မြောင်းမြ  ၂၀  ဖေဖော်ဝါရီ

နိုင်ငံခြားသား ကမ္ဘာလှည့်ခရီးသည်များ ဖေဖေါ်ဝါရီ ၂၀ ရက်နေ့ ညနေ ၄ နာရီအချိန်က မြောင်းမြမြို့သို့ ရောက်ရှိပြီး မြောင်းမြမြို့ သမိုင်းအမွေအနှစ် လက်ရာများရှိနေသေးသည့် လွန်ခဲ့သော နှစ် (၁၀ဝ)ခန့်က ဗြိတိသျှအုပ်ချုပ်ရေးခေတ် အဆောက်အဦလက်ရာများဖြစ်သည့် ခရိုင်အုပ်ချုပ်ရေးမှူးရုံး၊ ခရိုင်မြို့နယ် တရားရုံး စသည့်ရှေးဟောင်းအမွေအနှစ်လက်ရာများနှင့် နိုင်ငံတော်လွတ်လပ်ရေးအတွက် ကြိုးပမ်းဆောင်ရွက်ခဲ့သည့် အမျိုးသားခေါင်းဆောင်ကြီး ဗိုလ်ချုပ်အောင်ဆန်းရုပ်တုတို့သို့ ရောက်ရှိလေ့လာပြီး အမှတ်တရဓါတ်ပုံများ ရိုက်ကူးခဲ့ကြကြောင်း သိရသည်။

ထို့အပြင်  ရှေးသမိုင်းဝင် စကြာသီဟ၊ စကြာနန္ဒစေတီတော်၊ ရွှေသာလျောင်းဘုရား၊ ဒီးဒုတ် ဦးဘချိုရုပ်တုရင်ပြင်နှင့် အခြား အထင်ကရနေရာများကိုလည်း လေ့လာသွားမည်ဖြစ်ကြောင်း သိရသည်။

အဆိုပါ ကမ္ဘာလှည့်ခရီးသည်များတွင် ဗြိတိန်နိုင်ငံသူ (၁)ဦး ၊ နော်ဝေနိုင်ငံသူ/နိုင်ငံသား (၂၆)ဦး ၊ စုစုပေါင်း(၂၇)ဦးတို့ လိုက်ပါလာပြီး  Royal Voyage Co.Ltd အစီအစဉ်ဖြင့် အပျော်စီးသင်္ဘော RV Kamee Pandaw သင်္ဘောဖြင့် မန္တလေး ၊ ရန်ကုန် ၊ ဖျာပုံ ၊ ဘိုကလေး ၊ မော်လမြိုင်ကျွန်းမှ မြောင်းမြမြို့သို့ ရောက်ရှိ ညအိပ်လေ့လာကာ နောက်တစ်နေ့တွင် ပုသိမ်မြို့မှ ချောင်းသာကမ်းခြေသို့ သွားရောက်ကြမည်ဖြစ်ကြောင်းသိရသည်။

အောင်မင်း(မြောင်းမြ)