မြိတ် ၂၀ မတ်
တနင်္သာရီတိုင်းဒေသကြီး မြိတ်မြို့ကျက်သရေဆောင် လေးကျွန်းဆီမီးစေတီတော်ကို လာရောက်ဖူး မြော်သူ ရဟန်း/ရှင်/လူ ပြည်သူအများ ကြည်ညိုသဒ္ဒါပွားများစေရန် ရည်ရွယ်၍ စေတီတော် ဘဏ္ဍာတော်ထိန်း ဂေါပကအဖွဲ့မှ ဦးဆောင်ပြီး စေတီတော်ကြီးနှင့်အတူ အရံစေတီ(၄)ဆူကို လုံးတော်ပြည့်ရွှေသင်္ကန်းကပ်လှူ ပူဇော်ခဲ့ရာ တပေါင်းလပြည့်နေ့ မတ်(၂၀)ရက် နံနက်(၉)နာရီက စေတီတော်ဗုဒ္ဓသာသနာ့ဗိမာန်၌ ဗုဒ္ဓပူဇနိယ ပွဲတော်နှင့်အတူ ရွှေစင်ရွှေပြား ရွှေသင်္ကန်းတော် ကပ်လှူပူဇော်ခြင်း ရေစက်ချအလှူတော် မင်္ဂလာကို ကျင်းပခဲ့ကြောင်း သိရသည်။
စေတီတော်ကြီးကို (၁၉၉၀ခုနှစ်မှ ၂၀၁၂ခုနှစ်အထိ) မြိတ်မြို့သူမြို့သားများနှင့် စေတနာရှင်များက အံမခန်းလောက်သည့်သဒ္ဒါတရားဖြင့် ရွှေသင်္ကန်းတော်ညိုးမှန်ခြင်းမရှိရလေအောင် ရွှေချိန်(၁၈၈၂)ကျပ်လှူဒါန်း ခဲ့ကြရာ ဘဏ္ဍာတော်ထိန်းဂေါပကအဖွဲ့မှ (၉)လက်မပတ်လည် ရွှေပြားများခတ်၍ ရွှေသားအစစ် ရွှေသင်္ကန်း တော်ကို ငှက်ပျောဖူး၊ ကြာမှောက်ကြာလှန်မှ ပထမဖောင်းရစ်အထိ ကပ်လှူပူဇော်နိုင်ခဲ့ပြီး ယခုနှစ်တွင် စေတရှင် အလှူရှင်များ လှူဒါန်းသည့် (၉)လက်မပတ်လည်(၂)ကျပ်သား ရွှေစင်ရွှေပြားများကို (၄၃)ပြား (၈၆) ကျပ်သားကို ဆက်လက်ကပ်လှူမည်ဖြစ်ကြောင်း ဘဏ္ဍာတော်ထိန်းဂေါပကအဖွဲ့မှသိရသည်။
ထို့အတူ စေတီတော်ကြီးနှင့်အတူ အရံစေတီလေးဆူကိုလည်း စေတနာရှင်များ ကုသိုလ်ပါဝင် လှူဒါန်း မှုများဖြင့် ရွှေဆိုင်း(၅၅၀ဝ)ကျော်ကို လုံးတော်ပြည့် ရွှေသင်္ကန်းကပ်လှူပူဇော်ခဲ့လျက်ရှိရာ တပေါင်းလပြည့်နေ့ ၌ ဗုဒ္ဓပူဇနိယပွဲတော်တွင် စေတီတော်ကြီးအတွက် ရွှေစင်ရွှေပြားများကို အလှူရှင်များကိုယ်တိုင် သြဝါဒစရိယ ဆရာတော်ကြီးများထံ ဆက်ကပ်လှူဒါန်းခဲ့ကြပြီး ဘဏ္ဍာတော်ထိန်းဂေါပကအဖွဲ့မှ ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့ကြသည်။
ဗုဒ္ဓပူဇနိယပွဲတော်နှင့် ရွှေသင်္ကန်းတော် ကပ်လှူပူဇော်ခြင်း ရေစက်ချအလှူတော်မင်္ဂလာတွင် စေတနာ ရှင်အလှူရှင်များက စေတီတော်သြဝါဒစရိယ ဘဒ္ဒန္တ ကေသရ ဘုရားကိုင်ကျောင်းတိုက် ဆရာတော်ထံမှ ရှစ်ပါးသီလခံယူဆောက်တည်ခဲ့ကြပြီး အနုမောဒနာတရားနာယူ၍ သံဃာတော်အရှင်သူမြတ်များအား လှူဖွယ်ပစ္စည်းများ ဆက်ကပ်လှူဒါန်းကာ လှူဒါန်းမှုအစုစုအတွက် ရေစက်သွန်းချအမျှပေးဝေခဲ့ကြသည်။
ထိုနောက် လှူဒါန်းထားသည့် ရွှေစင်ရွှေပြားများကို စေတနာရှင် အလှူရှင်များကိုယ်တိုင် ကိုင်ဆောင်၍ စေတီတော်အား လက်ယာရစ် တစ်ပတ်ပတ်ပြီး ရွှေစင်ရွှေပြားများကို စေတီတော်ကြီးပေါ်သို့ ပန်းရထားဖြင့် တင်လှူပူဇော်ခဲ့ကြသည်။ လေးကျွန်းဆီမီးစေတီတော်ကြီးကို စတိန်ဆရာတော်ဘုရားကြီး ဦးဇာဂရအား အမှူး ထား၍ မြို့မိမြို့ဖများက ဘုရားဓာတ်တော်(၃)ဆူ ဌာပနာ၍ သက္ကရာဇ်(၁၀၉၃)ခုနှစ်တွင် စတင်တည်ထား ကိုးကွယ်ခဲ့ပြီး ဉာဏ်တော်အမြင့်မှာ (၈၂)ပေ(၉)လက်မရှိကြောင်း သမိုင်းမှတ်တမ်းများအရ သိရသည်။
ခိုင်ထူး ( မြိတ် ပြန်/ဆက် )
