ပြည်သူတွေရဲ့ ငွေကြေးဆုံးရှုံးမှု တိုင်ကြားချက်တွေကို အရေးယူဖြေရှင်း ဆောင်ရွက်ပေးနေ

ကုမ္ပဏီအချို့သည် ငွေကြေးဆိုင်ရာ ဝန်ဆောင်မှုလုပ်ငန်းနှင့် ချေးငွေလုပ်ငန်းများကို တရားမဝင်လုပ်ကိုင်ကာ ပြည်သူများအား ရင်းနှီးမြှုပ်နှံရန် ဆွဲဆောင်ပြီး အတိုးနှုန်း ၁၀ မှ ၁၅ ရာခိုင်နှုန်းအထိ မက်လုံးပေးကာ အစုရှယ်ယာများကို ဖိတ်ခေါ်ရောင်းချနေကြသည်။

ထိုကဲ့သို့ အတိုးငွေမက်လုံးများကြောင့် မသိနားမလည်သည့် ပြည်သူများသည် အစုရှယ်ယာ ဝယ်ယူမိသည့်အတွက် ငွေကြေးလိမ်လည်ခံရပြီး နစ်နာဆုံးရှုံးမှုများ ကြုံတွေ့ခဲ့ရသည်။ ပြည်သူများ နစ်နာဆုံးရှုံးမှု မရှိစေရေးနှင့် လိမ်လည်မှု မခံရစေရေးတို့အတွက် အဆိုပါလိမ်လည်မှုများနှင့် ပတ်သက်၍ စစ်ဆေးဆောင်ရွက်နေသည့် ပြည်ထဲရေးဝန်ကြီးဌာန အထူးစုံစမ်းစစ်ဆေးရေး ဦးစီးဌာနမှ တာဝန်ရှိသူများကို ယခုကဲ့သို့ တွေ့ဆုံမေးမြန်းခဲ့သည်။

mdn

ဦးအောင်မျိုး(ညွှန်ကြားရေးမှူး)အထူးစုံစမ်းစစ်ဆေးရေးဦးစီးဌာန

မေး။ အထူးစုံစမ်းစစ်ဆေးရေးဦးစီးဌာနက တရားမဝင်ငွေကြေးဝန်ဆောင်မှုလုပ်ငန်းတွေ၊ ငွေကြေးလိ်မ်လည်မှုတွေကို စစ်ဆေးဆောင်ရွက်နေတာတွေရှိရင် ပြောပြပေးစေလို ပါတယ်။

ဖြေ။ လတ်တလောမှာတော့ ၂၀၁၇ ခုနစ် အစောပိုင်းမှာ ခွင့်ပြုချက်မရှိဘဲ တရားမဝင်ငွေကြေးဝန်ဆောင်မှု လုပ်ငန်းတွေ ဆောင်ရွက်နေတဲ့ ကုမ္ပဏီတွေကို စစ်ဆေးခဲ့တာ ရှိပါတယ်။ အဲဒီမှာတော့ SCL Myanmar Co.Ltd က ပဲခူး တိုင်းဒေသကြီး၊ ပြည်မြို့နယ်မှာ SCL Myanmar Co.Ltd ဆိုပြီး နိုင်ငံခြားကုမ္ပဏီတစ်ခုက ဒေသခံတွေကို အစုရှယ်ယာတွေ ရောင်းချပြီး အတိုးနှုန်းမြင့်မားစွာ ပေးနေတယ်ဆိုတဲ့ အပေါ်မှာ ပဲခူးတိုင်းဒေသကြီး အစိုးရအဖွဲ့က ပြည်ထောင်စုအစိုးရအဖွဲ့ကို တင်ပြခဲ့ပါတယ်။ ဒါတွေက လိမ်လည်မှု ဖြစ်ပေါ်လာနိုင်တဲ့အတွက် စစ်ဆေးဆောင်ရွက်ဖို့ဆိုပြီး တင်ပြလာတော့ ကျွန်တော်တို့ အထူးစုံစမ်းစစ်ဆေးရေး ဦးစီးဌာန၊ ရန်ကုန်တိုင်းဒေသကြီးရုံးနဲ့ ဗဟိုဘဏ် ဒုတိယညွှန်ကြားရေးမှူးတစ်ဦးတို့ ပါဝင်တဲ့ ပူးပေါင်း အဖွဲ့က စစ်ဆေးဆောင်ရွက်ခဲ့တာ ရှိပါတယ်။ SCL Myanmar Co.Ltd ကတော့ ထိုင်းနိ်ုင်ငံသားတစ်ဦးနဲ့ မြန်မာနိုင်ငံသား တစ်ဦးတို့ စတင်ဆောင်ရွက်ခဲ့ပြီး ရင်းနှီးမြှုပ်နှံငွေတွေကို လိမ်လည်သွားတဲ့ဖြစ်စဉ် ပေါ်ပေါက်ခဲ့ပါတယ်။ အဲဒါနဲ့ ပတ်သက် ပြီး ကျွန်တော်တို့ဆီက စစ်ဆေးအရေးယူ ဆောင်ရွက်ခဲ့တာ ရှိပါတယ်။

အလားတူ JJPTR Investment Co.Ltd ဆိုပြီး ၂၀၁၇ ခုနစ်မှာပဲ စုံစမ်းစစ်ဆေးခဲ့တာ ရှိပါတယ်။ အဲဒါကတော့ အမှတ် ၆၃ ၊ ၁၆၄ လမ်း တာမွေမြို့နယ်မှာ ဖွင့်ထားတဲ့ Royal JJ Co.Ltd မန်နေးဂျင်းဒါရိုက်တာက နိုင်ငံခြားကုမ္ပဏီနဲ့ ချိတ်ဆက်ပြီး ဆောင်ရွက်နေတာကို စစ်ဆေးခဲ့တာတွေ ရှိပါတယ်။ မလေးရှားနိုင်ငံမှာ ဖွင့်လှစ်ထားတဲ့ ကုမ္ပဏီတစ်ခုဖြစ်ပြီး မြန်မာ နိုင်ငံအပါအဝင် နိုင်ငံပေါင်း ၁၀ နိုင်ငံမှာ အွန်လိုင်းကနေ ငွေလက်ခံရယူတယ်။ ပြီးရင်အတိုးပြန်ထုတ်ပေးတဲ့ လုပ်ငန်းတွေကို လုပ်ကိုင်ဆောင်ရွက်နေပါတယ်။ ဒီကုမ္ပဏီကလည်း တရားမဝင် ငွေကြေးလုပ်ငန်း ဆောင်ရွက်နေတဲ့အတွက်ကြောင့် ဒါကိုလည်း ကျွန်တော်တို့စိစစ်ပြီး အရေးယူဆောင်ရွက်ခဲ့တာ ရှိပါတယ်။

မေး။ ပြည်သူတွေ ငွေကြေးလိမ်လည်မှု မခံရအောင် အသိပညာပေးစကားလေး ပြောပေးပါဦး။

ဖြေ။ အခုခေတ်ကာလမှာ ပေါ်ပေါက်လာပြီး လုပ်ကိုင်လေ့ရှိကြတဲ့ ငွေကြေးဆိုင်ရာ ဝန်ဆောင်မှုလုပ်ငန်း၊ ချေးငွေလုပ်ငန်းတွေက တရားဝင် ခွင့်ပြုချက်မရှိဘဲ လုပ်ကိုင်နေကြတာတွေကို ပြည်သူတွေအနေနဲ့ မယုံကြည်ကြဖို့ ပြောချင်ပါတယ်။ အတိုးနှုန်းပေါ်မှာ မက်လုံးပေးပြီး ဆောင်ရွက်နေတာဖြစ်လို့ ဆုံးရှုံးနိုင်ချေများပါတယ်။ ဒါ့အပြင် တရားမဝင်ဆောင်ရွက် နေတာဖြစ်လို့ သက်ဆိုင်ရာဥပဒေနဲ့ အရေးယူခံရရင် မိမိတို့ရဲ့ ရင်းနှီးမြှုပ်နှံမှုတွေကိုလည်း ထိခိုက်နိုင်ပါတယ်။ အဲဒီအတွက်ကြောင့် ဒီလို တရားမဝင် ဆောင်ရွက်မှုတွေကို တွေ့ရင်လည်း သတင်းပေး တိုင်ကြားနိုင်ပါတယ်ဆိုတဲ့အကြောင်း အသိပေးချင်ပါတယ်။

mdn

ဦးအောင်မင်းဦး(ဒုတိယညွှန်ကြားရေးမှူး) မှုခင်းဌာန ၊ အထူးစုံစမ်းစစ်ဆေးရေးဦးစီးဌာန

မေး။ မြန်မာနိုင်ငံအတွင်းမှာ တရားမဝင်ငွေကြေး ဝန်ဆောင်မှု လုပ်ငန်းတွေ ဆောင်ရွက်နေတာတွေကို စစ်ဆေးတွေ့ရှိရင် ဘယ်လိုအရေးယူ ဆောင်ရွက်လို့ ရသလဲဆိုတာ ရှင်းပြပေးစေလိုပါတယ်။

ဖြေ။ ကျွန်တော်တို့ဌာနက စစ်ဆေးခဲ့တဲ့ ကုမ္ပဏီနှစ်ခုနဲ့ ပတ်သက်ပြီး စစ်ဆေးတွေ့ရှိတာက SCL Myanmar Co.Ltd ကျွန်တော်တို့နိုင်ငံမှာလာပြီး ဆောင်ရွက် သွားတာက ထိုင်းနိုင်ငံသား မစ္စတာ ချစ်စနူပေါင်ဆူရာမိုင်တစ် နဲ့ မြန်မာနိုင်ငံက နန်းတစ်နွန်း(ခ) ဖန်းဖန်းတို့က ဆောင်ရွက်သွားတာကို တွေ့ရပါတယ်။ သူတို့က SCL Myan-mar Co.Ltd ကို ထူထောင်တဲ့အခါ ကျွန်တော်တို့ နိုင်ငံသားတွေကို ဒါရိုက်တာ အဖွဲ့ဝင်အဖြစ် အမည်ခံစေပြီးတော့ နောက်ကွယ်က ကြိုးကိုင် လှုပ်ရှားသွားတာကို စစ်ဆေးတွေ့ရှိရပါတယ်။

သူတို့က ရင်းနှီးမြှုပ်နှံချင်တဲ့သူတွေကို တစ်ယူနစ်ကို တစ်ဒေါ်လာ၊ မြန်မာငွေကျပ် ၁၂၅၀ နှုန်းသတ်မှတ်ပြီး ထည့်ဝင်စေပါတယ်။ ထည့်ဝင်သူတွေကို အနည်းဆုံး ယူနစ် ၁၀ဝ ထည့်ဝင်စေပြီး အတိုးနှုန်းကတော့ ၃ ဒသမ ၆ ရာခိုင်နှုန်းလောက်ပေးပြီး ဆောင်ရွက်သွားတာကို စစ်ဆေးတွေ့ရှိရပါတယ်။ အတိုး ၊အရင်းပေါင်းကို သူတို့က သုံးလတစ်ကြိမ် ပြန်ထုတ်ပေးပါတယ်။ ဒါ့အပြင် သူတို့ဆီမှာ အစုရှယ်ယာဝင်တွေ များလာစေဖို့အတွက် မက်လုံးပေးတဲ့စနစ်ဖြစ်တဲ့ ခြောက်ဦးအဖွဲ့၊ ၁၂ ဦးအဖွဲ့၊ ၂၀ ဦးအဖွဲ့၊ ၄၀ဦး အဖွဲ့ အဲဒီလိုအဖွဲ့လေးတွေနဲ့ စုဆောင်းခိုင်းပါတယ်။ အဲဒီလို စုဆောင်းပေးနိုင်တဲ့ သူတွေကို အထူးဆုကြေးငွေ ဘောနပ်စ်အဖြစ် ခြောက်ဦးအဖွဲ့ စုဆောင်းနိုင်သူကို ၁၀ ရာခိုင်နှုန်း၊ ၁၂ ဦး ဖွဲ့စည်းနိုင်မှုကို အထူးဆုကြေး ၁၁ ရာခိုင်နှုန်း၊ ၂၀ ဦး စုပေးနိုင်မှုကို အထူးဆုကြေး ၁၂ ရာခိုင်နှုန်း၊ ၆၀ ဦးစုပေးနိုင်မှုကို အထူးဆုကြေး ၁၃ ရာခိုင်နှုန်း၊ ၂၀ဝ ဦး စုပေးနိုင်မှုကို အထူးဆုကြေး ၁၅ ရာခိုင်နှုန်း ပေးတဲ့စနစ်ကို မက်လုံးပေးပြီး ဆောင်ရွက်တာ ဖြစ်ပါတယ်။ ယူနစ် ထည့်ဝင်ငွေပမာဏ သတ်မှတ်ပေးပြီး များများထည့်ဝင်နိုင်သူကို များများအတိုးရစေတဲ့ စနစ်ကို ကျင့်သုံးခဲ့ကြတယ်။

အတိုးငွေပေးတဲ့အပေါ် ယုံကြည်လာပြီး စုဆောင်းထည့်ဝင်သူတွေ များလာပါတယ်။ စုဆောင်းသူဦးရေ လေးသောင်းကျော်၊ ထည့်ဝင်ငွေကျပ်သိန်းပေါင်း သုံးသောင်းကျော်လောက် ရှိလာတဲ့အခါ ထုတ်ယူပြီး ထွက်ပြေးတိမ်းရှောင်သွားတာကို စစ်ဆေးတွေ့ရှိရပါတယ်။ အဲဒါကြောင့် SCL Myan-mar Co.Ltd က ထိုင်းနိုင်ငံသား မစ္စတာ ချစ်စနူပေါင် ဆူရာမိုင်တစ်နဲ့ နန်းတစ်နွန်း (ခ) ဖန်းဖန်းတို့ကို ၂၀၁၆ ခုနစ် ငွေရေးကြေးရေး အဖွဲ့အစည်းများ ဥပဒေပုဒ်မ ၁၇၁/၁၇၄ ပြစ်မှုဆိုင်ရာကျင့်ထုံး ဥပဒေပုဒ်မ ၅၁၂ နဲ့ ဗဟန်းတရားရုံးကို တရားစွဲတင်ပို့ခဲ့ပါတယ်။ ရာဇဝတ် အထွေထွေမှုအမှတ် (၁၀၂ / ၂၀၁၇) နဲ့ ကြားနာစစ်ဆေးခဲ့ပြီး ရာဇဝတ်ကျင့်ထုံး ဥပဒေပုဒ်မ ၈၇/၈၈ အရ တရားခံပြေးအဖြစ် ကြေညာပြီး ဖမ်းဆီးအရေးယူနိုင်ဖို့ ဆောင်ရွက်လျက်ရှိပါတယ်။

JJPTR Investment Co.Ltd ရုံးက မလေးရှားနိုင်ငံမှာ ရှိပါတယ်။ သူကတော့ မြန်မာနိုင်ငံအပါအဝင် ၁၀ နိုင်ငံလောက်မှာ စုဆောင်းငွေတွေ လက်ခံပြီး အတိုးထုတ်ပေးတဲ့စနစ်ကို ကျင့်သုံး နေပါတယ်။ JJPTR ကုမ္ပဏီအတွက် ကျွန်တော်တို့နိုင်ငံမှာ တာဝန်ယူဆောင်ရွက်ပေးတာကတော့ ဒေါ်တွမ်ပီကြိုင်ဆိုသူ ဖြစ်ပါတယ်။ သူက Royal JJ Co.Ltd ဆိုပြီး တာဝန်ခံဆောင် ရွက်ပေးတာ ဖြစ်ပါတယ်။ Royal JJ Co.Ltd ကျွန်တော်တို့ နိုင်ငံမှာ တရားဝင် မှတ်ပုံတင်ထားပေမယ့် မလေးရှားနိုင်ငံက JJPTR ကုမ္ပဏီက ကျွန်တော်တို့နိုင်ငံမှာ တရားဝင်မှတ်ပုံတင်ထားခြင်း မရှိပါဘူး။ အဲဒီတော့ သူတို့ရဲ့ လုပ်ငန်းဆောင်ရွက်မှုကို စုံစမ်းထောက်လှမ်းတဲ့အခါ စုဆောင်းငွေထည့်ဝင်သူက အနည် ဆုံး ၂၅ ဒေါ်လာကနေ အများဆုံးဒေါ်လာ ၁၀ဝဝ အထိ ထည့်ဝင်နိုင်တယ်။ ဒီထက်ပိုပြီး ထည့်ဝင်ချင်တယ်ဆိုလည်း လက်ခံပေးတယ်။ အတိုးနှုန်းကို တစ်လပြည့်တိုင်း ၂၀ ရာခိုင်နှုန်းထုတ်ပေးတဲ့ စနစ်ကိုကျင့်သုံးတယ်။ သူတို့ဆီမှာ ထည့်ဝင်ချင်တဲ့သူက ပထမဦးဆုံး ဘဏ်အကောင့်ဖွင့်ရတယ်။ ပြီးရင် အွန်လိုင်းက www. JJPTR .com မှာ ထည့်ဝင်တဲ့ Registration အမည်စာရင်း တင်သွင်းရတယ်။

အဲဒီလိုလုပ်ပြီးတဲ့အခါ ထည့်ဝင်ချင်တဲ့ငွေကို ဒေါ်တွမ်ပီကြိုင်ကို ငွေလွှဲပေးရတယ်။ ဒေါ်တွမ်ပီကြိုင်ကတစ်ဆင့် JJPTR ကို ဆက်သွယ်ပေးတယ်။ JJPTR က ထည့်ဝင်သူတွေထံ အကောင့်ကို လျှို့ဝှက် ID ပြန်ပို့ပေးတယ်။ ထည့်ဝင်တဲ့သူက အဲဒီလျှို့ဝှက် ID နဲ့ အွန်လိုင်းမှာ သူနေ့စဉ်ရနေတဲ့ အတိုး၊ အမြတ်ကို ဝင်ကြည့်လို့ရတယ်။ အဲဒီလိုနဲ့ ထပ်ပြီးထည့်ကြတယ်။ ကျွန်တော်တို့ ဝင်ရောက်စစ်ဆေးတဲ့အခါ လူ ၅၀ဝဝ ခန့် ထည့်ဝင်ထားကြတာကို တွေ့ရတယ်။

ဒီလုပ်ငန်းက မြန်မာနိုင်ငံတော်ဗဟိုဘဏ်ရဲ့ ခွင့်ပြုချက်မရှိဘဲ တရားမဝင် ငွေကြေးဝန်ဆောင်မှုလုပ်ငန်း လုပ်ကိုင်ခြင်းနဲ့ ခွင့်ပြုမိန့်မရှိဘဲ နိုင်ငံခြားသုံးငွေ လုပ်ကိုင်ခြင်းတွေကြောင့် ဒေါ်တွမ်ပီကြိုင်ကို ၂၀၁၆ ခုနစ် ငွေရေး၊ ကြေးရေးအဖွဲ့အစည်းများ ဥပဒေပုဒ်မ ၁၇၁ နဲ့ ၂၀၁၂ ခုနစ် နိုင်ငံခြားသုံးငွေစီမံခန့်ခွဲမှု ဥပဒေပုဒ်မ ၄၂ တို့အရ တရားစွဲဆိုခဲ့ပြီး၂၀၁၆ ခုနစ် ငွေရေး၊ ကြေးရေးအဖွဲ့အစည်းများ ဥပဒေပုဒ်မ ၁၇၁ အရ ထောင်ဒဏ် နှစ်နှစ်နဲ့ ငွေဒဏ်ကျပ် ၁၀ သိန်း၊ ငွေဒဏ်မဆောင်ပါက ထောင်ဒဏ်တစ်နှစ် ထပ်မံကျခံစေရန်၊ အမှုနဲ့ပတ်သက်ပြီး သိမ်းဆည်းထားတဲ့ ငွေကျပ် သိန်းပေါင်း ၇၉၀ဝ ကျော်နဲ့ မော်တော်ယာဉ်ကို ပြည်သူ့ဘဏ္ဍာအဖြစ် သိမ်းဆည်းနိုင်ခဲ့သလို ၂၀၁၂ ခုနစ် နိုင်ငံခြားသုံးငွေ စီမံခန့်ခွဲမှုဥပဒေပုဒ်မ ၄၂ အရ ငွေဒဏ် ကျပ် သိန်း ၃၀ ပေးဆောင်ရန်၊ ငွေဒဏ်မဆောင်ပါက ထောင်ဒဏ် ခြောက်လ ထပ်မံကျခံစေရန် အမိန့်ချမှတ်အရေးယူ နိုင်ခဲ့ပါတယ်။

မေး။ ငွေကြေးလိမ်လည်ခံရတဲ့ နစ်နာသူ၊ ပြည်သူတွေက တိုင်ကြားချင်တယ်ဆိုရင် ဘယ်လိုဆက်သွယ်ဆောင် ရွက်ရမလဲဆိုတာ ပြောပြပေးပါဦး။

ဖြေ။ ပြည်သူတွေက ငွေကြေးတွေဆုံးရှုံးလို့ တိုင်ကြားချင်တယ်ဆိုရင် ကျွန်တော်တို့ဌာနကို လိပ်မူပြီး တိုင်စာပေးပို့လို့ ရပါတယ်။ အွန်လိုင်းကလည်း သတင်းပေးတိုင်ကြားလို့ ရပါတယ်။ ငွေကြေးလိမ်လည်မှုတွေနဲ့ ပတ်သက်ပြီး ကျွန်တော်တို့ ဌာနကို မကြာခဏ တိုင်ကြားလာတာတွေလည်း ရှိပါတယ်။ အဲဒီလိုတိုင်ကြားမှုတွေကို လမ်းညွှန်ချက်နဲ့အညီ စုံစမ်းအရေးယူ ဖြေရှင်းဆောင်ရွက် ပေးနေပါတယ်။

mdn

ဦးစိုးမြင့်လေး (ဒုတိယညွှန်ကြားရေးမှူး) ဥပဒေနှင့် အကျိုးဆောင်ဌာန၊ အထူးစုံစမ်းစစ်ဆေးရေး ဦးစီးဌာန

မေး။ တရားမဝင် ငွေရေးကြေးရေး ဝန်ဆောင်မှုတွေနဲ့ ပတ်သက်ပြီးဘယ်လိုအရေးယူ ဆောင်ရွက်လို့ ရပါသလဲ။

ဖြေ။ တရားမဝင်ငွေရေးကြေးရေး ဝန်ဆောင်မှုတွေ ဆောင်ရွက်မယ်ဆိုရင် ၂၀၁၆ ခုနှစ်၊ ငွေရေးကြေးရေး အဖွဲ့အစည်းများ ဥပဒေအရ အရေးယူဆောင်ရွက်နိုင်ပါတယ်။ အဲဒီဥပဒေပုဒ်မ ၁၅၉ မှာ မည်သူမျှ ဗဟိုဘဏ်ကထုတ်ပေးတဲ့ မှတ်ပုံတင်လက်မှတ် မရှိဘဲ ဘဏ်မဟုတ်တဲ့ ငွေရေးကြေးရေး အဖွဲ့အစည်း မလုပ်ရလို့ ကန့်သတ်ထားပါတယ်။ အဲဒီ ကန့်သတ်ချက်ကို ဖောက်ဖျက်ရင် ပုဒ်မ ၁၇၁ အရ ပြစ်မှုထင်ရှားစီရင်ခြင်း ခံရမှာဖြစ်ပြီး အနည်းဆုံးထောင်ဒဏ်(၂)နှစ်မှ အများဆုံး (၅)နှစ် ထက်မပိုတဲ့ ထောင်ဒဏ်ချမှတ်ခံရမယ့်အပြင် ကျပ် သန်း (၅၀ဝ) ထက်မပိုတဲ့ ငွေဒဏ်လည်း ချမှတ်ခံရမှာ ဖြစ်ပါတယ်။

ဒါ့အပြင် ၂၀၁၂ ခုနှစ်၊ အရေးကြီးကုန်စည်နဲ့ ဝန်ဆောင်မှု ဥပဒေပုဒ်မ ၄ (ဂ) အရ ပြည်ထောင်စုအစိုးရအဖွဲ့သည် သက်ဆိုင်ရာ ဝန်ကြီးဌာန တစ်ခုခုအား ဝန်ဆောင်မှုတစ်မျိုးမျိုးကို အရေးကြီးဝန်ဆောင်မှုအဖြစ် သတ်မှတ်ကြေညာပြီး အဲဒီဝန်ဆောင်မှုနဲ့ သက်ဆိုင်တဲ့ ကိစ္စရပ်တွေကို တားမြစ်မိန့်၊ စည်းကမ်းသတ်မှတ်မိန့်၊ ကြီးကြပ်မိန့်၊ ကာကွယ်မိန့်နဲ့ လိုအပ်သလို ဆောင်ရွက်စေလိုတဲ့ အမိန့်တွေ ထုတ်ပြန်နိုင်ခွင့် အာဏာ အပ်နှင်းနိုင်ပြီး အဲဒီသက်ဆိုင်ရာ ဝန်ကြီးဌာနတွေက အများ ပြည်သူထိခိုက်နစ်နာစေတဲ့ ဝန်ဆောင်မှုတွေနဲ့ ပတ်သက်ပြီး အမိန့်ထုတ်ပြန် ထိန်းချုပ်ကန့်သတ် ကြီးကြပ်ဆောင်ရွက်နိုင်တာ တွေ့ရပါတယ်။ အမိန့်မလိုက်နာသူ မည်သူ့ကိုမဆို ၂၀၁၂ ခုနှစ်၊ အရေးကြီးကုန်စည်နဲ့ ဝန်ဆောင်မှုဥပဒေပုဒ်မ ၅ အရ အနည်းဆုံး ထောင်ဒဏ် ၆ လ မှ အများဆုံးထောင်ဒဏ် ၃ နှစ်အထိ ချမှတ် ရမယ့်အပြင် ကျပ်ငါးသိန်းထက်မပိုတဲ့ ငွေဒဏ်လည်း ချမှတ်နိုင်ပါတယ်။ ဒါ့ကြောင့် အများပြည်သူ ထိခိုက်နစ်နာစေမယ့် ဝန်ဆောင်မှုတွေကို တရားမဝင် လုပ်ကိုင်မယ်ဆိုရင် ၂၀၁၂ အရေးကြီး ကုန်စည်နဲ့ ဝန်ဆောင်မှုဥပဒေအရလည်း အရေးယူနိုင်မှာ ဖြစ်ပါ တယ်။

မေး။ ဆုံးရှုံးနစ်နာသွားတဲ့ ပြည်သူတွေက ငွေကြေးတွေ ပြန်လည်ရရှိအောင် ဘယ်လိုဆောင်ရွက်လို့ရပါသလဲ။

ဖြေ။ ငွေကြေးတွေ ဆုံးရှုံးသွားတဲ့ ပြည်သူတွေက ငွေကြေးပြန်လည်ရဖို့ဆိုရင် ကျွန်တော်တို့ အရေးယူဆောင်ရွက်ရတဲ့ တရားစွဲ အဖွဲ့အစည်းတွေအနေနဲ့ မှုခင်းတွေ စုံစမ်းစစ်ဆေးချိန်၊ ပြစ်မှုကျူးလွန်မှုနဲ့ သက်ဆိုင်တဲ့ ငွေကြေးနှင့် ပစ္စည်းတွေကို သိမ်းဆည်းပြီး သက်ဆိုင်ရာ စီရင်ပိုင်ခွင့်ရှိတဲ့ တရားရုံးတွေကို သက်သေခံပစ္စည်းအဖြစ် တင်ပြဆောင်ရွက်နေတဲ့အချိန်မှာ ဆုံးရှုံးနစ်နာသွားသူတွေ အနေနဲ့ မိမိတို့နစ်နာ ဆုံးရှုံးသွားတဲ့ ငွေကြေးနဲ့ပစ္စည်းတွေ ပြန်လည်ရရှိဖို့အတွက် သက်ဆိုင်ရာ တရားရုံးတွေမှာ တတိယပုဂ္ဂိုလ်(Third Party)အနေနဲ့ ဥပဒေနဲ့အညီ တင်ပြတောင်းခံနိုင်ပါတယ်။ ဒါ့အပြင် ပြစ်မှုကျူးလွန်သွားသူတွေထံကလည်း တရားမကြောင်းအရ မိမိဆုံးရှုံးနစ်နာမှုတွေကို တရားစွဲဆို တောင်းခံနိုင်ပါတယ်

နန္ဒာဝင်း၊ ဓာတ်ပုံ-တာရာ