နေပြည်တော် ၂၂ ဧပြီ
သစ်တောဉီးစီးဌာနသည် တရားမဝင်သစ်နှင့် သစ်တောထွက်ပစ္စည်းများကို ရှာဖွေဖမ်းဆီး လျက်ရှိရာ သစ်တောဝန်ထမ်းများ၊ မြန်မာနိုင်ငံရဲတပ်ဖွဲ့ဝင်များနှင့် ကျေးရွာအုပ်ချုပ်ရေးအဖွဲ့ဝင်များ ပါဝင်သောပူးပေါင်းအဖွဲ့သည် ဧပြီ ၁၇ ရက် မှ ၂၁ ရက်အတွင်း ပဲခူးတိုင်းဒေသကြီး၊ ပဲခူးခရိုင်၊ ပဲခူးမြို့နယ်၊ ရှမ်းကိုင်း၊ ညောင်ခါးရှည်ကျေးရွာလမ်းထိပ်မှ FORLAND (၆)ဘီး (အဖြူရောင်)ယာဉ်ပေါ်မှ တောင်သရက်ခွဲသား ၁ ဒသမ ၃၆၈၆ တန်နှင့်အတူ ပြစ်မှုကျူးလွန်သူ (၂)ဦး ဖမ်းဆီးရမိခဲ့ကြောင်း သိရသည်။
ထို့ပြင် တနင်္သာရီတိုင်းဒေသကြီး၊ ပုလောမြို့နယ်အတွင်း နန်းတောင်ချောင်းဖျား ဓနိတောစပ် နေရာမှ ကတွတ်ခွဲသား ၆ ဒသမ ၉၃၅၆ တန်နှင့် မန္တလေးတိုင်းဒေသကြီး၊ ပြင်ဦးလွင် မြို့နယ်၊ လယ်မချောင်းလက်တက်နေရာ မှ ကျွန်း၊ ပျဉ်းကတိုး၊ သစ်လုံး/ ခွဲသား/ဓါးရွေ/တိုင် ၁၀ ဒသမ ၂၂၈၆ တန်တို့အား ပိုင်ရှင်မဲ့ ဖမ်းဆီးရမိခဲ့ကြောင်း သိရသည်။
ဆက်လက်၍ ရှမ်းပြည်နယ် နောင်ချိုမြို့နယ် နောင်ချို-ကံကြီး-ရပ်စောက်ကားလမ်း၊ မကျီးရေးကျေးရွာ တောင်ဘက်တောစပ်နေရာမှ ကျွန်းသစ်လုံး (၉၀) ခန့်နှင့် ၂၂ ဘီးယာဉ် ၏ နောက်တွဲ(၂)စီး တို့အား ဖမ်းဆီးရမိခဲ့ရာ ပြစ်မှုကျူးလွန်သူများကို စုံစမ်းဖော်ထုတ်၍ ဥပဒေနှင့်အညီ ထိရောက်စွာ အရေးယူနိုင်ရေး ဆောင်ရွက်လျက်ရှိကြောင်း သစ်တောဉီးစီးဌာနမှ သိရသည်။
မောင်လူမော်
