မြန်မာနိုင်ငံ၏ ၂၀၂၀ ပြည့်နှစ် အထွေထွေရွေးကောက်ပွဲများ စတင်ကျင်းပ နေပြီဟု ဆိုရမည်။ နိုင်ငံရပ်ခြား တိုင်းပြည်များတွင် ပြည်ပရောက် နိုင်ငံသူ၊ နိုင်ငံသားများက မြန်မာနိုင်ငံဆိုင်ရာ သံရုံး၊ အဖွဲ့ရုံး၊ ကောင်စစ်ဝန်ချုပ်ရုံးများ၏ သတ်မှတ်ထားသည့်နေရာများတွင် ကိုဗစ်-၁၉ ရောဂါ ကျန်းမာရေး စည်းကမ်းများနှင့်အညီ ကြိုတင်မဲများ စနစ်တကျပေးနေသည်ကို မြင်တွေ့ နေရသည်။

ယနေ့ခေတ်ကို သတင်းနှင့်အချက်အလက်ခေတ်ဟူ၍ သတ်မှတ် ပြောဆိုကြလေ့ရှိ၏။ လူတို့အတွက် နိုင်ငံရေးအရဖြစ်စေ၊ စီးပွားရေး အရဖြစ်စေ၊ သတင်းနှင့် အချက်အလက်က အရေးပါ၏။ သတင်းနှင့် အချက်အလက် ပြည့်ပြည့်စုံစုံ၊ မှန်မှန်ကန်ကန် မည်မျှလောက်ကို၊ မည်သူရသလဲ ဆိုသည့်ပေါ်မူတည်၍ ရှေ့တန်းသို့ရောက်သည့် ခေတ်ဖြစ်၏။