နမ့်ဆန် ၆ မတ်
ရှမ်းပြည်နယ် ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ် မဟာမြတ်မုနိဘုရား ကုန်းပေါ်တွင် ကျင်းပမည့် (၆၀)ကြိမ်မြောက် ဗုဒ္ဓပူဇနိယ တပေါင်းပွဲတော်အတွက် ဆွမ်းတော်ကြီး လှည့်လည် အလှူခံပွဲကို ယနေ့ နံနက်(၉)နာရီတွင် ဂေါပက အဖွဲ့ဝင်များ၊ ရပ်မိရပ်ဖများတို့က နမ့်ဆန်မြို့ပေါ်၌ စုပေါင်းလှည့်လည်ခဲ့ကြောင်း သိရသည်။
အကြိမ် (၆၀) မြောက် ကျင်းပမည့် တပေါင်းပွဲတော်ကြီးကို နှစ်စဉ်တပေါင်းလဆန်း (၁၂) ရက်နေ့ မှ တပေါင်းလပြည့်နေ့အထိ ကျင်းပလေ့ရှိပြီး အဆိုပါပွဲတော်တွင် အနယ်နယ်အရပ်ရပ်မှ ဘုရားဖူးသူများ၊ ဈေးရောင်း/ဈေးဝယ်သူများဖြင့် အလွန်စည်ကားလျှက်ရှိသည်။ သို့သော်ယခုနှစ်တွင် ကမ္ဘာတစ်ဝန်း ဖြစ်ပွားသည့် ကပ်ရောဂါ ကိုရိုနာဗိုင်းရပ်စ်ကြောင့် ကျန်းမာရေးဝန်ကြီးဌာနမှ ထုတ်ပြန်သည့် လူစုလူဝေး မလုပ်ကြရန်၊ ပွဲလမ်းသဘင် အခမ်းအနားများမပြုလုပ်ကြရန် ညွန်ကြားချက် ထုတ်ပြန်လာသဖြင့် တပေါင်းပွဲတော်ကို တပေါင်းလဆန်း (၁၄) ရက်နှင့် (၁၅) ရက်တွင်သာ ကျင်းပရန် ဆုံးဖြတ်ခဲ့ကြသည်။
ထိုနေ့များ၌ မဟာမြတ်မုနိဘုရားတွင် ရွှေဆိုင်းကပ်ခြင်း၊ အာရုဏ်ဆွမ်းကပ်လှူခြင်း ပြုလုပ်နိုင်ပြီး ဈေးရောင်း/ ဈေးဝယ်ခြင်း (၂)ရက်သာ ခွင့်ပြုပြီး ဖျော်ဖြေရေး အစီအစဉ်များကိုလည်း ထည့်သွင်းကျင်းပ တော့မည် မဟုတ်ကြောင်း မဟာမြတ်မုနိဘုရား ဂေါပကများထံမှ သိရသည်။
အောင်မိုး (နမ့်ဆန် ပြန်/ဆက်)
