တိုင်းရင်းသားလူမျိုးများရေးရာဝန်ကြီးဌာန ပဲခူးတိုင်းဒေသကြီးညွှန်ကြားရေးမှူးရုံး ဖွင့်ပွဲ အခမ်းအနားကျင်းပ

ပဲခူး ၂၂ ဖေဖော်ဝါရီ

တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားစာပေနှင့်ယဉ်ကျေးမှုဦးစီးဌာနနှင့် တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန ပဲခူးတိုင်းဒေသကြီး ညွှန်ကြားရေးမှူးရုံး ဖွင့်ပွဲအခမ်းအနားကို ယနေ့ နံနက် ၉ နာရီက ပဲခူးမြို့၊ ဥဿာမြို့သစ် ဆည်မြောင်းလမ်းနှင့် သစ်တောရိပ်သာလမ်းထောင့်တွင် ကျင်းပသည်။

ရှေးဦးစွာ တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး နိုင်သက်လွင်၊ ဒုတိယဝန်ကြီး ဦးလှမော်ဦး၊ ပဲခူးတိုင်းဒေသကြီးဥပဒေချုပ် ဦးအုန်းမြင့်၊ ပဲခူးတိုင်းဒေသကြီး ကရင်တိုင်းရင်းသားလူမျိုးရေးရာဝန်ကြီး နော်ပွယ်စေးနှင့် ဆောက်လုပ်ရေးဝန်ကြီးဌာန အင်ဂျင်နီယာချုပ် ဦးသန်းနိုင်အောင်တို့က ညွှန်ကြားရေးမှူးရုံးနှစ်ထပ်အဆောက်အဦသစ်အား ဖဲကြိုးဖြတ်ဖွင့်လှစ်ပေးပြီး ရုံးဆိုင်းဘုတ်အားအမွှေးနံ့ သာရည်များ ပက်ဖြန်းပေးကာ ရုံးအတွင်းလှည့်လည်ကြည့်ရှုကြသည်။

ထို့နောက် ပြည်ထောင်စုဝန်ကြီးနှင့် ပဲခူးတိုင်းဒေသကြီး ကရင်တိုင်းရင်းသား လူမျိုးရေးရာဝန်ကြီးတို့က အမှာစကားပြောကြားပြီး ဆောက်လုပ်ရေးဝန်ကြီးဌာနအင်ဂျင်နီယာချုပ် ဦးသန်းနိုင်အောင်ကပဲခူးတိုင်းဒေသကြီး ညွှန်ကြားရေးမှူးရုံး ဆောက်လုပ်မှုနှင့်ပတ်သက်၍ ရှင်းလင်းပြောကြားသည်။

ယင်းနောက် ကယားစာပေနှင့် ယဉ်ကျေးမှုအဖွဲ့မှ ဖားစည်သံသီချင်း သီဆို၍ ကယားရိုးရာအကဖြင့်လည်းကောင်း၊ ကရင်စာပေနှင့်ယဉ်ကျေးမှုအဖွဲ့မှ မိုးသောက်ကြယ်ဒုံးအဖွဲ့က ရိုးရာနှစ်သစ်ကူးသီချင်းသီဆို၍ ကရင်ရိုးရာဒုံးယိမ်းအကဖြင့်လည်းကောင်း၊ အရှိုချင်းစာပေနှင့်ယဉ်ကျေးမှုအဖွဲ့မှ ချင်းရိုးရာယိမ်းအကဖြင့်လည်းကောင်း၊ မွန်စာပေနှင့်ယဉ်ကျေးမှုအဖွဲ့မှ တပင်တိုင်ယိမ်းအကဖြင့် လည်းကောင်း၊ ရှမ်းစာပေနှင့်ယဉ်ကျေးမှုအဖွဲ့မှ ရှမ်းပျိုဖြူ မောင်မယ်များ၏ မီးပုံပွဲအကဖြင့်လည်းကောင်း၊ ပအိုဝ်းစာပေနှင့်ယဉ်ကျေးမှုအဖွဲ့မှ တို့တိုင်းရင်းသားအကဖြင့်လည်းကောင်း အသီးသီးဖျော်ဖြေတင်ဆက်ကြသည်။

တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားစာပေနှင့်ယဉ်ကျေး မှုဦးစီးဌာနနှင့် တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန ပဲခူးတိုင်းဒေသကြီးညွှန်ကြားရေးမှူးရုံးသည် ပဲခူးတိုင်းဒေသကြီးအတွင်းတွင်ရှိသည့် တိုင်းရင်းသားများ၏ တိုင်းရင်းသားရေးရာကိစ္စများကို ညှိနှိုင်းပေါင်းစပ် ဆောင်ရွက်ပေးမည့်နေရာတစ်ခုဖြစ်ပြီး တိုင်းရင်းသားများ၏ရိုးရာအကပွဲတော်များ၊ ညှိနှိုင်းဆွေး နွေးပွဲများ၊ မွမ်းမံသင်တန်းများကိုလည်း ဖွင့်လှစ်ကျင်းပနိုင်မည့် နေရာဖြစ်ကြောင်း သိရသည်။

အဆိုပါရုံးသည် အလျား(၈၀)ပေ၊ အနံ (၆၀)ပေ နှစ်ထပ် RC အဆောက်အဦဖြစ်ပြီး ၂၀၁၇-၂၀၁၈ဘဏ္ဍာရေးနှစ် ပြည်ထောင်စုအစိုးရအဖွဲ့ခွင့်ပြုရံပုံငွေ ကျပ်သန်း (၂၅၀)ဖြင့်တည်ဆောက်ခဲ့ခြင်းဖြစ်သည်။

ဟိန်းထက်(ပဲခူး)