နိုင်ငံတစ်ဝန်း လွှမ်းခြုံပြောင်းလဲအသုံးပြုမည့် မြန်မာယူနီကုဒ်

နေခန့်နိုင်(T.T)

အပြည်ပြည်ဆိုင်ရာ စံချိန်စံညွှန်းနှင့် ကိုက်ညီသော မြန်မာယူနီကုဒ်ကို လာမည့် အောက်တိုဘာလ ၁ ရက်နေ့တွင် တစ်နိုင်ငံလုံး အတိုင်းအတာဖြင့် တစ်ပြိုင်တည်း ပြောင်းလဲအသုံးပြုတော့မည် ဖြစ်သည်။

မြန်မာနိုင်ငံတွင် ကွန်ပျူတာသုံး မြန်မာစာသုံးစွဲမှု၏ ၉၀ ရာခိုင်နှုန်းကျော်သည် မိုဘိုင်းဖုန်းကတစ်ဆင့် သုံးစွဲနေသည့်အတွက် ပြည်သူတစ်ရပ်လုံး ယူနီကုဒ်စနစ်သုံး မြန်မာစာစနစ်ကို ကျယ်ကျယ်ပြန့်ပြန့် အသုံးပြုနိုင်ရန် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာနိုင်ငံ ကွန်ပျူတာအသင်းချုပ်တို့သည် အစိုးရဌာနများ၊ မိုဘိုင်း အော်ပရေတာများနှင့် မီဒီယာလုပ်ငန်းများ၊ အသင်းအဖွဲများ၊ ဆော့ဖ်ဝဲရေးဆွဲသူများ၊ မိုဘိုင်းဖုန်း ထုတ်လုပ်သူများ၊ အပြည်ပြည်ဆိုင်ရာ နည်းပညာ ကုမ္ပဏီများ၊ မြန်မာစာအဖွဲ့၊ ပညာရှင်များနှင့် ညှိနှိုင်းဆောင်ရွက်လျက်ရှိသည်။

မြန်မာဖောင့်များအစ
မြန်မာနိုင်ငံတွင် ကွန်ပျူတာစနစ်ကို စတင်အခြေချခဲ့သည့် ၁၉၉၂ ခုနှစ်မှစ၍ မြန်မာကွန်ပျူတာ ပညာရှင်များ ကိုယ်ပိုင် တီထွင်ခဲ့သည့် Win စနစ်၊ Zawgyi စနစ် အစရှိသဖြင့် ပြည်သူများအကြားတွင် ကျယ်ကျယ်ပြန့်ပြန့် သုံးစွဲခဲ့ကြပြီး ယနေ့တိုင် သုံးစွဲလျက်ရှိသည်။

မြန်မာယူနီကုဒ်စံစနစ်
မြန်မာယူနီကုဒ်စံစနစ် သတ်မှတ်နိုင်ရန်အတွက် မြန်မာကွန်ပျူတာ အသင်းချုပ်နှင့် မြန်မာစာအဖွဲ့မှ ပညာရှင်များ ပူးပေါင်း၍ ဆယ်စုနှစ်တစ်စုစာ ကြိုးစားအားထုတ်မှုကြောင့် ပြည်ထောင်စုသမ္မတ မြန်မာနိုင်ငံတော် “အမျိုးသား စံချိန်စံညွှန်းကောင်စီ” က ၂၀၁၉ ခုနှစ်ဖေဖော်ဝါရီ ၂၁ ရက် ရက်စွဲပါ အမိန့်ကြော်ငြာစာအမှတ် (ဝ၂၂/၂၀၁၉) နှင့် ယူနီကုဒ်စနစ်သုံး မြန်မာစာ စံစနစ် Unicode Standard, ISO-10646 ကို ကွန်ပျူတာသုံး မြန်မာစာစံစနစ်အဖြစ် သတ်မှတ်ထုတ်ပြန်နိုင်ခဲ့သည်။ ပြည်ထောင်စုဖောင့် (Pyidaungsu Font) စနစ်သည် ယူနီကုဒ်နိုင်ငံတကာစံ ISO 10646 နှင့် ကိုက်ညီအောင် ဆောင်ရွက်ထားသောစနစ် ဖြစ်ပါသည်။ ၂၀၁၉ ခုနှစ်ဧပြီလ ၁ ရက်နေ့မှစ၍ ပြည်ထောင်စု အစိုးရအဖွဲ့နှင့် ဝန်ကြီးဌာနများ၊ တိုင်းဒေသကြီးနှင့် ပြည်နယ် အစိုးရအဖွဲ့ရုံးဌာနများတွင် စတင်ပြောင်းလဲ သုံးစွဲလျက်ရှိနေပြီး ဆက်သွယ်ရေး ညွှန်ကြားမှု ဦးစီးဌာနအနေဖြင့် ၂၀၁၉ ခုနှစ်အောက်တိုဘာလ ၁ ရက်နေ့တွင် တစ်နိုင်ငံလုံး အတိုင်းအတာဖြင့် စတင်ပြောင်းလဲသုံးစွဲရန် နှိုးဆော်ထားရှိသည်။

ကြုံတွေ့နိုင်သည့် အခက်အခဲများ
အပြောင်းအလဲလုပ်ရာတွင် အခက်အခဲရှိမည်ဖြစ်သော်လည်း ယခုအချိန်မှစ၍ ပြောင်းလဲပါက တရားဝင်ပြောင်းလဲမည့် အချိန်တွင် အဆင်ပြေ လွယ်ကူချောမွေ့သွားမည် ဖြစ်သည်။ ထိုသို့ပြောင်းလဲရာတွင် ပထမဆုံး ကြုံတွေ့ရမည့် အခက်အခဲမှာ မိုဘိုင်းဖုန်းများတွင် စတင်ဖြစ်ပေါ်နိုင်ပါသည်။ ယခုနောက်ပိုင်း ထွက်ရှိလာသည့် မိုဘိုင်းဖုန်းအများစုတွင် ပြည်ထောင်စုဖောင့် တစ်ပါတည်း ပါရှိသဖြင့် ပြောင်းလဲသုံးစွဲရန် လွယ်ကူသော်လည်း လွန်ခဲ့သော (ငါးနှစ်၊ ၁၀နှစ်ခန့်)ကာလများက ဝယ်ယူ ထားသည့် မိုဘိုင်းဖုန်းများတွင် ပြည်ထောင်စုဖောင့်များ မမြင်ရခြင်း၊ အသုံးပြုရ ခက်ခဲခြင်းများ ကြုံတွေ့နိုင်ပါသည်။ ယခုအခါ Facebook သုံးစွဲရာတွင် ပြည်ထောင်စုဖောင့်များအား မြင်တွေ့ဖတ်ရှုနိုင်သည်ကို တွေ့ရှိရသည်။ Android ဖုန်းများ အနေဖြင့် messenger ကဲ့သို့ စာများပေးပို့သည့် နေရာတွင် Auto convert ကဲ့သို့စနစ်များ ပါလာသည့် အတွက် လွယ်ကူစွာ ဖတ်ရှုနိုင်ကြပြီဖြစ်သော်လည်း ios စနစ်သုံး Apple တံဆိပ်များတွင်မူ မရရှိသေးကြောင်း နှိုင်းယှဉ် တွေ့ရှိရသည်။ လက်ရှိအခြေအနေအပေါ်တွင် ယင်းကဲ့သို့ အခက်အခဲများ ကြုံတွေ့နေမှုအပေါ် မြန်မာကွန်ပျူတာ အသင်းချုပ်မှ တာဝန်ရှိသူများအနေဖြင် Facebook တွင် Myanmar Unicode Migration အမည်ဖြင့် Page တစ်ခုပြုလုပ်ကာ ပြည်ထောင်စုဖောင့်နှင့် ပတ်သက်သည့် သတင်းအချက်အလက်များ ဖြန့်ဝေ ပေးလျက်ရှိသည့်အပြင် ပြောင်းလဲအသုံးပြုသူများ မေးမြန်းစုံစမ်းနိုင်ရန်အတွက်လည်း call center ဖုန်းနံပါတ် ဝ၉၄၅၅၇၃၆၉၉၉ ကို စီစဉ်ဆောင်ရွက်ပေးထားသည်။

ပြည်ထောင်စုဖောင့်နှင့် အခြားဖောင့်များ ခြားနားမှု
ပြည်ထောင်စုဖောင့်တွင် မွန်၊ ရှမ်း၊ ကရင်နှင့် ကယား စသည့် တိုင်းရင်းသားစာပေများ ပါဝင်လာခြင်း၊ အင်တာနက် အသုံးပြုရှာဖွေမှုတွင် အသိအမှတ်ပြု ထားခံရခြင်း (ဥပမာ- Google Map တွင် မြန်မာအသံဖြင့် ပြောကြားမှုကို ရှာဖွေပေးခြင်း၊ ရှာဖွေမှုတွင် မြန်မာဖောင့်များအား ထင်ရှားစွာ မြင်တွေ့ရခြင်း၊ ရှာဖွေရ လွယ်ကူခြင်း)၊ Database အသုံးပြုသည့် အချက်အလက် သိမ်းဆည်းမှုများတွင် ပြန်လည်ထုတ်ယူသုံးစွဲမှု လွယ်ကူခြင်း၊ လွဲမှားမှု မရှိနိုင်ခြင်း၊ မြန်မာစာ ရေးထုံးရေးနည်းများအတိုင်း ရေးသားထားခြင်း၊ Keyboard လက်ကွက်ရိုက်ရာတွင် လွယ်ကူခြင်း၊ မိုဘိုင်း Application များနှင့် နိုင်ငံတကာ ဆော့ဖ်ဝဲများအား လွယ်ကူစွာ သုံးစွဲနိုင်ခြင်းများ စိစစ်တွေ့ရှိရပါသည်။

ရရှိနိုင်သော အကျိုးကျေးဇူးများ
ယူနီကုဒ်သုံးစွဲခြင်းကြောင့် ရရှိနိုင်သော အကျိုးကျေးဇူးများမှာ ယူနီကုဒ်စနစ်သုံး မြန်မာစာစနစ်သည် သတင်းအချက် အလက်များကို စနစ်တကျဖြင့် သိမ်းဆည်းနိုင်ခြင်း၊ လွယ်ကူတိကျစွာ ပြန်လည်ရှာဖွေနိုင်ခြင်း၊ မြန်မာစာစနစ်အတိုင်း အလွယ်တကူ အက္ခရာစဉ်နိုင်ခြင်း၊ ဘာသာပြန်ဆိုမှုတွင်လည်း အခြားဘာသာတစ်ခုမှ မြန်မာဘာသာသို့ အပြန်အလှန် ပြန်ဆိုရာတွင် ပိုမိုအဆင်ပြေချောမွေ့မှုရှိခြင်း၊ မြန်မာဘာသာစကားကို ကွန်ပျူတာစနစ်တွင် အသုံးချလာနိုင်ခြင်း၊ တိုင်းရင်းသား ဘာသာစကားများကိုလည်း ယူနီကုဒ်စနစ်တွင် လွယ်ကူစွာ အသုံးပြုနိုင်ခြင်း၊ နိုင်ငံတော်က အကောင်အထည် ဖော် ဆောင်ရွက်လျက်ရှိသည့် e-Government စနစ် တိုးတက်ရေးအတွက် များစွာ အထောက်အပံ့ ဖြစ်စေခြင်းများ တွေ့ရှိရမည် ဖြစ်ပါသည်။

ယခုအခါ မြန်မာနိုင်ငံတွင် အစိုးရဌာနများက စတင်ပြောင်းလဲ ဆောင်ရွက်လာကြသော်လည်း များမကြာမီ ပြည်သူများ အားလုံး လိုက်ပါပြောင်းလဲသုံးစွဲမှသာ တစ်နိုင်ငံလုံး လွှမ်းခြုံလာနိုင်မည်ဖြစ်ရာ အကျိုးရလဒ်များ ထင်ရှားပေါ်လွင်စွာ ရရှိမည်ဖြစ်၍ ယူနီကုဒ်စနစ် ပြည်ထောင်စုဖောင့်များအား ယခုနှစ် အောက်တိုဘာလ ၁ ရက်နေ့အထိ စောင့်ဆိုင်း မနေတော့ဘဲ ယခုမှစ၍ အမြန်ပြောင်းလဲ အသုံးပြုကြပါစို့ဟု တိုက်တွန်းနှိုးဆော် ရေးသားလိုက်ပါသည်။ ။