တနင်္သာရီမြို့တွင်ကျင်းပသည့် ရိုးရာနဂါးလှေတော်များ ဧဇာခေါ်ခြင်းနှင့် မင်္ဂလာရေခင်း သဘင်အခမ်းအနားကို ထိုင်းနိုင်ငံတက္ကသိုလ်မှ ပညာရှင်များအဖွဲ့ လာရောက်လေ့လာ

တနင်္သာရီ ၁၈ အောက်တိုဘာ

တနင်္သာရီတိုင်းဒေသကြီးတွင် ထူးခြားသည့် ပွဲတော်တစ်ခုဖြစ်သည့် နှစ်ပေါင်း (၈၆၆) နှစ် သက်တမ်းရှိသော တနင်္သာရီမြို့၏ ရှေ့ဟောင်းသမိုင်းဝင်ရိုးရာယဉ်ကျေးမှု အမွေအနှစ်ဖြစ်သောနဂါးလှေတော်များ "ဧဇာ" ခေါ်ခြင်းနှင့်မင်္ဂလာရေခင်း သဘင်ပွဲ အခမ်းအနားကို ထိုင်းနိုင်ငံ မဟိန္ဒာတက္ကသိုလ်မှ ပညာရှင်များအဖွဲ့က လာရောက်လေ့လာခဲ့ကြောင်း သိရသည်။

နှစ်ပေါင်း(၈၆၆)နှစ်သက်တမ်းရှိသော တနင်္သာရီမြို့၏ ရှေးဟောင်းသမိုင်းဝင်ရိုးရာ နဂါးလှေတော်များ" ဧဇာ"ခေါ်ခြင်းနှင့်မင်္ဂလာရေခင်း သဘင်ပွဲတော်နှင့် စုပေါင်းမဟာဘုံကထိန်ပွဲကို အောက်တိုဘာ ၁၇ ရက် (၁၃၈၁ ခုနှစ်သီတင်း ကျွတ်လပြည်ကျော် ၄ ရက်) နံနက် ၆ နာရီ ၃၀ မိနစ်အချိန်က တနင်္သာရီတိုင်းဒေသကြီး၊ မြိတ်ခရိုင်၊တနင်္သာရီမြို့နှင့် ချောင်းကြီး၊ချောင်းငယ်မြစ်နှစ်သွယ် အတွင်း၌ ကျင်းပခဲ့ရာ အနယ်နယ်အရပ်ရပ်မှ လာရောက်ကြည့်ရှုသူများ၊ ခရီးသွားလုပ်ငန်းအဖွဲ့များအပြင် ထိုင်းနိုင်ငံမဟိန္ဒာတက္ကသိုလ်မှပညာရှင်များ အဖွဲ့ကစိတ်ဝင်တစားဖြင့် လာရောက်လေ့လာကြည့်ရှုအားပေးခဲ့ကြောင်း တနင်္သာရီမြို့နယ်စာပေနှင့်ယဉ်ကျေးမှု အမွေအနှစ် ထိန်းသိမ်း မြှင့်တင်ရေးအဖွဲ့ ဥက္ကဌ ဉီးသန်းစိုးဝင်း (နဂါးလှေများရဲ့ခေါင်းဆောင်)ထံမှ သိရသည်။

ယခင်နှစ်ကနဂါးလှေခြောက်စင်းဖြင့် လှော်ခတ်ပူဇော်ခဲ့သော်လည်း ယခုနှစ်တွင်တနင်္သာရီမြို့မှ သက်တမ်းနှစ်ပေါင်း(၈၀)ကျော်ရှိရွှေနန်းသာရီ အမည်ရှိသော ရိုးရာနဂါးလှေတော်မှာကြံ့ခိုင်မှု အားနည်းလာသည့် အတွက်ပါဝင်ခြင်း မရှိသောကြောင့် ရိုးရာနဂါးလှေတော်များ" ဧဇာ"ခေါ်ခြင်းနှင့် မင်္ဂလာရေခင်း သဘင်ပွဲတော်တွင် တနင်္သာရီမြို့မှငွေနန်းသာရီအမည်ရှိ နဂါးလှေတော်တစ်စင်းနှင့် လယ်သစ်ကျေးရွာမှ ရန်ကြီးအောင်၊မြကြီးအောင်၊ ပတ္တမြားသွယ်၊ စိန်ပန်းသွယ်အမည်ရှိ နဂါးလှေတာ်လေးစင်း၊ စုစုပေါင်းနဂါးလှေတော်(၅)စင်းဖြင့် လှေလှော်သား(၂၁၂) ဉီးတို့ဖြင့် နံနက် ၆ နာရီ ၃၀ မိနစ်အချိန်တွင် မြို့အဝင်ရွှေလိပ်ပြာစုရပ်နှင့် ဘန်ဂလိုလှေဆိပ်စုရပ်တို့မှ စတင်ကာတနင်္သာရီမြစ်ကြောင်း အတိုင်း တက်ညီလက်ညီ လှော်ခတ်ထွက်လာပြီး တနင်္သာရီ မြို့ရှိ တန်ခိုးကြီး ဘုရားများဖြစ်သော နဝထပ်(နဂါးကပ်တောင်) စေတီ၊မြဝတ်ဆင်၊ဝင်္ဂဘာ၊လေသာနန်း ဉီးစေတီစသည်စေတီတော်များကိုမြစ်အတွင်းမှ လက်ယာရစ် ဉီးခိုက်ပူဇော်လှော်ခတ်ခဲ့ကြပြီးမြို့ကို လက်ယာရစ်လှည့်ပတ်ကာ တနင်္သာရီမြို့တွင်း "ဧဇာ"သီရစ်ကျူးရင်းညီညာစွာ လှော်ခတ်ခဲ့ကြကြောင်း သိရသည်။

တနင်္သာရီမြို့၌ နှစ်စဉ် အစဉ် အလာမပျက် ကျင်းပနေရာ အဆိုပါရိုးရာ နဂါးလှေတော်များ"ဧဇာ" ခေါ်ခြင်းနှင့် မင်္ဂလာရေခင်းသဘင် အခမ်းအနားကိုယခုနှစ်တွင် အိမ်နီးချင်းထိုင်းနိုင်ငံမဟိန္ဒာတက္ကသိုလ်မှ ပညာရှင်များအဖွဲ့မှ တနင်္သာရီမြို့သို့ လာရောက်လေ့လာကြည့်ရှုကာ တနင်္သာရီမြို့ရှိယဉ်ကျေးမှုပြတိုက်၊ ဈေးနှင့်မြို့အတွင်းလှည့်လည် ကြည့်ရှုပြီး သမိုင်းဝင်တန်ခိုးကြီးဘုရားများအား ဖူးမြော်ခဲ့ကြကြောင်း တနင်္သာရီမြို့နယ်စာပေနှင့် ယဉ်ကျေးမှု အမွေအနှစ်ထိန်းသိမ်းမြှင့်တင်ရေးအဖွဲ့ ဥက္ကဌ ဉီးသန်းစိုးဝင်း၏ ပြောပြချက်အရ သိရသည်။

မြင့်ဉီး(မြိတ်)