နေပြည်တော် ဒီဇင်ဘာ ၄

၂၀၂၀ ပြည့်နှစ် အမျိုးသားစာပေတစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆု ဆုချီးမြှင့်ပွဲအခမ်းအနားကို စာဆိုတော်နေ့ဖြစ်သည့် ယနေ့နံနက်ပိုင်းတွင် ရန်ကုန်တိုင်းဒေသကြီး ရန်ကင်းမြို့နယ်ရှိ မြဝတီမီဒီယာစင်တာ၌ ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ဂုဏ်ပြုအမှာစကား ပြောကြားပြီး ဆုများချီးမြှင့်ပေးအပ်သည်။

အဆိုပါအခမ်းအနားသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်နှင့်အတူ နိုင်ငံတော်စီမံအုပ်ချုပ်ရေးကောင်စီအဖွဲ့ဝင်များ ဖြစ်ကြသည့်  ဗိုလ်ချုပ်ကြီး မောင်မောင်ကျော်၊ ဒုတိယဗိုလ်ချုပ်ကြီး မိုးမြင့်ထွန်း၊ မန်းငြိမ်းမောင်၊ ဒေါ်အေးနုစိန်၊ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ ပြည်ထောင်စုဝန်ကြီးများ၊ ရန်ကုန်တိုင်းဒေသကြီးဝန်ကြီးချုပ် ဦးလှစိုး၊ ကာကွယ်ရေး ဦးစီးချုပ်ရုံးမှ တပ်မတော်အရာရှိကြီးများ၊ ရန်ကုန်တိုင်းစစ်ဌာနချုပ်တိုင်းမှူး ဗိုလ်ချုပ် ညွန့်ဝင်းဆွေနှင့် တာဝန်ရှိသူများ၊ ၂၀၂၀ ပြည့်နှစ် အမျိုးသားစာပေတစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆုရရှိကြသူများနှင့် မိသားစုဝင်များ၊ ဖိတ်ကြားထားသူများ တက်ရောက်ကြသည်။

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် အခမ်းအနားကျင်းပမည့်နေရာသို့ ရောက်ရှိကြပြီး ၂၀၂၀-၂၀၂၁ ခုနှစ် အတွင်း ထုတ်ဝေခဲ့သည့် သုတ၊ ရသ၊ အထွေထွေ စာအုပ်များ၊ အထူးထုတ် စာအုပ်များ၊ နှစ်ချုပ်စာအုပ်များ၊ ၂၀၂၀ ပြည့်နှစ် အမျိုးသားစာပေတစ်သက်တာဆု၊ အမျိုးသားစာပေ ဆုနှင့် စာပေဗိမာန်စာမူဆု ဆုရရှိကြသူများ၏ အတ္ထုပ္ပတ္တိနှင့် ဆုရစာအုပ်များ ခင်းကျင်းပြသထားရှိမှုကို ကြည့်ရှုလေ့လာရာ ပြန်ကြားရေးဝန်ကြီးဌာန၊ ပြည်ထောင်စုဝန်ကြီး ဦးမောင်မောင်အုန်းနှင့် တာဝန်ရှိသူများက ရှင်းလင်းပြသကြသည်။ ထို့နောက် အခမ်းအနား စတင်ကျင်းပကြောင်း ကြေညာပြီး စာပေဆုနှင်းသဘင် ဂုဏ်ပြုတေး သီချင်း Video Clip ကိုပြသသည်။

 

 

 

 

ယင်းနောက် နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ်က ဂုဏ်ပြုအမှာစကားပြောကြားရာတွင် "ဂုဏ်ပြုချီးမြှင့်ထိုက်သူကို ဂုဏ်ပြုချီးမြှင့်ခြင်းသည် မင်္ဂလာမည်၏" ဟူသည့် မြန်မာတို့၏ဆိုရိုးစကားကို လေးလေးမြတ်မြတ် လိုက်နာကျင့်သုံးပြီး မြန်မာ့ယဉ်ကျေးမှုအစဉ်အလာတစ်ခုဖြစ်သော နတ်တော်လဆန်း ၁ ရက်၊ စာဆိုတော်နေ့တွင် ကျင်းပသည့် ယနေ့ဆုနှင်းသဘင်အခမ်းအနားတွင် အမှာစကားပြောကြားခွင့်ရသည့်အတွက် ကြည်နူးဝမ်းမြောက်ရပါကြောင်း။

စာပေသည် နိုင်ငံတစ်နိုင်ငံ၏ ယဉ်ကျေးမှုမျက်နှာစာဖြစ်သကဲ့သို့ နိုင်ငံနှင့်လူမျိုး တိုးတက်ဖွံ့ဖြိုးရေးတွင် အရေးပါလှသည့် ယဉ်ကျေးမှုဆိုင်ရာ နယ်ပယ်ကြီးတစ်ခု ဖြစ်သည်ကို မြန်မာ့သမိုင်း၏ဖြစ်ပေါ်တိုးတက်မှုများတွင် အထင်အရှားတွေ့နိုင်မည် ဖြစ်ပါကြောင်း၊ မြန်မာလူမျိုးနှင့် မြန်မာစာပေသည် ခေတ်အဆက်ဆက် မကင်းမကွာရှိနေခဲ့ပြီး အမျိုးသားရေးနှင့် နိုင်ငံဖွံ့ဖြိုးတိုးတက်ရေးကိစ္စများတွင် စာပေနှင့်ပြည်သူတို့ အပြန်အလှန် အကျိုးပြုနိုင်ခဲ့သည့် သာဓကများစွာရှိခဲ့ပါကြောင်း။

မိမိတို့ မြန်မာစာပေ၏ သက်တမ်းသည် ပုဂံခေတ် ၁၂ ရာစုအစမှ မျက်မှောက် ခေတ်အထိဆိုပါက နှစ်ပေါင်း ၁၀၀၀ နီးပါးရှိပြီ ဖြစ်ပါကြောင်း၊ မြန်မာဘာသာစကားနှင့် မြန်မာစာပေသည် မြန်မာ့သမိုင်းရေစီးကြောင်းတွင် ခိုင်မာတည်တံ့စွာ ထင်လင်းခဲ့သည့် ယဉ်ကျေးမှုအမွေအနှစ် တစ်ခုဖြစ်ပါကြောင်း၊ မိမိနိုင်ငံနှင့် လူမျိုးအတွက် အသိဉာဏ်အမြော်အမြင်နှင့် စိတ်ဓာတ်အင်အားကို ဖွံ့ဖြိုးစေလိုသည့် စေတနာဖြင့် သုတရသ စာပေ အဖြာဖြာကို အားထုတ်ရေးဖွဲ့ခဲ့သည့် စာပေကလောင်ရှင်ကြီးများ၊ စာဆိုတော် ကြီးများ၏ ကျေးဇူးတရားကို အလေးအမြတ် ဂုဏ်ပြုရမည်ဖြစ်ပါကြောင်း၊ အဆိုပါ ရဟန်းစာဆို၊ လူပုဂ္ဂိုလ်စာဆိုကြီးများကို ဂုဏ်ပြုချီးကျူးသောအားဖြင့် မြန်မာနိုင်ငံ အဝန်း နှစ်စဉ်နှစ်တိုင်း နတ်တော်လဆန်း ၁ ရက်နေ့တွင် “စာဆိုတော်နေ့” အခမ်း အနားကို ကျင်းပခဲ့ကြခြင်းဖြစ်ပါကြောင်း။

 

 

 

 

၁၉၄၄ ခုနှစ်တွင် ပထမအကြိမ် စာဆိုတော်နေ့ကို ကျင်းပခဲ့သည့်အတွက် ယခ နှစ်ဆိုပါက နှစ်ပေါင်း ၇၇ နှစ်ရှိခဲ့ပြီဖြစ်ပါကြောင်း၊ စာရေးဆရာများ၊ စာပေချစ်မြတ်နိုးသူများအတွက် မြန်မာနိုင်ငံတစ်နံတစ်လျားတွင် နတ်တော်လဆန်း ၁ ရက်၊ စာဆိုတော် နေ့ ဝန်းကျင်အချိန်သည် စာပေဆိုင်ရာ လှုပ်ရှားမှုများဖြင့် ဝေစည်နေသည့် ကာလဖြစ်ပါကြောင်း၊ စာဆိုတော်နေ့အကြိုနှင့် စာဆိုတော်နေ့ နောက်ပိုင်းအချိန်အထိ စာဆိုတော်နေ့အထိမ်းအမှတ် သက်ကြီးဝါကြီး စာရေးဆရာကြီးများ ကန်တော့ပွဲများ၊ စာပေဟောပြောပွဲများ၊ စာပေပြိုင်ပွဲများ၊ စာအုပ်စာပေပြပွဲများ ကျင်းပလေ့ရှိပြီး စာဆိုတော်နေ့အထိမ်းအမှတ် စာစောင်၊ မဂ္ဂဇင်းများလည်း ထုတ်ဝေကြပါကြောင်း။

နိုင်ငံတော်အစိုးရအနေဖြင့်လည်း မြန်မာ့ယဉ်ကျေးမှုအနုပညာ နယ်ပယ်အသီးသီး ဖြာထွက်ရာ ပင်မမဏ္ဍိုင်ဖြစ်သည့် မြန်မာစာပေ နယ်ပယ်ဖွံ့ဖြိုး တိုးတက်ရေးကို ရည်သန်မျှော်မှန်းပြီး စာဆိုတော်ကြီးများ၏ အကောင်းဆုံးစာပေလက်ရာများကို ရွေးချယ်ကာ အမျိုးသားစာပေဆုအဖြစ် နှစ်စဉ်စာဆိုတော်နေ့တွင် ချီးမြှောက်ဂုဏ်ပြုပေးလျက် ရှိပါကြောင်း၊ ဒုတိယကမ္ဘာစစ်အပြီး စစ်ဘေးစစ်ဒဏ်ခံခဲ့ရသည့် မြန်မာနိုင်ငံကို အဘက်ဘက်က ပြန်လည်ထူထောင်ရေးအတွက် ၁၉၄၇ ခုနှစ်၊ ဇွန်လ ၆ ရက်မှ ၇ ရက်နေ့အထိ ရန်ကုန်မြို့၊ ပြည်လမ်း “ဆိုရန် တိုဗီလာ အဆောက်အအုံ” ၌ “မြန်မာပြည် ပြန်လည်ထူထောင်ရေးလုပ်ငန်းကွန်ဖရင့်” ကို ကျင်းပခဲ့ပါကြောင်း၊ ယင်းကွန်ဖရင့်တွင် လွတ်လပ်ရေးဖခင်ကြီး ဗိုလ်ချုပ်အောင်ဆန်းက “လူအများအတွက် အရေးကြီးသည့် စာအုပ်တွေ၊ အသုံးကျမည့် စာအုပ်တွေကို ပုံနှိပ်ထုတ်ဝေရမယ်၊ ဘာသာပြန်ဌာနကြီးတစ်ခု ဖွင့်ရမယ်” ဟု မိန့်ခွန်းတွင် ထည့်သွင်းမြွက်ကြားခဲ့ပါ ကြောင်း။

ထို့ကြောင့် ၁၉၄၇ ခုနှစ်၊ ဩဂုတ်လတွင် “မြန်မာနိုင်ငံဘာသာပြန် စာပေအသင်း” နှင့် “စာပေဗိမာန်” ကိုစတင်တည်ထောင်ခဲ့ပါကြောင်း၊ ကမ္ဘာကို မြန်မာကသိအောင် ဘာသာပြန်စာအုပ်များ ထုတ်ဝေခဲ့သကဲ့သို့ ပြည်သူအများ ဗဟုသုတနှင့် ဉာဏ်ပညာ ဖွံ့ဖြိုးစေမည့် စာအုပ်စာပေများကိုလည်း ထုတ်ဝေခဲ့ပါကြောင်း၊ ထို့ပြင် မြန်မာစာပေ ဖွံ့ဖြိုးရေးအတွက် စာပေဆုများ ချီးမြှင့်သည့်လုပ်ငန်းကိုပါ ဆောင်ရွက်လာခဲ့ပါကြောင်း၊ ၁၉၄၈ ခုနှစ်တွင် “ စာပေဗိမာန်ကာလပေါ်ဝတ္ထုဆု ” ကို စတင်ချီးမြှင့်ခဲ့ပါကြောင်း၊ “စာပေဗိမာန်ဆု”၊ “အနုပညာစာပေဆိုင်ရာဆု”၊ “ အမျိုးသားစာပေ ဆု” စသည်ဖြင့် ဆုအမည်ကို ပုံသဏ္ဌာန်အမျိုးမျိုး ပြောင်းလဲချီးမြှင့်ခဲ့ပါကြောင်း၊ ဆုချီးမြှင့်မည့် ဘာသာရပ်များကိုလည်း တိုးတက်ချီးမြှင့်ခဲ့သည်မှာ ၂၀၂၀ ပြည့်နှစ် အတွက် အမျိုးသား စာပေဆုတွင် ဆုချီးမြှင့်မည့် ဘာသာရပ် (၁၉)မျိုးအထိ ရှိလာခဲ့ပြီဖြစ်ပါကြောင်း၊ ထို့အပြင် မြန်မာစာပေအကျိုးကို တစ်သက်တာလုံး အားထုတ်ကြိုးပမ်း ဆောင်ရွက်ခဲ့ပြီး တစိုက်မတ်မတ် စာပေရေးသားပြုစုခဲ့သည့် စာပေပညာရှင်ကြီးများကို အသိအမှတ်ပြု ချီးမြှောက်သည့်အနေဖြင့် “အမျိုးသား စာပေတစ်သက်တာဆု” ကို ၂၀၀၁ ခုနှစ်တွင် စတင်ပြီးချီးမြှင့်ခဲ့ပါကြောင်း။

 

 

 

 

ထို့ပြင် အကြောင်းအမျိုးမျိုးကြောင့် ပုံနှိပ်ထုတ်ဝေခြင်း မပြုနိုင်သည့် ကလောင်ရှင်များ၏ စာမူကောင်းများကို စာအုပ်ဖြစ်စေရန်ရည်ရွယ်ပြီး ပြိုင်ပွဲဝင်စနစ်ဖြင့် “စာပေဗိမာန်စာမူဆု” အဖြစ်ရွေးချယ်ကာ ဘာသာရပ် ၁၃ မျိုးအထိ ဆုချီးမြှင့်နိုင်ခဲ့ ပြီဖြစ်ပါကြောင်း၊ ယခုနှစ်တွင် နိုင်ငံတော်စီမံအုပ်ချုပ်ရေးကောင်စီအစိုးရ၏ စေတနာဖြင့် စာပေပညာရှင်ကြီးများကို ဂုဏ်ပြုချီးမြှောက်လိုမှု၊ စာပေပညာရှင်ကြီးများ၏ လူမှုဘဝပိုမိုဖူလုံစေမှုတို့ဖြင့် ဆုချီးမြှင့်ငွေများကို ယနေ့ ဆုနှင်းသဘင်တွင် ပိုမိုတိုးမြင့် ချီးမြှင့်သွားမည် ဖြစ်ပါကြောင်း၊  ယခင်က အမျိုးသားစာပေတစ်သက်တာဆုကို ငွေကျပ်သိန်း ၅၀ ချီးမြှင့်ခဲ့ရာမှ ယခုနှစ်တွင် ငွေကျပ်သိန်း ၁၀၀ ချီးမြှင့်မှာဖြစ်ပြီး အမျိုးသားစာပေဆုတွင် ယခင်က ငွေကျပ် ၂၅ သိန်း ချီးမြှင့်ရာမှ ယခုနှစ်တွင် ငွေကျပ်သိန်း ၃၀ အထိ တိုးမြှင့်ပြီး လည်းကောင်း၊ စာပေဗိမာန် စာမူဆုများကိုလည်း ပထမဆု ငွေကျပ် ၁၀ သိန်း၊ ဒုတိယဆု ငွေကျပ် ၇ သိန်း၊ တတိယဆု ငွေကျပ် ၅ သိန်းမှ ယခုပထမဆု ငွေကျပ် ၁၅ သိန်း၊ ဒုတိယဆု ငွေကျပ် ၁၀ သိန်း၊ တတိယဆု ငွေကျပ် ၇ သိန်း တိုးတက်ချီးမြှင့်သွားမည်ဖြစ်ပါကြောင်း၊ စာပေလောကသားများ အားလုံး ကြည်နူးဝမ်းမြောက်ကြမည်ဟုလည်း မျှော်လင့်ပါကြောင်း။

စာပေဆုများကို ရွေးချယ်ရာတွင်လည်း စာပေအတွေ့အကြုံပြည့်ဝသည့် ပညာရှင်ကြီး(၂၈)ဦး ပါဝင်သည့် အမျိုးသားစာပေဆု စိစစ်ရွေးချယ်ရေးကော်မတီ၊ ပညာရှင်(၂၄)ဦး ပါဝင်သည့် စာပေဗိမာန်စာမူဆု ရွေးချယ်ရေးအဖွဲ့တို့ကို ဖွဲ့စည်းပေးခဲ့ပါကြောင်း၊ အမှန်တကယ် ထိုက်တန်သော စာအုပ်များ၊ စာမူများကိုရွေးချယ် ချီးမြှင့်နိုင်ရန် ပဏာမအဆင့်၊ ဆန်ခါတင်အဆင့်၊ အတည်ပြုအဆင့်ဆိုပြီး ပညာရှင်များက အဆင့်ဆင့် စိစစ်ရွေးချယ်ခဲ့ကြသည်ကို တွေ့ရပါကြောင်း၊ ယနေ့အခမ်းအနားတွင် အမျိုးသားစာပေဆု အတွက် ၂၀၂၀ ပြည့်နှစ်အတွင်း ပထမအကြိမ် ပုံနှိပ်ထုတ်ဝေခဲ့သည့် စာအုပ်ပေါင်း ၁၁၂၂ အုပ်အတွင်းမှ ဘာသာရပ် ၁၉ ခုအနက် ဘာသာရပ် (၁၂) ခု၊ စာပေဗိမာန်စာမူဆုတွင် ပြိုင်ပွဲဝင်စာမူ ၂၅၉ စောင်အတွင်းမှ ဘာသာရပ် ၁၃ ခုအနက် ဆုချီးမြှင့်ရန် ထိုက်တန်သည့် စာမူပေါင်း ၂၇ ခုကို ဆုများချီးမြှင့်သွားမည်ဖြစ်ပါကြောင်း။

 

 

 

 

စာပေ၊ ရုပ်ရှင်၊ ဂီတ၊ သဘင်စသည့် အနုပညာအဖွဲ့အစည်းများသည် ခေတ်အဆက်ဆက်၊ အစိုးရအဆက်ဆက် ပြောင်းလဲခဲ့ချိန်တွင်လည်း အစိုးရ၏ မူဝါဒအပေါ်မူတည်ပြီး နိုင်ငံတိုးတက်ရေးအတွက် ဆောင်ရွက်ခဲ့ကြသည်ကို တွေ့ရပါကြောင်း၊ အနုပညာရှင်ဆိုသည်မှာ ပြည်သူများအားလုံး၏ စိတ်ခံစားမှုများကို တက်ကြွအောင် ဆောင်ရွက်ပေးပြီး ခေတ်ရေစီးကြောင်းတွင် ပါဝင်လာအောင် ဆောင်ရွက်ပေးနိုင်ကြသူများ ဖြစ်ပါကြောင်း၊ ပြည်သူလူထုကို အသိပညာပေးခြင်း၊ ဖျော်ဖြေမှုရသပေးခြင်းများနှင့်အတူ မြန်မာ့ရိုးရာယဉ်ကျေးမှုနှင့် အမျိုးသားရေးစရိုက်လက္ခဏာများကို ထိန်းသိမ်းပြီး နိုင်ငံ၏ ရေစီးကြောင်းပေါ်တွင်ပါလာအောင် စည်းရုံးလှုံ့ဆော် နိုင်ခဲ့ကြသူများဖြစ်ပါကြောင်း။

လွန်ခဲ့သည့် နိုဝင်ဘာ ၁ ရက်က စာပေ၊ ရုပ်ရှင်၊ သဘင်၊ ဂီတအနုပညာ ရပ်ဝန်းအသီးသီးမှ အနုပညာရှင်များနှင့် တွေ့ဆုံအားပေးခဲ့ပြီး စားသောက်ဖွယ်ရာများနှင့် ရန်ပုံငွေကျပ်သိန်း ၄၀၀၀ ကို မတည်ငွေအဖြစ် ပေးအပ်ထောက်ပံ့ခဲ့ပါကြောင်း၊ အနုပညာရှင်များအပေါ် ထားရှိသည့် နိုင်ငံတော်၏ စေတနာနှင့် အလေးထားမှုကို ဖော်ပြခဲ့ခြင်းလည်း ဖြစ်ပါကြောင်း၊မိမိတို့ ဦးတည်ဆောင်ရွက်နေသည့် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်နိုင်ရေးတွင် စွမ်းရည်ထက်မြက်သည့် လူချွန်လူမွန်များ၊ အရည်အချင်းနှင့် အရည်အသွေးပြည့်ဝသည့် လူငယ်များကို မွေးထုတ်ပေးနိုင်ရန်လိုအပ်ပါကြောင်း၊ နိုင်ငံ၏ မျိုးဆက်သစ်လူငယ်များ၏ နှလုံးရည်၊ ဉာဏ်ရည်များ မှန်ကန်စွာဖွံ့ဖြိုးရေးအတွက် စာပေလေ့လာဖတ်ရှုမှု အလေ့ အထကို တိုးမြှင့်ပေးရန် လိုအပ်ပါကြောင်း၊ လူငယ်များ စာပေလေ့လာမှုနှုန်း မြင့်မား လာသည်နှင့်အမျှ ခေတ်မီလူ့စွမ်းအားအရင်းအမြစ်များ ပြည့်စုံကြွယ်ဝလာမည် ဖြစ်ပါ ကြောင်း။

မိမိတို့၏ နိုင်ငံသူနိုင်ငံသားများ စာပေလေ့လာဖတ်ရှုမှု အရှိန်အဟုန် မြင့်မားလာစေရန်အတွက် စာကြည့်တိုက်များကိုလည်း ခေတ်မီဖွံ့ဖြိုးအောင် ဆောင်ရွက်ရန် လိုအပ်ပါကြောင်း၊ စာကြည့်တိုက်မှတစ်ဆင့် သမိုင်းဆိုင်ရာများ၊ ဘာသာရပ်ပိုင်း ဆိုင်ရာများ၊ လူမှုအသိုင်းအဝိုင်းဆိုင်ရာ ဗဟုသုတများကိုပေးစွမ်းနိုင်သည့်အတွက် စာကြည့်တိုက်များတွင် စာကောင်းပေမွန်များ ပြည့်စုံအောင်ထားရှိရန် လိုအပ်သကဲ့သို့ စာဖတ်သူများ လွယ်ကူစွာလေ့လာဖတ်ရှုနိုင်ရေး၊ စာအုပ်စာတမ်းများ ရေရှည်တည်တံ့စွာ ထိန်းသိမ်းနိုင်ရေးတို့ကို နည်းပညာအကူအညီနှင့်  ဆောင်ရွက်သွားကြရန် သက်ဆိုင်ရာ ဝန်ကြီးဌာနများက ဖြည့်ဆည်းကူညီဆောင်ရွက်လျက်ရှိပါကြောင်း။

 

 

 

 

နိုင်ငံ့သမိုင်းရေစီးကြောင်းတွင် စာပေပညာရှင်ကြီးများသည် နိုင်ငံတိုးတက်ဖွံ့ဖြိုးရေး လုပ်ငန်းစဉ်များတွင် ခေတ်၏ လိုအပ်ချက်အတိုင်း ကလောင်လက်နက်ဖြင့် အင်တိုက်အားတိုက် ပါဝင်ကြိုးပမ်းခဲ့ကြသည်ကို အထင်အရှားတွေ့ရပါကြောင်း၊ နိုင်ငံသူ/နိုင်ငံသားများ အတွေးအခေါ်မှန်ကန်စေရန်၊ နည်းလမ်းမှန်ကန်သောအသိဉာဏ် ဗဟုသုတတိုးပွားစေရန်၊ အကျင့်စာရိတ္တနှင့် ကိုယ်ကျင့်တရား ကောင်းမွန်စေရန်၊ လူသားအရင်းအမြစ် အရည်အသွေးတိုးတက် တောက်ပြောင်စေရန် “စာပေ” အားဖြင့် ထိန်းကျောင်းတည့်မတ်ပေးသွားရမည်ဖြစ်ပါကြောင်း၊ ထို့ကြောင့် စာပေပညာရှင်များ၊ စာရေးဆရာများကလည်း နိုင်ငံတိုးတက်ဖွံ့ဖြိုးရေးလုပ်ငန်းစဉ်များတွင် တစ်တပ် တစ်အား ပါဝင်ကြရန် နှိုးဆော်တိုက်တွန်းလိုပါကြောင်း။

ကမ္ဘာပေါ်တွင်ရှိသည့် မည်သည့်နိုင်ငံ၊ မည်သည့်လူမျိုးမဆို စာပေနှင့်ယဉ်ကျေးမှုကို အထူးတန်ဖိုးထားကြရပါကြောင်း၊ တစ်နိုင်ငံနှင့်တစ်နိုင်ငံ ကူးလူးဆက်ဆံမှုမှ စာပေယဉ်ကျေးမှုများ ဖလှယ်နိုင်ပြီး စာပေမှတစ်ဆင့် ဘာသာရေး၊ စီးပွားရေး၊ ယဉ်ကျေးမှု စသည်တို့ ပြန့်ပွားဖလှယ်နိုင်ကြသည်ကိုလည်း တွေ့ရမည်ဖြစ်ပါကြောင်း၊ မြန်မာစာဆိုကြီးများသည် နိုင်ငံချစ်စိတ်၊ မျိုးချစ်စိတ်ဖြင့် ရေးခဲ့သည့်စာပေများ ပေါ်ပေါက်ခဲ့ခြင်းကြောင့် မြန်မာနိုင်ငံသည် ခေတ်ကာလအမျိုးမျိုးကြားကနိုင်ငံရေးစနစ်များ မည်သို့ပင်ပြောင်းစေကာမူ ကမ္ဘာ့အလယ်တွင် စာပေယဉ်ကျေးမှု ဖွံ့ဖြိုးတိုးတက်သည့် နိုင်ငံအဖြစ် ရပ်တည်နိုင်ခဲ့ပါကြောင်း၊       မိမိတို့ခေတ်၊ နောင်မျိုးဆက်သစ်များ၏ ခေတ်တွင်လည်း တန်ဖိုးမဖြတ်နိုင်သည့် ဤမွန်မြတ်သည့် အစဉ်အလာများကို ဆက်လက်ထိန်းသိမ်းရန် တာဝန်ရှိသကဲ့သို့ နှိုးဆော်မှုများ၊ ရေးသားစပ်ဆိုမှုများကို စာပေပညာရှင်များ၊ စာပေသုတေသီများက မျိုးဆက်သစ် ကလောင်ရှင်များကို စေတနာကောင်းနှင့် လက်ဆင့်ကမ်းခဲ့ကြရန် တိုက်တွန်းလိုပါကြောင်း၊ ထပ်မံဖော်ထုတ် ထိန်းသိမ်းရမည့် မြန်မာမှု၊ မြန်မာ့အတွေးအမြင်၊ မြန်မာ့ယဉ်ကျေးမှုများကို ဆက်လက် ဖော်ထုတ်တင်ပြနိုင်ကြပါစေရန်လည်း နှိုးဆော်အပ်ပါကြောင်း။

 

 

 

 

ယနေ့ဆုချီးမြှင့်ခံခဲ့ကြရသည့် စာပေပညာရှင်ကြီးများကလည်း အမျိုးဘာသာ သာသနာ ကောင်းကျိုးကို သယ်ပိုးဆောင်ရွက်နိုင်သည့် နိုင်ငံ၏ပုံရိပ်ကို မြှင့်တင်ဖော်ပြနိုင်သည့် စာကောင်းပေမွန်များကို ဆက်လက်ရေးသားဖွဲ့ဆိုနိုင်ကြပါစေ၊ ကိုယ်စိတ်နှစ်ဖြာ ကျန်းမာချမ်းသာ ကြပါစေဟု ဆုမွန်ကောင်းတောင်းအပ်ပါကြောင်း။

ယနေ့အခမ်းအနားသို့ တက်ရောက်လာကြသည့် စာပေပညာရှင်ကြီးများ၊ စာပေဆုရရှိသူများ၊ အထူးသဖြင့် ယခုကဲ့သို့ စာပေဆုများ အောင်မြင်စွာ ချီးမြှင့်နိုင် စေရန်အချိန်ကုန်၊ လူအားစိုက်ထုတ်ပြီး စာပေစေတနာ အပြည့်အဝဖြင့် ဆောင်ရွက် ပေးခဲ့ကြသည့် အမျိုးသားစာပေဆု စိစစ်ရွေးချယ်ရေးကော်မတီနှင့် စာပေဗိမာန်စာမူဆု စိစစ်ရွေးချယ်ရေး အဖွဲ့တို့မှ ဥက္ကဋ္ဌများ၊ အဖွဲ့ဝင်များ၊ ပညာရှင်များ အားလုံးကို အထူးကျေးဇူးတင်ရှိပါကြောင်းနှင့် မြန်မာစာပေလောက ခိုင်မြဲစည်ပင်ဖွံ့ဖြိုးရေးအတွက် ဆက်လက်ပါဝင်ကူညီပေးကြရန် မေတ္တာရပ်ခံအပ်ပါကြောင်းပြောကြားသည်။

ထို့နောက် နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ၂၀၂၀ ပြည့်နှစ် အမျိုးသားစာပေတစ်သက်တာဆု ရရှိသူများဖြစ်သည့် ဆရာကြီး ဦးမောင်မောင်လတ်(နောင်)၊ ဆရာကြီး ဦးစိန်လှိုင် (သူရဇော်)နှင့် ဆရာမကြီး ဒေါ်ချိုချိုတင်(မစန္ဒာ)တို့ကိုလည်းကောင်း၊ အမျိုးသား စာပေဆုရရှိသူများဖြစ်ကြသည့် ဝတ္ထုရှည်ဆုရ “ပျောက်ဆုံးသွားသော နှင်းစက်များ (သို့မဟုတ်)နှင်းစက်ပုံပြင်” စာအုပ်ကိုရေးသားသူ ဆရာမ မခြူးပွင့်၊ ဂန္တဝင်ကဗျာဆုရ “မြင်းမိုရ်စိတ်ကူး ကဗျာများ” စာအုပ်ကိုရေးသားသူ ဆရာ ချစ်စုအောင်နှင့် မြန်မာ့ယဉ်ကျေးမှုနှင့် အနုပညာဆိုင်ရာဆုရ “ရှေးဟောင်းယဉ်ကျေးမှု အစဉ်အလာ အမွေအနှစ် တက္ကသိုလ်ပညာသင်ကြားခဲ့ရာများ” စာအုပ်ကိုရေးသားသူ ဆရာနိုင်ဇော် တို့ကိုလည်းကောင်း ဆုများကို ပေးအပ်ချီးမြှင့်ရာ ဆုရရှိသူများနှင့် ၎င်းတို့၏မိသားစု ဝင်များက လက်ခံရယူကြသည်။

 

 

 

 

ယင်းနောက် နိုင်ငံတော်စီမံအုပ်ချုပ်ရေး ကောင်စီအဖွဲ့ဝင် မန်းငြိမ်းမောင်က အမျိုးသား စာပေဆုရရှိသူများဖြစ်ကြသည့် အင်္ဂလိပ်ဘာသာ(ရသ)ဆုရ “A Motley Collection of My Works” စာအုပ်ကို ရေးသားသူ ဆရာမ အေးဖြူ၊ စာပဒေသာဆုရ “ပါမောက္ခချုပ် ဆရာတော် ဒေါက်တာ အရှင်နန္ဒမာလာဘိဝံသ၏ ဘဝခရီးနှင့် ဓမ္မဆီမီး” စာအုပ်ကို ရေးသားသူ ဆရာ မြသန်းစံ၊ သုတပဒေသာ (အသုံးချသိပ္ပံ)ဆုရ “ကလေးကျန်းမာဖွံ့ဖြိုးရေး၊ နိုင်ငံတိုးတက်မှုနှင့် ခဲဆိပ်အန္တရာယ်” စာအုပ်ကို ရေးသားသူ ဆရာ ဒေါက်တာ ဦးလှကြည်(ကလေးကျန်းမာရေး)၊ ဘာသာ ပြန်(သုတ)ဆုရ “ပစ်မှတ်” စာအုပ်ကို ရေးသားသူ ဆရာ ရဲမင်းဝင်း၊ နိုင်ငံရေးစာပေဆုရ “ဗိုလ်ချုပ်အောင်ဆန်း၏ နိုင်ငံရေး သဘောတရား အမြင်များ” စာအုပ်ကိုရေးသားသူ ဆရာမ မနွဲ့ရီ(မဟာဝိဇ္ဇာ)နှင့် သုတပဒေသာ(ဝိဇ္ဇာ)ဆုရ “စာပေပင်လယ်ထဲက ကဗျာလှိုင်းကလေး” စာအုပ်ကို ရေးသားသူ ဆရာ ဒေါက်တာ အောင်မြင့်ဦး တို့ကို ဆုများပေးအပ်ချီးမြှင့်ရာ ဆုရရှိသူများနှင့် ၎င်းတို့၏ မိသားစုဝင်များက လက်ခံရယူကြသည်။

ထို့နောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါ်အေးနုစိန်က အမျိုးသားစာပေဆု ရရှိသူများဖြစ်ကြသည့် အင်္ဂလိပ်ဘာသာ(သုတ)ဆုရ “Papers from My Shoulder Bag” စာအုပ်ကို ရေးသားသူ ဆရာ စည်သူ ဒေါက်တာ သော်ကောင်း၊ ခေတ်ပေါ်ကဗျာဆုရ “ဒီနေ့ပန်းတွေပွင့်တယ်” စာအုပ်ကိုရေးသားသူ ဆရာ အောင်ကောင်းမြစ်နှင့် ရသစာတမ်း( အက်ဆေး)ဆုရ “မြို့ကလေးရဲ့ အော်ပရာ အက်ဆေးများ” စာအုပ်ကို ရေးသားသူ ဆရာ နိုင်ဝင်းသီ တို့ကိုလည်းကောင်း၊ စာပေဗိမာန်စာမူဆုရသူများဖြစ်ကြသည့် ဝတ္ထုရှည် ပထမဆုရ “မလင်း ဘယ်ခါရှိပါ့မယ်”  စာမူကို ရေးသားသူ ဆရာ ညိမ်းညို၊ ဝတ္ထုရှည် ဒုတိယဆုရ “မေတ္တာရှိရင်းစွဲမို့ လွဲနိုင်ပါဘူးရှင်” စာမူကို ရေးသားသူ ဆရာကံမြင့်မော်နှင့် ဝတ္ထုရှည် တတိယဆုရ “လေဆန်သည့်ငှက်၊ လှိုင်းထက်ကလှေ” စာမူကို ရေးသားသူ ဆရာတင်လင်းဇော် တို့ကိုလည်းကောင်း ဆုများကိုပေးအပ်ချီးမြှင့်ရာ ဆုရရှိသူများနှင့် ၎င်းတို့၏ မိသားစုဝင်များက လက်ခံရယူကြသည်။

 

 

 

 

ယင်းနောက် ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း က စာပေဗိမာန်စာမူဆု ရရှိသူများဖြစ်ကြသည့် ဝတ္ထုတိုပေါင်းချုပ် ပထမဆုရ “ဖားဝိဇ္ဇာနှင့် ကျေးရွာအလှဝတ္ထုတိုများ” စာမူကိုရေးသားသူ ဆရာသိန်းဇော်(ရွှေလီဦး)၊ ဝတ္ထုတို ပေါင်းချုပ် ဒုတိယဆုရ “မိုးယံထက်က အလှပန်းများနှင့် အခြားဝတ္ထုတိုများ” စာမူကို ရေးသားသူ ဆရာမင်းလပြည့်(ဟားခါး)၊ ဝတ္ထုတို ပေါင်းချုပ် တတိယဆုရ “ပဲ့ကိုင်ရှင် တို့၏ နှလုံးသားအလှနှင့် ဝတ္ထုတိုများစုစည်းမှု” စာမူကိုရေးသားသူ ဆရာ တင်တော်၊ ကဗျာပေါင်းချုပ် ပထမဆုရ “ရာသီမြုံလုံးချင်း ကဗျာများ” စာမူကို ရေးသားသူ ဆရာ ကောင်းနွဲ့၊ ကဗျာပေါင်းချုပ် ဒုတိယဆုရ “မြန်မာဂန္ထဝင်ရနံ့ လက်ရွေးစင်ကဗျာများ” စာမူကို ရေးသားသူ ဆရာကျော်သက်ခိုင်(မုံရွာ)နှင့် ကဗျာပေါင်းချုပ် တတိယဆုရ “နေနှင့်လမင်း အလင်းသစ္စာ ကဗျာများ” စာမူကို ရေးသားသူ ဆရာကနောင် နိုင်နွယ်ဦး တို့ကို ဆုများပေးအပ်ချီးမြှင့်ရာ ဆုရရှိသူများနှင့် ၎င်းတို့၏ မိသားစုဝင်များက လက်ခံရယူကြသည်။

ထို့နောက် သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး ဦးကိုကိုက စာပေဗိမာန်စာမူဆုရရှိသူများဖြစ်ကြသည့် စာပဒေသာ ပထမဆုရ “ဆိုင်းဂီတဖြင့် တိုင်းပြည်အလှဆင်ခြင်း(သို့)အလင်္ကာကျော်စွာ စိန်စတင်း”စာမူကို ရေးသားသူ ဆရာ မြေလတ် မင်းလွင်၊ စာပဒေသာ ဒုတိယဆုရ “ဆည်းဆာရသ စာတမ်းများ” စာမူကို ရေးသားသူ ဆရာ ဇာတ်ညွှန်းအကယ်ဒမီ ကိုကိုလေး၊ စာပဒေသာ တတိယဆုရ “နာပေါင်းကုဋေ ဆရာမြေဝယ်” စာမူကို ရေးသားသူ ဆရာမနန္ဒခင် (သက္ကလမြေ)၊ မြန်မာ့ယဉ်ကျေးမှုနှင့် အနုပညာဆိုင်ရာစာပေ ပထမဆုရ “မြန်မာနိုင်ငံအတွင်းရှိ အရှေ့ပိုးကရင်လူမျိုးတို့၏ ယဉ်ကျေးမှုဓလေ့ထုံးစံနှင့်စာပေ” စာမူကို ရေးသားသူ အရှင်ပညာသာမိ၊ မြန်မာ့ယဉ်ကျေးမှုနှင့် အနုပညာဆိုင်ရာ စာပေဒုတိယဆုရ “ကွက်စိပ် ဗေဒသုခုမ” စာမူကိုရေးသားသူ ဆရာမင်းသျှင်အောင် (တွံတေး)နှင့် မြန်မာ့ယဉ်ကျေးမှုနှင့် အနုပညာဆိုင်ရာ စာပေတတိယဆုရ “မြန်မာ့ယဉ်ကျေးမှု ဆယ့်နှစ်လရာသီ ဓလေ့ထုံးစဉ်လာ” စာမူကို ရေးသားသူ ဆရာအောင်စိုး (တိရစ္ဆာန်ဆေးကုဆရာဝန်) တို့ကို ဆုများပေးအပ်ချီးမြှင့်ရာ ဆုရရှိသူများနှင့် ၎င်းတို့၏ မိသားစုဝင်များက လက်ခံရယူကြသည်။

ယင်းနောက် သိပ္ပံနှင့် နည်းပညာဝန်ကြီးဌာန၊ ပြည်ထောင်စုဝန်ကြီး ဒေါက်တာ မျိုးသိန်းကျော် က စာပေဗိမာန်စာမူဆုရရှိသူများဖြစ်ကြသည့် သုတပဒေသာ(ဝိဇ္ဇာ) ပထမဆုရ “ဒွတ္တပေါင်မင်းကြီးနှင့် ကမ္ဘာ့အမွေအနှစ်စာရင်းဝင် သရေခေတ္တရာ” စာမူကိုရေးသားသူ ဆရာမ ယဉ်ယဉ်မွန်(ရှေးဟောင်းသုတေသန)၊ သုတပဒေသာ (ဝိဇ္ဇာ) ဒုတိယဆုရ “မြန်မာ့သုတ ပညာရေးမှတ်တိုင်များ” စာမူကို ရေးသားသူ ဆရာ ဦးညွန့်ဝေ(ဘီအေ ဘီအီးဒီ)၊ သုတပဒေသာ(ဝိဇ္ဇာ) တတိယဆုရ “ပအိုဝ်းရိုးရာ ဒုံးလွှတ်ခြင်းဓလေ့နှင့် ဗမာဒုံးချင်း ကဗျာများ”စာမူကို ရေးသားသူ ဆရာလွင်မြန်မာ(မန်းတက္ကသိုလ်)၊ သုတပဒေသာ (ရိုးရိုးသိပ္ပံနှင့် အသုံးချသိပ္ပံ) ပထမဆုရ “အရိပ်ရပင်နှင့် ပန်းအလှပင်များ”စာမူကို ရေးသားသူ ဆရာ အောင်စိုး(စိုက်ပျိုး/၁၀၇)၊ သုတပဒေသာ (ရိုးရိုးသိပ္ပံနှင့်အသုံးချသိပ္ပံ)ဒုတိယဆုရ “သက်စွန့်ဆံဖျား တောင်တက်ခြင်းအားကစား” စာမူကို ရေးသားသူ ဆရာမ ဆွေဆွေအုန်း(ရန်ကုန်တက္ကသိုလ်)နှင့် သုတပဒေသာ (ရိုးရိုးသိပ္ပံနှင့် အသုံးချသိပ္ပံ) တတိယဆုရ “သားရေခွာရုပ်လုံးသွင်း အတတ်ပညာ မိတ်ဆက်”စာမူကို ရေးသားသူ ဆရာကိုတူး(သာယာမြိုင်) တို့ကို ဆုများပေးအပ် ချီးမြှင့်ရာ ဆုရရှိသူများနှင့် ၎င်းတို့၏မိသားစုဝင်များက လက်ခံရယူကြသည်။

ထို့နောက် အားကစားနှင့် လူငယ်ရေးရာဝန်ကြီးဌာန၊ ပြည်ထောင်စုဝန်ကြီး ဦးမင်းသိန်းဇံ က စာပေဗိမာန်စာမူဆုရရှိသူများဖြစ်ကြသည့် ကလေးစာပေ ပထမဆုရ “မြန်မာ့မေတ္တာစွမ်း ကမ္ဘာကိုလွှမ်းစေရမည်နှင့် ကလေးဝတ္ထုတိုများ” စာမူကို ရေးသားသူ ဆရာမ ဝတ်ရည်ခင်(ပဲခူး)၊ ကလေးစာပေ ဒုတိယဆုရ “ဖူးစီဝေလန်း ရောင်စုံပန်း ကလေး ကဗျာများ” စာမူကိုရေးသားသူ ဆရာမ သက်ဦးခင်၊ ကလေးစာပေ တတိယဆုရ “တို့လေးလေးစားစား သီဆိုမယ်နှင့် အခြားဝတ္ထုတိုများ” စာမူကိုရေးသားသူ ဆရာညွန့်ဝင်း(နတ္တလင်း)၊ လူငယ်စာပေပထမဆုရ “ကြယ်မကြွေသောထိုကောင်းကင်” စာမူကို ရေးသားသူ ဆရာမ ယဉ်ယဉ်(ဘတ်ရဲ)၊ လူငယ်စာပေ ဒုတိယဆုရ “ပန်းတစ်ပွင့် လန်းစွင့်ခဲ့ပြီ” စာမူကို ရေးသားသူ ဆရာမ သက်ဦးခင်နှင့် လူငယ်စာပေ တတိယဆုရ “သားသို့ ပေးစာများ” စာမူကို ရေးသားသူ ဆရာနွေကံ့ကော်(မြို့လှ) တို့ကိုဆုများ ပေးအပ်ချီးမြှင့်ရာ ဆုရရှိသူများက လက်ခံရယူကြသည်။

ဆက်လက်ပြီး ဆုရရှိသူများကိုယ်စား အမျိုးသားစာပေတစ်သက်တာစာပေဆုရှင် ဆရာကြီး ဦးစိန်လှိုင်(သူရဇော်) က ကျေးဇူးတင်စကားပြောကြားရာ ယနေ့သည် စာပေသမားများအတွက် ထူးခြားသည့်နေ့တစ်နေ့ဖြစ်သည့် စာဆိုတော်နေ့ ဖြစ်ပါကြောင်း၊ ယနေ့ကျင်းပပြုလုပ်သည့် ဆုချီးမြှင့်ပွဲတွင် ဆုရရှိခဲ့သည့် စာရေးဆရာကြီးများနှင့် ဆရာမကြီးများအနေဖြင့် စာပေရေးသားမှုများကို မိမိတို့ တတ်စွမ်းသမျှ ပါဝင်ဆောင်ရွက်ခြင်းဖြင့် နိုင်ငံတော်အတွက် စာပေအသီးအပွင့်များ ဝေဝေဆာဆာ ဖူးပွင့်လာနိုင်ရေးအတွက် တစ်ဖက်တစ်လမ်းမှ ဆောင်ရွက်နိုင်ခဲ့ပြီဖြစ်ပါကြောင်း၊ ယခုအခါတွင် စာပေဆိုင်ရာဆုများချီးမြှင့် ပေးအပ်ရာတွင် ဆုငွေများ တိုးတက်ပေးအပ်ခဲ့သည့်အတွက် စာပေပညာရှင်များအတွက် ချီးမြှင့်ပေးမှုပင်ဖြစ်ကြောင်း၊ ယခုကဲ့သို့ ဆုများကိုပေးအပ်ချီးမြှင့်မှုအတွက်   နိုင်ငံတော်အကြီးအကဲများနှင့် တာဝန်ရှိသူများအား ကျေးဇူးတင်ရှိပါကြောင်းဖြင့် ပြောကြားသည်။

ထို့နောက် ခေတ်အဆက်ဆက် မြန်မာစာပေဖွံ့ဖြိုးတိုးတက်လာမှုနှင့် နိုင်ငံတော်အစိုးရက ကဏ္ဍပေါင်းစုံမှ ပံ့ပိုးဆောင်ရွက်ပေးခဲ့မှုအခြေအနေများနှင့် ပတ်သက်သည့် Video Clip ကို ပြသသည်။

ယင်းနောက် နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် ၂၀၂၀ ပြည့်နှစ် အမျိုးသားစာပေတစ်သက်တာဆု၊ အမျိုးသား စာပေဆုနှင့် စာပေဗိမာန်စာမူဆု ရရှိကြသူများနှင့် စုပေါင်းမှတ်တမ်းတင်ဓာတ်ပုံရိုက်ကြပြီး ဆုရရှိသည့် စာရေးဆရာကြီးများနှင့် ဆရာမကြီးများ၊ မိသားစုဝင်များအား နေ့လယ်စာဖြင့် တည်ခင်းဧည့်ခံခဲ့ကြောင်း သတင်းရရှိသည်။

(သတင်းစဉ်)