နမ့်ဆန် ၉ စက်တင်ဘာ
ရှမ်းပြည်နယ် (မြောက်ပိုင်း) ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ်၌ မြို့နယ်ကြက်ခြေနီအသင်း သူနာပြုတပ်ဖွဲ့နှင့် ပညာရေးဌာနမှပူးပေါင်း၍ အထက်တန်းဆင့် ကျောင်းသား ကျောင်းသူများအား Myanmar Red Cross Society (အခြေခံ) ရှေးဦးပြုစုခြင်း သင်တန်းကို ယမန်နေ့က အထက(၁)ကျောင်း၌ ဖွင့်လှစ်သည်။
သင်တန်းကို မြို့နယ်ကြက်ခြေနီသူနာပြုတပ်ဖွဲ့များက ကြက်ခြေနီအကြောင်း သိကောင်းစရာများ၊ ကြက်ခြေနီအခြေခံမူ(၇)ချက်၊ ရှေးဦးပြုစုခြင်းဆိုင်ရာအခြေခံသဘောတရားများ၊ လူနာဆန်းစစ်ခြင်း၊ ဒဏ်ရာနှင့်သွေးယိုစီးခြင်း၊ အပူလောင်ခြင်း၊ သွေးဆုတ်သွေးလန့်ခြင်း၊ ဆေးထည့်ခြင်း နှင့် ပတ်တီးစည်းခြင်း၊ အရိုးအဆစ်၊ ဇက်ကြောနှင့်ကြွက်သားများ ထိခိုက်ဒဏ်ရာရခြင်း စသည့် ရှေးဦးပြုစုခြင်းဆိုင်ရာ သင်ခန်းစာများတို့ကို (၃)ရက်တိတိ စာတွေ့လက်တွေ့ သင်ကြားပြသပို့ချသွား မည်ဖြစ်သည်။
အလားတူ(အခြေခံ)ရှေးဦးပြုစုခြင်း သင်တန်းကို အလက(၁) ထခွဲကျောင်း၊ အမေ့အိမ်ကိုယ်ပိုင်အကျောင်း၊ အထက(၂)ကျောင်းတို့တွင်လည်း သင်ကြားပို့ချ သွားမည်ဖြစ်ကြောင်း ကြက်ခြေနီသူနာပြုတပ်ဖွဲ့များထံမှသိရသည်။
ကိုအောင်မိုး (ရွှေဖီမြေ)
