ပခုက္ကူ၊  ၉  ဇန်နဝါရီ

မကွေးတိုင်းဒေသကြီး၊ ပခုက္ကူမြို့နယ်၊ သစ်ပုလွေကုန်းကျေးရွာရှိ ကုန်ထုတ်လမ်းဖောက်လုပ်ပေးနေမှုကို ဇန်နဝါရီ ၉ ရက် နံနက် ၁၀ နာရီက တာဝန်ရှိသူများမှ ကွင်းဆင်းစစ်ဆေးခဲ့သည်။

ထိုသို့စစ်ဆေးရာတွင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ပခုက္ကူခရိုင်ဦးစီးမှူး ဦးတင့်ဝေနှင့် တာဝန်ရှိသူများက ကုန်ထုတ်လမ်းဖောက်လုပ်ရာတွင် လုပ်ငန်းအရည်အသွေးပြည့်မှီစေရေးနှင့် သတ်မှတ်ကာလ အတွင်းအချိန်မီပြီးစီးရေးတို့ကို လမ်းညွှန်မှာကြားကာ နည်းပညာဆိုင်ရာလိုအပ်သည်များကို ပေါင်းစပ်ဆောင်ရွက် ပေးခဲ့သည်။

အဆိုပါကုန်ထုတ်လမ်းအား စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ကျေးလက်ဒေသ ဖွံ့ဖြိုးတိုးတက် ရေးဦးစီးဌာနက ၂၀၂၀-၂၀၂၁ ဘဏ္ဍာရေးနှစ် မူလခွင့်ပြုငွေကျပ် ၂၁ သန်းဖြင့် ဆောင်ရွက်ခြင်းဖြစ်ပြီး ကုန်ထုတ်လမ်း အရှည် ၁ မိုင် ၂ ဖာလုံ၊ အကျယ် ၁၂ ပေ၊ ထု ၁ ပေ ၉ လက်မရှိသည်။

ကုန်ထုတ်လမ်းပြီးစီးပါက ကျေးရွာရှိ အိမ်ခြေ ၉၀၀ အိမ်၊ လူဦးရေ ၁၈၀၀ ဦးတို့၏ လယ်ယာမြေဧက (၄၀၀)တို့မှ သီးနှံထွက်ကုန်များအား ဈေးကွက်အတွင်းသို့ ရာသီမရွေး သယ်ယူပို့ဆောင်နိုင်တော့မည်ဖြစ်ကြောင်း သိရသည်။

ဆလိုင်းကိုကီး(ပြန်/ဆက်)