၂၀၂၀ ပြည့်နှစ် မေလအတွင်း ရန်ကုန်၏ နေ့စဉ်ပျမ်းမျှအပူချိန်က တစ်စတစ် တိုးလာနေသည်။ အပူရှိန်မြင့်တက်လာမှုနည်းတူ ကိုဗစ်- ၁၉ ကပ်ရောဂါ ကူးစက်မှုကလည်း တစ်နေ့တခြား တိုးလာနေသည်။ အပူချိန်မြင့်မားမှု၊ ကိုဗစ်-၁၉ ကူးစက်မှုကြားမှပင် ရန်ကုန်လူထုသည် နေ့စဉ်ဘဝရပ်တည်ရေးကို ရုန်းကန်နေကြရသည်။ ပူပြင်းသော နေရောင်အောက်တွင် စားဝတ် နေရေးအတွက် ရုန်းကန်နေကြရသဖြင့် မကြာခဏ အန္တရာယ်ကြုံတွေ့နေရသော သတင်းများကို ကြားနေရသည်။