ဂျီနီဗာ ၁၅ ဩဂုတ်
ရုရှားနိုင်ငံက မကြာမီစတင်ထုတ်လုပ်တော့မည့် ကိုဗစ်-၁၉ ကာကွယ်ဆေးနှင့်ပတ်သက်ပြီး ကမ္ဘာ့ကျန်းမာရေး အဖွဲ့နှင့် ရုရှားတာဝန်ရှိသူများ ဆွေးနွေးလျက်ရှိကြောင်း ကမ္ဘာ့ကျန်းမာရေးအဖွဲ့ အဆင့်မြင့်ကျွမ်းကျင်ပညာရှင် တစ်ဦးက ပြောကြားလိုက်သည်။
ကမ္ဘာ့ကျန်းမာရေးအဖွဲ့ အနေဖြင့် ရုရှားနိုင်ငံလုပ် ကိုဗစ်-၁၉ ကာကွယ်ဆေးကို စစ်ဆေးအကဲဖြတ်ရန် လုံလောက်သောအချက်အလက်များ အခိုင်အမာမရှိသေးကြောင်း ကမ္ဘာ့ကျန်းမာရေးအဖွဲ့ ညွှန်ကြားရေးမှူးချုပ်၏ အဆင့်မြင့်အကြံပေး ဒေါက်တာ ဘရုစ်အယ်လ်ဝဒ်က ပြောကြားခဲ့သည်။
ကမ္ဘာ့ကျန်းမာရေးအဖွဲ့၏ ပူးပေါင်း လုပ်ဆောင်မှုနှင့်အတူ စမ်းသပ်မှု အဆင့် ၂ နှင့် အဆင့် ၃ သို့ ရောက်ရှိတော့မည့် ကာကွယ်ဆေးအမျိုးအစား ကိုးမျိုးခန့်ရှိကြောင်းနှင့် ရုရှားနိုင်ငံလုပ် ကာကွယ်ဆေးသည် အဆိုပါ စမ်းသပ်မှုများ ပြုလုပ်လျက်ရှိသည့် ဆေးအမျိုးအစား ကိုးမျိုးတွင် ပါဝင်ခြင်းမရှိကြောင်း ဒေါက်တာဘရုစ် အယ်လ်ဝဒ်က ဆိုသည်။
အဆိုပါ ရုရှားလုပ်ကာကွယ်ဆေးကို ကမ္ဘာ့ပထမဆုံးသော ကိုဗစ်-၁၉ ကာကွယ်ဆေးအဖြစ် ဩဂုတ် ၁၁ ရက်တွင် ရုရှားသမ္မတ ဗလာဒီမာပူတင်က စာရင်းသွင်းခဲ့သည်။ အဆိုပါကာကွယ်ဆေးကို ရက်သတ္တနှစ်ပတ်အတွင်း စတင်ထုတ်လုပ်တော့မည်ဖြစ်ကြောင်းနှင့် ကာကွယ်ဆေးနှင့်ပတ်သက်ပြီး သံသယဖြင့်ပြောဆိုမှုများသည် အခြေအမြစ် မရှိပါကြောင်း ရုရှားကျန်းမာရေးဝန်ကြီး မီခေးမူရာရှ်ကို က ဆိုသည်။ ရုရှားနိုင်ငံက အဆိုပါ ကာကွယ်ဆေးကို အောက်တိုဘာလအတွင်း အများအပြားထုတ်လုပ်ရန် စီစဉ်ထားကြောင်း သိရသည်။ သို့သော် ရုရှားနိုင်ငံက ကိုဗစ်-၁၉ ကာကွယ်ဆေး ထုတ်လုပ်တော့မည်ဟု ကြေညာခဲ့ပြီးနောက် အဆိုပါဆေးအပေါ် ယုံကြည်စိတ်ချရခြင်း ရှိ၊ မရှိနှင့် ပတ်သက်ပြီး ကမ္ဘာတစ်ဝန်း၌ စိုးရိမ်ပူပန်မှုများ မြင့်တက်လျက်ရှိသည်။
ဘာသာပြန်-အောင်ကျော်ကျော်
ကိုးကား-ဆင်ဟွာ
