ ဇမ္ဗူသီရိမြို့နယ် ပိတောက်အိမ်ရာ အဆောက်အအုံများ ပြန်လည်ပြုပြင်နေမှု အခြေအနေများကို လှည့်လည်ကြည့်ရှု စစ်ဆေးသည်။

မွန်းလွဲပိုင်းတွင် နေပြည်တော်ကောင်စီဥက္ကဋ္ဌသည် နေပြည်တော်ကောင်စီရုံး ဇမ္ဗူသီရိခန်းမ၌ ပြုလုပ်သည့် ၂၀၂၄ ခုနှစ် မိုးစပါးချေးငွေအတွက် ရာသီဥတုအညွှန်းကိန်း သီးနှံအာမခံ လျော်ကြေးပေးအပ်ပွဲ အခမ်းအနား တက်ရောက်အမှာစကားပြောကြားသည်။

ယင်းနောက် သနပ္ပင်ဆိပ်ကျေးရွာ၊ နှမ်းတောကျေးရွာနှင့် ကျွန်းဦးကျေးရွာတို့မှ တောင်သူများအား နေပြည်တော်ကောင်စီဥက္ကဋ္ဌက သီးနှံအာမခံ လျော်ကြေးငွေများပေးအပ်ရာ တောင်သူများကိုယ်စား တောင်သူတစ်ဦးက ကျေးဇူးတင်စကား ပြန်လည်ပြောကြားသည်။

ထို့နောက် နေပြည်တော်ကောင်စီဥက္ကဋ္ဌသည် နေပြည်တော်ကောင်စီ ဇမ္ဗူသီရိခန်းမဝင်းအတွင်း ပဲခူးတိုင်းဒေသကြီးအစိုးရအဖွဲ့က ငလျင်ဘေးသင့်ပြည်သူများအတွက် MSME ထုတ်ကုန်များ၊ လူသုံးကုန်၊ စားသုံးကုန်၊ မီးဖိုချောင်သုံးပစ္စည်းမျိုးစုံ အရောင်းယာဉ်ဖြင့် ရောင်းချပေးနေမှု အခြေအနေများကို ကြည့်ရှုအားပေးခဲ့ကြောင်း သိရသည်။

သတင်းစဉ်