နေပြည်တော် ဇူလိုင် ၁၆

 

တတိယအကြိမ် ပြည်သူ့လွှတ်တော် ဒုတိယ ပုံမှန်အစည်းအဝေး ၂၄ ရက်မြောက်နေ့ကို ယနေ့ နံနက် ၁၀ နာရီတွင် နေပြည်တော်ရှိ လွှတ်တော် အဆောက်အအုံ ပြည်သူ့လွှတ်တော်အစည်းအဝေး ခန်းမ၌ ကျင်းပရာ ပြည်သူ့လွှတ်တော်ဥက္ကဋ္ဌ ဦးခင်ရီ၊ ဒုတိယဥက္ကဋ္ဌ ဦးမောင်မောင်အုန်းနှင့် ပြည်သူ့လွှတ်တော်ကိုယ်စားလှယ်များ တက်ရောက်ကြ သည်။

 

အစည်းအဝေးတွင် ဆက်သွယ်ရေး၊ လမ်း၊ မြစ်ကူး၊ ချောင်းကူးတံတားများနှင့် အားကစားကွင်း တည်ဆောက်ပေးနိုင်ရေး၊ ယာယီနေရပ်စွန့်ခွာသူများ ထောက်ပံ့ကြေးရရှိရေးတို့နှင့် စပ်လျဉ်း၍ မေးခွန်း ၁၂ ခု မေးမြန်းဖြေကြားခြင်း၊ အဆို ၁ ခု ဆွေးနွေး အတည်ပြုခြင်းနှင့် ဥပဒေကြမ်း ၁ ခု တင်သွင်းခြင်း တို့ကို ဆောင်ရွက်ကြသည်။

 

ဦးစွာ ကွန်ဟိန်းမဲဆန္ဒနယ်မှ စိုင်းကျော်လှ၏ ကွန်ဟိန်းမြို့နယ်အတွင်း ကျေးရွာ ၇၂ ရွာ တို့တွင် ဆက်သွယ်ရေးကွန်ရက် မရှိပါသဖြင့် အော်ပရေတာ တစ်ခုခုမှ တာဝါတိုင်နှစ်တိုင် တည်ဆောက်ပေးရန် မည်ကဲ့သို့ဆောင်ရွက်ပေးမည်ကို သိရှိလိုခြင်း မေးခွန်းနှင့်စပ်လျဉ်း၍ ဒီဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးသက်ဝင်းအောင်က ရှမ်းပြည်နယ်(တောင်ပိုင်း) ကွန်ဟိန်းမြို့နယ်အတွင်း၌ မိုဘိုင်းစခန်း ၂၅ ခုကို ဖိုင်ဘာကေဘယ်၊ မိုက္ကရိုဝေ့ဗ် အဝေးဆက်သွယ်ရေးဆက်ကြောင်းများဖြင့် ချိတ်ဆက်၍ ဆက်သွယ်ရေး ဝန်ဆောင်မှုလုပ်ငန်းများ ဆောင်ရွက်ပေးလျက်ရှိပါကြောင်း။

 

မေးခွန်းမေးမြန်းထားသည့် ကျေးရွာအုပ်စု ၉ စု၊ ကျေးရွာ ၇၂ ရွာတွင် လျှပ်စစ်ဓာတ်အားမရရှိနိုင်မှု၊ တောင်ကုန်းတောင်တန်းများ ထူထပ်၍ အဝေး ဆက်သွယ်ရေးဆက်ကြောင်းများ တည်ဆောက်ရန် ခက်ခဲမှုတို့ကြောင့် မိုဘိုင်းဆက်သွယ်ရေးစခန်းအသစ် တည်ဆောက်တပ်ဆင်ပေးရန် လတ်တလောအစီ အစဉ်မရှိသေးပါကြောင်း။

 

သို့သော်လည်း ဝန်ကြီးဌာနအနေဖြင့် လမ်းပန်း ဆက်သွယ်ရေးခက်ခဲပြီး သွားလာရန် မလွယ်ကူသည့် နယ်မြေဒေသများတွင် ဆက်သွယ်ရေးကဏ္ဍဖွံ့ဖြိုးတိုးတက်ရေးအတွက် ဆောင်ရွက်လျက်ရှိရာ ကွန်ဟိန်းမြို့နယ်၌ ကွင်းဆင်းတိုင်းတာရေး ဆောင်ရွက်သွားမည် ဖြစ်ပါကြောင်း၊ မိုဘိုင်းဆက်သွယ်ရေး စခန်းများ တည်ဆောက်နိုင်ရန်အတွက် လျှပ်စစ် ဓာတ်အားရရှိမှု၊ ဆက်သွယ်ရေးဆက်ကြောင်းများ တည်ဆောက်ချိတ်ဆက်နိုင်မှု၊ ဘဏ္ဍာငွေရရှိမှုနှင့် နယ်မြေဒေသ အခြေအနေများအပေါ် မူတည်ပြီး ဆက်သွယ်ရေးဆိုင်ရာ စည်းမျဉ်းစည်းကမ်း၊ သတ်မှတ်ချက်များနှင့် ကိုက်ညီမှုရှိပါက မိုဘိုင်း ဆက်သွယ်ရေးစခန်းများ တည်ဆောက်နိုင်ရေး ဘဏ္ဍာနှစ်အလိုက် လျာထားစီစဉ်ဆောင်ရွက်သွား မည်ဖြစ်ပါကြောင်း ဖြေကြားသည်။

 

ပူတာအိုမဲဆန္ဒနယ်မှ ဦးရားနီ၏ ပူတာအို- နမ်ထွမ်ခူး ကျေးရွာချင်းဆက်လမ်း၏ ကျန်ရှိသော ၁ဝ မိုင်အား ကွန်ကရစ်လမ်းအဖြစ် ဆက်လက်ခင်း ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ် ကျော်စွာဦးက ကချင်ပြည်နယ် ပူတာအိုမြို့နယ် ပူတာအို-နမ်ထွမ်ခူး ကျေးရွာချင်းဆက်လမ်း ၁၄ မိုင်အား နယ်စပ်ရေးရာဝန်ကြီးဌာန၏ နယ်စပ်ဒေသ ဖွံ့ဖြိုးရေး ပြည်ထောင်စုရန်ပုံငွေနှင့် ၂၀၁၄-၂၀၁၅ မှ ၂၀၂၃-၂ဝ၂၄ ဘဏ္ဍာရေးနှစ်အထိ ဘဏ္ဍာနှစ်အလိုက် မြေသားလမ်း၊ ကျောက်လမ်းဆောင်ရွက်ပေးခဲ့ရာ ၂၀၂၂-၂၀၂၃ ဘဏ္ဍာရေးနှစ်အထိ ကွန်ကရစ်လမ်း ၄ မိုင်ကို ဆောင်ရွက်နိုင်ခဲ့ပါကြောင်း။

 

ပူတာအို-နမ်ထွမ်ခူးလမ်း ၁၄ မိုင်မှ ကျန်ရှိသည့် ကွန်ကရစ်လမ်း ၁၀ မိုင် ခင်းခြင်းလုပ်ငန်းကို စက်သုံး ဆီနှင့်လုပ်ငန်းသုံးပစ္စည်းများ လုပ်ငန်းခွင်သို့ လွယ်ကူစွာ သယ်ယူပို့ဆောင်နိုင်သည့် အချိန်နှင့် ရန်ပုံငွေရရှိမှုတို့အပေါ် မူတည်၍ သင့်လျော်သည့် ဘဏ္ဍာရေးနှစ်တွင် လျာထားဆောင်ရွက်မည်ဖြစ်ပါကြောင်း ဖြေကြားသည်။

 

လှိုင်သာယာ(အရှေ့ပိုင်း) မဲဆန္ဒနယ်မှ ဦးအေးချမ်း၏ အမျိုးသမီးရေးရာဝန်ကြီးဌာနအသစ်၏ ရည်မှန်းချက်၊ ရှေ့လုပ်ငန်းစဉ်များအား ပြည်သူလူထုသိရှိနိုင်ရေးအတွက် ဆောင်ရွက်မည့်အစီအမံများကို သိရှိလိုခြင်း မေးခွန်းနှင့်စပ်လျဉ်း၍ အမျိုးသမီးရေးရာဝန်ကြီးဌာန ဒုတိယဝန်ကြီး ဒေါ်စန်းစန်းနွယ်က ၂ဝ၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်း၊ ပြည်ထောင်စု အစီရင်ခံစာအရ မြန်မာနိုင်ငံမှာ လူဦးရေ ၅၁ သန်း ကျော်ရှိပြီး အမျိုးသမီးဦးရေမှာ ၅၃ ရာခိုင်နှုန်းခန့် ရှိပါကြောင်း၊ မြန်မာနိုင်ငံရှိ အမျိုးသမီးများသည် လူဦး ရေ၏ ထက်ဝက်ကျော်ကို ကိုယ်စားပြုလျက်ရှိသဖြင့် ယင်းအင်အားကို နိုင်ငံတော်ဖွံ့ဖြိုးတိုးတက်ရေး အတွက် အကျိုးရှိစွာအသုံးချနိုင်ရေးကို အဓိကထား ဆောင်ရွက်သွားမည်ဖြစ်ပါကြောင်း။

 

ဝန်ကြီးဌာန၏ ရည်မှန်းချက်နှင့် ရှေ့လုပ်ငန်းစဉ်များကို ပြည်သူလူထုအနေဖြင့် ရှင်းလင်းစွာ သိရှိ နားလည်နိုင်စေရန် ဝန်ကြီးဌာန၏ တရားဝင် Website၊ လူမှုကွန်ရက်စာမျက်နှာများ၊ ပုံနှိပ်ထုတ်ဝေထားသည့်စာအုပ်များ၊ လက်ကမ်းစာစောင်များနှင့် ရုပ်သံမီဒီယာများ၊ အသိပညာပေးဆွေးနွေးပွဲများ၊ အလုပ်ရုံဆွေးနွေးပွဲများ၊ ဒေသအခြေပြု အသိပညာ ပေးအစီအစဉ်များနှင့် သက်ဆိုင်ရာဝန်ကြီးဌာနများ၊ အမျိုးသမီးအဖွဲ့အစည်းများ၊ အရပ်ဘက်အဖွဲ့အစည်းများနှင့် ပူးပေါင်းဆောင်ရွက်မည့် ကဏ္ဍစုံဆက်သွယ် ရေးအစီအစဉ်များမှတစ်ဆင့် ကျယ်ကျယ်ပြန့်ပြန့် အသိပညာပေး ဆောင်ရွက်သွားမည်ဖြစ်ပါကြောင်း။

 

အမျိုးသမီးရေးရာဝန်ကြီးဌာနသည် သက်ဆိုင်ရာ အဖွဲ့အစည်းများ၏ အားသာချက်များကို ပေါင်းစပ် အသုံးချ၍ ပူးပေါင်းဆောင်ရွက်မှုကို ပိုမိုအားကောင်းစေကာ အမျိုးသမီးများ၏ စွမ်းပကားနှင့်စွမ်းဆောင် ရည်ကိုမြှင့်တင်ပြီး နိုင်ငံတော်ဖွံ့ဖြိုးတိုးတက်ရေး လုပ်ငန်းစဉ်များတွင် အမျိုးသမီးများ၏ အခန်းကဏ္ဍ ပိုမိုမြင့်မားလာစေရေးနှင့် အားလုံးအကျုံးဝင်သော လူ့အဖွဲ့အစည်းတစ်ရပ် ဖြစ်ထွန်းလာစေရေးကို ရည်မှန်း၍ ဆောင်ရွက်သွားမည်ဖြစ်ပါကြောင်း။

 

အမျိုးသမီးရေးရာဝန်ကြီးဌာန ဖွဲ့စည်းတည်ထောင်ခြင်းသည် အဖွဲ့အစည်းဖွဲ့စည်းပုံ ပြောင်းလဲခြင်းမျှသာမဟုတ်ဘဲ အမျိုးသမီးများဖွံ့ဖြိုး တိုးတက်ရေးဆိုင်ရာ မူဝါဒများကို ပိုမိုထိရောက်စွာ ညှိနှိုင်းခြင်း၊ အကောင်အထည်ဖော်ခြင်း၊ စောင့်ကြည့် အကဲဖြတ်ခြင်းတို့ကို ဆောင်ရွက်နိုင်ရန် နိုင်ငံတော်၏ အဖွဲ့အစည်းဆိုင်ရာ စွမ်းဆောင်ရည်ကို မဟာဗျူ ဟာမြောက်မြှင့်တင်လိုက်ခြင်း ဖြစ်ပါကြောင်း၊ ယင်းမှတစ်ဆင့် အမျိုးသမီးများနှင့် အမျိုးသမီး ငယ်များသည် ကာကွယ်စောင့်ရှောက်မှုရရှိပြီး စွမ်းပကားမြင့်မားကာ နိုင်ငံတော်ဖွံ့ဖြိုးတိုးတက်ရေး ကဏ္ဍအသီးသီးတွင် အဓိပ္ပာယ်ရှိစွာ ပါဝင်ဆောင်ရွက် နိုင်သော အားလုံးအကျုံးဝင်သည့် လူ့အဖွဲ့အစည်းတစ်ရပ် ဖြစ်ထွန်းလာစေရန် ရည်မှန်းဆောင်ရွက်သွား မည်ဖြစ်ပါကြောင်း ဖြေကြားသည်။

 

မချမ်းဘောမဲဆန္ဒနယ်မှ ဦးငွါးရဲ့ဆဲ၏ မချမ်းဘောမြို့နယ်တွင် မြို့နယ်အားကစားနှင့် ကာယပညာဦးစီးဌာနရုံးနှင့် အားကစားကွင်းများ တည်ဆောက်ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ အားကစားရေးရာဝန်ကြီးဌာန ဒုတိယဝန်ကြီး ဦးညီညီက မချမ်းဘောမြို့နယ်တွင် အားကစားရေးရာဝန်ကြီးဌာန အားကစားနှင့်ကာယ ပညာဦးစီးဌာန အားကစားကွင်းမြေနေရာအဖြစ် မြေဧရိယာ ၄ ဧကခန့်သာရှိသည့်အတွက် အားကစား ရုံတည်ဆောက်ရန် မြေနေရာလုံလောက်မှုမရှိပါကြောင်း၊ သို့သော်လည်း ရိုးရိုးဘောလုံးကွင်း အလျား ၃၄၅ ပေ၊ အနံ ၂၂၅ ပေ ဖောက်လုပ်ခြင်းနှင့် ရုံးအဆောက်အအုံ အလျား ပေ ၅၀၊ အနံ ၃၅ ပေ တည်ဆောက်ခြင်းအတွက် စုစုပေါင်း ငွေကျပ် ၄၇၅ သန်းအား နီးစပ်ရာဘဏ္ဍာရေးနှစ်၏ ကချင်ပြည် နယ် အားကစားနှင့်ကာယပညာဦးစီးဌာန ငွေလုံး ငွေရင်းအသုံးစရိတ်ရန်ပုံငွေတွင် ထည့်သွင်းလျာထား နိုင်ရေးအတွက် ကချင်ပြည်နယ်အစိုးရအဖွဲ့ထံ တင်ပြခွင့်ပြုချက် ရယူဆောင်ရွက်သွားမည်ဖြစ်ပါကြောင်းနှင့် ခွင့်ပြုချက်ရရှိပါက ဆောင်ရွက်ပေးသွား မည်ဖြစ်ပါကြောင်း ဖြေကြားသည်။

 

ဗန်းမော်မဲဆန္ဒနယ်မှ ဦးကျော်လင်း၏ ယာယီ နေရပ်စွန့်ခွာသူများအား ထောက်ပံ့သည့် လစဉ်ကြေး များကို ၂ဝ၂၆ ခုနှစ်၌ ဆိုင်းငံ့ထားသည့်အတွက် ဆက်လက်ထောက်ပံ့ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာသန်းစိုးက ပြည်ထောင်စုနယ်မြေ နေပြည်တော်နှင့် တိုင်းဒေသကြီး၊ ပြည်နယ်များတွင် အကြမ်းဖက်ဖြစ်စဉ်ကြောင့် ယာယီနေရပ်စွန့်ခွာ ပြည်သူများအတွက် ထောက်ပံ့မှုများဆောင်ရွက်ပေးရန် တစ်ဦးလျှင် ၁ လ ငွေကျပ် ၂၀၀၀၀ နှုန်းဖြင့် ၂၀၂၅ ခုနှစ် ဇန်နဝါရီလမှ ဒီဇင်ဘာလအထိ အမျိုးသားသဘာဝ ဘေးအန္တရာယ်ဆိုင်ရာ စီမံ ခန့်ခွဲမှုကော်မတီရန်ပုံငွေမှ ထောက်ပံ့ပေးခဲ့ပါကြောင်း၊ ထိုသို့ ၁ နှစ်စာ ထောက်ပံ့ မှုများဆောင်ရွက်ခဲ့ရာ ကချင်ပြည်နယ်ရှိ နေရပ် စွန့်ခွာသူများအတွက် ငွေကျပ် ၂၂၄၄၆ ဒသမ ၇၈ သန်းကို ထောက်ပံ့ပေးခဲ့ပါကြောင်း။

 

လက်ရှိတွင် အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီရန်ပုံငွေကို ၂၀၂၆ ခုနှစ် တွင် မန္တလေးငလျင်ကြီး ပြန်လည်ထူထောင်ရေး လုပ်ငန်းများ၊ တပ်မတော်က နယ်မြေပြန်လည်စိုးမိုးနိုင်ခဲ့သော မြို့ရွာများတွင် အကြမ်းဖက်သမားများ ဖျက်ဆီးမှုကြောင့် ပျက်စီးခဲ့သော စာသင်ကျောင်း၊ ဆေးရုံ၊ လမ်းတံတား၊ ရေ၊ မီး၊ လျှပ်စစ် အစရှိသည့် အများပြည်သူဆိုင်ရာ အခြေခံအဆောက်အအုံများ အတွက် ပြန်လည်ထူထောင်ရေးလုပ်ငန်းများတွင် ဦးစားပေးသုံးစွဲနေရသဖြင့် နေရပ်သို့မပြန်နိုင်သေးသည့် ပြည်သူများအား ဆက်လက်ထောက်ပံ့နိုင်ခြင်း မရှိသေးပါကြောင်း ဖြေကြားသည်။

 

ရွှေတောင်မဲဆန္ဒနယ်မှ ဦးတင်ရွှေ၏ ရွှေတောင်မြို့ ယွန်းတန်းရပ်ကွက်မှ မြို့မကျေးရွာအုပ်စုသို့ သွယ်တန်းထားသော မြေသားတမံ ရေကာတာအား တာပေါင်တမံချဲ့ထွင်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်က ထန်းလုံးချောင်းတာသည် ရွှေတောင်မြို့နယ် ရွှေတောင်မြို့ ယွန်းတန်းရပ်ကွက်နှင့် မြို့မကျေးရွာတို့အကြားတွင် တည်ရှိပြီး အဆိုပါ တာအား ရေဘေးကာကွယ်ရေးအတွက်သာ ရည်ရွယ် တည်ဆောက်ထားခဲ့ခြင်းဖြစ်သည့်အတွက် တာတမံ ပေါ်မှ ကားကြီးကားငယ်များ နေ့စဉ်ဖြတ်သန်း၍ ကျေးရွာချင်းဆက်လမ်းအဖြစ် အသုံးပြုပါက အထူးသဖြင့် မိုးရာသီကာလတွင် တာတမံထိခိုက်ပျက်စီးမှုများ ဖြစ်ပေါ်စေနိုင်ပါကြောင်း။

 

တာတမံထိခိုက်ပျက်စီးမှု လျော့နည်းစေရန်နှင့် ရေရှည်ကြံ့ခိုင်မှုရှိစေရေး တာတမံစစ်ဆေးရေး လုပ်ငန်းများ ဆောင်ရွက်နိုင်ရန်နှင့် ဒေသခံပြည်သူ များသွားလာနိုင်ရန် ၁ တန်အောက် မော်တော်ယာဉ်၊ ထော်လာဂျီနှင့် ဆိုင်ကယ်များမှလွဲ၍ မည်သည့်ယာဉ်မှ ဖြတ်သန်းသွားလာခွင့် မရှိစေရေးအတွက် သံမဏိဂိုးတိုင်မောင်းတံဂိတ် ၂ ခုကို ၂၀၂၅-၂၀၂၆ ဘဏ္ဍာနှစ်တွင် ပဲခူးတိုင်းဒေသကြီး အစိုးရအဖွဲ့၏ ခွင့်ပြုရန်ပုံငွေဖြင့် တည်ဆောက်ထားရှိခဲ့ပြီးဖြစ် ကြောင်း၊ ပဲခူးတိုင်းဒေသကြီး အစိုးရအဖွဲ့မှလည်း ဒေသနေပြည်သူများ အရေးပေါ်အကြောင်းကိစ္စရှိက ရာသီမရွေးလွယ်ကူချောမွေ့စွာ သွားလာနိုင်စေရန်အတွက် ရွာသာယာ-နွားခြံကုန်း-မြို့မလမ်း အရှည် ၃ မိုင် ၇ ဒသမ ၅ ဖာလုံအား ရွှေတောင်မြို့နယ် ကျေးလက်လမ်းဖွံ့ဖြိုးတိုးတက်ရေး ဦးစီးဌာနမှ အဆင့်မြှင့်တင်ဆောင်ရွက်ခဲ့ရာ ၃ မိုင်နှင့် ၀ ဒသမ ၅ ဖာလုံ ဆောင်ရွက်ပြီးဖြစ်ပါကြောင်း၊ ကျန်ရှိသည့် လမ်းအရှည် ၇ ဖာလုံကိုလည်း ဘဏ္ဍာရေးနှစ် အလိုက် ကျေးလက်လမ်း ဖွံ့ဖြိုးတိုးတက်ရေးဦးစီးဌာနမှ ဆက်လက်လျာထားဆောင်ရွက်သွားမည် ဖြစ်ပါကြောင်း၊ တာထိပ်ပြင်အကျယ် ၉ ပေသာရှိသော ထန်းလုံးချောင်းတာသည် ရေဘေးကာကွယ်ရေးတာ ဖြစ်သည့်အတွက် တာတမံကြံ့ခိုင်မှုမထိခိုက်စေရန်နှင့် ရေရှည်တည်တံ့ခိုင်မာစေရန်အတွက် မော်တော်ယာဉ် ၂ စီးရှောင်နိုင်သည်အထိ တာတစ်လျှောက်လုံး တာပေါင်ချဲ့ထွင် ဆောင်ရွက်ပေးရန်အတွက် လတ်တလောတွင် အစီအစဉ် မရှိသေးပါကြောင်း ဖြေကြားသည်။

 

သနပ်ပင်မဲဆန္ဒနယ်မှ ဦးအောင်ဇော်လင်း၏ သနပ်ပင်မြို့နယ် ကျေးရွာအုပ်စု ၇ စု၊ မင်းရွာ-ကုက္ကို ရေနုတ်မြောင်းဖျားရှိ သောင်အတွင်းတိမ်ကောနေ သည့် ရိုးချောင်းအား တူးဖော်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ဒုတိယဝန်ကြီး ဦးဗိုလ်ဗိုလ်ကျော်က ပဲခူးတိုင်းဒေသကြီး သနပ်ပင် မြို့နယ် မင်းရွာ-ကုက္ကို ရေနုတ်မြောင်းသည် ရေကြီးကွင်း၊ ရေနက်ကွင်းများ၏ မိုးစပါးစိုက်ဧရိယာများ ဖြစ်သည့် စိုက်ဧက ၂၁၃၅၃ ဧကအား ရေထုတ်နုတ်ပေးပြီး တောင်သူများအတွက် အရေးပါသည့် ရေနုတ်မြောင်းဖြစ်ပါကြောင်း၊ အဆိုပါရေနုတ်မြောင်းအား စိုက်ပျိုးမြေများ ရေကြီးနစ်မြုပ်မှု လျော့နည်း သက်သာစေရေးအတွက် လွန်ခဲ့သည့် နှစ် ၃၀ ခန့်က ဌာနမှ တူးဖော်ခဲ့ပြီး ယခုအခါ ရေနုတ်မြောင်းဖျားရှိ စစ်တောင်းမြစ်အတွင်း မြစ်ကြောင်းပြောင်းလဲပြီး သဲသောင်များပေါ်ထွန်းလာသဖြင့် ရေစီးဆင်းနိုင်မှုနှင့် ရေထုတ်နုတ်နိုင်မှုတို့ အားနည်းလာသည်ကို တွေ့ရှိ ရပါကြောင်း။

 

ရေနုတ်မြောင်းအတွင်း စီးဆင်းသော ရေပမာဏကို လုံလောက်စွာ ထုတ်နုတ်နိုင်ရန်အတွက် သောင် အတွင်း ရိုးချောင်းကို အလျား ၄ ဒသမ ၅၀ မိုင်၊ အကျယ် ပေ ၃၀ နှင့် အနက် ၈ ပေတူးဖော်ရန် လိုအပ်လျက်ရှိပါကြောင်း၊

 

သို့ဖြစ်ပါ၍ သနပ်ပင်မြို့နယ် ကျေးရွာအုပ်စု ၇ စုရှိ မိုးစပါးများ ရေကြီးနစ်မြုပ်မှု လျော့နည်းသက်သာစေ ရန်အတွက် သောင်အတွင်း တိမ်ကောနေသည့် ရိုးချောင်းတူးဖော်ခြင်း လုပ်ငန်းအား ၂၀၂၇-၂၀၂၈ ဘဏ္ဍာနှစ် တိုင်းဒေသကြီးရန်ပုံငွေတွင် တင်ပြ တောင်းခံပြီး ရန်ပုံငွေရရှိမှုအပေါ် မူတည်၍ ဆောင် ရွက်ပေးသွားမည်ဖြစ်ပါကြောင်း ဖြေကြားသည်။

 

ကြံခင်းမဲဆန္ဒနယ်မှ ဦးနိုင်မင်းဦး၏ ကြံခင်းမြို့ နယ် ကြို့ပင်စုကျေးရွာအုပ်စုအတွင်း၌ ကျောက်နီ ချောင်း သံကူကွန်ကရစ် ရေတားတမံဆောင်ရွက်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ဒုတိယဝန်ကြီး ဦးဗိုလ်ဗိုလ်ကျော်က ကြံခင်းမြို့နယ် ကြို့ပင်စုကျေးရွာအုပ်စုအနီး ကျောက်နီချောင်းပေါ်တွင် ခိုင်မာသော သံကူကွန်ကရစ်ရေတားတမံ (ရေလွှဲဆည်)တည်ဆောက်ခြင်းအတွက် ၂၀၂၀-၂၀၂၁ ဘဏ္ဍာနှစ် တိုင်းဒေသကြီး ငွေလုံးငွေရင်းရန်ပုံငွေ မှ ငွေကျပ် သိန်း ၆၅၀၀ ခွဲဝေရရှိခဲ့ပါကြောင်း၊ အဆိုပါ အချိန်ကာလသည် ကိုဗစ်ကာလဖြစ်၍ လုပ်ငန်းများ ဆောင်ရွက်ရန်အတွက် တည်ဆောက်ရေးပစ္စည်းများ ဝယ်ယူရန်ခက်ခဲခြင်း၊ အချိန်မီပြီးစီးအောင် ဆောင်ရွက်ရန်ခက်ခဲခြင်းတို့ကြောင့် ရန်ပုံငွေ ပြန်လည်အပ်နှံခဲ့ရပါကြောင်း။

 

သို့သော် ကြံခင်းမြို့နယ် ကြို့ပင်စုကျေးရွာ အုပ်စု ကျောက်နီချောင်းပေါ်တွင် သံကူကွန်ကရစ် ရေတားတမံ(ရေလွှဲဆည်) တည်ဆောက်နိုင်ရေးအတွက် မြေပြင်အခြေအနေ ပြောင်းလဲမှုများကို ကွင်းဆင်းတိုင်းတာခြင်း၊ အကြိုစူးစမ်းလေ့လာခြင်း၊ ဒီဇိုင်းပုံစံပြန်လည်စိစစ်တွက်ချက်ခြင်းနှင့် ခန့်မှန်း ခြေစာရင်း ပြန်လည်တွက်ချက်ခြင်းများ ဆောင်ရွက်ပြီး လုပ်ငန်းဆောင်ရွက်နိုင်မည့် အခြေအနေရှိပါက လုပ်ငန်းအကောင်အထည်ဖော်နိုင်ရေးအတွက် လိုအပ်ရန်ပုံငွေအား နီးစပ်ရာဘဏ္ဍာနှစ် တိုင်းဒေသ ကြီးရန်ပုံငွေတွင် ထည့်သွင်းတင်ပြတောင်းခံကာ ရန်ပုံငွေရရှိမှုပေါ်မူတည်၍ ဆောင်ရွက်သွားမည် ဖြစ်ပါကြောင်း ဖြေကြားသည်။

 

ဝမ်းတွင်းမဲဆန္ဒနယ်မှ ဦးမျိုးမြင့်သိန်း၏ ဝမ်းတွင်းမြို့နယ်ရှိ ဆူးဖြူကန်-တောင်ဘို၊ သပြေရိုး ကျေးရွာမှ ရန်ကုန်-မန္တလေးလမ်းသို့ သွားလာသည့် ရိုးကူးတံတားကြီး၊ ပဲနံ့သာရွာနှင့် ရွှေတောင်ရွာ ဆက်သွယ်သော ရိုးကူးတံတားနှင့် ကံကြီးကျေးရွာနှင့် ဘုရားဖြူ-ရွှေပေါ်ကျွန်းလမ်းကို ဆက်သွယ်သော လမ်းပေါ်ရှိ ရိုးကူးတံတားများအား ဆောက်လုပ်ပေး ရန်အစီအစဉ် ရှိ၊ မရှိ မေးခွန်းနှင့်စပ်လျဉ်း၍ သမဝါယမ နှင့်ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးက ဝမ်းတွင်းမြို့နယ် ပဲနံ့သာရွာ-ရွှေတောင်ရွာ ကျေးရွာချင်းဆက်လမ်းပေါ်ရှိ ရိုးကူး တံတား ပေ ၁၃၀နှင့် ကံကြီးကျေးရွာနှင့် ဘုရားဖြူ-ရွှေပေါ်ကျွန်းလမ်းမကြီး ဆက်သွယ်သည့် လမ်းပေါ်ရှိ ရေကျော်တံတားတို့အား ပြင်ဆင်ထိန်းသိမ်းခြင်း ရန်ပုံငွေဖြင့် ဆောင်ရွက်ပေးသွားမည်ဖြစ်ပြီး ဆူးဖြူကန်-တောင်ဘို-သပြေရိုးကျေးရွာမှ ရန်ကုန်-မန္တလေးလမ်းမသို့ ချိတ်ဆက်သည့် လမ်းပေါ်ရှိ ရိုးကူး တံတား ပေ ၈၀ အား ကွန်ကရစ်တံတားအဖြစ် မြှင့်တင်ရန် ကျေးလက်လမ်းဖွံ့ဖြိုးရေးမဟာဗျူဟာ အရ ကျေးလက်နေပြည်သူလူထု၏ လူမှုစီးပွားဘဝ ဖွံ့ဖြိုးတိုးတက်မှု အကျိုးပြုမှုနှုန်း လက်ရှိလိုအပ်မှုတို့ကို ဦးစားပေးရွေးချယ်မှုအပေါ် မူတည်၍ ၂၀၂၇-၂၀၂၈ ဘဏ္ဍာနှစ်တွင် လျာထားတင်ပြမည်ဖြစ်ပြီး ရန်ပုံငွေရရှိမှုအပေါ် မူတည်၍ ဆောင်ရွက်သွားမည် ဖြစ်ပါကြောင်း ဖြေကြားသည်။

 

မြစ်သားမဲဆန္ဒနယ်မှ ဦးစန်းမြင့်၏ မြစ်သားမြို့ နယ် အိမ်ရှေ့တောင်ရွာနှင့် ခရုတုတ်ရွာအကြားရှိ ပန်းလောင်မြစ်ကူးတံတားအား မည်သည့်ဘဏ္ဍာရေးနှစ်တွင် တည်ဆောက်ပေးမည်ကို သိရှိလိုခြင်း မေးခွန်းနှင့်စပ်လျဉ်း၍ ဒုတိယဝန်ကြီး ဦးသိုက်စိုးက မြစ်သားမြို့နယ် ပန်းလောင်မြစ်ကူးတံတားသည် ကျေးလက်လမ်းဖွံ့ဖြိုးရေးဦးစီးဌာနပိုင် ပြည်ထောင်စုမှ စီမံခန့်ခွဲသော တံတားဖြစ်ပြီး ၂၀၀၇-၂၀၀၈ ဘဏ္ဍာ နှစ်တွင် ဒေသခံပြည်သူများမှ ကိုယ်ထူကိုယ်ထ တည်ဆောက်ခဲ့သော အလျား ပေ ၁၅၀၊ အကျယ် ၅ ပေ၊ အမြင့် ၁၅ ပေရှိသော ဆိုင်ကယ်ကူးကြိုးတံတား ဖြစ်ပါကြောင်း။

 

အဆိုပါတံတားအား ကွန်ကရစ်တံတား အသစ် တည်ဆောက်မည်ဆိုပါက ခန့်မှန်းငွေကျပ်သန်း ၁၃၂၀ ကုန်ကျမည်ဖြစ်ပြီး ကျေးလက်နေပြည်သူလူထု၏ လူမှုစီးပွားဘဝဖွံ့ဖြိုးတိုးတက်မှု အကျိုးပြုနှုန်း လက်ရှိလိုအပ်မှုတို့ကို ဦးစားပေး ရွေးချယ်မှုအပေါ် မူတည်၍ ကြိုးတံတားပြင်ဆင်ထိန်းသိမ်းခြင်း လုပ်ငန်းအား ၂၀၂၇-၂၀၂၈ ဘဏ္ဍာနှစ်တွင် တိုင်းဒေသကြီး ငွေလုံးငွေရင်းရန်ပုံငွေဖြင့် လျာထားတင်ပြသွား မည်ဖြစ်ပြီး ကွန်ကရစ်တံတားတည်ဆောက်ခြင်း လုပ်ငန်းအား လတ်တလောဆောင်ရွက်ရန် အစီအစဉ် မရှိသေးပါကြောင်းနှင့် ၂၀၂၈-၂၀၂၉ ဘဏ္ဍာနှစ်မှသာ တိုင်းဒေသကြီး ရန်ပုံငွေလျာထားတင်ပြပြီး ရရှိရန်ပုံငွေအပေါ်မူတည်၍ ဆောင်ရွက်သွားမည် ဖြစ်ပါကြောင်း ဖြေကြားသည်။

 

မင်းတုန်းမဲဆန္ဒနယ်မှ ဦးစိုးနိုင်၏ မင်းတုန်းမြို့ နယ်ရှိ မင်းတုန်း၊ ဘူးတောင်-ပုသိမ်-မုံရွာကားလမ်း မကြီးနှင့် ဆက်သွယ်သည့်လမ်းအား အဆင့်မြှင့်တင် ခြင်း၊ သွေးကျောက်ချောင်းတံတား၏ ချဉ်းကပ်လမ်းအား မြေထိန်းနံရံတည်ဆောက်ခြင်း၊ Box Culvert တစ်စင်းတည်ဆောက်ခြင်းတို့အား ခွင့်ပြုပေးပါရန် သိရှိလိုခြင်း မေးခွန်းနှင့်စပ်လျဉ်း၍ ဒုတိယဝန်ကြီး ဦးသိုက်စိုးက မင်းတုန်းမြို့နယ် မင်းတုန်း-ဘူးတောင်-ပုသိမ်-မုံရွာဆက်သွယ်ရေးလမ်းသည် သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ကျေးလက်လမ်းဖွံ့ဖြိုးရေးဦးစီးဌာနပိုင် လမ်းအရှည် ၃ မိုင် ၄ ဖာလုံရှိသည့် ပြည်ထောင်စုမှ စီမံခန့်ခွဲသော လမ်းဖြစ်ပြီး လမ်းဦးစီးဌာနပိုင် ပုသိမ်-မုံရွာလမ်းနှင့် ချိတ်ဆက်ထားသည့် ပထမဦးစားပေးအဆင့် ကတ္တရာလမ်းဖြစ်ပါကြောင်း၊ ၎င်းလမ်းအား ကတ္တရာ ခင်းခြင်းဆောင်ရွက်ထားသည်မှာ နှစ်ကာလကြာမြင့် နေခြင်း၊ အချို့နေရာများတွင် နှစ်စဉ်ရေလွှမ်းမိုးမှုခံရ သဖြင့် များစွာပျက်စီးနေခြင်းတို့ကြောင့် ယခုအချိန်တွင် ယာဉ်သွားလာမှု ခက်ခဲလျက်ရှိပြီး ရေလွှမ်းမိုးမှုဒဏ်ကြောင့် ကတ္တရာလမ်းများ ပြင်ဆင်ရန်၊ မြေထိန်းနံရံနှင့် Box Culvert တည်ဆောက်ပေးရန် လိုအပ်မည်ဖြစ်ပါကြောင်း။

 

သို့ဖြစ်ပါ၍ ပျက်စီးနေသော ကတ္တရာလမ်းအား နှစ်စဉ်ရေလွှမ်းမိုးမှုမှ ကာကွယ်ရန်အတွက် ကတ္တရာ လမ်းခင်းခြင်း လုပ်ငန်းဆောင်ရွက်ရန်နှင့် သွေးကျောက်ချောင်းတံတား၏ ချဉ်းကပ်လမ်းအား မြေထိန်းနံရံတည်ဆောက်ခြင်း Box Culvert တစ်စင်းတည်ဆောက်ခြင်း လုပ်ငန်းများမှာ ယခုအခါ နယ်မြေလုံခြုံရေး အခြေအနေအရ လောလောဆယ် ဆောင်ရွက်ပေးနိုင်ခြင်း မရှိသေးပါကြောင်း ဖြေကြားသည်။

 

မှော်ဘီမဲဆန္ဒနယ်မှ ဒေါက်တာနေလင်း၏ မင်းရွာ-လယ်ပြင်စုရွာ-လိပ်ချောင်းရွာ-ရိုးကြီးရွာ များသို့ ကျေးရွာချင်းဆက်လမ်းနှင့် လယ်ပြင်စုရွာ-မိုးကြိုးပစ်ရွာ-သာယာကုန်းကျေးရွာများသို့ ကျေးရွာ ချင်းဆက်လမ်းတို့အား အဆင့်မြှင့်တင်ပေးရန် အစီ အစဉ်ရှိ၊ မရှိ မေးခွန်းနှင့်စပ်လျဉ်း၍ ဒုတိယဝန်ကြီး ဦးသိုက်စိုးက မှော်ဘီမြို့နယ် မင်းရွာ-လယ်ပြင်စုရွာ-လိပ်ချောင်းရွာ-ရိုးကြီးရွာများသို့ ကျေးလက်လမ်း ဖွံ့ဖြိုးရေးဦးစီးဌာနပိုင် လမ်းအရှည် ဆက်သွယ်သော လမ်းမှာ ၄ မိုင် ၅ ဒသမ ၃၉ ဖာလုံရှိပြီး တိုင်းဒေသကြီးမှ စီမံခန့်ခွဲသော ကျောက်လမ်းအမျိုးအစားဖြစ်ပါ ကြောင်း၊ အဆိုပါကျောက်လမ်းအား ကွန်ကရစ်လမ်းအဖြစ် အဆင့်မြှင့်တင်မည်ဆိုပါက ခန့်မှန်းငွေကျပ် ၃၉၃၀ ဒသမ ၄၃၇ သန်း ကုန်ကျမည်ဖြစ်ပြီး ၁ မိုင် ကွန်ကရစ်လမ်းအဖြစ် အဆင့်မြှင့်တင်မည်ဆိုပါက ခန့်မှန်းငွေကျပ် သန်း ၈၆၀ ကုန်ကျမည်ဖြစ်ပါ ကြောင်း၊ ၂၀၂၇-၂၀၂၈ ဘဏ္ဍာနှစ်တွင် ၁ မိုင် ကွန်ကရစ်လမ်းခင်းခြင်းလုပ်ငန်းအား ရန်ပုံငွေလျာထား တင်ပြသွားမည်ဖြစ်ပြီး တိုင်းဒေသကြီး ရရှိရန်ပုံငွေ အပေါ်မူတည်၍ ဆက်လက်ဆောင်ရွက်ပေးသွားမည် ဖြစ်ပါကြောင်း။

 

အလားတူ မှော်ဘီမြို့နယ် လယ်ပြင်စုရွာ- မိုးကြိုးပစ်ရွာ-သာယာကုန်းရွာများသို့ ဆက်သွယ် သောလမ်းမှာ ကျေးလက်လမ်း ဖွံ့ဖြိုးရေးဦးစီးဌာနပိုင် လမ်းအရှည် ၂ မိုင် ၇ ဒသမ ၈ ဖာလုံရှိပြီး တိုင်းဒေသကြီးမှ စီမံခန့်ခွဲသော လမ်းဖြစ်ပါကြောင်း၊ ကတ္တရာလမ်း အရှည် ၆ ဒသမ၂၃ ဖာလုံ နှင့် ကျန် ၂ မိုင် ၁ ဒသမ ၅၇ ဖာလုံမှာ ကျောက်လမ်းအမျိုးအစား ဖြစ်ပါကြောင်း၊ လက်ရှိ မြေပြင်အခြေအနေအရ အဆိုပါကတ္တရာလမ်းပိုင်းတွင် ယာဉ်များသွားလာမှု များသဖြင့် ကတ္တရာအပွန်းခံလွှာ ပျက်စီးနေပြီး ကျောက်ချောလမ်းပိုင်းတွင် ချိုင့်ခွက်များ ဖြစ်ပေါ် လျက်ရှိပါကြောင်း။

 

လက်ရှိလိုအပ်မှုတို့ကို ဦးစားပေးရွေးချယ်၍ ကတ္တရာလမ်းပိုင်း ၆ ဒသမ ၂၃ ဖာလုံအား ထပ်ပိုး လွှာခင်းခြင်းနှင့် ကျန်အပိုင်း ၂ မိုင် ၁ ဒသမ ၅၇ ဖာလုံ ကျောက်လမ်းအား ကျောက်လမ်းအနိမ့်အမြင့် ဖြေညှိခြင်းနှင့် အပွန်းခံလွှာခင်းခြင်းတို့ကို ၂၀၂၇-၂၀၂၈ ဘဏ္ဍာနှစ်တွင် တိုင်းဒေသကြီးရန်ပုံငွေဖြင့် လျာထားတင်ပြသွားမည်ဖြစ်ပြီး ရန်ပုံငွေရရှိမှုအပေါ် မူတည်၍ ဆောင်ရွက်ပေးသွားမည်ဖြစ်ပါကြောင်း ဖြေကြားသည်။

 

ထို့နောက် ကျောင်းကုန်းမဲဆန္ဒနယ်မှ ဒေါက်တာ ထိန်ဝင်းတင်သွင်းသည့် “မြန်မာနိုင်ငံ လူဦးရေနှင့် အိမ်အကြောင်းအရာ သန်းခေါင်စာရင်းများမှရရှိသော ကိန်းဂဏန်း အချက်အလက်များအား စနစ်တကျ ထိရောက်စွာစီမံခန့်ခွဲ၍ နိုင်ငံတော်၏ လူမှုဘဝ ဖွံ့ဖြိုးတိုးတက်ရေးအတွက် မဟာဗျူဟာမြောက် မူဝါဒများ ချမှတ်အကောင်အထည်ဖော်နိုင်ရန် လိုအပ် သည့် “အမျိုးသားလူဦးရေနှင့် ဖွံ့ဖြိုးတိုးတက်မှု ကော်မရှင်”တစ်ရပ် ဖွဲ့စည်းဆောင်ရွက်ရန် ပြည်ထောင်စုအစိုးရသို့ တိုက်တွန်းကြောင်းအဆို”နှင့် စပ်လျဉ်း၍ လွှတ်တော်ကိုယ်စားလှယ်များက ဆွေးနွေးကြသည်။

 

လပွတ္တာမဲဆန္ဒနယ်မှ ဦးဝင်းဆွေ(ခ) ဦးဝင်းရွှေ က မြန်မာနိုင်ငံအနေဖြင့် လူဦးရေနှင့်အိမ်အကြောင်းအရာ သန်းခေါင်စာရင်းမှ ကောက်ယူရရှိပြီးသော အချက်အလက်များသည် နိုင်ငံတော်၏ ရေရှည်ဖွံ့ဖြိုး တိုးတက်မှုမူဝါဒများ ချမှတ်ခြင်းနှင့် စီမံကိန်းများ ရေးဆွဲခြင်းတို့အတွက် အခြေခံအကျဆုံးနှင့် မရှိမဖြစ် လိုအပ်သော သော့ချက်များ ဖြစ်ကြောင်း၊ ယင်းအချက်အလက်များသည် နိုင်ငံတော်အတွက် မူဝါဒများ၊ မဟာဗျူဟာစီမံကိန်းများရေးဆွဲခြင်း၊ ပညာရေးနှင့်ကျန်းမာရေးကဏ္ဍများ မြှင့်တင်နိုင်ခြင်း၊ အခြေခံအဆောက်အအုံနှင့် အိမ်ရာဖွံ့ဖြိုးတိုး တက်စေခြင်း၊ အလုပ်အကိုင်၊ စီးပွားရေး၊ အခွင့် အလမ်းများဖန်တီးပေးခြင်း၊ ဘေးအန္တရာယ်စီမံခန့်ခွဲမှုနှင့် လူမှုကာကွယ်စောင့်ရှောက်ရေး ကဏ္ဍကြီးတို့တွင် အထောက်အကူပြုမည်ဖြစ်ပါကြောင်း။

 

၂ဝ၂၄ ခုနှစ် လူဦးရေနှင့်အိမ်အကြောင်းအရာ သန်းခေါင်စာရင်းသည် မြန်မာနိုင်ငံ ရေရှည်ဖွံ့ဖြိုး တိုးတက်ရေးအတွက် မဖြစ်မနေအသုံးပြုရမည့် အရေးပါဆုံးအချက်အလက် အရင်းအမြစ်တစ်ခုဖြစ်ပါကြောင်း၊ နိုင်ငံတော်အတွင်း နယ်ပယ်အလိုက်၊ ကဏ္ဍအလိုက် ဘက်စုံဖွံ့ဖြိုးတိုးတက်ရေးအတွက် လူဦးရေ၊ သန်းခေါင်စာရင်းပါအချက်အလက်များအား ကိုးကားအခြေပြု၍ မူဝါဒများချမှတ်ခြင်း၊ စီမံကိန်းများရေးဆွဲခြင်းတို့ ဆောင်ရွက်ရာတွင် သက်ဆိုင်ရာ ဝန်ကြီးဌာနများအကြား ပူးပေါင်းဆောင်ရွက်မှု အားကောင်းလာစေရန်နှင့် အကောင် အထည်ဖော်မှု၊ သွက်လက်မြန်ဆန်စေရန် လုပ်ငန်းတာဝန်များသတ်မှတ်ပေးခြင်း၊ ကြီးကြပ်ခြင်း၊ တွန်းအားပေးခြင်းကို ဆောင်ရွက်မည့် ကော်မရှင်တစ်ရပ်ဖွဲ့စည်းဆောင်ရွက်ရန် လိုအပ်သည်ဟု သုံးသပ်ရပါကြောင်းအဆိုနှင့်စပ်လျဉ်း၍ ထောက်ခံ ဆွေးနွေးသည်။

 

သာပေါင်းမဲဆန္ဒနယ်မှ ဦးမောင်မောင်စိုးက စာရင်းအင်းအချက်အလက်များ ရရှိခြင်းအားဖြင့် နိုင်ငံတော်ဖွံ့ဖြိုးတိုးတက်ရေးအတွက် အဓိကကျသည့် လိုအပ်သည့်နေရာများတွင် ကျောင်း၊ ဆေးရုံ၊ လမ်း၊ တံတား၊ လျှပ်စစ်နှင့် ရေပေးဝေရေးစီမံကိန်း များကို မှန်ကန်စွာချမှတ်နိုင်ခြင်း၊ နိုင်ငံတော် ဘတ်ဂျက်ကို လိုအပ်ချက်အလိုက် ထိရောက်စွာ ခွဲဝေသုံးစွဲနိုင်ခြင်း၊ ဆင်းရဲနွမ်းပါးမှု လျှော့ချရေးနှင့် လူမှုကာကွယ်စောင့်ရှောက်ရေး အစီအစဉ်များကို ပိုမိုတိကျစွာ ဆောင်ရွက်နိုင်ခြင်း၊ သဘာဝဘေး အန္တရာယ်ကြိုတင်ပြင်ဆင်ရေးနှင့် ပြန်လည်ထူထောင် ရေးအစီအစဉ်များကို ပိုမိုကောင်းမွန်စွာ စီမံနိုင်ခြင်း၊ ရေရှည်အမျိုးသားဖွံ့ဖြိုးတိုးတက်ရေး စီမံကိန်းများကို အချက်အလက်အခြေပြုနည်းလမ်းဖြင့် ရေးဆွဲနိုင်ခြင်း၊ ဒီဂျစ်တယ်အစိုးရ ဖွံ့ဖြိုးတိုးတက်ရေးအတွက် အထောက်အကူရနိုင်ခြင်း၊ ကျန်းမာရေး၊ ပညာရေး၊ အိမ်ရာ၊ လူမှုကာကွယ် စောင့်ရှောက်ရေးနှင့် အခြေခံအဆောက်အအုံ စီမံကိန်းများတွင် အရင်း အမြစ်များကို ပိုမိုထိရောက်စွာ ခွဲဝေသုံးစွဲနိုင်ခြင်း၊ မြို့ပြနှင့် ကျေးလက်ဒေသဖွံ့ဖြိုးရေးအတွက် အသုံးချနိုင်ခြင်း၊ Sustainable Development Goals(SDGs)အကောင်အထည်ဖော်ရာတွင် အထောက်အကူဖြစ် စေခြင်း၊ E-Government နှင့်ချိတ်ဆက်နိုင်သည့် Data စနစ်များ တည်ဆောက်နိုင်ခြင်း၊ AI ၊ GIS နှင့် Big Data နည်းပညာများကို အသုံးပြုလာနိုင်ခြင်း စသည့် အကျိုးကျေးဇူးများ ရရှိလာမည်ဖြစ်သည့် အတွက် အဆိုကိုထောက်ခံပါကြောင်း ဆွေးနွေးသည်။

 

ကျောက်တန်းမဲဆန္ဒနယ်မှ ဦးနိုင်ဝင်းက နိုင်ငံတော်အဆင့် ဦးဆောင်ကော်မရှင်ဖွဲ့စည်းနိုင်ပါ က လူဦးရေ၊ ကျားမ၊ Gender အုပ်စု၊ မသန်စွမ်း အရေအတွက် အိမ်အကြောင်းအရာများ သစ်သား အိမ်၊ တိုက်အိမ်၊ ဝါးတဲအိမ်၊ ဓနိမိုး၊ ထရံကာစသည့် ဖြင့်ကောက်ယူပြီး ကိန်းဂဏန်းများအပေါ် မူတည်၍ ပညာရေး၊ ကျန်းမာရေး၊ လူမှုစီးပွားဘဝဖွံ့ဖြိုးရေး၊ အလုပ်အကိုင်ရှာဖွေရေး၊ ဆင်းရဲမှုလျှော့ချရေး၊ လူငယ်၊ အမျိုးသမီး၊ သက်ကြီးရွယ်အိုစောင့်ရှောက် ရေး၊ သဘာဝပတ်ဝန်းကျင်နှင့်ဆိုင်သော မဟာဗျူ ဟာ၊ နည်းဗျူဟာ(Plan)များ ကောင်းမွန်စွာချမှတ် နိုင်မည်ဖြစ်ပါကြောင်း အဆိုအား ထောက်ခံဆွေးနွေးသည်။

 

ပဲခူးမဲဆန္ဒနယ်မှ ဦးမင်းခန့်ကျော်က နိုင်ငံတိုးတက်လာအောင်၊ လူ့စွမ်းအားအရင်းအမြစ်များ ဖွံ့ဖြိုးလာအောင်၊ အလုပ်အကိုင်များ ရရှိလာအောင် မည်သို့ မဟာဗျူဟာမြောက် အစီအမံများ ရေးဆွဲမည်၊ မည်ကဲ့သို့ အကောင်အထည်ဖော်မည် စသည်ဖြင့် စနစ်တကျပုံဖော်နိုင်မှသာ နိုင်ငံအနာဂတ်ပိုမိုကောင်း မွန်လာမည်ဖြစ်ပါကြောင်း၊ ထို့အတွက် စနစ်တကျ ပုံဖော်နိုင်ရန်အတွက်လည်း သီးခြားဖွဲ့စည်းထားသည့် အဖွဲ့တစ်ဖွဲ့(သို့)ကော်မရှင်တစ်ရပ် လိုအပ်ပါကြောင်း၊ လူဦးရေသန်းခေါင်စာရင်း အချက်အလက်များကို စီမံခန့်ခွဲရန် ဖွဲ့စည်းသည့် နိုင်ငံတော်အဆင့် မဟာဗျူဟာကော်မရှင်သည် လူငယ်ဖွံ့ဖြိုးတိုးတက်ရေးကို ဦးဆောင်မည်ဆိုပါက အချက်အလက်များအခြေပြုကာ အစီအစဉ်များ ရေးဆွဲအကောင်အထည် ဖော်သင့်ပါကြောင်း။

 

မူဝါဒများ ချမှတ်ခြင်း၊ မူဝါဒများ အကောင်အထည်ဖော်ခြင်းတို့မှာ အဖွဲ့အစည်းတစ်ရပ်အနေ ဖြင့် တိတိကျကျတာဝန်ပေးမှသာ ကောင်းမွန်သော အစီအမံများကို ဖော်ထုတ်ဆောင်ရွက်နိုင်မည်ဖြစ်ပါကြောင်း၊ သို့ဖြစ်ပါ၍ တန်ဖိုးရှိလှသော မြန်မာနိုင်ငံ လူဦးရေနှင့် အိမ်အကြောင်းအရာ သန်းခေါင်စာရင်းများမှ ရရှိသော ကိန်းဂဏန်း အချက်အလက်များအား စနစ်တကျထိရောက်စွာ စီမံခန့်ခွဲနိုင်ရန် အမျိုးသား လူဦးရေနှင့် ဖွံ့ဖြိုးတိုးတက်မှုကော်မရှင်တစ်ရပ် ဖွဲ့စည်းရန်အဆိုကို ထောက်ခံပါကြောင်း ဆွေးနွေးသည်။

 

ဗိုလ်တထောင် မဲဆန္ဒနယ်မှ ဦးဉာဏ်ဝင်းထိုက် က လူဦးရေနှင့်အိမ်အကြောင်းအရာ သန်းခေါင် စာရင်းများမှ ကောက်ယူရရှိသော စာရင်းအင်း ကိန်းဂဏန်းအချက်အလက်များကို စနစ်တကျ ထိရောက်စွာစီမံခန့်ခွဲ၍ ပြည်သူများ၏ လူမှုဘဝ ဖွံ့ဖြိုးတိုးတက်မှုနှင့် နိုင်ငံတော်ဖွံ့ဖြိုးတိုးတက်ရေးအတွက် ပိုမိုကျယ်ပြန့်သော မဟာဗျူဟာမြောက် မူဝါဒများ ချမှတ်အကောင်အထည် ဖော်ဆောင်နိုင်ရန် ဌာနစုံမှ လူပုဂ္ဂိုလ်များပါဝင်သော နိုင်ငံတော်အဆင့်ကော်မရှင် တစ်ရပ်ကို ဖွဲ့စည်းဆောင်ရွက်နိုင်မည်ဆိုလျှင် စာရင်း ကောက်ယူမှုမှရရှိထားသည့် ကိန်းဂဏန်း အချက်အလက်များကို ထိရောက်စွာ စီမံခန့်ခွဲပြီး နိုင်ငံတော်၏ မူဝါဒများချမှတ်အသုံးပြုခြင်း၊ ဒေသအလိုက်ဖွံ့ဖြိုးမှု စီမံကိန်းများရေးဆွဲခြင်း၊ ဘတ်ဂျက်နှင့် အရင်းအမြစ်များကို လိုအပ်ချက်အလိုက် ခွဲဝေနိုင်ခြင်း၊ ဆင်းရဲ နွမ်းပါးမှုလျှော့ချရေးနှင့် လူမှုဖူလုံရေးအစီအစဉ်များ ရေးဆွဲခြင်း၊ သဘာဝဘေးအန္တရာယ်နှင့် အရေးပေါ် အခြေအနေများကို ကြိုတင်ပြင်ဆင်ကာကွယ်ရေး အစီအမံများအပြင် နိုင်ငံရေး၊ စီးပွားရေး၊ လူမှုရေး ဆိုင်ရာအတွက် နိုင်ငံ၏မဟာဗျူဟာလုပ်ငန်းစဉ်များ ချမှတ်ရေးဆွဲခြင်းများကို ဆောင်ရွက်နိုင်ပါကြောင်း၊ ပြည်သူများအတွက် အခြေခံကျသည့် အခန်းကဏ္ဍများ မြှင့်တင်ရန်ကိစ္စများကိုလည်း ထိမိအောင် လုပ်ဆောင်နိုင်မည်ဖြစ်ပါကြောင်း၊ ပြည်သူများအတွက် လိုအပ်သည့် အခန်းကဏ္ဍ၊ ပညာရေးမြှင့်တင်မှုကဏ္ဍ၊ ကျန်းမာရေးမြှင့်တင်မှုကဏ္ဍ၊ အိမ်ရာနှင့်မြို့ပြဖွံ့ဖြိုးရေး မြှင့်တင်မှုကဏ္ဍ၊ လူငယ်ရေးရာ ကဏ္ဍများနှင့်စပ်လျဉ်း၍ မူဝါဒရေးဆွဲနိုင်မည်ဖြစ်ပါကြောင်း အဆိုကို ထောက်ခံဆွေးနွေးသည်။

 

ဒဂုံမြို့သစ်(တောင်ပိုင်း) မဲဆန္ဒနယ်မှ ဒေါ်စမ်းစမ်းဌေး က လူဦးရေနှင့် သန်းခေါင်စာရင်း ကောက်ယူခြင်းမှ ရရှိလာသောအချက်အလက်များကို အခြေခံ၍(လူမှုရေး၊ စီးပွားရေး)ကိန်းဂဏန်းများအရ အလုပ်လက်မဲ့လျှော့ချရေး စီမံချက်များ ချမှတ် နိုင်ခြင်း၊ အသေးစား၊ အလတ်စား စီးပွားရေးလုပ်ငန်းများအား ပံ့ပိုးကူညီနိုင်ခြင်းလုပ်ငန်းစဉ်၊ အခြေခံ လူတန်းစားများအတွက် ဆင်းရဲနွမ်းပါးမှုပပျောက်နိုင်ရေး၊ ကုန်ဈေးနှုန်းထိန်းညှိနိုင်ရေး၊ မဟာဗျူဟာ စီမံကိန်းချမှတ်ရန်လိုပါကြောင်း၊ မြန်မာနိုင်ငံ လူဦးရေ၏ ထက်ဝက်ကျော် အမျိုးသမီးများအား စာရင်းဇယားစစ်တမ်းအရ ပညာရေး၊ ကျန်းမာရေး၊ အလုပ်အကိုင်အခွင့်အလမ်းများ တိုးမြှင့်ဆောင်ရွက် ပေးနိုင်သည့်အခါ နိုင်ငံအတွက် လိုအပ်လျက်ရှိသော အခန်းကဏ္ဍများတွင် စွမ်းဆောင်ရည်ပြည့်ဝသော အမျိုးသမီးများ ပိုမိုပါဝင်ဆောင်ရွက်လာနိုင်မည်ဖြစ်သောကြောင့် အဆိုကိုထောက်ခံပါကြောင်း ဆွေးနွေးသည်။

 

ပေါင်းတည် မဲဆန္ဒနယ်မှ ဒေါ်ဆွေဆွေသင်းက ကော်မရှင်တစ်ရပ်ဖွဲ့စည်းနိုင်ပါက ပညာရေးကဏ္ဍ တွင် ကျောင်းနေအရွယ် ကလေးဦးရေ ၊ မူလတန်း၊ အလယ်တန်း၊ အထက်တန်းအရွယ် ကျောင်းသား ဦးရေ၊ ကျောင်းပြင်ပအရွယ်ရောက်နေသော ကလေး ဦးရေ၊ ဆရာ ဆရာမ လိုအပ်ချက်၊ စာသင်ခန်းနှင့် ကျောင်းဆောင်လိုအပ်ချက်တို့ကို စနစ်တကျ ခန့်မှန်း နိုင်မည်ဖြစ်ကြောင်း၊ ကျောင်းအပ်နှံစာရင်းကို အခြေခံထားသည့်အတွက် ကျောင်းနေအရွယ်ကလေး စာရင်းကောက်ယူထားရှိပါက ကျောင်းအပ်နှံရန် ကျန်သူစာရင်းကို အတိအကျသိရှိလျှင် သက်ဆိုင်ရာ ဌာနအဖွဲ့အစည်းများမှ ဝိုင်းဝန်း၍ စာသင်ကျောင်း အရောက်ပို့ခြင်းဖြင့် ကျောင်းနေအရွယ်ကလေး အားလုံး အခြေခံ KG + 9 အခမဲ့သင်ကြားခွင့်ရရှိပြီး ပညာရေးရည်မှန်းချက် အောင်မြင်မည်ဖြစ်ပါကြောင်း။

 

ကျန်းမာရေးကဏ္ဍတွင် မွေးစာရင်း၊ သေစာရင်း အသက်အုပ်စုအလိုက် လူဦးရေ၊ ကိုယ်ဝန်ဆောင်မိခင် ဦးရေ သက်ကြီးရွယ်အိုဦးရေ၊ မသန်စွမ်းသူဦးရေ သိရှိနိုင်ပါက ဆေးရုံ၊ ဆေးခန်း၊ ကျန်းမာရေးဝန်ထမ်းများ ခန့်ထားရေးနှင့် ဆေးဝါးဖြန့်ဖြူးရေးတို့ကို အမှန်တကယ် လိုအပ်သည့်ဒေသများသို့ ထိရောက်စွာ စီမံနိုင်မည်ဖြစ်ပါကြောင်း၊ ထို့ပြင် ကျေးရွာအုပ်စု အလိုက် အိမ်ထောင်စုစာရင်း၊ မွေးစာရင်း၊ သေစာရင်း၊ ပြောင်းရွှေ့ဝင်ထွက်မှုများနှင့် လူဦးရေပြောင်းလဲမှု အခြေအနေများကို စဉ်ဆက်မပြတ် မွမ်းမံထိန်းသိမ်း ထားနိုင်ပါက ပြည်သူ့အုပ်ချုပ်ရေးလုပ်ငန်းများ၊ လူမှုကူညီရေးလုပ်ငန်းများ၊ သဘာဝဘေးအန္တရာယ် စီမံ ခန့်ခွဲရေးလုပ်ငန်းများနှင့် ဒေသဖွံ့ဖြိုးရေးလုပ်ငန်းများတွင် များစွာအကျိုးရှိမည် ဖြစ်ပါကြောင်း။

 

အမျိုးသားလူဦးရေနှင့် ဖွံ့ဖြိုးတိုးတက်မှု လူဦးရေစာရင်းအချက်အလက်များကို စနစ်တကျ ထိန်းသိမ်းခြင်း၊ သက်ဆိုင်ရာဌာနများအကြား ပူးပေါင်းဆောင်ရွက်စေခြင်း၊ လိုအပ်သည့် အချက် အလက်များကို အချိန်နှင့်တစ်ပြေးညီ မွမ်းမံနိုင်စေခြင်း၊ မူဝါဒချမှတ်ရာတွင် အထောက်အကူပြုစေသည့် အစီရင်ခံစာများ ပြုစုတင်ပြခြင်းတို့ကို ဆောင်ရွက် နိုင်မည်ဖြစ်ပါကြောင်း၊ ထိုသို့ ဆောင်ရွက်နိုင်မှသာ လူဦးရေစာရင်းကောက်ယူရာတွင် အသုံးပြုခဲ့သော အချိန်၊ လူအင်အားနှင့် ဘဏ္ဍာငွေတို့၏ အကျိုးကျေးဇူးကို အပြည့်အဝ ရရှိနိုင်မည်ဖြစ်ပါကြောင်း အဆိုနှင့် စပ်လျဉ်း၍ ထောက်ခံဆွေးနွေးသည်။

 

ပင်လောင်းမဲဆန္ဒနယ်မှ ဒေါ်နန်းရီရီဝင်းက အမျိုးသားလူဦးရေနှင့် ဖွံ့ဖြိုးတိုးတက်ရေးကော်မရှင် ကို ဖွဲ့စည်းနိုင်ပါက လူဦးရေပြောင်းလဲမှုများကို အချိန်နှင့်တစ်ပြေးညီ လေ့လာဆန်းစစ်နိုင်မည်ဖြစ်ပြီး ပညာရေး၊ ကျန်းမာရေး၊ အလုပ်အကိုင်၊ အိမ်ရာ၊ လူမှုကာကွယ်စောင့်ရှောက်ရေးနှင့် ဒေသဖွံ့ဖြိုးရေးဆိုင်ရာ မူဝါဒများကို အထောက်အထားအခြေပြု နည်းလမ်းဖြင့် ချမှတ်ဆောင်ရွက်နိုင်မည်ဖြစ်ပါ ကြောင်း၊ ထို့ပြင် ကလေးသူငယ်များ၊ လူငယ်များ၊ အလုပ်လုပ်နိုင်သည့် အသက်အရွယ်ရှိသူများနှင့် သက်ကြီးရွယ်အိုများ၏ အချိုးအစားပြောင်းလဲလာမှုကို ကြိုတင်သုံးသပ်နိုင်ခြင်းကြောင့် ပညာရေး ရင်းနှီးမြှုပ်နှံမှု၊ ကျန်းမာရေးစောင့်ရှောက်မှု၊ အလုပ်အကိုင်ဖန်တီးရေးနှင့် လူမှုဖူလုံရေးစနစ်များကို ရေရှည်မျှော်မှန်းချက်ဖြင့် စီမံဆောင်ရွက်နိုင်မည် ဖြစ်ပါကြောင်း။

 

အထူးသဖြင့် ပြည်သူဗဟိုပြုဖွံ့ဖြိုးတိုးတက်ရေး၊ လူသားအရင်းအမြစ်ဖွံ့ဖြိုးတိုးတက်ရေး၊ အမျိုးသားစီမံကိန်းများရေးဆွဲရေးနှင့် နိုင်ငံတော်၏ ရေရှည်ဖွံ့ဖြိုး တိုးတက်ရေး မျှော်မှန်းချက်များကို အောင်မြင်စွာ အကောင်အထည်ဖော်နိုင်ရေးအတွက် ယခုအဆိုသည် အချိန်နှင့်လျော်ညီပြီး အကျိုးဖြစ်ထွန်းစေမည့် အဆိုတစ်ရပ်ဖြစ်သည်ဟု ယုံကြည်ပါကြောင်း၊ သို့ဖြစ်ပါ၍ နိုင်ငံတော်၏ လူမှုစီးပွားဖွံ့ဖြိုးတိုးတက်ရေး အတွက် မဟာဗျူဟာမြောက်မူဝါဒများ ချမှတ် အကောင်အထည်ဖော်နိုင်ရန် ကော်မရှင်တစ်ရပ်ကို ဖွဲ့စည်းဆောင်ရွက်နိုင်ရေးအဆိုအား ထောက်ခံပါကြောင်း ဆွေးနွေးသည်။

 

ဝေါ မဲဆန္ဒနယ်မှ ဦးအောင်နိုင်က မြန်မာနိုင်ငံသည် လူဦးရေအလွန်အမင်းများပြားသော အိမ်နီးချင်း နိုင်ငံများ၏ အကြားတည်ရှိနေသဖြင့် ကာကွယ်ရေး၊ လုံခြုံရေးနှင့် လူဦးရေဆိုင်ရာစီမံခန့်ခွဲမှု မူဝါဒများကို မဟာဗျူဟာမြောက် ချမှတ်ရန် လိုအပ်ပါကြောင်း၊ ဗဟိုသန်းခေါင်စာရင်းကော်မရှင်သည် စာရင်း ကောက်ယူရေးလုပ်ငန်းစဉ်ကို အဓိကထားဦးတည် သော်လည်း ယခုအဆိုပြုသည့်ကော်မရှင်သည် ရရှိလာသော အချက်အလက်များကို အခြေခံ၍ ရေရှည် အမျိုးသား အကျိုးစီးပွားအတွက် လူဦးရေမူဝါဒများကို မဟာဗျူဟာမြောက် ပြောင်းလဲချမှတ် နိုင်မည်ဖြစ်ပါကြောင်း။

 

ထို့ကြောင့် ဤအဆိုသည် လက်ရှိကာလအတွက် သာမကဘဲ နောင်လာမည့်ဆယ်စုနှစ်များစွာအထိ မိမိတို့နိုင်ငံ၏ စီးပွားရေး၊ လူမှုရေး၊ ပညာရေးနှင့် ကျန်းမာရေးကဏ္ဍများကို သိပ္ပံနည်းကျကျ ကြိုတင် ဗျူဟာခင်း ကာကွယ်ပေးမည့် နိုင်ငံတော်အဆင့် မျှော်မှန်းချက်ကြီးဖြစ်သည့်အတွက် အဆိုအား ထောက်ခံပါကြောင်း ဆွေးနွေးသည်။

 

လှိုင်သာယာ မဲဆန္ဒနယ်မှ ဦးအေးချမ်းက လူဦးရေသန်းခေါင်စာရင်းမှ ရရှိလာသည့်အချက် အလက်များသည် နိုင်ငံတော်မှ ငွေအင်အား၊ လူအင်အား၊ အချိန်အင်အား များစွာသုံးစွဲပြီးမှ ရရှိ လာခြင်းဖြစ်ပါကြောင်း၊ အလွန်အဖိုးတန်လှသော အချက်အလက်များကို စာအုပ်ပေါ်တွင်သာ ရိုက်နှိပ်ထားပြီး အပြင်လက်တွေ့တွင် အသုံးမပြုပါက မိမိတို့ နိုင်ငံသည် ကမ္ဘာ့နိုင်ငံများအလယ်တွင် အစဉ်အမြဲ နောက်ကနေရမည်ဖြစ်ပါကြောင်း အဆိုအား ထောက်ခံ ဆွေးနွေးသည်။

 

ထို့ပြင် တာချီလိတ် မဲဆန္ဒနယ်မှ ဦးကျော်ငြိမ်းအောင်၊ ကျွန်းစု မဲဆန္ဒနယ်မှ ဦးအောင် ကျော်နှင်းနှင့် မှော်ဘီ မဲဆန္ဒနယ်မှ ဒေါက်တာနေလင်း တို့က အဆိုနှင့်စပ်လျဉ်း၍ ထောက်ခံအကြံပြု ဆွေးနွေးကြသည်။

 

ထို့နောက် အဆိုနှင့် စပ်လျဉ်း၍ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ဒုတိယဝန်ကြီး ဦးလင်းဇော်ထွန်းက လူဦးရေဆိုင်ရာမူဝါဒများ ရေးဆွဲရာတွင် မိမိတို့နိုင်ငံအတွက် သင့်လျော်မှုအရှိဆုံး အနေတော် လူဦးရေ၊ မိမိနိုင်ငံ၏ သယံဇာတကြွယ်ဝမှု၊ စီးပွားရေး၊ လူမှုရေး၊ ယဉ်ကျေးမှုအခြေအနေ၊ ပထဝီ ဒေသအလိုက် လူဦးရေပျံ့နှံ့နေထိုင်မှု၊ မိမိနိုင်ငံ၏ လက်ရှိလူဦးရေတိုးနှုန်း၊ မွေးဖွားနှုန်း၊ သေဆုံးနှုန်း၊ ပြောင်းရွှေ့နှုန်း၊ မျှော်မှန်းသက်တမ်းတို့နှင့် အနာဂတ် တွင် ဖြစ်ပေါ်လာနိုင်မည့်အခြေအနေ၊ အိမ်နီးချင်းနိုင်ငံများ၏ လူဦးရေ၊ သိပ်သည်းမှု၊ ပျံ့နှံ့နေထိုင်မှုနှင့် နိုင်ငံတော်လုံခြုံရေးအတွက် ကာကွယ်ရေးအင်အား လိုအပ်ချက်တို့သည်လည်း ထည့်သွင်းစဉ်းစား သုံးသပ်ရမည့်အချက်များ ဖြစ်ပါကြောင်း။

 

ကမ္ဘာ့နိုင်ငံအသီးသီးတွင်လည်း လူဦးရေနှင့် ဖွံ့ဖြိုးတိုးတက်ရေးကို ဟန်ချက်ညီအောင် ထိန်းညှိ ပေးနိုင်မည့် လူဦးရေမူဝါဒများ ချမှတ်အကောင်အထည်ဖော် ဆောင်ရွက်လျက်ရှိသကဲ့သို့ လူဦးရေ မူဝါဒနှင့်ဆက်နွှယ်သည့်အစီအစဉ်များ အကောင်အထည်ဖော် ဆောင်ရွက်လျက်ရှိသည်ကို လေ့လာ တွေ့ရှိရပါကြောင်း။

 

မြန်မာနိုင်ငံ၌ လူဦးရေမူဝါဒရေးဆွဲနိုင်ခြင်း မရှိသေးသော်လည်း လူဦးရေမူဝါဒနှင့် ဆက်နွှယ် သည့် အစီအစဉ်များအဖြစ် မိသားစုစီမံကိန်း ချမှတ်နိုင်ရေး အသိပညာပေးအစီအစဉ်များ၊ သားဆက် ခြားရေး အသိပညာပေးနှင့် ဝန်ဆောင်မှုပေးခြင်း အစီအစဉ်များ၊ ကျား/မ တန်းတူညီမျှမှုရရှိရေး အသိပညာပေးအစီအစဉ်များ၊ သက်ကြီးရွယ်အို ထောက်ပံ့ပေးခြင်း အစီအစဉ်များ၊ ပြည်တွင်းအလုပ် အကိုင်ရရှိရေးနှင့် ပြည်ပနိုင်ငံများသို့ အလုပ်သမား စေလွှတ်ခြင်းဆိုင်ရာ အစီအစဉ်များကို သက်ဆိုင်ရာ ဌာနများက အကောင်အထည်ဖော် ဆောင်ရွက်လျက် ရှိသည်ကို လေ့လာတွေ့ရှိရပါကြောင်း။

 

လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနသည် မြန်မာနိုင်ငံ၏ တိကျမှန်ကန်သော လူဦးရေနှင့် လူမှုစီးပွားဆိုင်ရာ အချက်အလက်များကို အချိန်နှင့်တစ်ပြေးညီ စဉ်ဆက်မပြတ်ရရှိရန်၊ လူဦးရေနှင့် လူမှုစီးပွားဆိုင်ရာပြောင်းလဲမှုများ နှိုင်းယှဉ် လေ့လာ သုတေသနပြုပြီး လိုအပ်သောမူဝါဒ၊ စီမံကိန်း၊ မဟာဗျူဟာ၊ နည်းဗျူဟာများကို ချမှတ်နိုင်ရန်နှင့် နိုင်ငံတော်ဖွံ့ဖြိုးတိုးတက်ရေးအတွက် လိုအပ်သော အညွှန်းကိန်းများရရှိနိုင်ရန်ရည်ရွယ်၍ သန်းခေါင် စာရင်းများကို စဉ်ဆက်မပြတ် ကောက်ယူခဲ့ပါကြောင်း။

 

နောက်ဆုံး သန်းခေါင်စာရင်းအဖြစ် ၂၀၂၄ ခုနှစ်တွင် လူဦးရေနှင့် အိမ်အကြောင်းအရာ သန်းခေါင်စာရင်းကို နေပြည်တော်၊ တိုင်းဒေသကြီး/ပြည်နယ်များတွင် စာရင်းကောက်ယူခဲ့ပါကြောင်း၊ သန်းခေါင်စာရင်းကောက်ယူရာတွင် မြို့နယ်ပေါင်း ၃၃၀ ရှိသည့်အနက် ၁၅၂ မြို့နယ်ကို ရာနှုန်းပြည့် စာရင်းကောက်ယူနိုင်ခဲ့ပါကြောင်း၊ တစ်စိတ်တစ်ဒေသ စာရင်းကောက်ယူနိုင်ခဲ့သော မြို့နယ် ၁၂၀ ရှိပြီး မြို့နယ်လုံးကျွတ်သန်းခေါင်စာရင်း မကောက်ယူနိုင် သည့် မြို့နယ် ၅၈ မြို့နယ်ရှိပါကြောင်း၊ စုစုပေါင်း လူဦးရေ ၅၁ ဒသမ ၃၇ သန်းတွင် ၃၂ ဒသမ ၁၈ သန်းကိုသာ စာရင်းကောက်ယူနိုင်ခဲ့ပြီး ၁၉ ဒသမ ၁၉ သန်းမှာ Earth Remote Sensing (ERS)နည်းပညာ အသုံးပြုခန့်မှန်းထားသော လူဦးရေဖြစ်ပါကြောင်း။

 

တိုင်းဒေသကြီး၊ ပြည်နယ်အလိုက် စာရင်း ကောက်ယူရရှိမှု အခြေအနေကို တင်ပြရမည်ဆိုပါက ရန်ကုန်တိုင်းဒေသကြီး၊ ဧရာဝတီတိုင်းဒေသကြီးနှင့် နေပြည်တော်တို့သည် ၁၀၀ ရာခိုင်နှုန်းနှင့် ပဲခူးတိုင်း ဒေသကြီးသည် ၈၇ ဒသမ ၁ ရာခိုင်နှုန်း၊ မန္တလေး တိုင်းဒေသကြီးသည် ၇၀ ဒသမ ၆ ရာခိုင်နှုန်း၊ မွန်ပြည်နယ်သည် ၇၀ ဒသမ ၂ ရာခိုင်နှုန်းနှင့် ကျန်တိုင်းဒေသကြီး၊ ပြည်နယ်များသည် ၇၀ ရာခိုင် နှုန်းပြည့်မီရန် အနည်းငယ်လိုအပ်သောကြောင့် မူဝါဒရေးဆွဲသူများ၊ စီမံကိန်းရေးဆွဲသူများနှင့် သုတေသီများအတွက် အခြေခံအချက်အလက်များအဖြစ် အသုံးပြုနိုင်သော်လည်း မူဝါဒဆိုင်ရာဆုံးဖြတ်ချက် များချမှတ်ရာတွင် အခြားသောဌာနဆိုင်ရာများမှ အချက်အလက်များနှင့် ပေါင်းစပ်အသုံးပြုသင့်ပါကြောင်း။

 

အမျိုးသားလူဦးရေနှင့် ဖွံ့ဖြိုးတိုးတက်ရေးကော်မရှင်တစ်ရပ်ဖွဲ့စည်း၍ လူမှုဘဝဖွံ့ဖြိုးတိုးတက် ရေးအတွက် မဟာဗျူဟာမြောက် လူဦးရေမူဝါဒများ ချမှတ်အကောင်အထည်ဖော်ရာတွင် တစ်မျိုးသား လုံး လွှမ်းခြုံမှုရှိရမည်ဖြစ်သော်လည်း ၅၈ မြို့နယ် သန်းခေါင်စာရင်း ကောက်ယူရန်ကျန်ရှိနေခြင်း၊ အခြေခံ လိုအပ်သည့် လူဦးရေနှင့် လူမှုစီးပွားဆိုင်ရာအချက် အလက်များသည် အချို့သောတိုင်းဒေသကြီး၊ ပြည်နယ်များတွင် လိုအပ်ချက်များရှိနေသောကြောင့် အမျိုးသားလူဦးရေနှင့် ဖွံ့ဖြိုးတိုးတက်မှုကော်မရှင် ဖွဲ့စည်းရေးအဆိုကို ထောက်ခံပါကြောင်းနှင့် လတ်တလောတွင် အချက်အလက်များပြည့်စုံစွာ မရရှိသေးသောကြောင့် ဖွဲ့စည်းရန်အချိန်အခါ မသင့်သေးသဖြင့် အဆိုအား မှတ်တမ်းတင်ထားသင့်ပါကြောင်း ပြန်လည်ရှင်းလင်းဆွေးနွေးသည်။

 

ယင်းနောက် ပြည်သူ့လွှတ်တော်ဥက္ကဋ္ဌက ကျောင်းကုန်းမဲဆန္ဒနယ်မှ ဒေါက်တာထိန်ဝင်း တင်သွင်းသည့် အဆိုနှင့်စပ်လျဉ်း၍ ယခုတင်သွင်းခဲ့ သည့်အဆိုအပေါ် လွှတ်တော်ကိုယ်စားလှယ်များက အလေးအနက်ထား ထောက်ခံဆွေးနွေးခဲ့ပါကြောင်း၊ တစ်နိုင်ငံလုံးအတိုင်းအတာနှင့် လူဦးရေစာရင်းဇယားများ အမြန်ဆုံးပြည့်စုံအောင် ကြိုးပမ်းဆောင်ရွက်ရန်နှင့် လတ်တလောကာလတွင် အဆိုကို ထောက်ခံကြောင်းနှင့် ဆက်လက်ဆောင်ရွက်သွားမည်ဖြစ်ကြောင်း ကတိဝန်ခံချက်ကို လွှတ်တော်ကမှတ်တမ်းတင် စောင့်ကြည့်သွားမည်ဖြစ်ကြောင်း ကြေညာသည်။

 

ထို့နောက် “နိုင်ငံရေးပါတီများ မှတ်ပုံတင်ခြင်း ဥပဒေကို စတုတ္ထအကြိမ်ပြင်ဆင်သည့် ဥပဒေကြမ်း” ကို ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးခင်မောင်ဦးက လွှတ်တော်သို့တင်သွင်းပြီး ယင်း ဥပဒေကြမ်းနှင့်စပ်လျဉ်း၍ ဥပဒေကြမ်းကော်မတီ အဖွဲ့ဝင် ဦးတင့်လွင်က စိစစ်တွေ့ရှိချက်အစီရင်ခံစာ ကို ဖတ်ကြားရှင်းလင်းသည်။

 

ယင်းနောက် ပြည်သူ့လွှတ်တော်ဥက္ကဋ္ဌက အဆိုပါဥပဒေကြမ်းနှင့်စပ်လျဉ်း၍ ပြင်ဆင်ချက် အဆိုတင်သွင်းလိုသည့် ကိုယ်စားလှယ်ရှိပါက အမည်စာရင်းတင်သွင်းနိုင်ကြောင်း ကြေညာသည်။

 

တတိယအကြိမ် ပြည်သူ့လွှတ်တော် ဒုတိယ ပုံမှန်အစည်းအဝေး ၂၄ ရက်မြောက်နေ့ကို ရပ်နား လိုက်ပြီး အစည်းအဝေး ၂၅ ရက်မြောက်နေ့ကို ဇူလိုင် ၁၇ ရက်တွင် ကျင်းပသွားမည်ဖြစ်ကြောင်း သိရသည်။

 

သတင်းစဉ်