ဖာပွန်မြို့ ကလေးစာပေပွဲတော် စာအုပ်စာပေပြပွဲနှင့် စာအုပ်ဈေးရောင်းပွဲ၊ ဆုချီးမြှင့်ပွဲနှင့် ပိတ်ပွဲအခမ်းအနားကျင်းပ

ဖာပွန် ၁၉ ဇန်နဝါရီ

ကရင်ပြည်နယ်၊ ဖာပွန်ခရိုင်၊ ဖာပွန်မြို့တွင် ကရင်ပြည်နယ်အစိုးရအဖွဲ့၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊ အခြေခံပညာဦးစီးဌာနနှင့် ဖာပွန်ခရိုင်စီမံခန့်ခွဲမှုကော်မတီတို့ ပူးပေါင်းစီစဉ်ကျင်းပ သော ကလေးစာပေပွဲတော် စာအုပ်စာပေပြပွဲနှင့် စာအုပ်ဈေးရောင်းပွဲကို ဇန်နဝါရီ ၁၈ ရက်နေ့မှ ၁၉ ရက် နေ့အထိ ကျင်းပခဲ့ရာ ဆုချီးမြှင့်ပွဲနှင့် ပိတ်ပွဲအခမ်းအနားကို ယနေ့ မွန်းလွဲ ၃ နာရီအချိန်က အခြေခံပညာ အထက်တန်းကျောင်း၊ ပညာရတနာခန်းမ၌ ကျင်းပသည်။

ရှေးဦးစွာ ဖာပွန်ခရိုင်အထွေထွေအုပ်ချုပ်ရေးဦးစီးဌာန၊ ခေတ္တခရိုင်အုပ်ချုပ်ရေးမှူး ဦးမျိုးအောင်က အဖွင့်အမှာစကားပြောကြားပြီး၊ ဖာပွန်ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးမှူး ဒေါ်သိမ့်ဝါက ကလေးစာပေပွဲတော် ကျင်းပဆောင်ရွက်နိုင်မှုအခြေအနေနှင့် ကျေးဇူးတင်စကားပြောကြားသည်။

ဆက်လက်၍ မူလတန်းအထက်ဆင့်/အောက်ဆင့်ဆေးရောင်ခြယ်ပြိုင်ပွဲ၊ ကဗျာရွတ်ဆိုပြိုင်ပွဲ၊ အလယ်တန်းအဆင့်၊ မူလတန်း အဆင့်ပုံပြင်ပြောပြိုင်ပွဲ၊ အထက်တန်းအဆင့်၊ အလယ်တန်းအဆင့် ကျပန်းစကားပြောပြိုင်ပွဲ၊ အထက်တန်းအဆင့်၊ အလယ်တန်းအဆင့် စိတ်ကြိုက်ပန်းချီပြိုင်ပွဲများ ပထမ၊ ဒုတိယ၊ တတိယဆုနှင့် နှစ်သိမ်ဆု(၅)ဆုရရှိသော ကျောင်းသား/သူများအားလည်းကောင်း၊ ဖာပွန်ခရိုင်အတွင်းမှ မြန်မာ့လက်ရွေးစင် တိုင်းဒေသကြီးနှင့် ပြည်နယ်လက်ရွေးစင် ထူးချွန်အားကစားသမားများအား ဂုဏ်ပြုမှတ်တမ်းလွှာများ၊ ငွေ သားဆုများနှင့်လက်ဆောင်ပစ္စည်းများကို ခေတ္တခရိုင်အုပ်ချုပ်ရေးမှူး၊ ဖာပွန်ခရိုင်ရဲတပ်ဖွဲမှူး ရဲမှူးကြီးနှင့် ဌာနဆိုင်ရာတာဝန်ရှိသူများက ဆုများချီးမြှင့်ပေးအပ်ခဲ့သည်။

ထို့နောက် အထက(ဖာပွန်)မှ ကျောင်းသား/သူများက ပုဇဉ်းတောင်သံကြိုးသီချင်းနှင့် ကရင်ဒုံးယိမ်းအကဖြင့် ကပြဖျော်ဖြေခြင်း၊ အလက(မဲသလွတ်)ကျောင်းမှ ကျောင်းသား/သူများမှ ကလေးစာပေပွဲတော် သီးချင်းသီဆိုခြင်းနှင့် စုပေါင်းမှတ်တမ်းတင်ဓါတ်ပုံများရိုက်ကူးခဲ့ကြပြီး အခမ်းအနားပိတ်သိမ်းခဲ့ကြောင်း သိရသည်။

သတင်း- ကျော်ဝဏ္ဏ(ပြန်/ဆက်)
ဓါတ်ပုံ- ကျော်ဝဏ္ဏ၊ စိုးထက်အောင်၊ နေမျိုးလွင်၊ အောင်မျိုးလွင်