သထုံ ၁၈ မတ်
မွန်ပြည်နယ် သထုံမြို့နယ်၊ ဒုံဝန်းကျေးရွာတွင် တပေါင်းလပြည့်နေ့၌ ပြည်နယ်အဆင့် ကျင်းပမည့် နှစ်(၇၀)ပြည့် ပအိုဝ်းအမျိုးသားနေ့ ကွင်းမုခ်ဦးဖွင့်ပွဲအခမ်းအနားကို မတ်လ ၁၇ ရက်၊ မွန်းလွဲပိုင်းက ဒုံဝန်းကျေးရွာရှိ ကျင်းပရာကွင်းပြင်၌ စည်ကားစွာ ကျင်းပသည်။
ရှေးဦးစွာ ပအိုဝ်းအမျိုးသားဦးဆောင်ဆရာတော်ကြီးများ၊ မွန်ပြည်နယ်ပအိုဝ်းတိုင်းရင်းသား ရေးရာဝန်ကြီး ဒေါ်စံဝင့်ခိုင်၊ ပြည်နယ်ပအိုဝ်းစာပေနှင်ယဉ်ကျေးမှုအဖွဲ့ ဥက္ကဋ္ဌ ခွန်မောင်သောင်းနှင့် တာဝန်ရှိသူများက အခမ်းအနားမုခ်ဦးအား ဖဲကြိုးဖြတ်ဖွင့်လှစ်ပေးကြသည်။
ယင်းနောက် ပြည်နယ်ပအိုဝ်းတိုင်းရင်းသားရေးရာဝန်ကြီးနှင့် သထုံမြို့နယ်အုပ်ချုပ်ရေးမှူး ဦးသိန်းဝင်းတို့က အမှာစကားများပြောကြားပြီး ပအိုဝ်းတိုင်းရင်းသားယဉ်ကျေးမှုအဖွဲ့များက ရိုးရာအကများဖြင့် ကပြဖျော်ဖြေခဲ့ကြသည်။
အဆိုပါအခမ်းအနားသို့ ပြည်နယ်ပအိုဝ်းတိုင်းရင်းသားရေးရာဝန်ကြီး၊ ပြည်နယ်လွတ်တော် ကိုယ်စားလှယ် ဒေါ်ခိုင်ခိုင်လဲ့နှင့် ဦးအောင်ကျော်သူ၊ မြို့နယ်အုပ်ချုပ်ရေးမှူးနှင့် ဌာနဆိုင်ရာများ၊ ပအိုဝ်းတိုင်းရင်းသား စာပေနှင့် ယဉ်ကျေးမှုအဖွဲ့များ၊ ဒေသခံတိုင်းရင်းသားများနှင့် ဖိတ်ကြားထားသူများ တက်ရောက်ခဲ့ကြောင်း သိရသည်။
သက်ဦး(သထုံ)
