၂၀ ဇွန်
ဂျပန်နိုင်ငံတွင် ကျင်းပမည့် လာမည့်နှစ် တိုကျိုအိုလံပစ် အားကစားပြိုင်ပွဲစီစဉ်သူများက အိုလံပစ်ပွဲလက်မှတ်များကို ယနေ့ ရောင်းချသည်ဟု သိရသည်။
အိုလံပစ်ပွဲ ကျင်းပရေးကော်မတီက အိုလံပစ်ပွဲလက်မှတ်ဆိုင်ရာ ဝက်ဘ်ဆိုက်တွင် သက်သေခံကတ်ပြားဖြင့် ဝင်ရောက်မှတ်ပုံတင် စာရင်းသွင်းနိုင်ကြောင်း ယနေ့ သတင်းထုတ်ပြန်ခဲ့သည်။
အိုလံပစ်ပွဲစဉ် တစ်ခုစီအတွက် လက်မှတ်များ တန်ဖိုးမည်မျှပေးချေရမည်ကို ထိုဝက်ဘ်ဆိုက်တွင် ဝင်ရောက်ကြည့်ရှုနိုင်ကြောင်းနှင့် ပွဲလက်မှတ်ဝယ်ယူသူများထံသို့ အီးလ်မေးဖြင့် အကြောင်းကြားမည် ဖြစ်ကြောင်း ဖော်ပြထားသည်။
လာမည့် ဇူလိုင်လ ၂ ရက်နေ့ ဂျပန်စံတော်ချိန် ၁၁ နာရီ ၅၉ မိနစ်တွင် ပွဲလက်မှတ်များကို ဝယ်ယူနိုင်ပြီး လက်မှတ်ရောင်းမည့် ကန့်သတ်ထားသော ကာလ ကုန်ဆုံးချိန်နောက်ပိုင်း ရောက်ရှိလာသော စာရင်းများကို လက်ခံမည်မဟုတ်ဟု သိရသည်။
အိုလံပစ်ပွဲလက်မှတ်စောင်ရေပေါင်း ခုနှစ်ဒသမ ရှစ်သန်းခန့် ရှိသည်။ အိုလံပစ် ပွဲစီစဉ်ရေး ကော်မတီသည် လက်မှတ်စောင်ရေ မည်မျှ ရောင်းချရသည်၊ မည်မျှတောင်းဆိုထားသည်ကို ထုတ်ဖော်ပြောကြားခြင်းမရှိသော်လည်း ပွဲလက်မှတ်ဝယ်ယူရန် မှတ်ပုံတင် စာရင်းသွင်းသူများမှာ ခုနှစ် ဒသမ ငါးသန်းကျော် ရှိပြီ ဖြစ်သည်။
ကိုးကား - အန်အိတ်ချ်ကေ
ဘာသာပြန် - မြင့်မြင့်ချို
