သုဝဏ္ဏဝတီ ၄ ဒီဇင်ဘာ
မွန်ပြည်နယ် သထုံမြို့နယ် သုဝဏ္ဏဝတီမြို့အနီးပတ်ဝန်းကျင်ကျေးရွာများနှင့် ပင်လယ်နားနီး အောက်ကွင်း ကျေးရွာအုပ်စုများတွင် ယခုနှစ် စပါးပေါ်ချိန်တွင် စပါးအထွက်နှုန်း ကောင်းမွန်မှု မရှိသော်လည်း စပါးဟောင်းထက် စပါးသစ်ကို ဈေးနှုန်း ပိုပေး၍ ဝယ်ယူနေရကြောင်း စပါးဝယ်ယူ ကြိတ်ခွဲနေသူများထံမှ သိရသည် ။
“ဒီနှစ် စပါးထွက်ရှိမှု အခြေအနေက တစ်နယ်လုံးအတိုင်းအတာအရ ၂၀ ရာခိုင်နှုန်းလောက် ပျက်စီးပါတယ်၊ စပါးပေါ်ချိန်မှာ ရေပြတ်သွားလို့ အနှံမအောင်၊ အဖျင်းများ၊ အလေအလွင့် များတဲ့အတွက် အထွက်နည်းတာပါ၊ လယ်သမားတွေအတွက် အခက်အခဲဖြစ်ရတယ်၊ တစ်ဧက အတွက် စက်ငှားခ၊ လူလုပ်အား၊ကုန်ကျစားရိတ်နဲ့ ပြန်ရရှိတဲ့စားရိတ် မကာမိဘူး”ဟု လယ်သမားကြီး တစ်ဦးဖြစ်သူ ဦးမင်းတင်နွယ်က ပြောသည်။
“ စပါးဈေးနှုန်းကျတယ်၊ စပါးအမျိုးအစားအလိုက် သူ့ဈေးနဲ့ သူပါပဲ၊ စပါးဟောင်းနဲ့အသစ် မှာ အသစ်ကိုပဲ ပေါက်ဈေးထက် ပိုပြီးဝယ်ရတယ်၊ စပါးဟောင်းက ကျိုးလွယ်၊ကြေလွယ်တယ်၊ အနံ့ မကောင်းတဲ့အပြင် ဆန်ဝါဖောက်တဲ့အတွက် ဝယ်ပြီးကြိတ်ခွဲရတာ အဆင်မပြေလို့ ပေါက်ဈေး ထက် ဈေးကျပါ တယ် ၊ စပါးသစ်ကိုပဲ ဦးစားပေး ဝယ်နေရတယ် ” ဟု သုဝဏ္ဏဝတီမြို့မှ ဒေသတွင်း စပါးလိုက်လံ ဝယ်ယူ ကြိတ်ခွဲရောင်းချသူတစ်ဦးက ပြောသည်။
“ ဆန်ဈေးကျတော့ စားသုံးသူအတွက်တော့ ကောင်းပါတယ်၊ ခု စပါးဟောင်းတစ်အိတ်ကို နှစ်သောင်းခွဲကျပ် နဲ့ ၂ အိတ် ဝယ်ထားတယ်” ဟု ဝင်းပကျေးရွာသူ အိမ်ရှင်မတစ်ဦးက ပြောသည်။
သထုံမြို့နယ် နောင်ကုလားကျေးရွာ၌ နိုဝင်ဘာ ၃၀ ရက်နေ့က မွန်ပြည်နယ် ပအိုဝ်း တိုင်းရင်းသား ရေးရာဝန်ကြီးဒေါ်နန်းစံဝင့်ခိုင်၊ လွှတ်တော်ကိုယ်စားလှယ်ဒေါ်ခိုင်ခိုင်လဲ့၊ သက်ဆိုင်ရာ ဌာနများမှ တာဝန်ရှိသူများက တောင်သူလယ်သမားများနှင့် တွေ့ဆုံပွဲတွင် တောင်သူလယ်သမားများက စပါးပေါ်ချိန် ရေပြတ်မှုအခက်အခဲများ၊ အမတော်ကြေးငွေ ပေးသွင်းရန်ကိစ္စရပ်များကို တင်ပြ ကြသည် ။
သက်ဆိုင်ရာတာဝန်ရှိသူများက ပြန်လည်ရှင်းလင်းရာ မူဝါဒအရ ပြည်ထောင်စုအစိုးရနှင့် သက်ဆိုင်သည့်အတွက် ဖြေလျှော့ပေးရန် တင်ပြပေးမည်ဖြစ်ကြောင်းနှင့် ရေပြတ်မူ မရှိအောင် ဆောင်ရွက်ပေးမည်ဖြစ်ကြောင်း သက်ဆိုင်ရာတာဝန်ရှိသူများက ဖြေကြားခဲ့ကြောင်း သိရသည် ။
သုဝဏ္ဏဝတီမြို့တွင် ယခု လက်ရှိ စပါးပေါက်ဈေးမှာ သက်ငယ်စပါး တင်းတစ်ရာ ၄၈၅၀ဝ၀ ကျပ်၊ သက်ကြီးစပါးမှာ ငွေကျပ် ၆၅၅၀ဝ၀ မှ ၇၀ဝ၀ဝ၀ အထိ ရှိကြောင်း သိရပြီး စပါးအရောင်းအဝယ် အေးနေကြောင်း စပါးဝယ်ယူသူများထံမှ သိရှိရသည် ။
ခွန်(ဝင်းပ)
