တက္ကသိုလ်မြတ်သူ

 

ယခင်ကာလက နိုင်ငံတကာအခြေအနေ (ကမ္ဘာ့အခြေအနေ) သည် ယခု (မျက်မှောက်ကာလ) အခြေအနေများနှင့် ထူးမခြားနားဟု ဆိုရပေမည်။ ယခင်ကာလသည် အေးချမ်းတည်ငြိမ်စွာ မိမိတို့နိုင်ငံ၊ မိမိတို့လူမျိုး ကောင်းကျိုးညီညာစွာ ဆောင်ရွက်ကြိုးပမ်းနေကြသော ကမ္ဘာ့နိုင်ငံအများစုကို အရင်းရှင်စက်မှုနိုင်ငံများမှ လောဘလွန်၊ မောဟကျွံ၊ မာနတံခွန် ထူနေကြသည့် ကမ္ဘာ့လက်တစ်ဆုပ်စာမျှသာရှိသော နယ်ချဲ့သမားများက စွက်ဖက်ကျူးကျော် တိုက်ခိုက်သိမ်းပိုက်ချုပ်ကိုင် ကုပ်သွေးစုပ် ဒုက္ခပေးခဲ့ကြသည်။ ယနေ့ခေတ် ထိုနယ်ချဲ့နိုင်ငံတွင် နောင်တ၊ သံဝေဂ၊ အသိမှန်တွေရပြီး ဥပုသ်စောင့်ကုန်ကြပြီလား။ ကမ္ဘာသူ ကမ္ဘာသား (မြန်မာများအပါအဝင်) အားလုံးက နယ်ချဲ့အုပ်စု၏ လုပ်ဆောင်နေမှု အဝဝတွင် ကမ္ဘာ့အန္တရာယ် ပို၍ပင် ဆိုးလာပါသေးတယ်ဟု ပြောပြနေကြပေပြီ။

 

မျက်မှောက်ကာလတွင် နယ်ချဲ့အုပ်စု၏ ကောက်ကျစ်ယုတ်မာသော နယ်ချဲ့လက်သစ်ဝါဒ (Neo-colonialism) ကို ဒီမိုကရေစီစကားလုံး၊ လူ့အခွင့်အရေးစကားလုံး တွင်တွင်သုံးကာ သတင်းမီဒီယာ လက်ဝါးကြီးအုပ်လုပ်ရပ်ဖြင့် တစ်ဖက်သတ် ဝါဒဖြန့်မှိုင်းတိုက်၊ ထင်ရာစိုင်းလာနေသည်ကို မွေးရာပါအကောင်းပကတိ၊ မံသစက္ခုမျက်စိဖြင့် ကြည့်သောသူတိုင်း မြင်နေကြသည်။ ကိုယ်ပိုင် သောတနားဖြင့် နားထောင်သူတိုင်း ကြားနေကြ၏။ အမေက မွေးပေးသည်ဆိုဆို၊ သဘာဝအရ ပါလာသည် ဆိုဆို၊ ဘုရားသခင်က ဖန်ဆင်းသည်ဆိုဆို လူတိုင်းတွင် မွေးရာပါဖြစ်သော ကိုယ်ပိုင်ဦးနှောက် ကို အသုံးပြု၊ တွေးတောဆင်ခြင်၊ သုံးသပ်တတ်သူ တိုင်း သိနေကြရမည်။ အသိတရားကိုယ်စီမြဲနေ လျှင် ဘာကလွဲမှားသည်၊ ဘာကမှန်သည်ကို သိနိုင် ကြပါသည်။ မိမိတို့လူသားတိုင်း ပိုင်ဆိုင်ထားသော မြင်ခြင်း၊ ကြားခြင်း၊ သိခြင်းအခွင့်အရေးကို အသုံးမပြုလျှင် ကျားငစဉ်းလဲ၏ ခံတွင်းထဲ ကိုယ်တိုင်သက်ဆင်းရမည့်အခြေအနေ ဖြစ်နေလေသည်။

 

မုသားသတင်းဖြင့် လမ်းဖောက်

 

မန္တလေးတက္ကသိုလ် ကျောင်းအုပ်ဆရာကြီး (ငြိမ်း) ဦးကိုလေး သုတေသနပြု လေ့လာရေးသားခဲ့သည့် သီပေါမင်းနှင့် နယူးယောက်တိုင်းမ် သတင်းစာစာအုပ်ကို ပုဂံစာအုပ်တိုက်က ထုတ်ဝေခဲ့သည်။ ဤစာရေးသူသည် ဆရာကြီး ဦးကိုလေး၏ ထိုစာအုပ်ပါ အကြောင်းအရာ အချက်အလက်များကို ထုတ်နုတ်ခဲ့ပြီး လွန်ခဲ့သော နှစ်ပေါင်း ၁၂၀ က နယ်ချဲ့ဓာတ်ပြားဟောင်းခေါင်းစဉ်ဖြင့် နိုင်ငံပိုင်သတင်းစာတွင် နှစ်ကြိမ်မက၊ သုံးကြိမ်မျှ ရေးသားတင်ပြခဲ့ဖူးသည်။ လန်ဒန်ထုတ် ဒေလီးနယူးစ်၊ လန်ဒန်ဆန်းဒေးတိုင်းမ် စသည့်သတင်းစာများနှင့် အမေရိကန်ထုတ် နယူးယောက်တိုင်းမ် သတင်းစာများတွင် ၁၈၇၉ ခုနှစ် နှင့် ၁၈၈၀ ပြည့်နှစ်၊ ၁၈၈၅ ခုနှစ်များအတွင်းက မမှန်မကန် နယ်ချဲ့ကျူးကျော်မှု လမ်းစဉ်ကို မုသားသတင်းဖြင့် လမ်းဖောက်ပေးခဲ့ကြသည်။

 

သတင်းမီဒီယာများကို အထိရောက်ဆုံး လက်နက်ကိရိယာအဖြစ်သုံးခဲ့

 

ရေးသမျှ သတင်းတစ်ပုဒ်မှမမှန်၊ သီပေါမင်းကို ဘက်ပေါင်းစုံမှ မမှန်မကန်စွပ်စွဲအပုပ်ချလျက်၊ သည်ကနေ့သာ အင်္ဂလိပ်တို့က မြန်မာနိုင်ငံကို တိုက်ခိုက်သိမ်းပိုက်လျှင် မြန်မာပြည်သူများက လိုလားထောက်ခံကြဖွယ်ရှိနေပြီဟူသော နယ်ချဲ့နှတ်ကြောင်းပေးသတင်းများ၊ “အလွန်တရာရိုင်းစိုင်းသော ဇူးလူးလူမျိုး (အာဖရိက) များနှင့် အာဖဂန် လူမျိုးလူရိုင်းများကို ယဉ်ကျေးလာအောင် တိုက်ခိုက်ဆုံးမရန် ဘုရားသခင်က ငါတို့ အင်္ဂလိပ်များကို တာဝန်ပေးခဲ့သကဲ့သို့ ယနေ့ မြန်မာဘုရင်အရိုင်းအစိုင်းကို တိုက်ခိုက်ပြီး သွန်သင်ရန် ငါတို့အင်္ဂလိပ်များကို သဘာဝတရားကြီးက တာဝန်ပေး ပြန်ပြီ”ဟူ၍ ကူလီကူမာများ ရေးခဲ့သည်။

 

ယနေ့ခေတ် အမေရိကန်၊ ဗြိတိန်၊ ပြင်သစ်၊ ဂျာမနီစသည့် နယ်ချဲ့ဝါရင့်နိုင်ငံများမှ စာနယ်ဇင်းသတင်းမီဒီယာများက မြန်မာအပါအဝင် ကမ္ဘာကို သတင်းလိမ်၊ သတင်းမှား၊ သတင်းဇောက်ထိုး၊ သတင်းပြောင်းပြန်များ အုံလိုက်ကျင်းလိုက် လုပ်ကြံ ရေးသား လွှင့်ထုတ်ယုတ်မာနေကြသည်မှာ အဆန်းမဟုတ်ပေ။ လွန်ခဲ့သော နှစ်ပေါင်း ၁၄၄ နှစ် (၁၈၇၉ ခုနှစ်ကတည်းက) သတင်းမီဒီယာများကို နယ်ချဲ့လုပ်ငန်း၏ အထိရောက်ဆုံး လက်နက်ကိရိယာအဖြစ် သုံးခဲ့သည်ကို မေ့ထား၍မဖြစ်။ ကိုယ်ပိုင် မျက်စိ၊ နား၊ ဦးနှောက် အသုံးပြုနေသည့် မြန်မာတိုင်း သိနေကြသည်။ အနောက်နယ်ချဲ့အုပ်စု၏ “ကျီးကန်း တစ်အုပ်ပမာ” မီဒီယာများ၊ နယ်ချဲ့နောက်လိုက် မီဒီယာသမားများက မြန်မာနိုင်ငံတွင် ၂၀၀၈ ခုနှစ် မေလက ပြည်သူ ၂၅ သန်းနီးပါးက ထောက်ခံမဲပေး၊ အတည်ပြုထားခဲ့သော ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေ (၂၀၀၈ ခုနှစ်)ပါ ပြဋ္ဌာန်းချက်များနှင့်အညီ နယ်ချဲ့နှင့်ပေါင်းပြီး မဲလိမ်၊ မဲခိုး ထောင်းလမောင်း ထခဲ့သော ၂၀၂၀ ပြည့်နှစ် ရွေးကောက်ပွဲမသမာမှုများ၊ ဆန္ဒမဲ ၁၀ သန်းကျော် ကလိမ်ကျခဲ့မှုများ၊ မဲမသမာမှုကို စွပ်စွဲမှုရှိလျှင် ဖြေရှင်းမှုရှိရမည့်အစား မဖြေမရှင်း (ဖြေရှင်းရန်ကလည်း ၎င်းမဲသူခိုးများဘက်တွင် အကြောင်းပြချက် လုံးဝမရှိ) ဘဲနေခဲ့သဖြင့် အခြေခံဥပဒေအရ ယာယီသမ္မတနှင့် ကာလုံအစည်းအဝေးက နိုင်ငံကို အရေးပေါ် အခြေအနေကြေညာရတော့သည်။

 

ဖွဲ့စည်းပုံအခြေခံဥပဒေအရ အရေးပေါ်အခြေ အနေဆိုးဖြင့် နိုင်ငံတော်မပြိုမလဲ၊ ပြည်သူတို့ အသက်အိုးအိမ်စည်းစိမ် မပြိုကွဲရန် တပ်မတော် ကာကွယ်ရေးဦးစီးချုပ်ကို အရေးပေါ်အခြေအနေ လွန်မြောက်အောင်ဆောင်ရွက်ရန် တာဝန်ပေးခဲ့သည်။ စင်စစ်အခြေခံဥပဒေအရ တပ်မတော်ကာကွယ်ရေးဦးစီးချုပ်ကို တာဝန်ပေးခြင်းသာဖြစ်သည်။ အာဏာထိန်းသည်ဟူသော အသုံးအနှုန်းကို အာဏာသိမ်းသည်ဟု ရောကြိတ်လာကြသော နယ်ချဲ့အုပ်စုနှင့် ပြည်တွင်းမှ ပုဆိန်ရိုးအုပ်စုတို့ အတိုင်အဖောက်ညီညီ ပြဿနာရှာကြသည်။ ပြဿနာဖန်ကြသည်။

 

နယ်ချဲ့သံရုံးများက သတင်းမှားများ လွှင့်ထုတ်နေကြ

 

ယနေ့ CRPH, NUG, PDF စသည့် အကြမ်းဖက်ဥပဒေချိုးဖျက်၊ သူပုန်သူကန်(NLD)များက ပြည်ပြေးဘဝခံယူလျက် မြန်မာနိုင်ငံ ပြိုကွဲစေရန်၊ ကျဆုံး နိုင်ငံ(Fail State) ဖြစ်စေရန်၊ ထိုနိုင်ငံပျက်အခြေအနေကို လက်ညှိုးထိုးပြီး နယ်ချဲ့သမားလက် ရောင်းစားရန် သူတောင်းစားဟန်အပြည့်ဖြင့် သူတို့တစ်တွေ ကောင်းစားအောင် ဖန်နေကြသည်။ ယနေ့ ၎င်းတို့၏ အကြမ်းဖက်မှုများကြောင့် ရဟန်းသံဃာ၊ သာမဏေ၊ သီလရှင်၊ ကလေးသူငယ်၊ ကိုယ်ဝန်ဆောင်၊ သက်ကြီးဘိုးဘွား၊ ဆရာဝန်များ၊ ကျောင်းဆရာ ဆရာမများ၊ ကျောင်းသားများ သေကြရသည်မှာ ၇၀၀၀ ခန့်ရှိနေသည်။ မြန်မာနိုင်ငံအတွင်းမှာပင် ယနေ့တိုင် မျက်နှာပြောင်တိုက် အခြေစိုက်ပြီး NUG, PDF တို့၏ အကြမ်းဖက်မှုကြောင့် ပြည်သူများ ၇၀၀၀ ခန့် သေရ သေရသည်ကို နယ်ချဲ့သံရုံးများက ဖုံးကွယ်ကာ သတင်းမှားများ လွှင့်ထုတ်နေကြသည်။

 

ပြည်သူတို့အိုးအိမ်၊ လမ်းတံတား၊ စာသင် ကျောင်း၊ ဘုန်းတော်ကြီးကျောင်းများ မီးရှို့ခံရပြီး လမ်းတံတားများ ဖောက်ခွဲဖျက်ဆီးခံနေရသည်ကို အနီးကပ်မြင်နေပါလျက် ဗြောင်လိမ်ဗြောင်စား၊ လူသတ်တရားခံ PDF များနေရာတွင် တပ်မတော်ကို အစားထိုးသွင်း ဝါဒဖြန့်နေကြပေသည်။ နယ်ချဲ့သမားတို့၏ ဒေါ်လာအဆိပ်၊ မီဒီယာအဆိပ်မိနေသူ များ မည်သို့လိမ်လိမ် တိုင်းရင်းသားစုံမြန်မာတို့ကမူ မယုံမရှိ၊ ကိုယ်တွေ့ဖြစ်၍ သိနေကြပေသည်။

 

ဒီမို DEMO ဆိုသောစာလုံးမှာ မူလဂရိဘာသာ ဖြစ်ကြောင်း၊ အဓိပ္ပာယ်မှာ DEMO ပြည်သူဟူ၍ ဖြစ်ကြောင်း၊ ဒီမိုကရေစီသမိုင်းကြောင်း ရှေးဟောင်းအေသင်မြို့ပြ နိုင်ငံခေတ် လွန်ခဲ့သော နှစ်ပေါင်း ၂၆၀၀ ကျော်က ပြည်သူများကိုယ်တိုင် ပါဝင်တက်ရောက်ကာ နိုင်ငံအတွက် ဥပဒေပြုရေး၊ အုပ်ချုပ် ရေး၊ တရားစီရင်ရေးတို့ကို ပူးပေါင်းဆောင်ရွက်ခဲ့သည်တို့ကို စာရေးသူ အကြိမ်ကြိမ်ရေးခဲ့ဖူးသည်။ ဟောခဲ့၊ ပြောခဲ့ဖူးပါသည်။ အင်္ဂလန်၊ ဗြိတိန်ခေါ် ယူကေတွင် အရင်းရှင်များက ဘုရင့်ထံမှ အုပ်ချုပ်ရေး၊ ဥပဒေပြုရေး၊ တရားစီရင်ရေးအာဏာများ လက်နက်ကိုင် ပုန်ကန်တိုက်ခိုက် လုယက်ယူငင် ခဲ့ကြပြီးနောက် စက်မှုအရင်းရှင်တို့ ပေါချောင်ကောင်းနှုန်းဖြင့် ချမ်းသာရန် နယ်ချဲ့ခဲ့ကြကြောင်း၊ ကမ္ဘာ့နိုင်ငံအားလုံး၏ ၇၇ ရာခိုင်နှုန်းကို ကျူးကျော် တိုက်ခိုက်သိမ်းပိုက်ကျွန်ပြုပြီး ထိုကျွန်ပြုခံနိုင်ငံများ၏ အချုပ်အခြာအာဏာကို ဖျက်ဆီး၍ နိုင်ငံများမှ စက်မှုကုန်ကြမ်း၊ ဓာတ်သတ္တုမျိုးစုံ၊ လောင်စာစွမ်းအင် မျိုးစုံသာမက နန်းစဉ်ပတ္တမြား၊ ရွှေငွေစိန်ကျောက် ရတနာမှန်သမျှ ပင်လယ်ဓားပြသဖွယ်လုယက်၍ တစ်မျိုး၊ ခိုးယူ၍တစ်သွယ် လက်ကုန်နှိုက်ယူသွားကြ သော အဆိုပါနယ်ချဲ့များက သူတို့သည် ပါလီမန် ဒီမိုကရေစီဝါဒီများ၊ ကမ္ဘာ့နိုင်ငံများတွင် ဒီမိုကရေစီ ဆိတ်သုဉ်းနေ၍ ဒီမိုကရေစီဇာတ်သွင်းပေးရဦးမည် ဟု ဆိုလာပြန်သည်။

 

ယနေ့ခေတ်သစ်နယ်ချဲ့ လက်သစ်များက ဒီမိုကရေစီ လူ့အခွင့်အရေးဟူသော စကားလုံး နှစ်လုံး ကို ရေလဲနှင့်သုံးကာ ကမ္ဘာတစ်ခွင် သွေးပင်လယ်ဝေ၊ မျက်ရည်သမုဒ္ဒရာဝေရန် ကျူးကျော်စစ်၊ စွက်ဖက်စစ်၊ ကြားခံစစ်၊ ပြည်တွင်းစစ်၊ ဒေသစစ်စသည့် စစ်ပွဲမျိုးစုံ ဖန်တီးနေကြပုံကို မြန်မာစစ်စစ်များက သိကြသကဲ့သို့ ပုံမှန်အမျိုးသားရေးစိတ်ဓာတ်ရှိသည့် ကမ္ဘာ့ပြည်သူများကလည်း သိနေကြပေသည်။

 

နယ်ချဲ့ပါးစပ်ပေါက်များက ထွက်လာနေသော ဒီမိုကရေစီဆိုသည့် စကားလုံးနှင့်ပတ်သက်၍၊ လူ့အခွင့်အရေး၊ အကြမ်းဖက် တိုက်ဖျက်ရေးစသည်တို့နှင့်ပတ်သက်၍ စာရေးသူက ရေးသားလျှင် မထင်မရှား ပါမွှားတစ်ယောက်က ပြောခြင်း၊ ရေးခြင်း ဟု ငြင်းလိုက်လျှင် အချည်းနှီးဖြစ်ပေတော့မည်။ ငါးကြင်းဆီနှင့် ငါးကြင်းကို ကြော်သကဲ့သို့၊ သူ့အရိုးနှင့် သူ့ကိုထိုး သကဲ့သို့ နယ်ချဲ့လုပ်ပေါက်၊ ပြောပေါက်၊ ဆိုပေါက် များကို ထိုနယ်ချဲ့နိုင်ငံများမှ တစ်သန်းတစ်ယောက် ပင်မရှိသော၊ ရှားရှားပါးပါး မှန်ရာပြောဆိုရေးသားသော သူအချို့၏အရေးများကို ထုတ်နုတ်တင်ပြ ပါမည်။

 

ဂရိမြို့ပြနိုင်ငံ(အေသင်)၊ ရောမမြို့ပြနိုင်ငံ(ရောမ)၊ စပါတာမြို့ပြနိုင်ငံတို့တွင်လွန်ခဲ့သော နှစ်ပေါင်း ၂၆၀၀ ကျော်က တိုက်ရိုက်ဒီမိုကရက်တစ် Demo Kratos ကို ဘုရင့်ထံမှ အုပ်ချုပ်ရေးအာဏာကို ပုန်ကန်လုယက်ရရှိခဲ့သည့် ဗြိတိသျှ (အင်္ဂလိပ်) အရင်းရှင်များ ဥရောပမှ ပြင်သစ်အမှူးပြုသော အရင်းရှင်များက သူတို့သည် ရွေးကောက်ပွဲတွင် ပြည်သူပေးသော မဲအများစုဖြင့် တက်လာသော အစိုးရများဖြစ်၍ (ဒီမိုကရေစီနည်းကျ ပြည်သူက ရွေးကောက်၍) ဒီမိုကရေစီအစိုးရဟု ကြံဖန်ဂုဏ်လုပ်၊ လေပုပ်ထုတ်ခဲ့ကြသည်။ လက်တွေ့၌ ထိုအရင်းရှင်နယ်ချဲ့များသည် ကမ္ဘာ့နိုင်ငံ တစ်ရာကျော်ကို ကျွန်ပြုခဲ့၊ နယ်ချဲ့ခဲ့၊ သယံဇာတ ဓနဥစ္စာများ လုယက်ခိုးယူခဲ့ကြသည်။ အဆိုပါ(လူဖြူ) နယ်ချဲ့များ အထူးသဖြင့် နယ်ချဲ့ကာလသားခေါင်းကြီး အမေရိကန်တို့က လူထုကမဲပေးရွေးကောက်သော အစိုးရသာလျှင် ဒီမိုကရေစီအစိုးရဖြစ်သည်ဟု (မြန်မာနိုင်ငံမှ နဝတ၊ နယကမလွှဲသာ၍ နိုင်ငံ့ တာဝန်ယူရသော တပ်မတော်အစိုးရကို အပုပ်ချခဲ့ သည်။ သူတို့ ကြည်ဖြူအလိုရှိသော အခြားနိုင်ငံများ တွင် စစ်အာဏာသိမ်းပွဲ တစ်ဒါဇင်မက နှစ်ဒါဇင် ရှိပါစေ ဒီမိုကရေစီနိုင်ငံ)ဟု ဆိုကြပြန်သည်။ ယနေ့ တပ်မတော်ကာကွယ်ရေးဦးစီးချုပ်က အခြေခံဥပဒေအရ နိုင်ငံတော် အပြိုအလဲ၊ မကွဲမပျက်ရအောင် တာဝန်ဝင်ယူ၊ နိုင်ငံတော်အာဏာကို ယာယီ ဝင်ထိန်းရာမှ “စစ်အာဏာသိမ်း၊ စစ်အာဏာရှင်”ဟု သမုတ်သည်။ နစကဥက္ကဋ္ဌ နိုင်ငံတော်ဝန်ကြီးချုပ်ဗိုလ်ချုပ်မှူးကြီး မင်းအောင်လှိုင်က နိုင်ငံတော် အခြေအနေတည်ငြိမ်ပြီး ဥပဒေစိုးမိုးမှုပြည့်ဝစွာ ရရှိအောင်ကြိုးစားပြီး လွတ်လပ်သန့်ရှင်းမျှတသော ပါတီစုံ ဒီမိုကရေစီရွေးကောက်ပွဲကြီး လုပ်ပေး မည်ဟု ကမ္ဘာသိကြေညာလိုက်ပါမှ အမေရိကန်၊ အင်္ဂလန်၊ ပြင်သစ်နှင့် နယ်ချဲ့လက်ဟောင်းအုပ်စု (EU)တို့က ထိုရွေးကောက်ပွဲကို ဆန့်ကျင်ကြသည်။ ရွေးကောက်ပွဲမလုပ်နဲ့၊ လုပ်လျှင် ဖျက်မည်ဟု ၎င်းတို့၏ ကြေးစားပြည်တွင်း အကြမ်းဖက်သမားများမှတစ်ဆင့် ဆန့်ကျင်ကန့်ကွက်နေကြပြန်သည်။ တော်တော်တရားကျဖို့ ကောင်းနေပေပြီ။

 

ကိုယ်တိုင် ဒီမိုကရေစီကိုမယုံ ကိုယ်တိုင်မကျင့်ကြံသော နယ်ချဲ့သွေးထိုး “ဒီမိုကရေစီ” စကားလုံး ကို “ဥုံ”ခံမန်းမှုတ် ကမ္ဘာပတ်ရှုပ်နေသော်လည်း အမေရိကန်ပြည်ထောင်စု၏ ဒီမိုကရေစီအပေါ် အမေရိကန်လူမျိုး ရှားရှားပါးပါး လေ့လာကျွမ်းကျင် သူ နယူးယောက်တက္ကသိုလ် မြို့ပြရေးရာ ပါမောက္ခ၊ ပတ်ဘလစ်အင်ထရက်(စ်)စာစောင်၊ Public Interest တွဲဖက်အယ်ဒီတာ၊ ဝေါလ်စထရိဂျာနယ် ဆောင်းပါးရှင်၊ ကျမ်းပြုစာရေးဆရာပညာရှင် တစ်ဦးဖြစ်သည့် အာဗင်ခရစ္စတိုလ် Irving Kristol ရေးသားသည့် အမေရိကန်ပြည်ထောင်စု၏ ဒီမိုကရက်တစ် (On The Democratic Ideal in America) စာအုပ်မှ ကောက်နုတ်ချက်များ တင်ပြပါရစေ။

 

ထိုစာအုပ်ကို ရန်ကုန်ရှိ အမေရိကန်သံရုံး ပြန်ကြားရေးဌာန (၅၈၁) ကုန်သည်လမ်း ရန်ကုန် မြို့မှ သံရုံးအရာရှိကြီး အာနိုးလ်စီဟန်ဆင်က မြန်မာဘာသာသို့ သမာဓိသတင်းစာတိုက်မှ ဘီဘီစီဦးမောင်မောင်ကို မြန်မာဘာသာပြန်ဆိုစေကာ ၁၉၇၃ ခုနှစ် ဒီဇင်ဘာလက အမှတ်(၁၇) မလွှကုန်းလမ်း ကျောက်မြောင်းရှိ သင့်ဘဝပုံနှိပ်တိုက်တွင် ရိုက်နှိပ်ပြီး အခမဲ့ဝေငှဖြန့်ဖြူးခဲ့သည်။ ထိုစဉ်က ဤစာရေးသူသည် ကြေးမုံသတင်းစာတိုက်တွင် ဒုတိယအယ်ဒီတာချုပ် တာဝန်ထမ်းဆောင်နေစဉ် ထိုစာအုပ်ကို လက်ဆောင်အဖြစ် သံမှူးကြီး အာနိုးလ်စီ ဟန်ဆင်ထံမှ ရရှိခဲ့ပါသည်။ ထိုစာအုပ်မှ ကောက်နုတ်ချက်အချို့ကို အောက်တွင်ဖတ်ရှုကြပါရန်။

 

“ကျွန်တော်တို့သည် ပြည်ထောင်စုအမေရိကန်အား ပြုစုပျိုးထောင်ခဲ့သော ပုဂ္ဂိုလ်ကြီးများ ထိတ်လန့်တကြား ဖြစ်သွားအောင် တစ်နေ့တခြား ပြုမူလျက်ရှိသည်ဟု ဆိုချင်သည်။ ရှင်းရှင်းပြောရလျှင် အမေရိကန်လူမျိုးများ စည်းမဲ့ကမ်းမဲ့ လူအုပ်ကြီးများကဲ့သို့ တစ်နေ့တခြားပြုမူလျက်ရှိကြ၏။ ထိုသို့သော လူအုပ်ကြီးသည် တစ်ဦးဦးက ရှေ့ဆောင်ကာ ညာသံပေးပြီး လှုံ့ဆော်ပေးလျှင် ထိုသူ၏ နောက်သို့ မဆင်မခြင်လိုက်တတ်ကြ၏။ ဆူပူ သောင်းကျန်း၊ အုတ်အုတ်ကျက်ကျက် လုပ်တတ်ကြ၏။ အပြုလုပ်ငန်းထက် အဖျက်လုပ်ငန်းကို အားသန်ကြ၏။ ဤသို့သော လူအုပ်ကြီးများသည် ဆယ့်ရှစ်ရာစုကုန်ခါနီးတွင် စက်မှုလုပ်ငန်းများပေါ်ထွန်းလာရာ မြို့သစ်များ၌ စတင်ပေါ်ပေါက်ခဲ့သည်။’’ (စာမျက်နှာ -၁၃)

 

“လူများသည် ယုတ္တိတန်မတန် ဖြစ်နိုင်မဖြစ်နိုင်၊ အကြောင်းအကျိုးဆီလျော် မဆီလျော် မစဉ်းစား ဘဲ ရသင့်ရထိုက်သည်ဟု ခေါင်းမာစွာနှင့် မျှော်လင့် တောင့်တနေပါက ၎င်းမျှော်လင့်ချက်များကို အကောင်အထည်ဖော်ပေးနိုင်မည်မဟုတ်၍ ယင်း မဖြစ်နိုင်တာတွေကို တောင်းဆိုရန် ဆူပူအုံကြွမှုများအား နှိပ်ကွပ်ရေးအတွက် မလွှဲမရှောင်သာသဖြင့် ပြုလုပ်ဖို့လိုလာတော့သည်။ တစ်နိုင်ငံပြီး တစ်နိုင်ငံ ယင်းသို့ နှိပ်ကွပ်ခြင်းကိုသာ အားကိုးလျက်ရှိသည်” (စာမျက်နှာ -၂၈)

 

“လူငယ်များသည် သူတို့လောကထဲတွင် သူတို့ဘာသာ တသီးတခြားနေနေကြသည် မဟုတ်သေး။ သူတို့သည် လူကြီးများ၏ လောကကို ဆန့်ကျင်သူ လောကကြီးထဲတွင် နေထိုင်လျက်ရှိကြကာ ထိုသို့နေထိုင်သော လူငယ်များ၏ လူဦးရေသည် တစ်နေ့တခြား များပြားလာလေသည်။ တက္ကသိုလ်နယ်မြေများပေါ်၌ ဆူပူလှုပ်ရှားမှုတို့သည် ယင်းလောကကြီးနှစ်ခု ပဋိပက္ခဖြစ်နေခြင်း၏ အထင်ရှားဆုံး လက္ခဏာပင် ဖြစ်တော့သည်။”(စာမျက်နှာ- ၁၉)

 

“ပြည်သူ့လွတ်လပ်ခွင့်များကို အကြွင်းမဲ့ပေးရမည်ဟု ကျွန်တော်တို့ လူကြားကောင်းအောင် ကြွေးကြော်နေကြလင့်ကစား တစ်နေရာမှာတော့ စည်းကမ်းသတ်မှတ်ရမည်ကို စိတ်ထဲက နားလည်နေပေသည်။” (စာမျက်နှာ - ၃၇)

 

“စိစစ်ခြင်းဟူသောစကားကို ကြားရလျှင် လူများသည် ကျောချမ်းသွားကြသည်။ သို့သော်ထိုစကားကိုပင် ကျွန်တော်ထပ်လောင်း၍ မြွက်ဟလိုသည်။ အကယ်၍ ညစ်ညမ်းသော စာပေ၊ ရုပ်ရှင် စသည်တို့သည် ကြီးလေးသည့် ပြဿနာတစ်ရပ် ဖြစ်သည်ဟုထင်လျှင် စိစစ်ခြင်းကို ထောက်ခံကြရပေသည်။” (စာမျက်နှာ - ၄၅)

 

“ရှင်းရှင်းပြောရလျှင် ကျွန်တော်တို့ အမေရိကန် ဒီမိုကရေစီစနစ်အောက်တွင်ရှိသည့် ဘဝ၏ အရည်အသွေးကို မညစ်ညမ်းသွားစေချင်လျှင် စိစစ်ခြင်းကို ထောက်ခံကြရပေလိမ့်မည်။ ဆေးလိပ်သောက်ခြင်းကို ရာဇဝတ်မှု ကျူးလွန်ခြင်းတစ်ခုအဖြစ် ကျွန်တော်တို့ မပြဋ္ဌာန်းထားပေ။ သို့သော် ရုပ်မြင်သံကြားတွင် စီးကရက်ကြော်ငြာခြင်းကို ပိတ်ပင်ထားသည်။” (စာမျက်နှာ - ၄၆)

 

“အမေရိကန်ယဉ်ကျေးမှုဈေးကွက်တွင် ယခုအခါ ညစ်ညမ်းသောစာအုပ်များ၊ ညစ်ညမ်းသော ရုပ်ရှင်များနှင့် ညစ်ညမ်းသော ဇာတ်ပွဲများက ကြီးစိုးနေပေသည်။ စာပေ၊ ရုပ်ရှင်၊ ဇာတ်သဘင် အစ ရှိသည်တို့အား စိစစ်မှု ကျွန်တော်တို့လုပ်ကြလျှင် ဤသည်တို့နှင့်ပင်မပြီးဘဲ နိုင်ငံရေးထင်မြင် ယူဆချက်တွေကိုလည်း စိစစ်ခြင်း မပြုလာပေဘူးလားဟူသည့် အချက်ဖြစ်သည်။” (စာမျက်နှာ-၄၉)

 

“သို့သော် လူအုပ်ကြီးများ၏ ရုန်းရင်းဆန်ခတ်မှုများ၊ အာဏာဖီဆန်မှုများစသည်တို့ကို စဉ်းစားမိတိုင်း ကျွန်တော်စိတ်သက်သာမှုမရပေ။ လူများစု၏ အုပ်ချုပ်မှုကို လူများစု၏ နှိပ်စက်ကလူပြုမှုဖြင့် မရောမိအောင် သတိထားရပေမည်။ သို့မဟုတ်က ဒီမိုကရေစီ ၏ သဘောတရားကို ယုတ်ညံ့သွားအောင် ပြုလုပ်ရာ ရောက်ပေလိမ့်မည်။” (စာမျက်နှာ - ၆၄)

 

“အခါခပ်သိမ်း မကျေမနပ်ဖြစ်နေခြင်းသည် အကြောင်းအရာများကို ၎င်းတို့ ပကတိဖြစ်နေသည့် ဖြစ်ရပ်မှန်များအတိုင်း မမြင်နိုင်အောင်ဖြစ်ကြလေသည်။ ဖြစ်ရပ်မှန်အတိုင်း မမြင်လျှင်၊ ဖြစ်ရပ်မှန်အတိုင်း သုံးသပ်ဝေဖန်ကာ တိုးတက်ကောင်းမွန်အောင် ပြုပြင်နိုင်လိမ့်မည်မဟုတ်ပေ။” (စာမျက်နှာ-၁၅၇)

 

သတင်းများဖြင့် မြန်မာကို ဒုက္ခပေးခဲ့ပုံသိလာရ

 

အထက်ပါစာအုပ်တွင် ရေးသားသကဲ့သို့ အမေရိကန်နိုင်ငံ၊ အမေရိကန်အစိုးရ၊ အမေရိကန်၏ တရားလွန်တရားမင်း ထင်ရာစိုင်း ကိုယ်ကျိုးရှာသော လုပ်ရပ်များကို အမှန်အတိုင်း ရှုမြင်ထောက်ပြ ရေးသားပြောဆိုကြသူအချို့ (အလွန်နည်းပါးစွာ) ရှိနေပေသည်။ မန္တလေးတက္ကသိုလ် ကျောင်းအုပ ကြီး(ငြိမ်း)ဆရာကြီး ဦးကိုလေးသည် ကျွန်တော်နှင့် ရန်ကုန်တွင် မကြာခဏတွေ့ဆုံသောအခါတိုင်း ဟောပြောညွှန်ပြသွန်သင်လေ့ရှိသည်။ ဆရာကြီးသည် မျိုးချစ်စိတ်ဖြင့် မဟုတ်မခံ၊ မှန်ရာကို မခြွင်းမချန် ရေးသားဝေဖန်လေ့ရှိသည်။ ဆရာကြီးရေးသားသော စက္ကူဖြူပြဇာတ်ကို အင်္ဂလိပ်နယ်ချဲ့တို့ မျက်မှောင်ကြုတ်ကြည့်ခဲ့ကြသည်။ ဆရာကြီး ရေးသားထုတ်ဝေသော “သီပေါမင်းနှင့် နယူးယောက် တိုင်းမ်သတင်းစာ” စာအုပ်သည် ကျွန်တော်တို့မသိခဲ့ မမီခဲ့သော ရတနာပုံခေတ် အင်္ဂလိပ်သတင်းစာ၊ အမေရိကန် သတင်းစာများ နယ်ချဲ့လမ်းခင်း သတင်းများဖြင့် မြန်မာကို ဒုက္ခပေးခဲ့ပုံသိလာရ၏။

 

အမေရိကန်အထက်လွှတ်တော် (ဆီးနိတ်) အမတ် ဂျွန်မက္ကိန်း ရန်ကုန်သို့ လာရောက်ပြီး ဒေါ်စုကြည်၊ ဦးခွန်ထွန်းဦး (ရှမ်းNLD) တို့နှင့် တိုးတိုး တိတ်တိတ်ကြိတ်ပုန်း ဆွေးနွေးအပြီး အမျိုးသားညီလာခံသို့ တက်ရောက်နေသော ငြိမ်းချမ်းရေးအဖွဲ့များမှ ဦးစခုန်တိန့်ယိမ်း၊ ဦးမထုနော်၊ ဦးအောင်ခမ်း ထီ၊ NLD မှ ဒေါ်စုကြည်၊ ဦးတင်ဦး၊ ဦးလွင်၊ ဦးအောင်ရွှေ၊ ရှမ်း NLD မှ ဦးခွန်ထွန်းဦး၊ ပြင်ပမှ အသိပညာရှင်၊ အတတ်ပညာရှင် ဆရာကြီးဦးကိုလေးနှင့် ဤစာရေးသူတို့ ပြည်လမ်းရှိ အမေရိကန်သံမှူးကြီးနေအိမ်၌ ဆုံတွေ့ကြစဉ် အမျိုးသားညီလာခံ ကိုယ်စားလှယ် တိုင်းရင်းသား ခေါင်းဆောင်များက အမျိုးသားညီလာခံတွင် မိမိတို့ဆွေးနွေးလိုသမျှ ဆွေးနွေးနိုင်သည်။ ညီလာခံပြီး၍ အခြေခံဥပဒေ ရေးဆွဲပြဋ္ဌာန်းပြီးလျှင် မြန်မာပြည်ထောင်စုတွင် ဒီမိုကရေစီတည်ဆောက်မှုများ လုပ်နိုင်တော့မည်မှာ သေချာ၍ မိမိတို့ညီလာခံပြီးသည်အထိ ဆက်တက်ကြမည်ဟု ပြောသည်။ ဒေါ်စုကြည်နှင့် ဦးခွန်ထွန်းဦးတို့က ထိုအများရှေ့တွင် တစ်ခွန်းမှမပြော၊ ဒေါ်စုက ဂျွန်မက္ကိန်းနှင့် တစ်နာရီကျော်ကြာတွေ့ပြီး ပြောလိုသမျှ နှစ်ကိုယ်ကြားပြောထားပြီး ဦးခွန်ထွန်းဦးက ၎င်းတို့ဆန္ဒနှင့်သဘောထား စာရေးသားပေးထားပြီးဖြစ်သည်။ တစညမှ ဦးခင်မောင်ကြီးက “မစ္စတာ မက္ကိန်း ခင်ဗျားသိထားဖို့က ဒီကနေ့ မြန်မာနိုင်ငံမှာ ဒီမိုကရေစီစကားပြောပြီး ဒီမိုကရေစီရအောင်၊ ဒီမိုကရေစီနိုင်ငံဖြစ်အောင် ပါတီတစ်ခု (NLD) ကသာ လုပ်နေသည်မဟုတ်၊ မိမိတို့ တစညပါတီနှင့် အခြားပါတီများကလည်း စစ်မှန်စည်းကမ်းပြည့်ဝသည့် ဒီမိုကရေစီနိုင်ငံဖြစ်အောင် ကြိုးစားအားထုတ် တည်ဆောက်နေကြသည်ကို မစ္စတာမက္ကိန်း သိထားပါ”ဟု ပြောသည်။ ဆရာကြီး ဦးကိုလေးက “မစ္စတာ မက္ကိန်းရေ ကျွန်တော်ဟာ အခုအသက် ၈၀ ရှိပါပြီ။ ကျွန်တော့်တစ်သက် ဒီကနေ့ ဒီအချိန်အခါလောက် မြန်မာပြည်ထောင်စုကြီး ငြိမ်းချမ်းတာ၊ တည်ငြိမ်တာ၊ ဖွံ့ဖြိုးတိုးတက်လာတာ မတွေ့ဖူး မမြင်ဖူးခဲ့ပါ ဘူး၊ ဒီအခြေအနေကောင်းကို အမေရိကန်က ကူညီပါ၊ မကူညီရင်တောင် မနှောင့်ယှက်ပါနဲ့’’ဟု တင်ပြသည်။

 

ဆရာကြီးဦးကိုလေးသည် အသက်(၈၀)တွင်လည်း မနား၊ ရန်ကုန်ရှိ သံဃာ့တက္ကသိုလ်တွင် အင်္ဂလိပ်စာ ဧည့်ပါမောက္ခအဖြစ် ကုသိုလ်ယူဆောင်ရွက်ရင်း ပိဋကတ်သုံးပုံကို အင်္ဂလိပ်ဘာသာ ပြန်ဆိုသောလုပ်ငန်းတွင် ပါဝင်လုပ်ဆောင်နေခဲ့သည်။ ထေရဝါဒဗုဒ္ဓဘာသာအကြောင်း ဆောင်းပါးများ ဆက်တိုက်ရေးပြီး ကလောင်နာမည် မောင်သစ္စာဖြင့် ထေရဝါဒဗုဒ္ဓသာသနာစာအုပ် ထုတ်ဝေခဲ့သည်။

 

(ဆက်လက်ဖော်ပြပါမည်)