ရွှေရောင်စက္ကူများဖြင့် ပြုလုပ်ပုံဖော်ထားသော ကျား၊ ဆင်၊ သင်းခွေချပ် အစရှိသည့် အရုပ်ကြီး ၃ ရုပ်အား ကျုံးတောင်ဘက်ခြမ်းတွင် ပြသထားမည်

မန္တလေး ၂၃ ဇန်နဝါရီ

မြန်မာနိုင်ငံ၏ အဖိုးတန် တောရိုင်းတိရိစ္ဆာန်များအား ကာကွယ်ရန် ရည်ရွယ်၍ ကျင်းပသော တောကောင်လေးတို့အတွက် ရင်တွင်းစကားသံ (VOCIES FOR WILDLIFE) လူထုအသိပညာပေး အစီအစဉ်၏ အစိတ်အပိုင်းတစ်ခုဖြစ်သည့် ရွှေရောင်စက္ကူများဖြင့် ပြုလုပ်ပုံဖော်ထားသော ကျား၊ ဆင်၊ သင်းခွေချပ် အစရှိသည့် အရုပ်ကြီး ၃ ရုပ်အား ၂၀၂၀ ခုနှစ်၊ ဇန်နဝါရီလ ၂၅ ရက်နေ့ မှ ၃၁ ရက်နေ့အထိ မန္တလေးမြို့၊ ကျုံးတောင်ဘက်ခြမ်းတွင် ပြသထားမည်ဖြစ်သည်။

အဆိုပါ ရွှေရောင်စက္ကူဖြင့် ပြုလုပ်ထားသော ကျား၊ ဆင်၊ သင်းခွေချပ် စသည့် အရုပ်ကြီးသုံးရုပ်အား ရန်ကုန်မြို့နှင့် နေပြည်တော်မြို့မှ မန္တလေးမြို့သို့ ဇန်နဝါရီ ၂၂ ရက်နေ့တွင် သယ်ဆောင်လာခဲ့ခြင်း ဖြစ်ကာ အများပြည်သူလေ့လာနိုင်ရန် ကျုံးတောင်ဘက်ခြမ်း၊ အများပြည်သူ ပလက်ဖောင်းနေရာ ဖြစ်သည့် ၂၆ လမ်း ၊ ၆၆ လမ်းနှင့် ၆၇ လမ်းကြားတွင် ပြသထားမည်ဖြစ်သည်။

ပြသထားမည့် ရွှေရောင်ကျားရုပ်ကြီးမှာ အမြင့် ၉ ပေ ၃ လက်မ ရှိပြီး အရှည် ၉ ပေ ၁၀ လက်မခန့်ရှိသည်။ သင်းခွေချပ်အရုပ်ကြီးမှာမူ အမြင့် ၇ ပေရှိပြီး အရှည် ၁၁ ပေရှိကာ ဆင်ရုပ်ကြီးမှာ အမြင့် ၇ ပေ ရှိပြီး အရှည် ၉ ပေရှိသည်။ မြန်မာ့တောရိုင်းတိရစ္ဆာန်များသည့် အဖိုးတန် တောကောင်လေးများဖြစ်ပြီး ထိန်းသိမ်းကာကွယ်စောင့်ရှောက်ရန် လိုအပ်လျက်ရှိကြောင်းကို ရည်ညွှန်း၍ ရွှေရောင်စက္ကူများဖြင့် ပြုလုပ်ပုံဖော်ထားခြင်းဖြစ်ပါသည်။

တောကောင်လေးတို့အတွက် ရင်တွင်းစကားသံ (VOICES FOR WILDLIFE) ကမ်ပိန်းကို ၂၀၁၇ ခုနှစ်တွင် ဆင်အရေပြားအတွက် ဆင်များဖမ်းဆီးသတ်ဖြတ်ခံရခြင်းအား ဆန့်ကျင်တိုက်ဖျက်သည့် လုပ်ရှားမှုတစ်ရပ်အနေဖြင့် စတင်ခဲ့ပါသည်။ VOICES FOR WILDLIFE ၏ နောက်တစ်ဆင့်အနေဖြင့် “မြန်မာ့တောကောင်လေးများနှင့်အတူ ဆင်နွှဲခြင်း” ခေါင်းစဉ်ဖြင့် မြန်မာနိုင်ငံ၏ ဒုတိယအကြီးဆုံးမြို့ဖြစ်သည့် မန္တလေးမြို့တွင် မြန်မာနိုင်ငံအတွင်း တောရိုင်းတိရစ္ဆာန်ထွက်ပစ္စည်းများ အားလုံး တရားမဝင် ရောင်းဝယ်ဖောက်ကားနေမှုကို အတူတကွ အဆုံးသတ်နိုင်ကြရန် ရည်ရွယ်၍ မြန်မာနိုင်ငံ၏ ပထမဦးဆုံးသော တောရိုင်းတိရစ္ဆာန်ကာကွယ်ရေး သရုပ်ပြယာဉ်များဖြင့် လှည့်လည်ခြင်းအစီအစဉ်များဖြင့်လည်း ကျင်းပသွားမည်ဖြစ်သည်။

မြို့မငွေငန်း အလှပြယာဉ်နှင့်အတူ တောရိုင်းတိရစ္ဆာန်ကာကွယ်ရေး သရုပ်ပြယာဉ်များ၊ အဆို၊ အက အလှပြယာဉ်များဖြင့် စီတန်းလှည့်လည်ခြင်းကို ၂၀၂၀ ခုနှစ် ဖေဖော်ဝါရီလ ၁ ရက်နေ့တွင် မနော်ရမ္မံ (ပြည်သူ့ဟစ်တိုင်ကွင်း) မှစတင်၍ မန္တလေးမြို့အနှံ့ စီတန်းလှည့်လည်သွားမည်ဖြစ်ကြောင်း သိရသည်။

မေသက်ထား