ကိုဗစ်-၁၉ ရောဂါ ဖြစ်ပွားနေသောကာလအတွင်း ရောဂါပိုးမကူးစက်စေရေး၊ ကျန်းမာရေး စောင့်ရှောက်မှုပေးရေး၊ လူမှုရေး၊ စီးပွားရေး လုံခြုံအဆင်ပြေရေး စသည်ဖြင့် ပြည်သူများ၏ ကိုယ်ကျန်းမာရေး၊ စိတ်ချမ်းသာရေးကိစ္စ အဝဝတို့ကို အဘက်ဘက်တွင် လစ်ဟာမှု မရှိတန်သလောက် မရှိစေရအောင် နိုင်ငံတော်အစိုးရက အတတ်နိုင်ဆုံး ဖြည့်ဆည်း ဆောင်ရွက်ပေးနေသည်ကို တွေ့ရသည်။

နိုဝင်ဘာ ၈ရက် အထွေထွေရွေးကောက်ပွဲအပြီးတွင် ရွေးကောက်ပွဲ အောင်မြင်မှုကို အကြောင်းပြု၍ လူစုလူဝေးများ ဖြစ်ပေါ်ခဲ့ပေသည်။ ထိုလူစုလူဝေး ဖြစ်ပွားမှုတို့၏ အကျိုးဆက်အဖြစ် ကိုဗစ်ရောဂါပိုး ကူးစက်ပြန့်ပွားမှုရှိလာနိုင်သည်ဖြစ်ရာကိုဗစ်- ၁၉ရောဂါ ကာကွယ်၊ ထိန်းချုပ်၊ ကုသရေးဆိုင်ရာ ကြိုတင်ပြင်ဆင်ပြုမှုများ ပြုလုပ်နေကြရပြီ ဖြစ်ပါသည်။