နေပြည်တော်အတွင်း ကိုဗစ်-၁၉ ရောဂါ ကြိုတင်ကာကွယ်ရေးလုပ်ငန်းများနှင့် အောက်ဆီဂျင် ထုတ်လုပ်သုံးစွဲရေးလုပ်ငန်းများတွင် အသုံးပြုရန်အတွက် အလှူငွေများ ပေးအပ်လှူဒါန်းခြင်းကို ဩဂုတ် ၄ ရက် မွန်းလွဲပိုင်းက နေပြည်တော်ကောင်စီရုံး ဧည့်ခန်းမ၌ ကျင်းပရာ နေပြည်တော်ကောင်စီ အဖွဲ့ဝင်များဖြစ်ကြသည့် ဗိုလ်မှူးကြီးမင်းနောင်၊ ရဲမှူးကြီးကိုကိုလွင်နှင့် တာဝန်ရှိသူများ တက်ရောက်ကြသည်။

ရန်ကုန်တိုင်းဒေသကြီး၊ အရှေ့ပိုင်းခရိုင်၊ သင်္ဃန်းကျွန်းမြို့နယ် အထက(၂)နှင့် အထက(သုဝဏ္ဏ)တို့တွင် ဩဂုတ် ၄ ရက် နံနက်ပိုင်းမှစတင်၍ အသက်(၆၅)နှစ်အထက် ဘိုးဘွားများအား ကိုဗစ်-၁၉ ရောဂါ ကာကွယ်ဆေး ဆက်လက်ထိုးနှံပေးလျက်ရှိကြောင်း သိရှိရသည်။

မန္တလေးတိုင်းဒေသကြီး၊ ရမည်းသင်းမြို့နယ်၊ အကျဉ်းဦးစီးဌာန၌ ဩဂုတ် ၄ ရက် နံနက်ပိုင်းက အချုပ်သား/သူနှင့် အကျဉ်းသား/သူများအား တရုတ်နိုင်ငံထုတ် Sinopharm ကိုဗစ်- ၁၉ ရောဂါ ကာကွယ်ဆေးကို ပထမအကြိမ်အဖြစ် ဒုတိယနေ့ ဆက်လက်ထိုးနှံပေးလျက်ရှိကြောင်း သိရသည်။

ပဲခူးတိုင်းဒေသကြီး၊ ရွှေကျင်မြို့နယ်၊ အနောက်ဘက်ကျေးရွာအုပ်စု အုပ်ချုပ်ရေးမှူးရုံး၌ ဩဂုတ် ၄ ရက နံနက်ပိုင်းမှစ၍  လတ်တလောအသက်ရှူလမ်းကြောင်းဆိုင်ရာ ကိုဗစ်-၁၉ ရောဂါ ဖြစ်ပွားနေသော ကာလအတွင်း အခြေခံလူတန်းစားများ၏ စားသောက်ရေး အခက်အခဲရှိသော အိမ်ထောင်စုများသို့ အခြေခံစားသောက်ကုန်ဖြစ်သည့် ဆန်များ ထောက်ပံ့လှူဒါန်းခဲ့သည်။

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ မိုင်းဖုန်း(က) ကျေးရွာအုပ်စုရှိ ဝမ်ပုံဆိပ်ကမ်း၌ လာအိုနိုင်ငံမှ ဩဂုတ် ၃ ရက်တွင် ပြန်လည်လွှဲပြောင်းသည့် ရွှေ့ပြောင်းမြန်မာအလုပ်သမား ၁၆၇ ဦးအား ကိုဗစ်-၁၉ ရောဂါပိုး ကူးစက်ခံရမှု ရှိ၊ မရှိ စစ်ဆေးရာ ၈၃ ဦးတွင် ကိုဗစ်-၁၉ ရောဂါပိုး စစ်ဆေးတွေ့ရှိကြောင်း သိရသည်။