တောင်ကြီး ၉ နိုဝင်ဘာ
တောင်ကြီးမြို့၊စူဠာမုနိ ဘုရားပွဲ မဟာဘုံကထိန်နှင့် တန်ဆောင်တိုင်ပွဲတော် မီးပုံးပျံပြိုင်ပွဲ ကျင်းပရေး ကော်မတီမှကြီးမှူးကျင်းပသော တောင်ကြီးမြို့၏ နှစ်စဉ်ကျင်းပမြဲဖြစ်သော တန်ဆောင်တိုင် မီးပုံးပျံပြိုင်ပွဲကို နိုဝင်ဘာ ၈ ရက်နေ့ မွန်းလွဲ ၁၂ နာရီ အချိန်မှစတင်၍ အဝေရာကုန်းသာ မီးပုံးပျံကွင်း၌ ကျင်းပခဲ့သည်။
ရှမ်းပြည်နယ်၏မြို့တော် တောင်ကြီးမြို့တွင် နှစ်စဉ်ကျင်းပမြဲဖြစ်သော တန်ဆောင်တိုင်မီးပုံးပျံ လွှတ်ပြိုင်ပွဲ ညမီးကြီး၊စိန်နားပန်၊နေ့လွှတ်အရုပ်၊ ခြေနှစ်ချောင်း၊ ခြေလေးချောင်း၊ အုပ်စုအရုပ်များ ပါဝင် ယှဉ်ပြိုင်ခဲ့ကြသည်။ ယနေ့တွင်နေ့နံလွှတ် အရုပ်(၃၅)ရုပ် လွှတ်တင်သည့်ဖြစ်သည်အတွက် ခြေနှစ်ချောင်း အရုပ်(၁၁)ကောင်၊ ခြေလေးချောင်းအရုပ်(၄)ကောင်၊ အုပ်စုအရုပ်(၄)စုတို့က အောင်မြင်စွာ လွှတ်တင်နိုင်ခဲ့ကြကြောင်း သိရသည်။
အဆိုပါရိုးရာပွဲတော်ကြီးတွင် ပြည်ထောင်စုတိုင်းရင်းသားများ ဖြစ်ကြသည့် ဗမာ၊ ရှမ်း၊ ပအိုဝ်း၊ အင်းသား၊ဓနု၊ ပလောင် စသည့် တိုင်းရင်းသား၊ နိုင်ငံသား လူမျိုးပေါင်းစုံတို့ ပါဝင်ဆင်နွှဲသည့် ပွဲတော်ကြီး ဖြစ်သောကြောင့် စည်ကား သိုက်မြိုက်စွာ သိုက်သိုက်ဝန်းဝန်း၊ စည်းကမ်းရှိစွာ ပါဝင်ဆင်နွှဲပျော်ရွှင်ကြသည့် ရိုးရာပွဲတော် တစ်ခုဖြစ်ပါကြောင်း သိရသည်။
စိုင်းသန်းကျော်(တောင်ကြီး)
