နမ္မတူ စက်တင်ဘာ ၂၃
ရှမ်းပြည်နယ် (မြောက်ပိုင်း)၊ ကျောက်မဲခရိုင်၊ နမ္မတူမြို့နယ်တွင် မြို့နယ်ကိုဗစ်-၁၉ရောဂါ ကာကွယ် ထိန်းချုပ်ရေးကော်မတီနှင့် မြို့မဈေးကော်မတီတို့၏ ဆွေးနွေးဆုံဖြတ်ချက်အရ ဒေသခံပြည်သူများ စာဝတ်နေရေးအဆင်ပြေစေရေးအတွက် မြို့မဈေးနှင့် ယာယီပျံကျဈေးအား ကျန်းမာရေးဝန်ကြီးဌာန၏ ကိုဗစ်-၁၉ ရောဂါ ကာကွယ်ထိန်းချုပ်ရေး လမ်းညွှန်ချက်များနှင့်အညီ ယနေ့နံနက်ပိုင်းမှစတင်ကာ ကန့်သတ်အချိန်ဖြင့် ပြန်လည်ဖွင့်လှစ်ခွင့်ပြုခဲ့ကြောင်း သိရသည်။
ထိုသို့ ဖွင့်လှစ်ရောင်းချခွင့်ပြု ဆောင်ရွက်ရာမှာ ပန်ဟိုက်ရပ်ကွက်(၆)ရှိ ယာယီပျံကျဈေးအား နံနက် (၄) နာရီမှ နံနက် (၈)နာရီ အချိန်ထိ လည်းကောင်း၊ မြို့မဈေးကြီးအား နံနက် (၅)နာရီခွဲမှ မွန်းတည့် (၁၂)နာရီ အချိန်ထိ လည်းကောင်း ကန့်သတ်အချိန်ဖြင့် ဖွင့်လှစ်ရောင်းချခွင့်ပြုခြင်းဖြစ်ပြီး ဒေသခံပြည်သူ ဈေးရောင်းသူ/ဝယ်သူတို့အား ဈေးအတွင်းသို့မဝင်မီ လက်ဆေးစေခြင်း၊ ကိုယ်အပူချိန်တိုင်းတာပေးခြင်း၊ ပါစပ်နှင့်နှားခေါင်းစည်း (Mask)များ တပ်ဆင်စေခြင်းတို့ကို မြို့နယ်စည်ပင်သာယာရေးဦးစီးဌာန ဝန်ထမ်းများက ကြီးကြပ်ဆောင်ရွက်ပေးလျက် ရှိသည်။
ထို့အပြင် မြို့မဈေးနှင့် ယာယီပျံကျဈေးတို့တွင် ဈေးရောင်းချလျက်ရှိသော ဒေသခံပြည်သူ ဈေးရောင်းသည့် ဆိုင်ခန်းရှင်များအနေဖြင့် ဈေးဆိုင်ခန်းဧရိယာမှ ကျူးကျော်ရောင်းချခြင်းမပြုရန်၊ ကိုဗစ်-၁၉ ရောဂါ ကာကွယ်ထိန်းချုပ်ရေး စည်းကမ်းချက်များနှင့်အညီ ရောင်းချရန်၊ လိုက်နာမှုမရှိပါက ရှမ်းပြည်နယ် စည်ပင်သာယာရေးဥပဒေ၊ သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေနှင့်အညီ ထိရောက်စွာ အရေးယူဆောင်ရွက်သွားမည်ဖြစ်ကြောင်း နမ္မတူမြို့နယ် စည်ပင်သာယာရေးဦးစီးဌာနမှ ခေတ္တအမှုဆောင်အရာရှိ ဒေါ်အေးမာဝင်းထံက သိရသည်။
နမ္မတူမြို့နယ်အတွင်း ကိုဗစ်-၁၉ ရောဂါ ကူးစက်ပျံ့ပွားမှု လျော့နည်းစေရန်နှင့် ရောဂါကူးစက်မှုကို ထိထိရောက်ရောက် ကာကွယ်ရန်ရည်ရွယ်၍ အဆိုပါ မြို့မဈေးအား ဇူလိုင်လ (၁၁)ရက်နေ့မှ လည်းကောင်း၊ ယာယီပျံကျဈေးအား ဇူလိုင်လ (၁၇)ရက်နေ့မှလည်းကောင်း ခေတ္တယာယီ ပိတ်သိမ်းခဲ့ခြင်း ဖြစ်သည်။
နမ္မတူမြို့နယ်တွင် ဇွန်လ (၁၆)ရက်နေ့မှ ယနေ့နံနက်ပိုင်းအချိန်ထိ ကိုဗစ်-၁၉ပိုးတွေ့ရှိသူ ၅၆၆ဦး ရှိပြီး၊ ကျန်းမာရေးကောင်းမွန်၍ ဆေးရုံဆင်းခွင့်ရရှိသူ ၄၂၀ဦးရှိကာ၊ ၁၆ဦး သေဆုံးခဲ့ပြီး၊ ဆေးကုသဆဲ ပိုးတွေ့လူနာ ၁၃၀ ရှိကြောင်း မြို့နယ်ပြည်သူ့ကျန်းမာရေးနှင့်ကုသရေးဦးစီးဌာနမှ တာဝန်ရှိသူတစ်ဦးထံက သိရသည်။
လူမော် (ပြန်/ဆက်)
