ပြည်ထောင်စုဝန်ကြီး ဒေါက်တာဝင်းမြတ်အေး ကော့မှူးမြို့နယ် ငှက်အော်စမ်း လူငယ်သင်တန်းကျောင်း ကြည့်ရှုစစ်ဆေး

နေပြည်တော် ၂ ဖေဖော်ဝါရီ

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးသည် ယမန်နေ့ မွန်းလွဲပိုင်းတွင် ရန်ကုန်တိုင်းဒေသကြီး ကော့မှူးမြို့နယ်ရှိ ငှက်အော်စမ်းသူငယ်သင်တန်းကျောင်းကို ကြည့်ရှုစစ်ဆေးပြီး သင်တန်းကျောင်းရှိ ကလေးသူငယ်များနှင့် လူငယ်များကို အားပေးစကားပြောကြားသည်။

ရှေးဦးစွာ ပြည်ထောင်စုဝန်ကြီး ဒေါက်တာဝင်းမြတ်အေးသည် သင်တန်းကျောင်းရှိ သင်တန်းသားများ နှင့်တွေ့ဆုံ၍ မိမိတို့ နိုင်ငံသည် လူမှုစီးပွားဖွံ့ဖြိုးတိုးတက်ရေးအတွက် ကြိုးပမ်းနေဆဲကာလဖြစ်ကြောင်း၊ ဖွံ့ဖြိုးတိုးတက်ရေးအတွက် တစ်ဦးတစ်ယောက်ချင်းက ဆောင်ရွက်ပေးကြရန် တာဝန်ရှိကြောင်း၊ မိမိကိုယ့်ကိုယ်အကျိုးရှိအောင်၊ ကောင်းမွန်အောင် ကြိုးပမ်းခြင်းဖြင့် မိသားစု၊ ပတ်ဝန်းကျင်နှင့် နိုင်ငံအတွက်ပါ အကျိုးပြုလာနိုင်မည်ဖြစ်ကြောင်း၊ ကလေးသူငယ်များ၏ ရပ်တည်မှုနှင့် ဖွံ့ဖြိုးတိုးတက်မှုအတွက် ဆောင်ရွက်ပေးနိုင်ရန်နှင့် ကာကွယ်စောင့်ရှောက်မှုပေးနိုင်ရန် ကလေးသူငယ်အခွင့်အရေးများဆိုင်ရာဥပဒေ ပေါ်ပေါက်ပြီးဖြစ်ကြောင်း၊ တစ်ဦးချင်းက ကိုယ့်တာဝန်ကိုယ်ယူခြင်းဖြင့် ထိုအခွင့်အရေးများ ရရှိလာမည်ဖြစ်ကြောင်း၊ ကလေးသူငယ်များအနေဖြင့် ဖွံ့ဖြိုးတိုးတက်ရေးအတွက် ကျောင်းပညာ၊ အသက်မွေးဝမ်းကျောင်းပညာများကို လေ့လာ၊ ဆည်းပူး၊ သင်ယူကြရမည်ဖြစ်ရာ သင်ယူနိုင်စွမ်းရှိရန်လည်း အရေးကြီးပါကြောင်း၊ မူးယစ်ဆေးဝါးအန္တရာယ်သည် မိမိတို့ ကိုယ်ရည်ကိုယ်သွေးများ မြင့်မားလာအောင် ကြိုးစားဆောင်ရွက်မှုများကို ဟန့်တားနှောင့်ယှက်သည် သာမက အနာဂတ်ကို ပျက်စီးစေမည်ဖြစ်ကြောင်း။

အချိန်အကန့်အသတ်ရှိသည့် ကလေးဘဝကာလနှင့် လူငယ်ဘဝကာလများတွင် အချိန်ကိုအကျိုးရှိစွာ အသုံးချရမည်ဖြစ်ကြောင်း၊ အကျိုးရှိသည့်ကိစ္စများကို ဦးနှောက်က တွေးခေါ်မှု၊ ဆင်ခြင်မှု မပြုလုပ်နိုင်အောင် မူးယစ်ဆေးဝါးက ပြောင်းလဲဖျက်စီးမည်ဖြစ်ကြောင်း၊ လူတိုင်းသည် မိမိတို့၏ အခွင့်အရေးများကို ရရှိခံစားရာတွင် ဥပဒေနှင့်အညီဖြစ်ရန် လိုအပ်ကြောင်း၊ ဥပဒေကို ကျော်လွန်သွားပါက အပြစ်ဖြစ်ပါကြောင်း၊ သင်တန်းကျောင်းသို့ ရောက်ရှိနေသည့်ကာလကို အကျိုးရှိစွာကုန်ဆုံးစေရန် စိတ်ပိုင်းဆိုင်ရာ၊ ရုပ်ပိုင်းဆိုင်ရာ ဖွံ့ဖြိုးတိုးတက်ရေးအတွက် အတတ်နိုင်ဆုံး ပံ့ပိုးပေးမည်ဖြစ်၍ လိုက်ပါကြိုးစားကြရန် တိုက်တွန်းပါကြောင်း၊ ဤသင်တန်းကျောင်းတွင် နေထိုင်ရမည့်ကာလကျော်လွန်ပြီးပါက အဆိုးကျော့သံသရာပြန်မလည်ရန်လည်း အရေးကြီးပါကြောင်း၊ မိမိတို့၏ အမှားများအတွက် ဤနေရာသို့ လာရောက်အပြစ်ခံယူသည်ဟု မမှတ်ယူဘဲ ရှေ့ဆက်ရမည့် ဘဝတစ်လျှောက် ကောင်းမွန်နိုင်ရေးအတွက် လေ့ကျင့်သင်ယူမှုများဆောင်ရွက်ကြရသည်ဟု သဘောထားကြရန် လိုအပ်ကြောင်း ပြောကြားသည်။

ထို့နောက် ပြည်ထောင်စုဝန်ကြီး ဒေါက်တာဝင်းမြတ်အေး၊ ဒုတိယဝန်ကြီးဦးစိုးအောင်နှင့် လူမှုဝန်ထမ်း ဦးစီးဌာန ညွှန်ကြားရေးမှူးချုပ် ဒေါက်တာစန်းစန်းအေးတို့သည် သင်တန်းကျောင်းသားများ၏ လိုအပ်ချက်များကို မေးမြန်းပြီး တာဝန်ရှိသူများနှင့် ညှိနှိုင်းဖြည့်ဆည်းပေးသည်။

ရန်ကုန်တိုင်းဒေသကြီး ကော့မှူးမြို့နယ်ရှိ ငှက်အော်စမ်းလူငယ်သင်တန်းကျောင်းတွင် တရားရုံးများမှ အကျင့်စာရိတ္တပြုပြင်ရန် ပေးပို့လာသည့် ကလေးသူငယ် ၅၅၃ ဦးနှင့် လမ်းပေါ်နေ ကလေးလူငယ် ၁၂၁ ဦး စုစုပေါင်း ၆၇၄ ဦးကို ပြုပြင်လေ့ကျင့်ပျိုးထောင်ပေးလျက်ရှိပြီး ကျောင်းပညာရေးအပြင် အသက်မွေးဝမ်းကျောင်းပညာများကိုလည်း လေ့ကျင့်သင်ကြားပေးလျက်ရှိကြောင်း သိရသည်။

(သတင်းစဉ်)