ဖားဆောင်းမြို့ Community Based Facility Quarantine မှ စောင့်ကြည့်ရက် ၂၁ ရက် ပြည့်သူများအား နေအိမ်ပြန်ခွင့်ပြု

ဖားဆောင်း ၁၁ မေ

ကယားပြည်နယ်၊ ဘောလခဲခရိုင်၊ ဖားဆောင်းမြို့နယ်တွင် ဧပြီလ ၂၀ ရက်နေ့က မန္တလေး တိုင်းဒေသကြီးနှင့် ရှမ်းပြည်နယ် တောင်ကြီးမှ နေရပ်ပြန်လာသူများအား အခြေခံပညာ အထက်တန်း ကျောင်း ပညာရတနာခန်းမဆောင်တွင် ထားရှိသော Community Based Facility Quarantine တွင် စောင့်ကြည့်ခဲ့ရာ ၂၁ ရက်ပြည့်ပြီးဖြစ်၍ ယနေ့နံနက် ၉ နာရီက ၎င်းတို့နေအိမ် အသီးသီးသို့ ပြန်ခွင့်ပြုကြောင်း သိရသည်။

ရှေးဦးစွာ မြို့နယ် ကိုဗစ်-၁၉ ရောဂါ၊ ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီ ဥက္ကဋ္ဌ၊ မြို့နယ် အုပ်ချုပ်ရေးမှူး ဦးအောင်မြတ်မိုးက အဖွင့်အမှာစကား ပြောကြားပြီး ကျန်းမာရေး ဦးစီးဌာနမှူး ဒေါက်တာ အိဖြူသွယ် က စောင့်ကြည့်ခံရသူများ အနေဖြင့် မိမိတို့နေအိမ်တွင် နေထိုင်သောအခါ Community Based Facility Quarantine တွင် နေထိုင်သကဲ့သို့ Home Quarantine (၇) ရက်နေဖို့ လိုအပ်ကြောင်း ပြောကြားခဲ့သည်။

ယင်းနောက် ကျန်းမာရေးနှင့် အားကစားဝန်ကြီးဌာန၏ လမ်းညွှန်ချက်များ၊ ကျန်းမာရေး ထောက်ခံချက်များကို ပေးအပ်ခဲ့ပြီး မြို့နယ် ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီ၏ အစီအစဉ်ဖြင့် အမျိုးသား (၂) ဦး၊ အမျိုးသမီး (၁) ဦးအား ၎င်းတို့၏ အိမ်အရောက် အသီးသီး လိုက်လံ ပို့ဆောင်ပေးခဲ့ကြောင်း သိရသည်။

အဆိုပါ ပုဂ္ဂိုလ်များသည် ၎င်းတို့နေအိမ်၌ Home Quarantine (၇) ရက် နေထိုင်ရမည် ဖြစ်ကြောင်း သိရှိရသည်။

နန်းသဲနုအောင်(ဖားဆောင်း)