ဒူဘိုင်း ၂၃ ဇွန်
ဒူဘိုင်းတွင် တစ်စုံတစ်ခုသောအတိုင်း အတာအထိ ထိန်းချုပ်မှုများပြုလုပ်နိုင်ပါက ဇူလိုင် ၇ ရက်မှစတင်ကာ နိုင်ငံခြားခရီးသွားများကို ဒူဘိုင်းသို့ လာရောက်လည်ပတ်ခွင့် ပေးသွားမည်ဟု ဇွန် ၂၁ ရက်တွင် ဖော်ပြထားသည်။ ။
ဒူဘိုင်းသည် ယူအေအီးနိုင်ငံ၏ စီးပွားရေးအချက်အချာကျသည့် နေရာလည်း ဖြစ်သည်။ ကိုဗစ် -၁၉ ပျံ့နှံ့မှု ထိန်းချုပ်ရေးအတွက် မတ်လ အလယ်မှစတင်ကာ နိုင်ငံခြားခရီး သွားများဝင်ရောက်ခွင့်ကို ပိတ်ပင်ထားခဲ့သည်။ ထွက်ခွာသည့်ဂိတ်တွင် ပီစီအာ စမ်းသပ်မှုပြုလုပ်ရမည်ဖြစ်ပြီး စမ်းသပ်မှုရလဒ်တွင် ရောဂါမရှိဟု ပြသမှသာ ဝင်ရောက်ခွင့်ရမည် ဖြစ်သည်။ နောက်ထပ်လိုအပ်ချက် တစ်ခုမှာ ဒူဘိုင်းတွင် ဆေးကုသ စရိတ်အတွက် ကာမိသည့်ကျန်းမာရေး အာမခံရှိရမည်ဖြစ်သည်။ ဒူဘိုင်းလေဆိပ်သို့ ရောက်သည့်အခါတွင်လည်း ဆေးစစ်မှုခံယူရန်လိုအပ်ပြီး ရောဂါစစ်ဆေးတွေ့ရှိပါက အသွားအလာ ကန့်သတ်ထားသည့်နေရာတွင် သီးခြားနေထိုင်ရမည် ဖြစ်သည်။ ယူအေအီးနိုင်ငံတွင် ကိုဗစ် - ၁၉ ကူးစက်ပျံ့နှံ့မှုနှုန်းမှာ မကြာသေးမီ ရက်ပိုင်းအတွင်း ကျဆင်းလာပြီး နေ့စဉ်ကူးစက်မှုနှုန်းမှာ ၄၀၀ အောက်သို့ လျော့နည်းလာသည်။ ကမ်းခြေများ၊ ဟိုတယ်များ၊ ဖျော်ဖြေရေးနှင့် သက်ဆိုင်သည့် အဆောက်အအုံများ ကိုလည်း တဖြည်းဖြည်းချင်းဖွင့်လှစ် ခွင့်ပေးနေပြီဖြစ်သည်။
ဒူဘိုင်း၏စီးပွားရေးသည် ခရီးသွားလုပ်ငန်းအပေါ် မှီခိုနေသည့်အတွက် ယူအေအီးရှိ အခြားမြို့များ ထက်စောကာ ဒူဘိုင်းတွင် နိုင်ငံခြား ခရီးသွားများ ပြန်လည်လက်ခံနိုင်ရေး ကြိုးစားနေသည်။
အင်န်အိတ်ချ်ကေ
