ရန်ကုန်၊ ၂၀  ဒီဇင်ဘာ

ရန်ကုန်တိုင်းဒေသကြီ သုံးခွမြို့နယ်၊ ညောင်လန်းကုန်းဓာတ်အားခွဲရုံဖွင့်ပွဲကို ဒီဇင်ဘာ ၂၀ ရက် နံနက် ၉ နာရီတွင်ကျင်းပရာ ဝန်ကြီးချုပ် ဦးဖြိုးမင်းသိန်း တက်ရောက်ဖွင့်လှစ်ပေးခဲ့သည်။

အခမ်းအနားတွင် ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ရန်ကုန်တိုင်းဒေသကြီးအစိုးရ၏ ရန်ပုံငွေအသုံးပြု၍ တိုင်းဒေသကြီးအတွင်း တည်ဆောက်ပြီးစီးခဲ့သော 33/11 KV, 5 MVA ဓာတ်အားခွဲရုံသစ်  (၁၃)ရုံ ရှိရာ မြောက်ပိုင်းခရိုင်အတွင်း  ၆ ရုံနှင့် တောင်ပိုင်းခရိုင်အတွင်း(၅)ရုံ ဖွင့်လှစ်ပေးခဲ့ပြီးဖြစ်ကြောင်း၊ ယနေ့ ဖွင့်လှစ်မည့် ညောင်လန်းကုန်းဓာတ်အားခွဲရုံ အပါအဝင် ဓာတ်အားခွဲရုံသစ် ၁၂ ရုံ ဖွင့်လှစ်ပေးနိုင်ခဲ့ပြီးဖြစ်ကြောင်း၊
နိုင်ငံတော်အစိုးရအနေဖြင့် တိုင်းပြည်ဖွံ့ဖြိုးတိုးတက်ရေးအတွက် လမ်းပန်းဆက်သွယ်မှု လုံခြုံချောမွေ့စေရေးနှင့် လျှပ်စစ်ဓာတ်အား တည်ငြိမ်ပြည့်ဝစွာရရှိရေးတို့ကို အဓိကဦးစားပေးဆောင်ရွက်လျက်ရှိကြောင်း ပြောကြားသည်။

ဆက်လက်၍ ဝန်ကြီးချုပ်က သုံးခွမြို့နယ်တွင် ယခင်ဖွင့်လှစ်ပေးခဲ့သည့်  33/11 KV, 5 MVA ဒေါင့်ကြီးဓာတ်အားခွဲရုံအပြင် ယခု ညောင်လန်းကုန်း ဓာတ်အားခွဲရုံ ထပ်မံ ဖွင့်လှစ်ပေးနိုင်ခဲ့သဖြင့် သုံးခွမြို့နယ်အတွင်းရှိ ကျေးရွာပေါင်း ၃၄ ရွာ၊ အိမ်ထောင်စုပေါင်း ၄၄၉၀ စု ဓာတ်အားရရှိမှာဖြစ်​ပြီး လျှပ်စစ်ဓာတ်အား တိုးတက်ရရှိလာသည့်နှင့်အမျှ လူမှုရေး ၊ စီးပွားရေး ၊ ပညာရေး ၊ ကျန်းမာရေး အစရှိသည့်ကဏ္ဍအားလုံးတွင် ဘက်ပေါင်းစုံ ဖွံ့ဖြိုးတိုးတက်လာမည်ဖြစ်ကြောင်း၊ ဒေသခံပြည်သူများ အနေဖြင့် ဓာတ်အားခွဲရုံများ၊ ဓာတ်အားလိုင်းများ၊ ဓာတ်အားဖြန့်ဖြူးရေး ထရန်စဖော်မာများ ရေရှည်ကောင်းမွန်ပြီး မပျက်စီးအောင် ဝိုင်းဝန်းကူညီစောင့်ရှောက်ပေးကြပါရန် မေတ္တာရပ်ခံတိုက်တွန်းလိုပါကြောင်း ပြောကြား
သည်။

ထို့နောက် သုံးခွမြို့နယ်  33/11 kV, 5 MVA  ညောင်လန်းကုန်းဓာတ်အားခွဲရုံ ကမ္ဗည်းကျောက်စာမော်ကွန်း အား  ဝန်ကြီးချုပ် ဦးဖြိုးမင်းသိန်း၊ ရန်ကုန်တိုင်းဒေသကြီး လွှတ်တော်ဥက္ကဋ္ဌ ဦးတင်မောင်ထွန်း ၊ သုံးခွမြို့နယ် အမှတ် (၂) တိုင်းဒေသကြီး လွှတ်တော်ကိုယ်စားလှယ် ဦးမျိုးဆွေတို့က စက်ခလုပ်နှိပ် ဖွင့်လှစ်ပေးပြီး ဓာတ်အားခွဲရုံအတွင်း လှည့်လည်ကြည့်ရှုခဲ့ကြသည်။

ဆန်းကျော်ဦး(ပြန်/ဆက် )