လွိုင်ကော် ၂၁ အောက်တိုဘာ
ကျန်းမာရေးနှင့် အားကစားဝန်ကြီးဌာန၊ ပြည်နယ်ကုသရေးနှင့်ပြည်သူ့ကျန်းမာရေးဦးစီးဌာနမှ ပြည်နယ်အတွင်း ဝက်သက်-ဂျိုက်သိုးကာရောဂါ ဖြစ်ပွားမှု လျော့နည်းစေရန် ရည်ရွယ်၍ နိုင်ငံတဝန်း ဝက်သက်-ဂျိုက်သိုးကာကွယ်ဆေး အစုလိုက်ထိုးနှံခြင်းလုပ်ငန်း (၂၀၁၉) ပြည်နယ်အဆင့် အသိပေး ဆွေးနွေးခြင်းကို အောက်တိုဘာ ၂၁ ရက်နေ့ နံနက် ၉ နာရီအချိန်က ကယားပြည်နယ် လွိုင်ကော်မြို့ မင်းစုရပ်ကွက်ရှိ ပြည်နယ်ကုသရေးနှင့်ပြည်သူ့ကျန်းမာရေးဦးစီးဌာန ရှိ ခန်းမ ဆောင်၌ ကျင်းပသည်။
ရှေးဦးစွာ ပြည်နယ်ကုသရေးနှင့်ပြည်သူ့ကျန်းမာရေးဦးစီးဌာနမှူး ဒေါက်တာဌေးလွင်က အဖွင့်အမှာစကား ပြောကြားရာ ဝက်သက်ရောဂါဗိုင်းရပ်စ်ပိုးဟာ ဖြစ်ပွားပြီး အလွန်ကူးစက်မြန်သော ရောဂါတစ်မျိုး ဖြစ်ပါတယ်။ ဝက်သက်မပေါက်ဖူးသေးတဲ့ ရောဂါခုခံအားမရှိသေးတဲ့ လူတိုင်း ရောဂါကူးစက် ဖြစ်ပွားနိုင်ပါတယ်။ ဝက်သက်ကာကွယ်ဆေး မထိုးထားတဲ့၊ ထိုးပြီးသော်လည်း ခုခံအားမဖြစ်ပေါ်တဲ့ မည်သူမဆို ရောဂါကူးစက်ခံရနိုင်ပါတယ်။ ဝက်သက်ကာကွယ်ဆေး မထိုးထားတဲ့ ကလေးငယ်များဟာ ဝက်သက်ရောဂါနဲ့ နောက်ဆက်တွဲ ကျန်းမာရေးပြဿနာတွေကြောင့် သေဆုံးနိုင်ပါတယ် ။ ဂျိုက်သိုးရောဂါဟာ ဗိုင်းရပ်ပိုးကြောင့် ကူးစက်ရောဂါဖြစ်တယ်။ ကလေးတွေမှာ မပြင်းထန်သောရောဂါဖြစ်တယ်။ အပိန့်ထွက်ခြင်း၊ သာမန်ဖျားခြင်း၊ ပျို့ခြင်း၊ မျက်စိနီခြင်း၊ တွေကိုတွေ့ရတယ်။ ကိုယ်ဝန်ဆောင်တွေ ရောဂါကူးစက်ပြီဆိုရင် အချင်းမှတဆင့် သန္ဓေသားကို ဝင်ရောက်နိုင်ပြီး ကိုယ်ဝန်ပျက်ခြင်း၊ ကလေးသေခြင်း နဲ့ မွေးရာပါ ဂျိုက်သိုးရောဂါ ခံစားရတဲ့ ကလေးများအဖြစ် မွေးရာပါနှလုံးရောဂါ ၊ မျက်စိအတွင်းတိမ်၊ ဘေလုံးကြီးခြင်း၊ အရေပြားအောက် သွေးအနီစက်တွေထခြင်း၊ ဦးခေါင်းခွံသေးငယ်ခြင်း၊ နားမကြား ဆွံ့အခြင်းများ ဖြစ်ပွားတတ်တာကြောင့် မိသားစုအတွက် လူမှုရေး၊ စီးပွားရေးများစွာကို ထိခိုက်စေပါတယ်။ ဟု ပြောကြားသွားသည်။ ဆက်လက်၍ လက်ထောက်ညွှန်ကြားရေးမှူးဒေါက်တာ ခင်ဌေးရွှေက နိုင်ငံတဝန်း ဝက်သက်-ဂျိုက်သိုးကာကွယ်ဆေး အစုလိုက်ထိုးနှံခြင်းနှင့် ပက်သက်၍ ရှင်းလင်းပြောကြားပြီး စုပေါင်းအမှတ်တရ ဓါတ်ပုံရိုက်ကူးခဲ့သည်။
အဆိုပါ အသိပေးဆွေးနွေးပွဲသို့ ပြည်နယ်အဆင့်ဌာနဆိုင်ရာများ၊ ပြည်နယ်၊မြို့နယ်၊ခရိုင်များမှ ကျန်းမာရေး ဝန်ထမ်းများ၊ ဖိတ်ကြားထားသူများ တက်ရောက်ကြသည်။
ကိုစိုင်း (လွိုင်ကော်)
