နေပြည်တော် ဇူလိုင် ၁၇
ငွေကြေးခဝါချမှုတိုက်ဖျက်ရေးနှင့် အကြမ်းဖက်မှုတိုက်ဖျက်ရေးဆိုင်ရာ ဥပဒေပြဋ္ဌာန်းချက်များကို လိုက်နာဆောင်ရွက် ရေးသင်တန်းအမှတ်စဉ် (၅) ဖွင့်ပွဲအခမ်းအနားကို ယနေ့နံနက်ပိုင်းတွင် မြန်မာနိုင်ငံတော်ဗဟိုဘဏ်၊ ရန်ကုန် ဘဏ်ခွဲ၌ ကျင်းပသည်။
ဖွင့်ပွဲအခမ်းအနားသို့ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဦးဇော်မြင့်နိုင်၊ ညွှန်ကြားရေးမှူးချုပ်များနှင့် အရာထမ်းများ၊ အထူးစုံစမ်းစစ်ဆေးရေးဦးစီးဌာနမှ တာဝန်ရှိသူများနှင့် သင်တန်းသား၊ သင်တန်းသူများ တက်ရောက်ကြသည်။
အခမ်းအနားတွင် မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌက အမှာစကား ပြောကြားသည်။
ဗဟိုဘဏ်အနေဖြင့် အဆိုပါသင်တန်းကို အမှတ်စဉ် (၄)အထိ ဖွင့်လှစ်ခဲ့ရာ တက်ရောက်သူ (၂၅၀) အနက် (၁၈၁)ဦး ဖြေဆိုအောင်မြင်ပြီး သင်တန်းဆင်းလက်မှတ်များရရှိခဲ့ပြီးဖြစ်သည်။ အဆိုပါ သင်တန်းကို ပြည်ပငွေလွှဲလုပ်ငန်း ဆောင်ရွက်ရန် စိတ်ပါဝင်စားသူများနှင့် စီးပွားရေးလုပ်ငန်းရှင်များ အနေဖြင့် စီးပွားရေးနှင့် ငွေရေးကြေးရေး လွှဲပြောင်းပေးချေခြင်းဆိုင်ရာ ကိစ္စရပ်များတွင် AML/CFT ဆိုင်ရာဆုံးရှုံးနိုင်ခြေအန္တရာယ်ကို သိရှိရှောင်ရှားကြစေရန်၊ နိုင်ငံခြားသုံးငွေ စီမံခန့်ခွဲမှုနှင့် ပတ်သက်သည့် ဥပဒေ၊ စည်းမျဉ်းစည်းကမ်းများကို သိရှိနားလည်စေရန်၊ ပြည်ပ ငွေလွှဲလုပ်ငန်း ဆောင်ရွက်လိုသည့် ကုမ္ပဏီများအနေဖြင့် ၂၀၁၉ ခုနှစ်တွင် ပြဋ္ဌာန်းခဲ့သည့် ပြည်ပငွေလွှဲလုပ်ငန်း ဆောင်ရွက်ခွင့်ပြုခြင်းဆိုင်ရာ စည်းမျဉ်းအပိုဒ် ၄ (င)အရ လိုင်စင်လျှောက်ထားရာတွင် ငွေကြေးခဝါချမှု တိုက်ဖျက်ရေးနှင့် အကြမ်းဖက်မှုတိုက်ဖျက်ရေးဆိုင်ရာ ပြဋ္ဌာန်းချက်များကို လိုက်နာဆောင်ရွက်ရေး သင်တန်း တက်ရောက်ပြီးစီးကြောင်း အထောက်အထား လက်မှတ်တင်ပြရမည်ဖြစ်သဖြင့် သင်တန်းတက်ရောက် အောင်မြင်သူများကို Certificate ချီးမြှင့်ပေးနိုင်ရန်၊ ပြည်ပငွေလွှဲလုပ်ငန်း လိုင်စင်ရပြီးသည်နှင့် လိုင်စင်ရကုမ္ပဏီများအနေဖြင့် ပြည်ပငွေလွှဲလုပ်ငန်းလုပ်ကိုင်ရာတွင် မဖြစ်မနေသိရှိရမည့် ပြည်ပငွေလွှဲ လုပ်ငန်းဆောင်ရွက်ခွင့်ပြုခြင်းဆိုင်ရာ စည်းမျဉ်း၊ ငွေကြေးခဝါချမှု တိုက်ဖျက်ရေးဥပဒေ၊ အကြမ်းဖက်မှု တိုက်ဖျက်ရေးဥပဒေ၊ နိုင်ငံခြားသုံးငွေ စီမံခန့်ခွဲမှုဥပဒေတို့ပါ ပြဋ္ဌာန်းချက်များကို သိရှိနားလည်စေရန်၊ နိုင်ငံခြား သုံးငွေများ ဝယ်ယူရောင်းချလဲလှယ်ပေးခွင့် လုပ်ငန်းလိုင်စင်လျှောက်ရာတွင် လိုက်နာဆောင်ရွက်ရမည့် ညွှန်ကြားချက်များ သိရှိလိုက်နာ ဆောင်ရွက်စေရန်အတွက် ရည်ရွယ်၍ ဖွင့်လှစ်ပေးခြင်းဖြစ်ကြောင်း သတင်းရရှိသည်။
(သတင်းစဉ်)
