၁၇ ဒီဇင်ဘာ
မန္တလေးတိုင်း၊ မိတ္ထီလာခရိုင်၊ ဝမ်းတွင်းမြို့နယ်၊ လိပ်တက်ကျေးရွာတွင် မြစိမ်းရောင်ကျေးရွာ စီမံကိန်း အရင်းမပျောက် လည်ပတ်ရန်ပုံငွေဖြင့် တစ်ပိုင်တစ်နိုင် စီးပွားရေးလုပ်ငန်းများကို ၂၀၁၄-၂၀၁၅ ဘဏ္ဍာနှစ်မှစတင်၍ လုပ်ကိုင်ဆောင်ရွက်ခဲ့ကြောင်း သိရသည်။
“မြစိမ်းရောင်ကျေးရွာစီမံကိန်း” ဆိုသည်မှာ စီမံကိန်းဝင်ကျေးရွာတစ်ရွာလျှင် အရင်းမပျောက် လည်ပတ်ရန်ပုံငွေဖြင့် နိုင်ငံတော်ဘတ်ဂျက်မှ ကျပ်သန်း(၃၀)ဖြင့် “မ”တည်ပေးပြီး ကျေးရွာရှိ အိမ်ထောင်စုများအနေဖြင့် လည်ပတ်ရန်ပုံငွေမှ မိမိတို့လုပ်ငန်းများတွင် ဝင်ငွေတိုးပွားစေရန် ဆောင်ရွက်စေပြီး ကျေးရွာကော်မတီမှ သတ်မှတ်သော သင့်လျော်သည့် အတိုးနှုန်းများထည့်ဝင်ခြင်းဖြင့် ရရှိသောအတိုးငွေများမှ မိမိကျေးရွာ ဖွံ့ဖြိုးရေးလုပ်ငန်းများ ဆောင်ရွက်ပေးနေသည့် စီမံကိန်းတစ်ခုဖြစ်သည်။
အဆိုပါလိပ်တက်ကျေးရွာတွင် ၂၀၁၄ ခုနှစ်မှစတင်ပြီး မြစိမ်းရောင်ကျေးရွာစီမံကိန်း အသင်းဝင်မှတ်ပုံတင်၍ ချေးငွေထုတ်ချေးခဲ့ပြီး တစ်ပိုင်တစ်နိုင် စီးပွားရေးလုပ်ငန်းများဖြစ်သည့် မွေးမြူရေး၊ ကုန်ထုတ်လုပ်ငန်း၊ အရောင်းအဝယ်၊ အသက်မွေးဝမ်းကျောင်းလုပ်ငန်းများကို လုပ်ကိုင်လာခဲ့ကြပြီး ကျေးရွာအတွင်းရှိ မိသားစုများအနေဖြင့် အခြားဒေသများသို့ သွားရောက်လုပ်ကိုင်ရန် မလိုအပ်တော့ဘဲ မိမိတို့ကျေးရွာတွင် စီးပွားရေးလုပ်ငန်းများ လုပ်ကိုင်လာနိုင်ခြင်းဖြင့် ကျေးရွာအတွင်းရှိ အလုပ်လက်မဲ့များ ပပျောက်ပြီး မိသားစုအပိုဝင်ငွေများလည်း ရရှိလာခဲ့ပြီဖြစ်ကြောင်း သိရသည်။
ဦးသန်းထိုက်(ကုန်ထုတ်လုပ်ငန်း)လုပ်ကိုင်သူ
ကျွန်တော်တို့ကျေးရွာမှာ ၂၀၁၅-၂၀၁၆ ခုဘဏ္ဍာရေးနှစ်မှာ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ရန်ပုံငွေနဲ့ 11KVA (၁)မိုင် (၁)ဖာလုံ (200 KVA) ထရန်စဖော်မာ (၁)လုံးကို ခွင့်ပြုရန်ပုံငွေ ကျပ်သန်း (၂၇.၃၃၁၅)ဖြင့် အကောင်အထည်ဖော် ဆောင်ရွက်နိုင်ခဲ့ပါတယ်။ ရွာတွင်းလိုင်း (၄၀၀) Volt (၂၇၀၀)ပေအား ကုန်ကျငွေကျပ် (၁၂.၀၀)သန်းဖြင့် ကိုယ်ထူကိုယ်ထ အကောင်အထည်ဖော် ဆောင်ရွက်နိုင်ခဲ့ပါတယ်။ ကျွန်တော်တို့ကျေးရွာမှာ ယခင်က လျှပ်စစ်မီးဆိုတာ စိတ်ကူးယဉ်ဘဝသာ ရှိခဲ့ပါတယ်၊ ယခုလို ၂၀၁၅ ခုနှစ်မှစတင်ပြီး ကျေးရွာမှာ လျှပ်စစ်မီးများ အသုံးပြုနိုင်ခဲ့လို့ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၏ ကျေးဇူးပင် ဖြစ်တယ်။
ဒေါ်ခင်စန်းအေး (ရက်ကန်း-ကုန်ထုတ်လုပ်ငန်းလုပ်ကိုင်သူ)
ကျွန်မတို့မိသားစုဟာ ယခင်က ကိုယ်ပိုင်စီးပွားရေးလုပ်ငန်းလုပ်ရန် စိတ်ကူးခဲ့သော်လည်း မိသားစုအခက်အခဲများကြောင့် လုပ်ဆောင်နိုင်ခြင်းမရှိခဲ့ပါဘူး၊ ယခုအခါ မြစိမ်းရောင် အရင်းမပျောက် လည်ပတ်ရန်ပုံငွေမှ ချေးငွေများရရှိခဲ့ပြီး ရက်ကန်းလုပ်ငန်းကို စီးပွားဖြစ် လုပ်ကိုင်ခဲ့ရာ စီမံကိန်းကာလ (၅)နှစ်တာအတွင်း အကျိုးအမြတ်များစွာ ရရှိခဲ့ပါတယ်။ ယခင်က ကျေးရွာနှင့် (၁)မိုင်ကျော်ဝေးတဲ့ မြို့ပေါ်မှာ အလုပ်လုပ်ကိုင်ခဲ့ရသော်လည်း ယခုအချိန်မှာ ကျေးရွာမှာ ကိုယ်ပိုင်စီးပွားရေးကို အိုးမကွာအိမ်မကွာ လုပ်ကိုင်နိုင်ခဲ့ပါပြီ၊ ကျွန်မတို့မိသားစု စီးပွားရေးအဆင်ပြေရခြင်းမှာ မြစိမ်းရောင်စီမံကိန်းရဲ့ အကျိုးကျေးဇူးပင်ဖြစ်ပါတယ်။ အခြားသောကျေးရွာတွေမှာ မြစိမ်းရောင် ကျေးရွာစီမံကိန်းလုပ်ငန်းတွေ ကျယ်ကျယ်ပြန့်ပြန့် လုပ်ဆောင်ပေးနိုင်မယ်ဆိုရင် ကျေးလက်နေပြည်သူများဘဝ တိုးတက်မြင့်မားလာမှာ ဖြစ်ပါတယ်။
ဒေါ်ညို(နွားမွေးမြူရေး)
အမေတို့မိသားစုက အရင်က အခြားအရပ်မှာ အလုပ်လုပ်ကိုင်ရင်း အသက်မွေးဝမ်းကြောင်း ပြုရပါတယ်။ ရွာမှာ မြစိမ်းရောင်စီမံကိန်း ရောက်ရှိလာတော့ အသင်းဝင်မှတ်ပုံတင်ချေးငွေ ထုတ်ချေးပြီး မွေးမြူရေးလုပ်ငန်း စလုပ်တာ။ အရင်တည်းက ကိုယ်ပိုင်မွေးမြူရေး လုပ်ချင်နေမိခဲ့တာ၊ အခက်အခဲအမျိုမျိုးကြောင့် မလုပ်ဖြစ်ဘူး အခုမှ မြစိမ်းရောင်ကျေးရွာစီမံကိန်းကြောင့် အိုးမကွာအိမ်မကွာ၊ ကျေးရွာမှာပဲ မွေးမြူရေးလုပ်ငန်း လုပ်ကိုင်နိုင်ခဲ့တာပါ။ အမေတို့လို ကျေးရွာတွေ ဖွံ့ဖြိုးတိုးတက်အောင်၊ အလုပ်ကိုင်တွေရရှိအောင် ဆောင်ရွက်ပေးတဲ့ တာဝန်ရှိသူတွေကိုလည်း ကျေးဇူးအများကြီးတင်ပါတယ်၊ ရင်ထဲကနေ မေတ္တာပို့ပေးပါတယ်။
ဒေါ်သန်းသန်းမာ(အသက်မွေးဝမ်းကြောင်း) ဝါး/ထရံလုပ်ငန်း
ကျမတို့မိသားစု အရင်ကတော့ အပိုဝင်ငွေမရှိဘူး၊ အမျိုးသားတစ်ဦးပဲ အလုပ်ရှိတာ၊ ရွာကို မြစိမ်းရောင်စီမံကိန်း ရောက်လာတော့ အသင်းဝင်ပြီး ချေးငွေထုတ်ချေးဖြစ်ခဲ့ပါတယ်၊ ကျေးရွာမှာပဲ ကိုယ်ပိုင်စီးပွားရေးလေး လုပ်ကိုင်ခြင်တာကြောင့် ဝါး/ထရံရောင်းချခြင်းလုပ်ငန်းကို စတင်လုပ်ဖြစ်ခဲ့တာပါ။ ဒီလုပ်ငန်းလုပ်ကိုင်ရတာ အဆင်ပြေပါတယ်။ မိသားစုအပိုဝင်ငွေလဲရတယ်၊ တကယ်ကို တာဝန်ရှိသူတွေကို ကျေးဇူးတင်ပါတယ်၊ ကျေးရွာတွေမှာ မြစိမ်းရောင်စီမံကိန်းများ ကျယ်ကျယ်ပြန့်ပြန့် ဆောင်ရွက်ပေးနိုင်ရင် အလွန်ပင်ကောင်းမွန်ပါတယ်။
မန္တလေးတိုင်းဒေသကြီး၊ မိတ္ထီလာခရိုင်၊ ဝမ်းတွင်းမြို့နယ်အတွင်း ကျေးလက်ဒေသ ဖွံ့ဖြိုးတိုးတက်ရေးဦးစီးဌာမှ အကောင်ထည်ဖော် ဆောင်ရွက်လျက်ရှိသည့် မြစိမ်းရောင်ကျေးရွာစီမံကိန်း အသင်းဝင်ကျေးရွာ (၄၃)ရွာရှိနေပြီး အဆိုပါကျေးရွာများအားလုံးတွင် အလုပ်အကိုင်အခွင့်လမ်းများ ရရှိနေပြီဖြစ်ကာ မိသားစုအပိုဝင်ငွေ ရရှိနေသောကြောင့် မြစိမ်းရောင်၏ အသီးအပွင့်များကို ပြည်သူများ ခံစားနေရပြီဖြစ်ကြောင်း သိရသည်။
ဌေးလှိုင်(ပြန်/ဆက်)
