ပွင့်ဖြူမြို့နယ် ကြီးအုံကြီးဝတမံတွင် ယနေ့နံနက်ပိုင်း ရေပိုလွှဲမှ ၄ ဒသမ ၅ ပေခန့် ရေကျော်ကျလျက်ရှိ

ပွင့်ဖြူ ၅ စက်တင်ဘာ

မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ် အတွင်းရှိ ဒေသခံပြည်သူများ စိုက်ပျိုးရေအတွက် မှီခိုအားထား ပြုနေရသည့် ကြီးအုံကြီးဝတမံတွင် စက်တင်ဘာ ၅ ရက်၊ ယနေ့ နံနက် ၆ နာရီအချိန် တိုင်းထွာချက်အရ တမံရေပိုလွှဲမှ ၄ ဒသမ ၅ ပေခန့် ရေကျော်ကျလျက်ရှိကြောင်း ပွင့်ဖြူမြို့နယ် ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာနရုံးမှ သိရသည်။

ပွင့်ဖြူမြို့နယ် ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန အနေဖြင့် မြို့နယ်အတွင်း ဒေသခံပြည်သူများ သဘာဝ ဘေးအန္တရာယ်နှင့် ပတ်သက်ပြီး ထိခိုက်မှု ကင်းဝေးစေရန်အတွက် ကြီးအုံကြီးဝတမံရေပိုလွှဲမှ ရေကျော်ကျမှု အခြေအနေအား နေ့စဉ်အချိန်နှင့် တစ်ပြေးညီ သိရှိနိုင်ရေး အသိပေးနှိုးဆော်ခြင်းများ ဆောင်ရွက်လျက်ရှိကြောင်းနှင့် ယနေ့ နံနက်ပိုင်းက ကြီးအုံကြီးဝတမံရေပိုလွှဲမှ ၄ ဒသမ ၅ ပေခန့် ရေကျော်ကျလျက်ရှိကြောင်း အဆိုပါ မြို့နယ် ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ တာဝန်ရှိသူတစ်ဦးထံမှ သိရသည်။

ပွင့်ဖြူမြို့နယ် ကြီးအုံကြီးဝတမံ ရေပိုလွှဲမှ ရေကျော်ကျမှုသည် သြဂုတ် ၃၀ ရက်နေ့က ၃ ပေ နဲ့ ၁ လက်မ ရေကျော် ကျခဲ့ပြီး ယခုရက်ပိုင်း မိုးရွာသွန်းမှုကြောင့် ယနေ့ နံနက်ပိုင်း တမံရေပိုလွှဲမှ ၄ ဒသမ ၅ ပေ ရေကျော်ကျမှု တိုးလာခဲ့ခြင်း ဖြစ်ကြောင်းနှင့် အဆိုပါ တမံရေပိုလွှဲ ရေကျော်ကျမှုမှာ ဒေသခံပြည်သူများအတွက် စိုးရိမ်စရာမရှိကြောင်း ပွင့်ဖြူမြို့နယ် ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ သိရသည်။

ရဲဝင်းနိုင် (ညောင်ဦး)