မာန်အောင် ၁၂ ဒီဇင်ဘာ
မာန်အောင်မြို့နယ်တွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ အခြေခံပညာဦးစီးဌာန၊ မီးသတ်ဦးစီးဌာနနှင့် လူမှုဝန်ထမ်းဦးစီးဌာနတို့ ပူးပေါင်း၍စီစဉ်သော "ငလျင်ဘေးနှင့် ကလေးသူငယ် အခွင့်အရေးဆိုင်ရာ အသိပညာပေးဟောပြော၊ ဆွေးနွေးပွဲ"ကို ယနေ့ မွန်းလွဲ ၁ နာရီက မြို့နယ် ပြန်/ဆက်ရုံး၊ လူထုအခြေပြုဗဟိုဌာန (Commu-nity Centre) ခန်းမ၌ ကျင်းပခဲ့သည်။
ဟောပြောပွဲကို ကလေးသူငယ် ကျောင်းသား၊ ကျောင်းသူများသည် မမျှော်မှန်းနိုင်သော ငလျင်ဘေးအန္တရာယ် ကြုံတွေ့ခဲ့ရပါက ဆောင်ရန်နှင့် ရှောင်ရန်များ၊ လူကုန်ကူးမှုဆိုင်ရာများ၊ ကလေးသူငယ် အခွင့်အရေးများဆိုင်ရာကို သိရှိစေရန် ရည်ရွယ်ကျင်းပခြင်းဖြစ်ပြီး ဟောပြောပွဲတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန မြို့နယ်ဦးစီးမှူး ဦးသိန်းထွန်းအောင်က "လူကုန်ကူးခေါင်းပုံဖြတ် မခံရစေရန် မိမိကိုယ်ကိုကာကွယ်ပါ" ခေါင်းစဉ်ဖြင့် ရှင်းလင်းပြောကြားသည်။
ဆက်လက်၍ လူမှုဝန်ထမ်းဦးစီးဌာနမှ ဦးစီးအရာရှိ(ကိုယ်စား) အကြီးတန်းစာရေး ဒေါ်သော်တာခင်က ကျောင်းသား/ကျောင်းသူများအား ကလေးသူငယ် အခွင့်အရေးဆိုင်ရာနှင့်စပ်လျဉ်း၍ ကလေးသူငယ်များအနေဖြင့် အသက်ရှင်သန်ခွင့်၊ မွေးဖွားခွင့်၊ နေထိုင်ခွင့်၊ ပါဝင်ခွင့် စသော အခွင့်အရေး(၄)ချက်ကို ရပိုင်ခွင့်ရှိပါကြောင်း၊ လူကုန်ကူးမှုတွင်လည်း စိတ်ပိုင်းဆိုင်ရာ၊ ရုပ်ပိုင်းဆိုင်ရာများ ထိခိုက်နစ်နာမှုမရှိစေရန် ဆောင်ရန်/ရှောင်ရန် အချက်များကို ရှင်းလင်းဟောပြောကာ မြို့နယ်မီးသတ်ဦးစီးဌာန မြို့နယ်ဦးစီးမှူး ဦးထိန်လင်းက ငလျင်ဘေးအန္တရာယ်ကြုံတွေ့လာရပါက ထိရှမှု၊ ဆုံးရှုံးမှု နည်းပါးစေဖို့ ဆောင်ရန်/ရှောင်ရန် အချက်များနှင့် ငလျင်ဖြစ်ပေါ်သည့် ရပ်ဝန်းများကို အသေးစိတ်ရှင်းလင်းခဲ့ပြီး ငလျင်လှုပ်နေစဉ်အတွင်း "ဝပ်၊ ကာ၊ ကိုင်"နည်းလမ်းဖြင့် လက်တွေ့သရုပ်ပြဆောင်ရွက်ခဲ့သည်။
အဆိုပါဟောပြောပွဲသို့ ဌာနဆိုင်ရာများ၊ ဆရာ/ဆရာမများ၊ ကျောင်းသား/ကျောင်းသူများ (၄၀)ဦး တက်ရောက်ခဲ့ပြီး သိလိုသည်များမေးမြန်း၍ သက်ဆိုင်ရာတာဝန်ရှိသူများက ပြန်လည်ရှင်းလင်း ဖြေကြားခဲ့ကြပြီးနောက် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၏ ခင်းကျင်းပြသထားသည့် သုတ/ရသ စာအုပ်၊ ကလေးသူငယ်များနှင့် လူငယ်များအတွက် လုံခြုံစိတ်ချရသော ရွှေ့ပြောင်းသွားလာမှုဆိုင်ရာ စာစောင်၊ ငလျင်ဘေးအသိပညာ စာစောင်၊ အပြည်ပြည်ဆိုင်ရာ လူ့အခွင့်အရေးကြေညာစာတမ်း၊ မသန်စွမ်းသူ အခွင့်အရေးများဆိုင်ရာ ပိုစတာ၊ နံရံကပ်စာစောင်များကို စိတ်ဝင်တစား လေ့လာကြည့်ရှုခဲ့ကြောင်း သိရသည်။
သိန်းထွန်းအောင်(ပြန်/ဆက်)
