၇ စက်တင်ဘာ 

ရေသောက်နည်းလို့၊ အညောင်းထိုင်တာများလို့ စတဲ့အကြောင်းရင်းတွေကြောင့် ဝမ်းချုပ်ကြတယ်။ ဝမ်းတစ်လုံးမကောင်းတော့လည်း ခေါင်းခဲရ၊ အသားအရေညစ်၊ ဝက်ခြံတွေထွက်တာ လိုမျိုး ခန္ဓာကိုယ်မှာ သက်ရောက်မှုတွေဖြစ်လာနိုင်တော့ ဝမ်းမှန်အောင်ဂရုစိုက်သင့်ပါတယ်။ ဝမ်းပျော့ဆေးကို အလွယ်သောက်ကြပေမယ့် တစ်ကယ်တမ်းက ဆေးကိုအားကိုးတာထက် သဘာဝအလျောက် ဝမ်းမှန်တာပိုကောင်းပါတယ်။ ဒါပေမယ့် ဝမ်းမှန်ဖို့ကြိုးစားနေချိန်မှာ တချို့အစားအစာတွေကြောင့် ဝမ်းချုပ်ခြင်းကို ပိုဆိုးစေနိုင်ပါတယ်။ ဝမ်းချုပ်နေရင် ဒါတွေသိပ်မစားပါနဲ့လို့ အကြံပေးချင်ပါတယ်။

နို့ထွက်ပစ္စည်း

မကြာခဏဝမ်းချုပ်တတ်တယ်ဆိုရင် အစားအသောက်ရွေးတဲ့နေရာမှာ ဂရုစိုက်ပေးပါ။ ဥပမာ ချိစ်နဲ့နွားနို့စားတာများလွန်းရင် ဝမ်းချုပ်တတ်ပါတယ်။ ဒါပေမယ့် နို့ထွက်ပစ္စည်းတွေကို လုံးဝရှောင်စရာမလိုပါဘူး။ ဒီလိုအချိန်မှာ နည်းနည်းလျှော့စားဖို့ပဲလိုတာပါ။ အစာခြေစနစ်အတွက်ကောင်းတဲ့ အကျိုးပြုဘက်တီးရီးယားတွေပါဝင်နေတဲ့ ဒိန်ချဉ်ကိုရွေးချယ်တာကောင်းပါမယ်။

အသင့်အမြန်စား အစားအစာတွေ

အလုပ်တွေများလို့ လမ်းမှာအလွယ်စား၊ ဝယ်စားတတ်တာလား။ ရယ်ဒီမိတ်အစားအစာတွေက အဆင်ပြေလွယ်ကူတယ်၊ အချိန်ကုန်သက်သာတယ်ဆိုပေမယ့် ဆိုးကျိုးတွေကရှိနေပါတယ်။ သူတို့တွေအများစုက အစာခြေစနစ်နဲ့ဝမ်းမှန်စေဖို့အထောက်အကူပြုတဲ့ အမျှင်ဓာတ်တွေနည်းပါးပြီး ကျန်းမာရေးနဲ့မညီတဲ့ အချက်တွေများပါတယ်။

အကြော်အလှော်

ကြက်ကြော်၊ အာလူးကြော်စတဲ့ ဆီကြော်အစားအစာတွေက ဝမ်းချုပ်ခြင်းကိုပိုဆိုးစေနိုင်ပါတယ်။ အကြော်အလှော်တွေက အဆီများပြီး ချေဖျက်ဖို့ခက်ခဲပါတယ်။ ဒီအစားအစာတွေက အူမကြီးထဲရွေ့လျားမှုနှေးစေပြီး သူ့ကို ဝမ်းအဖြစ်စွန့်နိုင်ဖို့ ရေများများသောက်ဖို့လိုပါတယ်။ရေသောက်နည်းရင် ဝမ်းချုပ်ပြီး စမြင်းတုံးဖြစ်စေပါလိမ့်မယ်။

ကြက်ဥ

ကြက်ဥက ပရိုတင်းများတယ်ဆိုပေမယ့် အမျှင်ဓာတ်နည်းပါတယ်။ ဝမ်းချုပ်ချိန်မှာ သူ့ကိုအများကြီးမစားသင့်ပါဘူး။ လုံးဝရှောင်ရမှာမဟုတ်ဘူးနော်။ သူ့ကို အမျှင်ဓာတ်များတဲ့တခြားအစားအစာတွေနဲ့ ရောပြီးစားလို့ရတယ်။

အနီရောင်အသား

ပရိုတင်းနဲ့အဆီပါဝင်မှုများပြီး အမျှင်ဓာတ်မပါတဲ့အတွက် အသီးအရွက်အစားနည်းပြီး အသားစားများသူတွေအတွက် ဝမ်းပိုချုပ်စေပါတယ်။ အသားကို ပန်းဂေါ်ဖီစိမ်းလို အမျှင်ဓာတ်များတဲ့ ဟင်းသီးဟင်းရွက်တွေနဲ့ မျှတအောင်စားရင်တော့ ပြဿနာမရှိပါဘူး။

ပေါင်မုန့်

ပေါင်မုန့်ချည်းပဲစားတာများရင်လည်း ဝမ်းတွေမာကျစ်ပြီး ဝမ်းချုပ်စေနိုင်ပါတယ်။ အမျှင်ဓာတ်နည်းတဲ့ ဂျုံနုပေါင်မုန့်ဆိုရင် ပိုဆိုးတာမို့ အမျှင်ဓာတ်များတဲ့ ဂျုံကြမ်းပေါင်မုန့်တွေကိုရွေးချယ်ပါ။

ကဖင်း

တချို့က ကော်ဖီသောက်လိုက်မှ အိမ်သာသွားရတယ်တဲ့။ ဒါပေမယ့် ဆန့်ကျင်ဘက်သက်ရောက်မှုလည်း ရှိနိုင်ပါတယ်။ ကော်ဖီ၊လက်ဖက်ရည်နဲ့ အားဖြည့်အချိုရည်တွေမှာပါတဲ့ ကဖင်းဓာတ်က များရင် ဝမ်းချုပ်စေနိုင်တယ်။ ဒါ့ကြောင့် ဝမ်းချုပ်နေပြီဆို ကော်ဖီကို တစ်ခွက်ထက်ပိုမသောက်ပါနဲ့။

အရက်

ကော်ဖီလိုပဲ အယ်လ်ကိုဟောကလည်း ခန္ဓာကိုယ်ကို ရေဓာတ်ခန်းခြောက်စေပြီး ဝမ်းပိုချုပ်စေပါတယ်။ အရက်နဲ့ဘီယာမဟုတ်တောင် ဝိုင်နဲ့ကော့တေးတို့လို အယ်လ်ကိုဟောပါတဲ့သောက်စရာတွေသောက်ပြီးရင် ရေများများသောက်ပေးပါ။

ဒီအချက်လေးတွေကို သတိနဲ့ယှဉ်ပြီး စားသောက်နေထိုင်တတ်ရင်တော့ ဝမ်းတစ်လုံးကောင်းပြီး ခေါင်းမခဲစေတော့ပါဘူး။

ရေးသားသူ - Yun Sandi Nan Mon

ဆေးပညာပိုင်းဆိုင်ရာတည်းဖြတ်သူ-  Dr. Thurein Hlaing Win

“ယခုဆောင်းပါးကို Myanmar Digital News ၏ မိတ်ဘက်ဖြစ်သည့် ကျန်းမာရေးနှင့် ဆေးပညာဝက်ဘ်ဆိုဒ် Hello ဆရာဝန် https://hellosayarwon.com မှ ကူးယူဖော်ပြခြင်းဖြစ်ပါသည်”