နတ်မောက် ဇူလိုင် ၂၁
မကွေးတိုင်းဒေသကြီး၊ နတ်မောက်မြို့နယ်တွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် မြို့နယ်မီးသတ်ဦးစီးဌာနတို့ ပူးပေါင်း၍ ကိုဗစ်-၁၉ အသိပညာပေးအကြောင်းအရာများ အသံချဲ့စက်ဖြင့် လှည့်လည်နှိုးဆော်ခြင်းကို ယနေ့ နံနက်(၁၀)နာရီအချိန်ခန့်က မြို့ပေါ်(၇)ရပ်ကွက်သို့ လှည့်လည် ဆောင်ရွက်ခဲ့ကြောင်း သိရသည်။
ထိုသို့ဆောင်ရွက်ရာတွင် “ မိမိတို့နိုင်ငံတွင် လက်ရှိဖြစ်ပေါ်နေသော ကိုဗစ်-၁၉ ရောဂါဆိုးကြီးသည် လျင်မြန်စွာ ကူးစက်ပျံ့ပွားမှုဖြစ်နေသဖြင့် လူအများ ဒုက္ခဆင်းရဲဖြစ်ကြပြီး သေဆုံးမှု မြင့်မားလျက်ရှိပါသည်။ ထိုသို့ ကူးစက်ဖြစ်ပွားနေမှုကို လျော့နည်းစေပြီး ထိရောက်စွာ ကုသထိန်းချုပ်နိုင်ရန် အလွန်အရေးကြီးနေပြီး ပြည်သူများက ပူးပေါင်းပါဝင်ဆောင်ရွက်မှသာ ဒီရောဂါဆိုးကြီးကို လျင်မြန်စွာ အချိန်တိုအတွင်း ကာကွယ်နိုင်မှာဖြစ်ပါတယ် ” စသည်ဖြင့် မိဘပြည်သူများအား အသိပညာပန်ကြားလွှာများကို အသံချဲ့စက်ဖြင့် လှည့်လည်နှိုးဆော်ခဲ့ပါသည်။
ထို့ပြင် ကျန်းမာရေးနှင့်အားကစားဝန်ကြီးဌာန၏ ကူးစက်ရောဂါများကာကွယ်နှိမ်နင်းရေး ဥပဒေ ပုဒ်မ(၂၁) ပုဒ်ခွဲ(ခ)ပါ လုပ်ပိုင်ခွင့်အရ နတ်မောက်မြို့နယ်ကို ဇူလိုင်(၂၁)ရက်နေ့ နံနက်(၄)နာရီ အချိန်မှစ၍ Stay at Home အဖြစ် သတ်မှတ်ကြေငြာလိုက်ပြီး၊ စည်းကမ်းချက်များ လိုက်နာဆောင်ရွက်ရေး အသိပညာပေး နှိုးဆော်ခြင်းလုပ်ငန်းများကို မြို့နယ်ပြန်/ဆက်ရုံးဝန်ထမ်းများက အသံချဲ့စက်ဖြင့် နှိုးဆော်ခြင်း၊ လက်ကမ်းစာစောင်များ ဖြန့်ဝေခြင်းများကို မြို့နယ်မီးသတ်ဦးစီးဌာနနှင့် ပူးပေါင်း၍ ဆောင်ရွက်ခဲ့ကြောင်း သိရသည်။
သင်းသင်းဝေ ( နတ်မောက်)
