ဝန်းသို ၂၉ မတ်
စစ်ကိုင်းတိုင်းဒေသကြီး၊ ဝန်းသိုမြို့နယ်တွင် ကျေးရွာဖွံ့ဖြိုးရေးစီမံကိန်း ၂၀၁၉-၂၀၂ဝ ဘဏ္ဍာရေးနှစ် တတိယ နှစ်စက်ဝန်းလုပ်ငန်းများ အကောင်အထည်ဖော် ဆောင်ရွက်လျက်ရှိရာ သက္ကယ်ကျင်းကျေးရွာ ကွန်ကရစ်ခင်းခြင်း လုပ်ငန်းများ ၉၅ ရာခိုင်နှုန်း ပြီးစီးနေပြီဖြစ်ကြောင်း သိရသည်။
သက္ကယ်ကျင်းကျေးရွာသည် မိုးရာသီတွင် သွားလာရ အဆင်မပြေကြောင်း၊ ကလေးများ ကျောင်းသွား၊ ကျောင်းပြန်နှင့် သက်ကြီးရွယ်အိုများအတွက်လည်း ဘုန်းကြီးကျောင်းသို့ သီလယူသွားရန် အဆင်မပြေကြောင်း၊ ထို့ကြောင့် ကျေးရွာ ဖွံ့ဖြိုးရေးစီမံချက်များတွင် ကွန်ကရစ်လမ်းခင်းရန်အတွက် ဦးစားပေးရွေးချယ်ခဲ့ခြင်းဖြစ်ကြောင်း ကျေးရွာဖွံ့ဖြိုးရေး ကော်မတီဥက္ကဋ္ဌ ဦးရွှေကန်က ပြောသည်။
သက္ကယ်ကျင်းကျေးရွာ လမ်းကွန်ကရစ်ခင်းခြင်းလုပ်ငန်းမှာ အလျား ၁၁၀၀ ပေ၊ အနံ ၁၀ပေ၊ အမြင့် ၆ လက်မထုအထိ ဆောင်ရွက်နိုင်ခဲ့ပြီး လုပ်ငန်းအနည်းငယ်သာ ကျန်ရှိတော့သဖြင့် ရာနှုန်းပြည့်နီးပါး ပြီးစီးနေပြီဖြစ်သည်။
အဆိုပါလုပ်ငန်းကို ကျေးလက်ဒေသ ဖွံ့ဖြိုးတိုးဆက်ရေးဦးစီးဌာနမှ စီမံကိန်းထောက်ပံ့ငွေ ကျပ်သန်း (၁၀၀)နှင့် ပြည်သူထည့်ဝင်ငွေ ငွေကျပ် ၁၁ ဒသမ ၇ သိန်းဖြင့် ကျေးရွာလူထုကိုယ်တိုင် ဆောင်ရွက်ခြင်းဖြစ်ကြောင်း မြို့နယ်ဦးစီးမှူး ဦးမြတ်မျိုးထွန်းထံမှ သိရသည်။
မွှေးကြူဇင်
