ပင်လုံ ၈ နိုဝင်ဘာ
ရှမ်းပြည်နယ်တောင်ပိုင်း၊ လွိုင်လင်မြို့နယ်၊ ပင်လုံမြို့ မဲဆန္ဒနယ်အမှတ်(၂)ရှိ မဲရုံအသီးသီး၌ မဲရုံမှူးများက လွှတ်တော်ကိုယ်စားလှယ်လောင်းများ၊ ရွေးကောက်ပွဲကိုယ်စားလှယ်များ/အကူကိုယ်စားလှယ်များ၊ စောင့်ကြည့် လေ့လာသူများ၊ ကော်မရှင်အဖွဲ့ခွဲများ၊ မဲရုံအဖွဲ့ဝင်များရှေ့တွင် မဲပုံးလုံခြုံရေးများ ဆောင်ရွက်ပြီး ယနေ့နံနက် (၆)နာရီအချိန်တွင် မဲဆန္ဒရှင်ပြည်သူများက စတင်ဆန္ဒမဲပေးနေကြောင်း သိရပါသည်။
မဲဆန္ဒရှင်ပြည်သူများအား တစ်ဦးနှင့်တစ်ဦး ၆ ပေအကွာမှ တန်းစီစေခြင်း၊ မဲရုံအတွင်းသို့ မဝင်ရောက်မီ မဲဆန္ဒရှင်ပြည်သူအားလုံး ကိုယ်အပူချိန်တိုင်းတာပေးခြင်း၊ လက်သန့်ဆေးရည်အသုံးပြု၍ လက်ဆေးစေခြင်း၊ နှာခေါင်းစည်း Mask တပ်ဆင်စေခြင်း၊ မဲရုံအတွင်းသို့ မဝင်ရောက်မီ မဲဆန္ဒရှင်ပြည်သူတစ်ဦးချင်းစီ၏ ဘယ်ဖက် လက်သန်းကို မင်တို့ထားခြင်း ရှိ/မရှိ စစ်ဆေးခြင်းများကို ကိုဗစ်-၁၉ ရောဂါကြိုတင်ကာကွယ်ရေး စည်းကမ်းများ နှင့်အညီ စနစ်တကျဆောင်ရွက်၍ မဲဆန္ဒရှင် ပြည်သူများအား မဲရုံအတွင်းသို့ တန်းစီ၍ တစ်ဦးချင်းဝင်ရောက်စေပြီး ဆန္ဒမဲပေးခြင်းများကို လွတ်လပ်ပျော်ရွှင်စွာ ဆောင်ရွက်လျှက်ရှိကြောင်းသိရသည်။
လွိုင်လင်မြို့နယ် မဲဆန္ဒနယ်အမှတ်(၂)၊ ပင်လုံမြို့တွင် ရပ်ကွက်(၄)ခုနှင့် ကျေးရွာအုပ်စု(၆)ခုမှ ဆန္ဒမဲပေးခွင့်ရှိသူ မဲဆန္ဒရှင်ပြည်သူပေါင်း (၄၈၅၆၀)ဦးဖြစ်ကြောင်း သိရှိရပြီး မဲရုံ(၃၆)ရုံ ဖွင့်လှစ်ဆောင်ရွက်ထား၍ အဆိုပါ မဲရုံအသီးသီး၌ မဲဆန္ဒရှင်ပြည်သူများကလည်း ကိုဗစ်-၁၉ ရောဂါကြိုတင်ကာကွယ်ရေးစည်းကမ်းများနှင့်အညီ စနစ်တကျ မဲပေးလျှက်ရှိကြောင်းသိရသည်။
နန်းမြင့်မြင့်ဆွေ
