နေပြည်တော် ၂၄ ဩဂုတ်

ပြည်ထောင်စုဖောင့်(Pyidaungsu Font) စနစ်သည် ယူနီကုဒ်နိုင်ငံတကာစံ ISO 10646 နှင့်ကိုက်ညီအောင် ဆောင်ရွက်ထားသော စနစ်ဖြစ်သည်။ မြန်မာယူနီကုဒ်ကို ကွန်ပျူတာသုံး မြန်မာစာစနစ်အဖြစ်သတ်မှတ်ပြီး ပြည်ထောင်စုအစိုးရအဖွဲ့နှင့် ဝန်ကြီးဌာနများ၊ တိုင်းဒေသကြီးနှင့် ပြည်နယ်အစိုးရအဖွဲ့ရုံးဌာနများတွင် ယခုနှစ် ဧပြီလ ၁ ရက်နေ့မှစတင်၍ အောင်အောင်မြင်မြင် တွင်တွင်ကျယ်ကျယ် အသုံးပြု နေပြီဖြစ်သည်။

ဆက်လက်၍ နိုင်ငံတကာစနစ်ဖြစ်သော မြန်မာယူနီကုဒ်စနစ်ကို နိုင်ငံတစ်ဝန်းလုံးတွင် ပြောင်းလဲသုံးစွဲနိုင်အောင် အားလုံးကြိုးပမ်း အားထုတ်ရမည်ဖြစ်သည်။ မြန်မာယူနီကုဒ်စနစ်ကို ပြောင်းလဲသုံးစွဲရာတွင် သတင်းအချက်အလက် ဆက်သွယ်ရေးနှင့် ဆိုရှယ်မီဒီယာများပေါ်တွင် လက်ရှိရေးသား သုံးစွဲလျက်ရှိသော မြန်မာစာစနစ်အစား ယခုစနစ်အား လာမည့်အောက်တိုဘာလ ၁ ရက်နေ့မှစတင်၍ တရားဝင်စတင်ကူးပြောင်း သုံးစွဲနိုင်အောင် လက်တွေ့ ဆောင်ရွက်ကြရမည်ဖြစ်သည်။

မကြာမီစတင်တော့မည့် မြန်မာယူနီကုဒ်စနစ်သို့ ကူးပြောင်းရေး လုပ်ငန်းစဉ်များသည် မြန်မာနိုင်ငံ၏ e- Government လုပ်ငန်းစဉ်များ အောင်မြင်ရေးနှင့် ကဏ္ဍစုံ ဖွံ့ဖြိုးတိုးတက်ရေးအတွက် အရေးကြီးသော လုပ်ငန်းစဉ်ကို စတင်တက်လှမ်းလိုက်ခြင်းဖြစ်သည်။ မြန်မာနိုင်ငံတွင် ကွန်ပျူတာစနစ်ကို စတင်အခြေချခဲ့သည့် ၁၉၉၂ ခုနှစ်မှစ၍ မြန်မာ ကွန်ပျူတာပညာရှင်များ ကိုယ်ပိုင်တီထွင်ခဲ့သည့် Win စနစ်၊ Zawgyi  စနစ်ဖြင့် ပြည်သူများ အသုံးပြုလာခဲ့သည်။ ဆယ်စုနှစ်သုံးခုမျှ လက်စွဲလာသောစနစ်မှ ယခုစနစ်သစ်သို့ ပြောင်းလဲရန်မှာ ခက်ခဲသည်ဟု ထင်နိုင်သော်လည်း လက်တွေ့အသုံးချသောအခါ အခက်အခဲမရှိ လွယ်ကူပေသည်။

အပြောင်းအလဲတစ်ခုကို တစ်ပြိုင်နက်ဆောင်ရွက်ရာတွင် တစ်ပြေးညီဖြစ်ရန်မှာ ခက်ခဲမည်မှန်သော်လည်း ယခုအချိန်အခါတွင် နိုင်ငံတကာသုံး စနစ်ကို ပြောင်းလဲရန်အတွက် အလွန်အရေးကြီးနေသည်။ ယူနီကုဒ်စနစ်သည် တစ်ကမ္ဘာလုံး အသိအမှတ်ပြုထားသော စနစ်ဖြစ်ပြီး နိုင်ငံများအားလုံး ပြောင်းလဲအသုံးပြုနေကြပြီ ဖြစ်သည်။ နောက်ဆုံးပြောင်းလဲ အသုံးပြုခဲ့သောနိုင်ငံများမှာ ဘင်္ဂလားဒေ့ရှ်နှင့် ကမ္ဘောဒီးယားနိုင်ငံတို့ ဖြစ်ပြီး ၂၀ဝ၈ ခုနှစ်နှင့် ၂၀၁၀ ပြည့်နှစ်ကြားတွင် ပြောင်းလဲခဲ့သည်။ ယခုနှစ်တွင်မြန်မာနိုင်ငံသည် နောက်ဆုံး ပြောင်းလဲခဲ့သော နိုင်ငံဖြစ်လာမည်ဖြစ်သည်။

မြန်မာနိုင်ငံတွင် ယူနီကုဒ်စနစ်ကို ပြောင်းလဲလိုက်ခြင်းအားဖြင့် မြန်မာဘာသာစကားအပြင် တိုင်းရင်းသား ဘာသာစကားများ အားလုံးကိုပါ တစ်ကမ္ဘာလုံးမှာရှိသည့် ဘာသာစကားအားလုံးနှင့် စကားဖလှယ်ပြောင်းလဲ အသုံးပြုနိုင်မည်ဖြစ်သည်။

နိုင်ငံတကာ ဘာသာစကားများနှင့် ပြောင်းလဲမှု နောက်ကျကျန်ခဲ့ခြင်းသည် ဖွံ့ဖြိုးမှု နောက်ကျကျန်ခဲ့ခြင်းကို ဖြစ်စေသည်။ အပြောင်းအလဲလုပ်ရာတွင် အခက်အခဲရှိသည်မှာ မှန်သော်လည်း ယခုအချိန်မှစ၍ စတင်ပြောင်းလဲကြည့်မည်ဆိုလျှင် တရားဝင် ပြောင်းလဲသောအချိန်တွင် လွယ်ကူချောမွေ့သွားမည် ဖြစ်သည်။ အစောပိုင်းတွင် ဌာနဆိုင်ရာများအားလုံး ပြောင်းလဲအသုံးပြုခဲ့ကြပြီး မကြာမီတွင် ပြည်သူများအားလုံး ပြောင်းလဲအသုံးပြုခြင်းအားဖြင့် တစ်နိုင်ငံလုံးလွှမ်းခြုံမိမည်ဖြစ်သည်။

သို့ဖြစ်ရာ ပြောင်းလဲချိန်တန်ပြီဟု ဆိုသည့်အတိုင်း ဒီမိုကရေစီအသွင် ကူးပြောင်းရေးကာလတွင် အရာရာကို ပြုပြင်ပြောင်းလဲ ဖော်ဆောင်နေပြီဖြစ်ရာ တစ်နိုင်ငံလုံး၊ ပြည်သူအားလုံး တစ်ကမ္ဘာလုံးနှင့်ဆက်စပ်ပြီး အကျိုးရလဒ်များ ဖြစ်ထွန်းလာစေမည့် မြန်မာစာစနစ်နှင့် ကမ္ဘာ့ စာစနစ်တို့ ကူးလူးဖလှယ်ဆက်နွှယ်မည်ဖြစ်သော ယူနီကုဒ်စနစ်သို့ အမြန်ပြောင်းလဲကြရန် တိုက်တွန်းအပ်ပါသည်။

ကြေးမုံ