ပွင့်ဖြူ ဒီဇင်ဘာ ၁

မကွေးတိုင်းဒေသကြီး ၊ ပွင့်ဖြူမြို့နယ်စိုက်ပျိုးရေးဦးစီးဌာနက မြို့နယ်အတွင်း ဆန်စပါးစိုက်ပျိုးထုတ်လုပ်မှုကဏ္ဍ ပိုမိုဖွံ့ဖြိုးတိုးတက်လာစေရေးအတွက် တောင်သူပညာပေးစိုက်ပျိုးထားရှိသည့် သုတေသနစမ်းသပ်ကွက် သက်လျှင်အထွက် ကောင်းစပါးမျိုးများ စံကွက်ရိတ်သိမ်းပွဲကို ဒီဇင်ဘာ ၁ ရက်   နံနက် ၈ နာရီခွဲက ပွင့်ဖြူမြို့နယ် ကံသာကြီးကျေးရွာ တောင်သူ ဒေါ်ထွေးထွေး၏ ကွင်းအမှတ်(၈၉၅) စပါးစိုက်ခင်းတွင် ကျင်းပသည်။ 

စံကွက်ရိတ်သိမ်းရာတွင် ပွင့်ဖြူမြို့နယ်စိုက်ပျိုးရေးဦးစီးဌာနမှ ဒုတိယဦးစီးမှူး ဒေါ်အေးအေးမိုးနှင့် ဝန်ထမ်းများက တောင်သူပညာပေး သုတေသနစမ်းသပ်ကွက် စိုက်ပျိုးထားသည့် သက်လျှင်အထွက်ကောင်းစပါးမျိုးများဖြစ်သော ထိုင်းဆန် မွှေး ၊ ရက်(၉၀) ၊ လယ်တောကြီး ၊ ချမ်းမြေ့မေ စပါးမျိုး(၄)မျိုး ယှဉ်ပြိုင်စိုက်ပျိုးထားရှိမှုနှင့် ဆန်စပါးစိုက်ပျိုးရာတွင် သီးနှံ အထွက်နှုန်းတိုးတက်ကောင်းမွန်ရေးအတွက် မျိုးကောင်းမျိုးသန့် ရွေးချယ်စိုက်ပျိုးရန်အချက်များ ၊ စိုက်နည်းစနစ်မှန်ကန်ရေး လိုက်နာရန်အချက်များ ၊ သီးနှံဖျက်ပိုးရောဂါကြိုတင်ကာကွယ်နှိမ်နင်းရန်နည်းလမ်းများ ၊ မျိုးကောင်းမျိုးကောင်းရရှိအောင် ဆောင်ရွက်ရန်အချက်များနှင့် ထားသိုထိန်းသိမ်းစနစ်များကို ဒေသခံတောင်သူများကို အသိပညာပေး ရှင်းလင်းဆွေးနွေး ပြောကြားခဲ့သည်။ 

ထို့နောက် ကံသာကြီးကျေးရွာ တောင်သူ ဒေါ်ထွေးထွေး၏ လယ်မြေတွင် စိုက်ပျိုးထားရှိသော သုတေသနစမ်းသပ် ကွက် သက်လျှင်အထွက်ကောင်းစပါးမျိုး(၄)မျိုး ယှဉ်ပြိုင်စမ်းသက်ကွက်မှ ချမ်းမြေ့မေမျိုးစပါး ( သုည ဒသမ ၂၅)ဧက အား မျိုးစပါးစံကွက်ရိတ်သိမ်းရာ တစ်ဧက ပျမ်းမျှ စပါးတင်းရေ(အစို) ၁၀၉ ဒသမ ၃၇ တင်း ၊ (အခြောက်) ၉၈ ဒသမ ၄၃ တင်း ထွက်ရှိခဲ့ကြောင်း သိရသည်။   

ရဲဝင်းနိုင် ( ညောင်ဦး )