ရန်ကုန် ၂၉ ဇန်နဝါရီ
“ခ”သုံးလုံး ရုပ်ရှင်ထုတ်လုပ်ရေးက ထုတ်လုပ်ပြီး ဒါရိုက်တာ ကိုဇော်(အရုဏ်ဦး) ရိုက်ကူးထားသည့် "တရုတ်မလေးကိုချစ်တယ် (ဝေါ်အိုက်နီ)" ရုပ်ရှင်ဇာတ်ကား စာနယ်ဇင်းအကြို မိတ်ဆက်ပွဲအဖြစ် ဇန်နဝါရီ ၂၈ ရက် ည ၇ နာရီ က ရန်ကုန်မြို့ရှိ သမ္မတအဆင့်မြင့် ရုပ်ရှင်ရုံ၌ ပြသခဲ့ပြီး ဖေဖော်ဝါရီ ၁ ရက်မှ စတင်၍ နိုင်ငံတဝန်းလုံးရှိ အဆင့်မြင့်ရုပ်ရှင်ရုံကြီးများတွင် ပြသသွားမည်ဖြစ်သည်။
ဒါရိုက်တာ ကိုဇော်(အရုဏ်ဦး)က ``တရုတ်မလေး နှစ်ယောက်ကို ချစ်မိသွားတဲ့ မြန်မာလူငယ် နှစ်ဦးရဲ့ အချစ် ဟာသ ဇာတ်လမ်းလေးပါ။ အမြင်မတူ ကွဲပြားနေတဲ့ ဟာသတစ်ခုကို တွေ့မြင်ရမှာပါ။ ဝတ်စားဆင်ယဉ်မှု၊ အသုံးအဆောင် အပိုင်းတွေကို ပြင်ဦးလွင်မြို့ တရုတ်ဘုံ ကျောင်းက ဆရာ၊ ဆရာမတွေနဲ့ တာဝန်ရှိသူတွေက အများ ကြီးကူညီပေးခဲ့ကြတာပါ´´ ဟုပြောသည်။
အဆိုပါဇာတ်ကားတွင် လူမင်း၊ ခန့်စည်သူ၊ ထွန်းအိန္ဒြာဗိုလ်၊ ခိုင်သင်းကြည်၊ ဦးမိုးဒီ၊ ဧရာ၊ ငှက်ပျောကြော်၊ ဝက်မ၊ ဆင်မ၊ ငြိမ်းချမ်း၊ ပွင့်၊ ဝါဝါအောင်၊ မျောက်ရှုံး၊ ကျင်ဝှက်၊ အောင်သော်၊ အောင်မော်၊ ကြာစိ၊ နေလင်း၊ ကံပွင့်၊ စည်သူ(ပလပ်ကျွတ်) နှင့် အခြားသော အနုပညာရှင် များပါဝင်ထားပြီး ပျော်ရွှင်ရယ်မောဖွယ်ရာရိုက်ကူးထားသည့် အချစ် ဟာသ ရုပ်ရှင် ဇာတ်ကား ကြီးဖြစ်သည်။
သရုပ်ဆောင် ထွန်းအိန္ဒြာဗိုလ်က``တရုတ်မိသားစုဝင်ထဲက သမီးကြီး တစ်ယောက် အနေနဲ့ ပါဝင်ထားတာပါ။ ဟာသကားလေးပါ။ မြန်မာစကားပဲပြောရတာပါ။ တရုတ်မိသားစုပုံစံ ရိုက်ကူးထားတဲ့အတွက် စကားပြောတဲ့ အခါမှာ တရုတ်သံ ဝဲဝဲလေးနဲ့ ပြောပေးထားရပါတယ်။ အတတ်နိုင်ဆုံးကြိုး စားခဲ့ပါတယ်။ တကယ်တမ်းက ဇာတ်ကားရိုက်ပြီးသွားတော့မှ တရုတ်သံကို ပီပီပြင်ပြင်ရခဲ့တော့တယ်´´ ဟုပြောသည်။
သရုပ်ဆောင် ဝါဝါအောင်က ``ဒီကားမှာ ကိုခန့်ရဲ့အစ်မနေရာက ပါဝင်ထားတယ်။ နတ်ကို ကိုးကွယ်ယုံကြည်တဲ့ အပျိုကြီး တစ်ယောက်ပုံစံ သရုပ်ဆောင်ထားတာပါ။ ဟာသကားဆိုပေမယ့် ဝတ်စားဆင်ယဉ်မှုတွေကို ထူးထူးခြားခြား လေးတွေ့ မြင်ရမှာပါ။ တရုတ်မလေးတွေကို ချစ်မိသွားတဲ့ မြန်မာအမျိုးသားလေးတွေ အကြောင်းကို ချစ်စရာကောင်းအောင် ရိုက်ကူးထားတာပါ။ တရုတ်နှစ်သစ်ကူးအမီ ဒီဇာတ်ကားလေးကို ရုံတင်ခွင့်ရတဲ့အတွက် ဝမ်းသာမိပါတယ်´´ ဟုပြောသည်။
နဖူးစာရွာလည် ထိုက်တဲ့သူ ဆယ်ဆိုသည့် ဆိုရိုးစကားအတိုင်း တစ်ဦးနှင့်တစ်ဦး ဖူးစာပါလာသည့်အခါ မည်သို့မျှ ရှောင်လွှဲ၍ မရကြောင်းကို ရုပ်ရှင်ချစ် ပရိတ်သတ်များ ဘဝအမောပြေစေရန် ဟာသနှော၍ ရည်ရွယ်ရိုက်ကူးထား ခြင်းဖြစ်သည်။
သတင်း-ဇော်ကြီး၊ ဓာတ်ပုံ-ဖေဇော်
