နမ္မတူမြို့နယ်တွင် မဲရုံမှူး၊ ဒုတိယမဲရုံမှူးနှင့် မဲရုံအဖွဲ့ဝင်များ ရွေးကောက်ပွဲဆိုင်ရာ ပညာပေးသင်တန်း ဖွင့်လှစ်ပို့ချ

နမ္မတူ ၂၆ အောက်တိုဘာ

နမ္မတူမြို့နယ်တွင် ၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲကြီး အောင်မြင်စွာ ကျင်းပနိုင်ရေးအတွက် မဲရုံမှူး၊ ဒုတိယမဲရုံမှူးနှင့် မဲရုံအဖွဲ့ဝင်များအား ရွေးကောက်ပွဲ ဆိုင်ရာ ပညာပေး သင်တန်းကို ယနေ့နံနက် (၉)နာရီခန့်က ရှမ်းပြည်နယ် (မြောက်ပိုင်း)၊ ကျောက်မဲ ခရိုင်၊ နမ္မတူမြို့နယ်၊ အမှတ်(၁) အခြေခံပညာအထက်တန်းကျောင်းရှိ ပညာရောင်ခြည်ခန်းမ၌ ကျန်းမာရေး နှင့်အားကစား ဝန်ကြီးဌာန၏ လမ်းညွှန်ချက်များနှင့်အညီ ဖွင့်လှစ်ပို့ချခဲ့ကြောင်း သိရသည်။

အဆိုပါ သင်တန်းတွင် ရှေ့ဦးစွာ နမ္မတူမြို့နယ်စီမံခန့်ခွဲမှုကော်မတီဥက္ကဌ မြို့နယ်အုပ်ချုပ် ရေးမှူး ဦးထက်အောင်ဖြိုးက အမှာစကား ပြောကြားပြီး၊ မြို့နယ်ရွေးကောက်ပွဲ ကော်မရှင် အဖွဲ့ခွဲ ဥက္ကဋ္ဌ ဦးမင်းဇော်က မဲရုံမှူး၊ ဒုတိယမဲရုံမှူးနှင့် မဲရုံအဖွဲ့ဝင်များအား ရွေးကောက်ပွဲဆိုင်ရာ ပညာပေးသင်တန်း ဖွင့်လှစ်ပို့ချရခြင်း ရည်ရွယ်ချက်အား ရှင်းလင်းပြောကြား ခဲ့သည်။

ထို့နောက် သင်တန်းအား မဲရုံမှူး၏ တာဝန်နှင့်လုပ်ပိုင်ခွင့်များ၊ ဒုတိယမဲရုံမှူး၏ တာဝန်နှင့် လုပ်ပိုင်ခွင့်များ၊ မဲရုံမှူး၊ ဒုတိယမဲရုံမှူးနှင့် မဲရုံအဖွဲ့ဝင်များ ဆောင်ရွက်ရမည့် ဆောင်ရွက်ရန်နှင့် ရှောင်ကြည်ရန် အချက်များ၊ ရွေးကောက်ပွဲဆိုင်ရာ ပြစ်မှုနှင့်ပြစ်ဒဏ်များ၊ မဲပေးခြင်း၊ မဲရေတွက်ခြင်းနှင့် ရလဒ်များ ထုတ်ပြန်ကြေညာခြင်း၊ မဲရုံအဖွဲ့ဝင်များ၏ လုပ်ငန်းတာဝန် များ၊ ရွေးကောက်ပွဲဆိုင်ရာ အငြင်းပွားမှုများ ဖြေရှင်းခြင်း၊ မဲရုံဖွင့်လှစ်ရန် ကြိုတင်ပြင်ဆင်ခြင်း၊ မဲပေးမှုပုံစံများကို လက်တွေ့ သရုပ်ပြသခြင်း၊ ကျန်းမာရေးနှင့် ဘေးကင်းလုံခြုံစွာ မဲပေးနိုင်ရေး အစီအမံများအား မြို့နယ်ရွေးကောက်ပွဲ ကော်မရှင်အဖွဲ့ခွဲမှ တာဝန်ရှိသူများက ဆွေးနွေးပို့ချ ပေးခဲ့သည်။

နမ္မတူမြို့နယ်တွင် မဲရုံပေါင်း(၄၈)ရုံအတွက် မဲရုံမှူးနှင့် ဒုတိယမဲရုံမှူး တာဝန်ထမ်းဆောင်ကြမည့် ဆရာ၊ ဆရာမ (၉၆)ဦး၊ မဲရုံအတွင်းရေးမှူး (၂၃)ဦး စုစုပေါင်း (၁၁၉) ရှိပြီး မဲရုံမှူး၊ ဒုတိယမဲရုံမှူးနှင့် မဲရုံအဖွဲ့ဝင် များအား ရွေးကောက်ပွဲဆိုင်ရာ ပညာပေးသင်တန်းအား အောက်တိုဘာလ (၂၆)ရက်နေ့ နံနက်ပိုင်းတွင် နမ္မတူရပ်ကွက်၊ ပန်ဟိုက်ရပ်ကွက်၊ ကြူဆော့၊ မိုင်းတတ်၊ ဟူးဆာနှင့် ဟင်ပုတ်ကျေးရွာအုပ်စုအား လည်းကောင်း၊ နေ့လည်ပိုင်းတွင် ဘော်တွင်း၊ ဆိုက်ခေါင်၊ နမ့်တောင်ကုန်း၊ မန်စံနှင့် ပန့်ဆော့ကျေးရွာ အုပ်စုအား လည်းကောင်း၊ အောက်တိုဘာလ (၂၇)ရက်နေ့ နံနက်ပိုင်းတွင် ပန်ချင်၊ နားဆိုင်း၊ လွယ်ပြေး၊ နမ့်မျှော်၊ မိုင်းမုနှင့် ပန်လုံကျေးရွာအုပ်စုအားလည်းကောင်း၊ နေ့လည်ပိုင်းတွင် ချောင်းဆာ၊ မိုင်းရင်၊ ဝိန်းနန်၊ မန်ဆာလုံ၊ ခိုမိုနှင့် ဖာဆွမ်ကျေးရွာအုပ်စုအားလည်းကောင်း စသည်ဖြင့် အဖွဲ့ (၄)ဖွဲ့ခွဲကာ ဖွင့်လှစ်ပို့ချ ပေးမည်ဖြစ်ကြောင်း မြို့နယ်ရွေးကောက်ပွဲကော်မရှင်အဖွဲ့ခွဲ အတွင်းရေးမှူး ဒေါ်ယမင်းရွေစင်စိုးထံက သိရှိရပါသည်။

လူမော် (ပြန်/ဆက်)